ഐഎച്ച്ആര്‍ഡിയുടെ കീഴില്‍ പ്രവര്‍ത്തിക്കുന്ന മോഡല്‍ പോളിടെക്‌നിക്ക് കോളജുകളില്‍ ത്രിവത്സര എന്‍ജിനീയറിംഗ് ഡിപ്ലോമ കോഴ്‌സുകളില്‍ പ്രവേശനത്തിന് അപേക്ഷ ക്ഷണിച്ചു. ഈ മാസം 30ന് വൈകിട്ട് അഞ്ച് വരെ www.ihrdmptc.org എന്ന അഡ്മിഷന്‍ പോര്‍ട്ടല്‍ വഴി അപേക്ഷ സമര്‍പ്പിക്കാം. അപേക്ഷയുടെ പ്രിന്റ്ഔട്ടും ആവശ്യമായ രേഖകളും 200 രൂപയുടെ ഡിഡിയും സഹിതം (എസ്.സി/എസ്.റ്റി വിഭാഗത്തിന് 100 രൂപ) ജൂണ്‍ മൂന്നിന് വൈകിട്ട് നാലിന് മുമ്പ് പ്രവേശനം ആഗ്രഹിക്കുന്ന കോളജില്‍ നല്‍കണം. കൂടുതല്‍ വിവരം അഡ്മിഷന്‍ പോര്‍ട്ടലില്‍ ലഭ്യമാണ്.                   (പിഎന്‍പി 1124/19)

മഞ്ചേരി സബ്ബ് സ്റ്റേഷനില്‍  നവീകരണ പ്രവൃത്തികള്‍ നടക്കുന്നതിനാല്‍   മേയ് 12 രാവിലെ എട്ടു മുതല്‍  വൈകീട്ട് മൂന്നു വരെ കാവനൂര്‍, മഞ്ചേരി ടൗണ്‍, തൃക്കലങ്ങോട്, എന്നീ 11 കെ.വി  ഫീഡറുകളില്‍ വൈദ്യുതി വിതരണം ഉണ്ടായിരിക്കുന്നതല്ല.
മലപ്പുറം ഈസ്റ്റ് സെക്ഷന്‍ പരിധിയില്‍ കോട്ടപ്പടി, തിരൂര്‍ റോഡ്, കോഴിക്കോട് റോഡ് ഭാഗങ്ങളില്‍ മേയ് 12 പകല്‍ ഒന്‍പതു മുതല്‍ വൈകുന്നേരം അഞ്ചുവരെ വൈദ്യുതി മുടങ്ങും.

മുതുവല്ലൂര്‍ ഗ്രാമ പഞ്ചായത്തില്‍ ആരോഗ്യ ജാഗ്രത പരിപാടിയുടെ ഭാഗമായി പഞ്ചായത്ത് തല സെമിനാര്‍ നടത്തി. ഗ്രാമ പഞ്ചായത്ത് പ്രസിഡന്റ് കെ.എ.സഗീര്‍ ഉദ്ഘാടനം ചെയ്തു.

മൃഗസംരക്ഷണ വകുപ്പിന്റെ ആഭിമുഖ്യത്തില്‍ മലമ്പുഴ മൃഗസംരക്ഷണ   പരിശീലനകേന്ദ്രത്തില്‍  മെയ് 16, 17, 18 തിയ്യതികളില്‍ പശു വളര്‍ത്തലില്‍ സൗജന്യ പരിശീലനം സംഘടിപ്പിക്കുന്നു.  താല്‍പര്യമുളളവര്‍ നേരിട്ടോ ഫോണ്‍ മുഖേനയോ മുന്‍കൂട്ടി പേര് രജിസ്റ്റര്‍ ചെയ്യണം. ഫോണ്‍ നമ്പര്‍   0491 - 2815454.

ജില്ലയില്‍ ഏകജാലക സംവിധാനത്തിലൂടെ പ്ലസ് വണ്‍ അഡ്മിഷന് അപേക്ഷിക്കുന്ന ഐ.ഇ.ഡി വിദ്യാര്‍ഥികള്‍ക്കുള്ള മെഡിക്കല്‍ കൗണ്‍സിലിങ് മെയ് 13 (വണ്ടൂര്‍ വിദ്യാഭ്യാസ ജില്ല), മെയ് 14 (തിരൂര്‍, തിരൂരങ്ങാടി വിദ്യാഭ്യാസ ജില്ല), മെയ് 15 (മലപ്പുറം വിദ്യാഭ്യാസ ജില്ല) തീയ്യതികളില്‍ കോട്ടക്കല്‍ ഗവ. രാജാസ് ഹയര്‍ സെക്കന്‍ഡറി സ്‌കൂളില്‍ നടക്കും.   അര്‍ഹരായ വിദ്യാര്‍ഥികള്‍ അസ്സല്‍ സര്‍ട്ടിഫിക്കറ്റുകള്‍ സഹിതം രക്ഷിതാവിനൊപ്പം രാവിലെ 10ന് എത്തണം.

വണ്ടൂരിലെ പട്ടികജാതി വിഭാഗം പെണ്‍കുട്ടികള്‍ക്കായുള്ള പ്രീ-മെട്രിക് ഹോസ്റ്റലില്‍ ഒഴിവുള്ള അഞ്ച് മുതല്‍ 10 വരെ ക്ലാസുകളില്‍ പഠിക്കുന്ന വിദ്യാര്‍ഥിനികളില്‍ നിന്നും ഹോസ്റ്റല്‍ പ്രവേശനത്തിന് അപേക്ഷ ക്ഷണിച്ചു. മാര്‍ച്ച് മാസ പരീക്ഷയുടെ മാര്‍ക്ക് ലിസ്റ്റ്, സ്വഭാവ സര്‍ട്ടിഫിക്കറ്റ്, ജാതി, ജനന തിയ്യതി എന്നിവ തെളിയിക്കുന്ന സര്‍ട്ടിഫിക്കറ്റ് സഹിതം മെയ് 25നകം വണ്ടൂര്‍ ബ്ലോക്ക് പട്ടികജാതി വികസന ഓഫീസര്‍ക്ക് അപേക്ഷ നല്‍കണം.  വിവരങ്ങള്‍ക്കും അപേക്ഷാ ഫോറത്തിനും വണ്ടൂര്‍ ബ്ലോക്ക് പട്ടികജാതി വികസന ഓഫീസുമായി ബന്ധപ്പെടാം.  ഫോണ്‍  8547630137.