സിവില്‍ സപ്ലൈസ് കോര്‍പറേഷന്റെ ആഭിമുഖ്യത്തില്‍ 'ഓണം ഫെയര്‍ 2025'   കോന്നി സപ്ലൈകോ സൂപ്പര്‍മാര്‍ക്കറ്റില്‍ അഡ്വ. കെ.യു ജനീഷ്‌കുമാര്‍ എംഎല്‍എ  ഉദ്ഘാടനം ചെയ്തു. 
സെപ്തംബര്‍  നാലുവരെയാണ് ഓണം ഫെയര്‍. ഉല്‍പന്നങ്ങള്‍ അഞ്ച് മുതല്‍ 50 ശതമാനം വിലക്കുറവില്‍ ലഭിക്കും. ന്യായ വിലയ്ക്ക് പച്ചക്കറി ലഭ്യമാക്കുന്നതിന് സംസ്ഥാന ഹോര്‍ട്ടികോര്‍പ്പിന്റെ പ്രത്യേക സ്റ്റാളും ക്രമീകരിച്ചിട്ടുണ്ട്.

പന്തളം തെക്കേക്കര ഗ്രാമപഞ്ചായത്തിൽ  അങ്കണവാടി  കലോത്സവം "ഇതളുകൾ" സംഘടിപ്പിച്ചു. തട്ട എസ്.കെ.വി.യു.പി  സ്കൂൾ ഓഡിറ്റോറിയത്തിൽ  ഗ്രാമപഞ്ചായത്ത് പ്രസിഡൻ്റ് എസ് രാജേന്ദ്രപ്രസാദ് കലോത്സവം ഉദ്ഘാടനം ചെയ്തു.  ഗ്രാമപഞ്ചായത്തിൻ്റെ ജനകീയാസൂത്രണം പദ്ധതിയിൽ ഉൾപ്പെടുത്തിയാണ് കലോത്സവം നടത്തിയത്. ഫോക്‌ലോർ അക്കാദമി എക്സിക്യൂട്ടീവ് അംഗം അഡ്വ.സുരേഷ് സോമ കലാപരിപാടി ഉദ്ഘാടനം നിർവഹിച്ചു. വിനോദ് മുളമ്പുഴ മുഖ്യപ്രഭാഷണം നടത്തി. കലോത്സവത്തിൽ പങ്കെടുത്ത  കുട്ടികൾക്ക് മെമന്റോ നൽകി.

സപ്ലൈക്കോ ഓണചന്ത അടൂരിൽ പ്രവർത്തനം ആരംഭിച്ചു. നിയമസഭ ഡെപ്യൂട്ടി സ്പീക്കർ ചിറ്റയം ഗോപകുമാർ  ഉദ്ഘാടനം ചെയ്തു. അടൂർ നഗരസഭാ ചെയർപേർസൻ കെ. മഹേഷ് കുമാർ അധ്യക്ഷനായി. പറക്കോട് ബ്ലോക്ക് പഞ്ചായത്ത് പ്രസിഡൻ്റ് എം.പി. മണിയമ്മ  ആദ്യ വിൽപന നിർവഹിച്ചു. അടൂർ നഗരസഭ കൗൺസിലർമാരായ ഡി. സജി, സംസൺ ഡാനിയൽ, സജു മിഖായേൽ, അനശ്വര രാജൻ, ലിജു മണക്കാല, രാജൻ സുലൈമാൻ,   താലൂക്ക് സപ്ലൈ ഓഫീസർ രാജീവ് എന്നിവർ പങ്കെടുത്തു

പത്തനംതിട്ട ജില്ലാ  ആയുര്‍വേദ ആശുപത്രിക്ക്  ആയുഷ് കായകല്‍പ് കമന്‍ഡേഷന്‍ അവാര്‍ഡ് ലഭിച്ചു . തിരുവനന്തപുരം ജിമ്മി ജോര്‍ജ് ഇന്‍ഡോര്‍ സ്റ്റേഡിയത്തില്‍ നടന്ന പുരസ്‌കാരച്ചടങ്ങില്‍  മന്ത്രി വീണാ ജോര്‍ജില്‍ നിന്നും ജില്ലാ മെഡിക്കല്‍ ഓഫീസര്‍ ഡോ.ജെ. മിനി, ചീഫ് മെഡിക്കല്‍ ഓഫീസര്‍ ഡോ.സൂസന്‍ ബ്രൂണോ, ഡിപിഎം ഡോ. അഖില, മുന്‍ എസ്എംഒ ഡോ.ജി.എല്‍ മഞ്ജു, ഡോ. ശ്രീല, ജില്ലാ പഞ്ചായത്ത് സെക്രട്ടറി ഷെര്‍ല ബീഗം, ജില്ലാ ഡിവിഷന്‍ മെമ്പര്‍ സാറാ തോമസ് എന്നിവര്‍ പുരസ്‌കാരം ഏറ്റുവാങ്ങി.

ഭിന്നശേഷി മേഖലയില്‍ മികച്ച പ്രകടനം കാഴ്ചവച്ചിട്ടുളള വ്യക്തികള്‍, സര്‍ക്കാര്‍/ സര്‍ക്കാരിതര സ്ഥാപനങ്ങള്‍ എന്നിവര്‍ക്കുളള സംസ്ഥാന ഭിന്നശേഷി അവാര്‍ഡിന് 16 വിഭാഗങ്ങളിലേക്ക് നോമിനേഷന്‍ ക്ഷണിച്ചു. അവസാന തീയതി സെപ്റ്റംബര്‍ 15. വെബ് സൈറ്റ് : www.swdkerala.gov.in ഫോണ്‍ : 0468 2325168.

