ഉദ്ഘാടനത്തിനൊരുങ്ങി മഞ്ചയില്‍ക്കടവ്

പ്രകൃതി മനോഹാരമായ മണിയൂര്‍ പഞ്ചായത്തില്‍ വിനോദസഞ്ചാര കേന്ദ്രം യാഥാര്‍ത്ഥ്യമാകുന്നു. പതിയാരക്കരയില്‍ വെള്ളത്താല്‍ ചുറ്റപ്പെട്ട മനോഹരമായ മഞ്ചയില്‍ക്കടവിലാണ് മത്സ്യസഞ്ചാരി പദ്ധതിയുടെ ഭാഗമായി വിനോദസഞ്ചാര കേന്ദ്രം ഒരുങ്ങിയത്. ജില്ലാപഞ്ചായത്തും മണിയൂര്‍ ഗ്രാമപ്പഞ്ചായത്തും തൊഴില്‍രഹിതരായ യുവാക്കളെ ഉള്‍പ്പെടുത്തി രൂപംനല്‍കിയ മഞ്ചയില്‍ക്കടവ് അക്വാ ടൂറിസം പദ്ധതി വിനോദസഞ്ചാര വകുപ്പ് മന്ത്രി പി എ മുഹമ്മദ് റിയാസ് ഒക്ടോബര്‍ 19-ന് നാടിന് സമര്‍പ്പിക്കും.

ഒക്ടോബര്‍ 18ന് കോഴിക്കോട്ട് നടക്കുന്ന വിഷന്‍ 2031 പൊതുമരാമത്ത് വകുപ്പ് സെമിനാറില്‍ പങ്കെടുക്കാന്‍ താല്‍പര്യമുള്ളവര്‍ക്ക് ഇന്നുകൂടി (ഒക്ടോബര്‍ 14) രജിസ്റ്റര്‍ ചെയ്യാം. https://share.google/uxUb2OEL6vT9uVInc എന്ന ലിങ്ക് വഴിയാണ് രജിസ്റ്റര്‍ ചെയ്യേണ്ടത്. കേരള സംസ്ഥാനം രൂപംകൊണ്ടതിന്റെ 75ാം വാര്‍ഷികം ആഘോഷിക്കുന്ന 2031ല്‍ കേരളം എങ്ങനെയാകണമെന്ന കാഴ്ചപ്പാട് രൂപീകരിക്കുന്നതിന്റെ ഭാഗമായാണ് സെമിനാര്‍ സംഘടിപ്പിക്കുന്നത്. 

വികസന-ജനക്ഷേമ പ്രവര്‍ത്തനങ്ങള്‍ ജനങ്ങളിലെത്തിച്ചും ഭാവി വികസനത്തിനായുള്ള ആശയങ്ങള്‍ സ്വരൂപിച്ചും അത്തോളി ഗ്രാമപഞ്ചായത്ത് വികസന സദസ്സ്. അത്തോളി ലക്‌സ്‌മോര്‍ കണ്‍വെന്‍ഷന്‍ സെന്ററില്‍ നടന്ന പരിപാടി കെ എം സച്ചിന്‍ദേവ് എംഎല്‍എ ഉദ്ഘാടനം ചെയ്തു. സമാനതകളില്ലാത്ത വികസന മുന്നേറ്റമാണ് കേരളത്തില്‍ നടന്നുകൊണ്ടിരിക്കുന്നതെന്നും കേരളത്തിന്റെ വികസന നയം ജനങ്ങളുടെ വികസന ആശയങ്ങള്‍ കൂടി ഉള്‍പ്പെടുത്തിയാണ് രൂപപ്പെടുത്തുന്നതെന്നും എംഎല്‍എ പറഞ്ഞു. 

മലയോര മേഖലയായ കൂരാച്ചുണ്ടില്‍ സംസ്ഥാന സര്‍ക്കാറും ഗ്രാമപഞ്ചായത്തും നടപ്പാക്കിയ വികസന പ്രവര്‍ത്തനങ്ങള്‍ പങ്കുവെച്ച് വികസന സദസ്സ്. ഗ്രാമപഞ്ചായത്ത് ഹാളില്‍ നടന്ന പരിപാടി ബ്ലോക്ക് പഞ്ചായത്ത് അംഗം അഡ്വ. വി കെ ഹസീന ഉദ്ഘാടനം ചെയ്തു. 

പെരുമണ്ണ വികസന സദസ്സ്

വികസന കാഴ്ചപ്പാടുകളും നേട്ടങ്ങളും മുന്നോട്ടുവെച്ച് പെരുമണ്ണ ഗ്രാമപഞ്ചായത്ത് വികസന സദസ്സ്. വികസന സദസ്സ് പി ടി എ റഹീം എംഎൽഎ ഉദ്ഘാടനം ചെയ്തു.   വിപുലമായ വികസന കാഴ്ചപ്പാട് മുന്നോട്ട് വെച്ച ജില്ലയിലെ പ്രധാന ഗ്രാമപഞ്ചായത്താണ് പെരുമണ്ണയെന്ന് എംഎൽഎ പറഞ്ഞു. അടിസ്ഥാന വികസനങ്ങളുടെ കാര്യത്തിൽ പഞ്ചായത്ത് ഒരുപാട് മുന്നിലാണ്. 

