ആലപ്പുഴ ജില്ലാ പഞ്ചായത്ത് 2025-26 പദ്ധതി നിർവഹണത്തിന്റെ ഭാഗമായി ജില്ലാ ജാഗ്രത സമിതി ഓഫീസിൽ താൽക്കാലികാടിസ്ഥാനത്തിൽ ജില്ലാ ജാഗ്രത സമിതി കൗൺസലർ (ഒരു ഒഴിവ്) നിയമനത്തിന് അപേക്ഷ ക്ഷണിച്ചു. 21,000 രൂപയാണ് പ്രതിമാസ ശമ്പളം. സോഷ്യൽ വർക്ക്, സൈക്കോളജി, സോഷ്യോളജി എന്നിവയിൽ ഏതെങ്കിലും വിഷയത്തിൽ ബിരുദാനന്തര ബിരുദവും രണ്ടുവർഷത്തിൽ കുറയാത്ത  പ്രവർത്തിപരിചയവും കൗൺസിലിംഗിൽ ഡിപ്ലോമയുമുള്ള (അധിക യോഗ്യത) വനിതകൾക്കാണ് അവസരം. 25നും 35നുമിടയിൽ പ്രായമുള്ള ആലപ്പുഴ ജില്ലയിൽ സ്ഥിര താമസക്കാരായവർക്ക് അപേക്ഷിക്കാം.

വിജ്ഞാന കേരളം പദ്ധതിയുടെ ഭാഗമായി ആഗസ്റ്റ് 29,30 തീയതികളിൽ എറണാകുളത്ത് നടക്കുന്ന സ്കിൽ സമ്മിറ്റിന് മുന്നോടിയായി സംഘടിപ്പിച്ച കോൺക്ലേവ് 'വിജ്ഞാന ആലപ്പുഴ സ്കില്ലിംഗ് ഇനിഷ്യേറ്റീവ് 2025' ഫിഷറീസ്, സാംസ്കാരികവകുപ്പ് മന്ത്രി സജി ചെറിയാൻ ഉദ്ഘാടനം ചെയ്തു. ആലപ്പുഴ എസ് ഡി കോളേജ് ഗോൾഡൻ ജൂബിലി ഹാളിൽ നടന്ന ചടങ്ങിൽ എച്ച് സലാം എംഎൽഎ അധ്യക്ഷനായി. 

വനിതാ ശിശു വികസന വകുപ്പിന് കീഴിൽ ചെങ്ങന്നൂർ ഐസിഡിഎസ് പ്രൊജക്ട് പരിധിയില്‍പ്പെടുന്ന ചെറിയനാട്, മുളക്കുഴ, ചെങ്ങന്നൂർ മുനിസിപ്പാലിറ്റി എന്നിവിടങ്ങളിലെ 174   അങ്കണവാടികളിൽ 2025-26 വർഷത്തേക്ക്  മുട്ട, പാല്‍ എന്നിവ വിതരണം ചെയ്യുന്നതിന് ടെന്‍ഡര്‍ ക്ഷണിച്ചു. സെപ്റ്റംബർ ഒന്നിന് ഉച്ചക്ക് 1മണിവരെ  ടെന്‍ഡര്‍ സ്വീകരിക്കും.  ഫോൺ 04792452914.
(പിആര്‍/എഎല്‍പി/2554)

നാഷണൽ ഇൻസ്റ്റിറ്റ്യൂട്ട് ഓഫ് മെന്റൽ ഹെൽത്ത് ആന്റ് ന്യൂറോ സയൻസിന്റെ ആഭിമുഖ്യത്തിൽ ദേശീയ മാനസികാരോഗ്യ സർവെയുമായി ബന്ധപ്പെട്ട് ആലപ്പുഴ മെഡിക്കൽ കോളേജിലെ സൈക്യാട്രി വിഭാഗത്തിലെ വിവിധ തസ്തികളിലേക്ക് കരാർ അടിസ്ഥാനത്തിൽ നിയമനം നടത്തുന്നു. എൻഎംഎച്ച്എസ് - 2 സർവെ കോ ഓർഡിനേറ്റേർ( 1 ഒഴിവ്), എൻഎംഎച്ച്എസ് - 2 ഫീൽഡ് ഡേറ്റ കളക്‌ടർ(9 ഒഴിവുകൾ) എന്നീ തസ്തികകളിലേക്കാണ് നിയമനം. താൽപ്പര്യമുളള ഉദ്യോഗാർഥികൾ പ്രായം, വിദ്യാഭ്യാസ യോഗ്യത, പ്രവൃത്തിപരിചയം എന്നിവ തെളിയിക്കുന്ന അസ്സൽ സർട്ടിഫിക്കറ്റുകൾ സഹിതം സെപ്റ്റംബർ 10 ന് രാവിലെ 11 മണിക്ക് മെഡിക്കൽ കോളേജ് പ്രിൻസിപ്പൽ ഓഫീസിൽ എത്തണം. 

സംസ്ഥാന സർക്കാരിന്റെ വിജ്ഞാന കേരളം പദ്ധതിയുടെ ഭാഗമായി സംഘടിപ്പിക്കുന്ന മൈക്രോ തൊഴിൽമേള നാളെ (ആഗസ്റ്റ് 27 ന്) പി പി ചിത്തരഞ്ജൻ എംഎൽഎ ഉദ്ഘാടനം ചെയ്യും. രാവിലെ 9.30 ന് ചെറിയ കലവൂരിലെ അസാപ് കമ്മ്യൂണിറ്റി സ്കിൽ പാർക്കിൽ നടക്കുന്ന ചടങ്ങിൽ ജില്ലാ പഞ്ചായത്ത് പ്രസിഡൻ്റ് കെ ജി രാജേശ്വരി അധ്യക്ഷയാകും. 

