സ്വഛതാ ഹി സേവാ ക്യാമ്പയിൻ ജില്ലാതലത്തിൽ മികച്ച ബ്ലോക്ക് പഞ്ചായത്തായി പേരാമ്പ്ര. മാലിന്യ സംസ്‌കരണ മേഖലയിൽ മികച്ച രീതിയിൽ വിവിധ പ്രവർത്തനങ്ങൾ നടത്തിയാണ് പഞ്ചായത്ത് ഒന്നാം സ്ഥാനത്തിന് അർഹത നേടിയത്. കളക്ടറുടെ ചേമ്പറിൽ നടന്ന ചടങ്ങിൽ ജില്ലാ കളക്ടർ സ്നേഹിൽ കുമാർ സിംഗ് പുരസ്കാരം നൽകി. ബ്ലോക്ക് പഞ്ചായത്ത് പ്രസിഡന്റ് എൻ പി ബാബു, സെക്രട്ടറി പി വി സുജീന്ദ്രൻ, ജിഇഒ എം ആർ ധന്യ, ശുചിത്വമിഷ്യൻ റിസോഴ്സ് പേഴ്സൺ വി പി ഷൈനി എന്നിവർ ചേർന്ന് പുരസ്കാരം ഏറ്റുവാങ്ങി. 

വാരാമ്പറ്റ ഗവ. ഹൈസ്‌കൂളിൽ പുതുതായി ആരംഭിച്ച എസ്.പി.സി യൂണിറ്റിന്റെയും സ്‌കൂൾ സോഷ്യൽ സർവീസ് സ്കീം യൂണിറ്റിന്റെയും ഉദ്ഘാടനം ജില്ലാ കളക്‌ടർ ഡി. ആർ മേഘശ്രീ നിർവഹിച്ചു. പി.ടി.എ പ്രസിഡന്റ് പി.സി മമ്മൂട്ടി അധ്യക്ഷനായി. ജില്ലാ പഞ്ചായത്ത് അംഗം കെ.വിജയൻ, മാനന്തവാടി ബ്ലോക്ക് പഞ്ചായത്ത് വികസനകാര്യ സ്റ്റാൻ്റിങ് കമ്മറ്റി ചെയർപേഴ്‌സൺ  പി.കല്യാണി, എസ്.പി.സി ജില്ലാ അഡീഷണൽ നോഡൽ ഓഫീസർ മോഹൻദാസ്, സ്കൂൾ പ്രധാനാധ്യാപിക കെ.ടി ദിവ്യ, സീനിയർ അസിസ്റ്റന്റ് അബ്ദുൽ ഗഫൂർ, സ്റ്റാഫ് സെക്രട്ടറി പി.മുനീർ, എ.സി.പി.ഒ രഹന, സി.പി.ഒ ടി.കെ അബ്‌ദുൽ സലാം, പി.ടി.എ വൈസ് പ്രസിഡന്റ് പി.എ അസീസ്  എന്നിവർ പങ്കെടുത്തു.

കോട്ടയം: വിവര-പൊതുജനസമ്പർക്ക വകുപ്പിന്റെയും ജില്ലാ ഭരണകൂടത്തിന്റെയും ആഭിമുഖ്യത്തിൽ മലയാള ദിനാഘോഷവും-ഭരണഭാഷ വാരാഘോഷവും വിവിധ പരിപാടികളോടെ സംഘടിപ്പിക്കും.

 ജില്ലാതല ഉദ്ഘാടനം നവംബർ ഒന്ന് (ശനിയാഴ്ച) രാവിലെ 11ന് കളക്ട്രേറ്റ് വിപഞ്ചിക കോൺഫറൻസ് ഹാളിൽ ജില്ലാ കളക്ടർ ചേതൻ കുമാർ മീണ നിർവഹിക്കും. അഡീഷണൽ ജില്ലാ മജിസ്‌ട്രേറ്റ് എസ്. ശ്രീജിത്ത് ചടങ്ങിൽ അധ്യക്ഷനായിരിക്കും.

തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ ബിനു ജോൺ ഭരണഭാഷാ പ്രതിജ്ഞ ചൊല്ലിക്കൊടുക്കും. എഴുത്തുകാരനും മഹാത്മാ ഗാന്ധി സർവകലാശാലാ സ്‌കൂൾ ഓഫ് ലെറ്റേഴ്‌സ് അധ്യാപകനുമായ പ്രഫ. അജു നാരായണൻ മുഖ്യപ്രഭാഷണം നിർവഹിക്കും.

മലപ്പുറം ജില്ലാ മെഡിക്കൽ ഓഫീസർ ഡോ.ആർ.രേണുക നാളെ (വെള്ളി) സർവീസിൽ നിന്ന് വിരമിക്കും. 26 വർഷത്തെ സേവനത്തിന് ശേഷമാണ് ഡി.എം.ഒ. വിരമിക്കുന്നത്.ആരോഗ്യ കുടുംബ ക്ഷേമ രോഗപ്രതിരോധ പ്രവർത്തനങ്ങളിൽ ജില്ലയിൽ മികച്ച നേട്ടം കൈവരിക്കാൻ നേതൃത്വം നൽകിയാണ് ഡോ.രേണുക പടിയിറങ്ങുന്നത്.

2021 നവംബറിലാണ് ഡോ.രേണുക മലപ്പുറം ജില്ലാ മെഡിക്കൽ ഓഫീസറായി നിയമിതയായത്. ജില്ലയിൽ വീട്ടിലെ പ്രസവം ഗണ്യമായി കുറച്ചതിന് സംസ്ഥാന ആരോഗ്യവകുപ്പിന്റെ പുരസ്കാരം ലഭിച്ചിട്ടുണ്ട്. കൂടാതെ നിപ നിയന്ത്രണ പ്രവർത്തനത്തിനും ആരോഗ്യവകുപ്പിന്റെ പ്രശംസ നേടിയിട്ടുണ്ട്. 

വെള്ളമുണ്ട ഗ്രാമപഞ്ചായത്തിന്റെ നേതൃത്വത്തിൽ കുഞ്ഞുതാളം അങ്കണവാടി കലോത്സവം സംഘടിപ്പിച്ചു. വെള്ളമുണ്ട എട്ടേനാൽ സിറ്റി ഓഡിറ്റോറിയത്തിൽ നടന്ന പരിപാടി ജില്ലാ കളക്ടർ ഡി. ആർ മേഘശ്രീ ഉദ്ഘാടനം ചെയ്തു. മികച്ച തലമുറയെ വാർത്തെടുക്കാൻ അങ്കൺവാടി ജീവനക്കാർ വഹിക്കുന്ന പങ്ക് മാതൃകാപരമെന്ന് കളക്ടർ പറഞ്ഞു. പഞ്ചായത്ത്‌ പരിധിയിലെ വിവിധ അങ്കണവാടികളിൽ നിന്നുള്ള കുരുന്നുകൾ  വിവിധ കലാ പരിപാടികൾ അവതരിപ്പിച്ചു.

ഏറനാട് താലൂക്കുതല ഭക്ഷ്യോപദേശക വിജിലന്‍സ് സമിതി യോഗം പെരിന്തല്‍മണ്ണ സബ് കളക്ടര്‍ സാക്ഷി മോഹന്റെ അധ്യക്ഷതയില്‍ ചേര്‍ന്നു. സപ്ലൈകോ, റേഷന്‍കട എന്നിവയിലൂടെ വിതരണം ചെയ്യുന്ന ഭക്ഷ്യധാന്യങ്ങളുടെ ഗുണമേന്മ ഉറപ്പ് വരുത്താന്‍ യോഗത്തില്‍ തീരുമാനിച്ചു.