ജില്ലാ മെഡിക്കല്‍ ഓഫീസിലെ വാഹനം ലേലം ക്വട്ടേഷന്‍ ചെയ്ത് വില്‍പ്പന നടത്തിയ ശേഷം 5 വര്‍ഷത്തേക്കു തിരികെ ജില്ലാ മെഡിക്കല്‍ ഓഫീസിന്റെ ഉപയോഗത്തിനു വാടകയ്ക്ക് എടുക്കുന്നതിന് ക്വട്ടേഷന്‍ ക്ഷണിച്ചു. അവസാന തീയതി സെപ്റ്റംബര്‍ 3 രാവിലെ 11 വരെ. ഫോണ്‍ : 0468 2222642. ഇ-മെയില്‍ : dmohpathanamthitta@gmail.com

വെച്ചൂച്ചിറ സര്‍ക്കാര്‍ പോളിടെക്‌നിക് കോളജില്‍ ബയോമെഡിക്കല്‍, കമ്പ്യൂട്ടര്‍, ഇലക്ട്രോണിക്‌സ് എഞ്ചിനീയറിംഗ്  ഡിപ്ലോമ കോഴ്‌സുകളിലെ ഒഴിവുളള സീറ്റുകളിലേക്ക് സെപ്റ്റംബര്‍ 1 മുതല്‍ 15 വരെ ഡിപ്ലോമ റഗുലര്‍ അഡ്മിഷന്‍ നടക്കും.  സമയം രാവിലെ 9 മുതല്‍ വൈകിട്ട് 3 വരെ. റാങ്ക് ലിസ്റ്റില്‍ ഉള്‍പ്പെട്ട എല്ലാവര്‍ക്കും പങ്കെടുക്കാം. വെബ്സൈറ്റ് :  www.polyadmission.org ,   ഫോണ്‍ : 04735 266671.
 

ജില്ലാ വികസന സമിതി യോഗം കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്നു. തിരുവല്ല ബൈപാസിലെ തെരുവ് വിളക്കു പ്രവര്‍ത്തനക്ഷമമാക്കുന്നതിന് പൊതുമരാമത്തും നഗരസഭയും സംയുക്ത പരിശോധന നടത്തണമെന്ന് അഡ്വ മാത്യു ടി തോമസ് എംഎല്‍എ യോഗത്തില്‍ പറഞ്ഞു. ഹൈമാസ്റ്റ് ലൈറ്റ് സ്ഥാപിക്കാന്‍ അനുമതി ലഭിച്ചയിടങ്ങളില്‍ പ്രവര്‍ത്തി വേഗത്തിലാക്കണം. പെരിങ്ങര പഞ്ചായത്തിലെ മുന്നൊന്നില്‍ പടിതോട്ടിലെ പെരിഞ്ചാന്‍തറ, ആലുംമൂട്ടില്‍പടി എന്നിവിടങ്ങളിലെ സര്‍വെ നടപടി പൂര്‍ത്തിയാക്കണമെന്നും എംഎല്‍എ പറഞ്ഞു.

പള്ളിക്കല്‍ സര്‍ക്കാര്‍ മാതൃകാ ഹോമിയോപ്പതി ഡിസ്‌പെന്‍സറിക്ക് എന്‍.എ.ബി.എച്ച് എന്‍ട്രിലെവല്‍ സര്‍ട്ടിഫിക്കേഷനും കേരള ആയുഷ് കായകല്‍പ അവാര്‍ഡും ലഭിച്ചു. തിരുവനന്തപുരത്തു സംഘടിപ്പിച്ച പുരസ്‌കാരദാനചടങ്ങില്‍ ഗ്രാമപഞ്ചായത്ത് പ്രസിഡന്റ് സുശീലകുഞ്ഞമ്മകുറുപ്പ്, ഹോമിയോപ്പതിവകുപ്പ് ജില്ലാ മെഡിക്കല്‍ ഓഫീസര്‍ ഡോ.ഡി. ബിജുകുമാര്‍, സ്‌റ്റേറ്റ് ക്വാളിറ്റി നോഡല്‍ ഓഫീസര്‍ ഡോ.ആര്‍. രജികുമാര്‍ എന്നിവരടങ്ങിയ സംഘം ആരോഗ്യവകുപ്പ് മന്ത്രി വീണാ ജോര്‍ജില്‍ നിന്നും അവാര്‍ഡ് ഏറ്റുവാങ്ങി.

'ഇ സമൃദ്ധ' സംസ്ഥാനതല ഉദ്ഘാടനം മന്ത്രി ജെ. ചിഞ്ചു റാണി നിര്‍വഹിച്ചു

മൃഗങ്ങളുടെ ആരോഗ്യ പരിപാലനം, രോഗപ്രതിരോധം, കര്‍ഷകരെ ശാക്തീകരിക്കുക എന്നിവ ലക്ഷ്യമിട്ട് വകുപ്പ് ആരംഭിച്ച ഇ സമൃദ്ധയിലൂടെ ക്ഷീരകര്‍ഷകര്‍ക്ക് ആവശ്യമായ സേവനം വിരല്‍ത്തുമ്പില്‍ ലഭ്യമാകുമെന്ന് മൃഗസംരക്ഷണ-ക്ഷീരവികസന വകുപ്പ് മന്ത്രി ജെ. ചിഞ്ചു റാണി. സംസ്ഥാന മൃഗസംരക്ഷണ വകുപ്പിന്റെ ഇ-സമൃദ്ധ പദ്ധതിയുടെ സംസ്ഥാനതല ഉദ്ഘാടനം അടൂര്‍ ഓള്‍ സെയിന്റ്സ് സ്‌കൂള്‍ ഓഡിറ്റോറിയത്തില്‍ നിര്‍വഹിക്കുകയായിരുന്നു മന്ത്രി.