തദ്ദേശ സ്വയംഭരണ വകുപ്പ് മന്ത്രി എം ബി രാജേഷിന്റെ വീഡിയോ സന്ദേശം, പെരുമണ്ണ ഗ്രാമപഞ്ചായത്തിന്റെ ഭരണ നേട്ടങ്ങളുടെ ചിത്രപ്രദർശനം, കെ സ്മാർട്ട് ക്ലിനിക്ക്, എക്സിബിഷൻ എന്നിവയും സദസ്സിന്റെ ഭാഗമായി നടന്നു.

ജില്ലയിൽ 1,78,457 കുട്ടികൾക്ക് തുള്ളി മരുന്ന് നൽകി

പൾസ് പോളിയോ ഇമ്മ്യൂണൈസേഷൻ പരിപാടിയുടെ ഭാഗമായി ജില്ലയിലെ വിവിധ ബൂത്തുകളിലായി 1,78,457 കുട്ടികൾക്ക് തുള്ളി മരുന്ന് നൽകി.  ജില്ലയിൽ അഞ്ച് വയസ്സിന് താഴെയുള്ള 2,06,363 കുട്ടികളാണ് ഉള്ളത്. അതിൽ 86.5 ശതമാനം പേർക്കാണ് ഒന്നാം ദിവസമായ ഞായാഴ്ച പോളിയോ തുള്ളിമരുന്ന് നൽകിയത്. ഇതര സംസ്ഥാന തൊഴിലാളികളുടെ 1117 കുട്ടികളാണ് വാക്സിൻ സ്വീകരിച്ചത്. 

ചാലിയാറിന്റെ ഇരുകരകളിലുമുള്ള പതിനായിരങ്ങളെ ആവേശത്തിന്റെ കൊടുമുടിയിൽ എത്തിച്ച് ഓളപ്പരപ്പിൽ ആവേശത്തിന്റെ തുഴയെറിഞ്ഞ ചാമ്പ്യൻസ് ബോട്ട് ലീഗ് ചാമ്പ്യൻഷിപ്പിൽ വേഗരാജാക്കൻമാരായി
അഴിക്കോടന്‍ അച്ചാം തുരുത്തി. പാലിച്ചോൻ അച്ചാം തുരുത്തി എ ടീമിനെ പിന്നിലാക്കിയാണ് അഴിക്കോടന്‍ അച്ചാം തുരുത്തി ചാമ്പ്യൻസ് ബോട്ട് ലീഗിലെ ജലരാജാക്കൻമാരായത്. 2.27.561 ന് ഫിനിഷ് ചെയ്താണ് അഴിക്കോടന്‍ അച്ചാം തുരുത്തി ഒന്നാം സ്ഥാനം കരസ്ഥമാക്കിയത്. അണിയത്ത് സജിരാജ്, അമരത്ത് കെ പി വിജേഷും വള്ളം നിയന്ത്രിച്ചു. കെ ദീപേഷ് ആയിരുന്നു ടീം മാനേജർ.

പതിനായിരങ്ങളെ ആവേശത്തിന്റ കൊടുമുടിയില്‍ എത്തിച്ച്‌ ചാമ്പ്യന്‍സ്‌ ബോട്ട്‌ ലീഗ് മൂന്നാമത് പതിപ്പിൻ്റെ അഞ്ചാമത് മത്സരം ഫറോക്ക് ചാലിയാർ പുഴയിൽ ഫിനിഷ് ചെയ്തു. അതിവേഗതയോടെ ചാലിയാറിനെ മുറിച്ചു മുന്നോട്ടു കുതിച്ച ചുരുളൻ  വള്ളങ്ങളെ ആർപ്പ് വിളികളോടെയാണ്‌ കാഴ്ചക്കാർ സ്വീകരിച്ചത്. ചാമ്പ്യൻസ് ബോട്ട് ലീഗ് കാണാനെത്തിയവരെ  നേരിൽകണ്ടും വിശേഷം പറഞ്ഞും ടൂറിസം പൊതുമരാമത്ത് വകുപ്പ് മന്ത്രി മുഹമ്മദ് റിയാസ് മത്സര വേദിയിൽ നിറസാന്നിധ്യമായിരുന്നു

ആവേശം നിറച്ച് ചാമ്പ്യൻസ് ബോട്ട് ലീഗ്

ചാലിയാറിലെ ജലജേതാവായി അഴിക്കോടന്‍ അച്ചാം തുരുത്തി