മലപ്പുറം ഗവ. ടീച്ചര്‍ ട്രെയ്‌നിംഗ് ഇന്‍സ്റ്റിറ്റ്യൂട്ട് 2025-2027 വര്‍ഷത്തേക്കുള്ള ഡി.എല്‍.എഡ് ഉറുദു കോഴ്‌സില്‍ ഒഴിവുള്ള സീറ്റിലേക്ക് നവംബര്‍ ഒന്നിന് രാവിലെ പത്തിന് സ്ഥാപനത്തില്‍ വച്ച് സ്‌പോട്ട് അഡ്മിഷന്‍ നടത്തും. താത്പര്യമുള്ള വിദ്യാര്‍ഥികള്‍ അസ്സല്‍ സര്‍ട്ടിഫിക്കറ്റുകളുമായി അന്നേദിവസം നേരിട്ട് ഹാജരാകണം. ഫോണ്‍-9846304045.

വിജിലന്‍സ് ബോധവത്കരണ വാരവുമായി ബന്ധപ്പെട്ട് ജില്ലയിലെ വിവിധ ഇന്റേണല്‍ വിജിലന്‍സ് ഓഫീസര്‍മാര്‍ക്കായി ബോധവത്കരണ ക്ലാസ് സംഘടിപ്പിച്ചു. എല്‍.എസ്.ജി.ഡി. ജോയിന്റ് ഡയറക്ട്ടര്‍ കാര്യാലയത്തിലെ  കോണ്‍ഫറന്‍സ് ഹാളില്‍  നടന്ന പരിപാടിയില്‍ വിജിലന്‍സ് ഇന്‍സ്പെക്ടര്‍ പി. ജോതിന്ദ്രകുമാര്‍ ബോധവത്ക്കരണ ക്ലാസ് എടുത്തു. വിജിലന്‍സ് ഉദ്യോഗസ്ഥരായ വിക്ടര്‍ ആന്റണി, മധുസൂദനന്‍ എന്നിവര്‍ പങ്കെടുത്തു.

സ്വച്ഛതാ ഹി സേവ ക്യാമ്പയിൻ ശുചിത്വോത്സവം 2025 ൽ മികച്ച പ്രകടനം കാഴ്ചവെച്ച സ്ഥാപനങ്ങൾക്ക് അവാർഡുകൾ വിതരണം ചെയ്തു. ജില്ലാ കളക്ടർ സ്നേഹിൽ കുമാർ സിംഗ് പുരസ്കാരങ്ങൾ വിതരണം ചെയ്തു. ജില്ല കളക്ടറുടെ ചേമ്പറിൽ നടന്ന ചടങ്ങിൽ ശുചിത്വ മിഷൻ ജില്ലാ കോർഡിനേറ്റർ ഇ ടി രാകേഷ് അധ്യക്ഷനായി.

തിരൂര്‍-ചമ്രവട്ടം റോഡില്‍ ആലിങ്ങല്‍ മുതല്‍ ചമ്രവട്ടം വരെയുള്ള ഭാഗത്ത് നവംബര്‍ ഒന്ന് മുതല്‍ ബി.എം.ബി.സി പ്രവൃത്തികള്‍ ആരംഭിക്കുന്നതിനാല്‍ നവംബര്‍ ഒന്ന് മുതല്‍ പ്രവൃത്തി പൂര്‍ത്തിയാകുന്നത് വരെ ഈ റോഡിലൂടെയുള്ള ഗതാഗതം പൂര്‍ണമായും നിരോധിച്ചു. വാഹനങ്ങള്‍ ബി.പി അങ്ങാടി, കുറ്റിപ്പുറം, ആലത്തിയൂര്‍, കൊടക്കല്‍, ആലത്തിയൂര്‍, പള്ളിക്കട്, ആലിങ്ങല്‍, മംഗലം, കാവിലക്കാട് എന്നീ റോഡുകളിലൂടെ പോകണം.