സംസ്ഥാന യുവജനക്ഷേമ ബോർഡ് 2024ലെ സ്വാമി വിവേകാനന്ദൻ യുവപ്രതിഭാ പുരസ്‌കാരത്തിന് നിശ്ചിത ഫോറത്തിൽ നാമനിർദ്ദേശം ക്ഷണിച്ചു. വ്യക്തിഗത പുരസ്ക്കാരത്തിന് അതത് മേഖലകളിലെ 18നും 40നും ഇടയിൽ പ്രായമുള്ള യുവജനങ്ങളെ നാമനിർദ്ദേശം ചെയ്യാം. സാമൂഹ്യപ്രവർത്തനം, മാധ്യമപ്രവർത്തനം (പ്രിൻ്റ് മീഡിയ), മാധ്യമ പ്രവർത്തനം (ദൃശ്യമാധ്യമം), കല, സാഹിത്യം, കായികം (വനിത), കായികം (പുരുഷൻ), സംരംഭകത്വം, കൃഷി എന്നീ മേഖലകളിൽ നിന്നും മികച്ച ഓരോ വ്യക്തിക്കുവീതം ആകെ ഒമ്പത് പേർക്കാണ് പുരസ്കാരം നൽകുന്നത്. സ്വയം അപേക്ഷ സമർപ്പിക്കാൻ കഴിയില്ല. അതത് മേഖലകളുമായി ബന്ധപ്പെട്ട ഏതൊരാൾക്കും മറ്റൊരാളെ നാമനിർദ്ദേശം ചെയ്യാം.

പ്രിയ മാധ്യമ സുഹൃത്തുക്കളെ,

71 -ാമത് നെഹ്റു ട്രോഫി വള്ളംകളിയുമായി ബന്ധപ്പെട്ട് ജില്ലാ കളക്ടർ അലക്സ് വർഗീസ് ഐ എ എസ് നടത്തുന്ന പത്രസമ്മേളനം നാളെ ആഗസ്റ്റ് 26 ന് രാവിലെ 11 30ന്  ഹോട്ടൽ അർക്കാഡിയ റീജൻസിയിൽ വെച്ച് നടക്കും. എല്ലാ മാധ്യമ പ്രതിനിധികളെയും പത്രസമ്മേളനത്തിലേക്ക് ക്ഷണിക്കുന്നു.

ജില്ലാ ഇൻഫർമേഷൻ ഓഫീസർ

ഓച്ചിറ ക്ഷീരോൽപ്പന്ന നിർമ്മാണ പരിശീലന വികസന കേന്ദ്രത്തിൽ സെപ്റ്റംബർ ഒമ്പത് മുതൽ 20 വരെ ക്ഷീരോൽപന്ന നിർമ്മാണ പരിശീലന പരിപാടി സംഘടിപ്പിക്കുന്നു. താൽപ്പര്യമുള്ള ക്ഷീരകർഷകർക്കും സംരംഭകർക്കും ഓച്ചിറ ക്ഷീരപരിശീലനകേന്ദ്രം വഴി നേരിട്ടോ ആലപ്പുഴ, കൊല്ലം ഡെപ്യൂട്ടി ഡയറക്ടർമാർ, അതത് ബ്ലോക്ക് ക്ഷീരവികസന ഓഫീസർമാർ മുഖാന്തരമോ രജിസ്റ്റർ ചെയ്യാം. ആദ്യം രജിസ്റ്റർ ചെയ്യുന്ന 25 പേർക്കാണ് പങ്കെടുക്കാൻ അവസരം. പരിശീലനാർഥികൾ സെപ്റ്റംബർ എട്ടിന് വൈകുന്നേരം അഞ്ച് മണിക്ക് മുമ്പ് 8089391209, 0476 2698550 എന്നീ ഫോൺ നമ്പറുകളിൽ ബന്ധപ്പെട്ട് പേര് രജിസ്റ്റർ ചെയ്യണം. ഏതെങ്കിലും തിരിച്ചറിയൽ രേഖയുടെ പകർപ്പ് കൊണ്ടുവരണം.

ആലപ്പുഴ ജില്ലയിലെ തോട്ടപ്പള്ളി കോസ്റ്റല്‍ പൊലീസ് സ്‌റ്റേഷനിലെ ഇന്റര്‍സെപ്റ്റര്‍ ബോട്ടിന്റെ പുനര്‍ലേലം ആഗസ്റ്റ് 27 ന് രാവിലെ 11 മണി മുതല്‍ 4.30 വരെ  MSTC Ltd ന്റെ വെബ്‌സൈറ്റ് മുഖേന ഓണ്‍ലൈനായി നടത്തും. കൂടുതല്‍ വിവരങ്ങള്‍ക്ക് ഫോണ്‍-04772239326
(പിആര്‍/എഎല്‍പി/2549)

അമ്പലപ്പുഴ താലൂക്കിൽ പഴവീട് വില്ലേജിൽ അപകടകരമാംവിധം നിന്നിരുന്ന അക്കേഷ്യ, മാവ് എന്നിവ മുറിച്ചുമാറ്റിയ തടികള്‍ ലേലം ചെയ്യുന്നു.  ആഗസ്റ്റ് 29 ന്  രാവിലെ 11.30 ന് പഴവീട് വില്ലേജ് ഓഫീസിലാണ് പരസ്യ ലേലം. കൂടുതല്‍ വിവരങ്ങള്‍ക്ക് ഫോൺ : 0477 2253771
(പിആര്‍/എഎല്‍പി/2548)