ലോകസഭ തെരഞ്ഞെടുപ്പുമായി ബന്ധപ്പെട്ട് ജില്ലയിലെ മലപ്പുറം, പൊന്നാനി മണ്ഡങ്ങളില്‍ നിന്നായി വിവിധ സ്‌ക്വാഡുകള്‍ പിടിച്ചെടുത്തത് 1.62 കോടി രൂപ. വോട്ടര്‍മാരെ സ്വാധീനിക്കുന്ന തരത്തില്‍ അനധികൃത പണമൊഴുക്ക് തടയുന്നതിനായി രൂപീകരിച്ച സ്റ്റാറ്റിക് സര്‍വെയലന്‍സ്, ഫ്ളയിങ്ങ് സ്‌ക്വാഡുകള്‍ എന്നിവ പിടിച്ചെടുത്ത തുകയാണിത്. മലപ്പുറം ലോകസഭാ മണ്ഡലത്തില്‍ നിന്ന് 1.18 കോടി രൂപയും പൊന്നാനി ലോകസഭാ മണ്ഡലത്തില്‍ നിന്ന്  43.2 ലക്ഷവുമാണ് സംഘം പിടികൂടിയത്.

പ്രമുഖ ചരിത്രകാരന്‍ ഡോ.കെ.എന്‍ ഗണേഷ് നടത്തുന്ന ചരിത്രരചനയും മതസമുദായങ്ങളും പ്രഭാഷണം ഇന്ന് (27) രാവിലെ 10.30 ന് കൊണ്ടോട്ടി മഹാകവി മോയിന്‍കുട്ടി വൈദ്യര്‍ അക്കാദമിയില്‍ നടക്കും. ചരിത്രകാരനും നൂറോളം ഗ്രന്ഥങ്ങളുടെ രചയിതാവും  മഹത്തായ മാപ്പിള സാഹിത്യ പാരമ്പര്യം എന്ന കൃതിയുടെ സഹകര്‍ത്താവുമായ കെ.കെ മുഹമ്മദ് അബ്ദുല്‍ കരീം സ്മാരക പ്രഭാഷണമാണ് മഹാകവി മോയിന്‍കുട്ടി വൈദ്യര്‍ മാപ്പിള കലാ അക്കാദമി സംഘടിപ്പിച്ചിരിക്കുന്നത്. 2005 ഏപ്രിലില്‍ അന്തരിച്ച അദ്ദേഹത്തിന്റെ സ്മാരകമായാണ് അക്കാദമിയിലെ അറബി മലയാളം റിസര്‍ച്ച് ലൈബ്രറി പ്രവര്‍ത്തിക്കുന്നത്.

    എച്ച്.ഐ.വി നിയന്ത്രണ പരിപാടികള്‍ ഫലപ്രദമായി നടപ്പാക്കുന്നതിനും ഏകോപനത്തിനുമായി രൂപീകരിച്ച സ്റ്റിയറിങ് കമ്മിറ്റിയുടെ അവലോകന യോഗം ഏപ്രില്‍ 29 രാവിലെ 10.30ന് കലക്ടറുടെ ചേമ്പറില്‍ ചേരും.

    പള്ളിക്കല്‍ ഗ്രാമ പഞ്ചായത്തിലെ വിവിധ എസ്.സി കോളനികളിലും വാഴയൂര്‍ ഗ്രാമ പഞ്ചായത്തിലെ കാരാട് ഇ.എം.എസ് സ്റ്റേഡിയത്തിലും കുഴിമണ്ണ ഗ്രാമ പഞ്ചായത്തിലെ കോതൊടി എസ്.സി കോളനിയിലും തൃക്കലങ്ങോട് ഗ്രാമ പഞ്ചായത്തിലെ ജി.യു.പി.എസ് എളംങ്കൂര്‍, മേലെ മരത്താണി അങ്കണവാടി എന്നിവിടങ്ങളിലും കുഴല്‍ കിണര്‍ നിര്‍മ്മിക്കുന്നതിന് ദര്‍ഘാസ് ക്ഷണിച്ചു.  ദര്‍ഘാസ് മെയ് ഏഴിന് വൈകുന്നേരം മൂന്നിനകം ജില്ലാ ഓഫീസ്, ഭുജല വകുപ്പ്, മലപ്പുറം വിലാസത്തില്‍ ലഭിക്കണം.  ഫോണ്‍ 0483 2731450.

    മനുഷ്യാവകാശ കമ്മീഷന്‍ കെ. മോഹന്‍കുമാര്‍ മെയ് ഏഴിന് തിരൂര്‍ റെസ്റ്റ് ഹൗസില്‍ ക്യാമ്പ് സിറ്റിങ് നടത്തും.

    ഷൊര്‍ണ്ണൂര്‍ - നിലമ്പൂര്‍ പാതയിലെ പെരിന്തല്‍മണ്ണ - മുതുകുര്‍ശ്ശി റോഡിലെ റെയില്‍വെ ഗെയ്റ്റ് അറ്റകുറ്റപണികള്‍ക്കായി മെയ് എട്ടിന് രാവിലെ എട്ട് മുതല്‍ വൈകുന്നേരം ആറുവരെ അടച്ചിടും.  വാഹനങ്ങള്‍ ചെറുകര - കുന്നക്കാവ് - ഏലംകുളം,  കുന്നക്കാവ് - പാറക്കല്‍മുക്ക് - ചെറുകര എല്‍.സി വഴി പോകണം.

       സാഹിത്യ അക്കാദമിയും മഞ്ചേരി പബ്ലിക്ക് ലൈബ്രററിയും സംയുക്തമായി ഗാന്ധി സ്മൃതി എന്ന പേരില്‍ ഏപ്രില്‍ 28ന് പരിപാടി സംഘടിപ്പിക്കും. മഞ്ചേരി പബ്ലിക്ക് ലൈബ്രററിയില്‍ ഉച്ചയ്ക്ക് 2.30ന് നടക്കുന്ന പരിപാടി പ്രശസ്ത എഴുത്തുകാരന്‍ പി.സുരേന്ദ്രന്‍ ഉദ്ഘാടനം ചെയ്യും. മഹാത്മാഗാന്ധി ജീവിതവും ചിന്തയും എന്ന വിഷയത്തില്‍ ജില്ലാ ലൈബ്രററി കൗണ്‍സില്‍ പ്രസിഡന്റ് കെ.കെ ബാലചന്ദ്രന്‍  സെമിനാര്‍ അവതരിപ്പിച്ച് സംസാരിക്കും.

ഇന്ത്യന്‍ മഹാസമുദ്രത്തില്‍ രൂപം കൊണ്ട ന്യൂനമര്‍ദം ചുഴലിക്കാറ്റായി മാറാനുളള സാധ്യതയുള്ളതിനാല്‍ ജനങ്ങള്‍ ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു. കടല്‍  പ്രക്ഷുബ്ധമാകാനിടയുള്ളതിനാല്‍ മത്സ്യതൊഴിലാളികള്‍ ജാഗ്രത പുലര്‍ത്തണം. ആഴക്കടലില്‍ മത്സ്യബന്ധനത്തിന് പോയവര്‍ തൊട്ടടുത്ത തീരത്തേക്ക് ഉടന്‍  മടങ്ങണം.