ഫിഷറീസ് വകുപ്പിന്റെ നേതൃത്വത്തില്‍ മുറ്റത്ത് ഒരു മീന്‍തോട്ടം പദ്ധതി നടപ്പാക്കുന്നതിന്റെ ഭാഗമായി ചെറിയ കുളങ്ങളില്‍ / അടുക്കളക്കുളം മത്സ്യകൃഷി ചെയ്യാന്‍ താല്പര്യമുള്ളവരില്‍ നിന്നും അപേക്ഷ ക്ഷണിച്ചു. നിലവില്‍ ചെറിയ കുളങ്ങള്‍ ഉള്ളവരും സ്വന്തമായി കുളമൊരുക്കി കൃഷി ചെയ്യാന്‍ താല്പര്യമുള്ളവര്‍ക്കും അപേക്ഷിക്കാം.  മത്സ്യവിത്ത്, സാങ്കേതിക സഹായം എന്നിവ അഡാക്ക് (ജലകൃഷി വികസന ഏജന്‍സി) സൗജന്യമായി നല്‍കും.

*ഭൂമിമലയാളം ഭാഷാസെമിനാര്‍ സംഘടിപ്പിച്ചു

മലയാളഭാഷയെക്കുറിച്ച് മലയാളികള്‍ പുലര്‍ത്തുന്ന അപകര്‍ഷതാബോധം ഉപേക്ഷിക്കണമെന്നും ഇത്  മലയാളികളെ ധരിപ്പിക്കാനുള്ള ദൗത്യം മലയാളം മിഷന്‍ ഏറ്റെടുക്കണമെന്നും മുഖ്യമന്ത്രിയുടെ മാധ്യമ ഉപദേഷ്ടാവ് പ്രഭാവര്‍മ പറഞ്ഞു. മലയാളം മിഷന്‍ സംഘടിപ്പിച്ച ഭൂമി മലയാളം ഭാഷാ സെമിനാറില്‍ വിഷയം അവതരിപ്പിക്കുകയായിരുന്നു അദ്ദേഹം. 

ഉന്നതവിജ്ഞാനം ജനസമൂഹത്തിലേക്ക് എത്തിക്കാന്‍ ചോദ്യം ചോദിക്കാന്‍ പ്രചോദിപ്പിച്ച് 'പ്രബുദ്ധത' പദ്ധതിയ്ക്ക് തുടക്കമായി. ഉന്നത വിജ്ഞാനത്തിന്റെ ജനാധിപത്യവത്കരണവും സാമൂഹ്യവത്കരണവും ലക്ഷ്യമിട്ട് സംസ്ഥാന ഉന്നത വിദ്യാഭ്യാസ കൗണ്‍സിലാണ് പദ്ധതി നടപ്പാക്കുന്നത്. പാളയം യൂണിവേഴ്‌സിറ്റി ക്യാമ്പസില്‍ 'പ്രബുദ്ധത ഇന്‍സ്റ്റലേഷനെ' കേന്ദ്രീകരിച്ച് നടന്ന വ്യത്യസ്തമായ ചടങ്ങില്‍ പദ്ധതിയുടെ പ്രചാരണ ക്യാമ്പയിന്‍ ഉന്നതവിദ്യാഭ്യാസ വകുപ്പ് മന്ത്രി ഡോ. കെ.ടി. ജലീല്‍ ഉദ്ഘാടനം ചെയ്തു.

വനിത ശിശു വികസന വകുപ്പ് സംയോജിത ശിശു സംരക്ഷണ പദ്ധതി വഴി ആവിഷ്‌കരിച്ചിട്ടുളള 'ഔവര്‍ റെസ്‌പോണ്‍സിബിലിറ്റി ടു ചില്‍ഡ്രന്‍' (ഒ.ആര്‍.സി.) പദ്ധതി കേരളത്തിലെ പട്ടിക വര്‍ഗവികസന വകുപ്പിനു കീഴിലുളള 20 മോഡല്‍ റെസിഡന്‍ഷ്യല്‍ സ്‌കൂളുകളിലേയ്ക്ക് കൂടി വ്യാപിപ്പിക്കുന്നു. ഇതിന്റെ ഭാഗമായി തിരുവനന്തപുരം പി.ഡബ്ലു.ഡി. റെസ്റ്റ് ഹൗസില്‍ സംഘടിപ്പിച്ച ഏകദിന ശില്പശാല ആരോഗ്യ സാമൂഹ്യനീതി വനിത ശിശു വികസന വകുപ്പ് മന്ത്രി കെ.കെ. ശൈലജ ടീച്ചര്‍ ഉദ്ഘാടനം ചെയ്തു. കുട്ടികളെ സമഭാവനയോടെ കണ്ട് അവരെ സമൂഹത്തിന്റെ മുഖ്യധാരയിലേക്ക് ഉയര്‍ത്തിക്കൊണ്ട് വരണമെന്ന് മന്ത്രി പറഞ്ഞു.

തിരുവല്ലം ഇലക്ട്രിക്കല്‍ സെക്ഷനില്‍ തിരുവല്ലം ജംഗ്ഷന്‍, എന്‍.എച്ച് ബൈപ്പാസ് എന്നിവിടങ്ങളിലും വെള്ളയമ്പലം ഇലക്ട്രിക്കല്‍ സെക്ഷനില്‍ മരുതംകുഴി, കൊച്ചാര്‍റോഡ്, മരുതന്‍കുഴി മാര്‍ക്കറ്റ്, ഉദിയന്നൂര്‍ എന്നിവിടങ്ങളിലും കഴക്കൂട്ടം ഇലക്ട്രിക്കല്‍ സെക്ഷനില്‍ കഴക്കൂട്ടം ജംഗ്ഷന്‍, കട്ടവിള, മഹാദേവക്ഷേത്രം, നാലുമുക്ക് എന്നിവിടങ്ങളിലും അറ്റകുറ്റപ്പണി നടക്കുന്നതിനാല്‍ ഇന്ന് ( 25 വ്യാഴം) രാവിലെ ഒമ്പതു മുതല്‍ വൈകിട്ട് അഞ്ചു വരെ വൈദ്യുതി മുടങ്ങുമെന്ന് കെ.എസ്.ഇ.ബി. അധികൃതര്‍ അറിയിച്ചു.
(പി.ആര്‍.പി. 2536/2018)

കുടുംബശ്രീ ജില്ലയില്‍ നടത്തുന്ന ജൈവസന്ദേശ യാത്രയുടെ ഭാഗമായി സംഘടിപ്പിക്കുന്ന തെരുവ് നാടക അവതരണം ഇന്ന് (ഒക്‌ടോബര്‍ 25) സമാപിക്കും.  ജില്ലയിലെ തെരഞ്ഞെടുത്ത 12 സ്ഥലങ്ങളില്‍ കഴിഞ്ഞ 23 മുതലാണ് നാടകം അവതരിപ്പിച്ചുതുടങ്ങിയത്.  രംഗശ്രീയുടെ നേതൃത്വത്തിലാണു നാടക അവതരണം.

വിഷവിമുക്തമായ പച്ചക്കറി ഉത്പാദിപ്പിക്കുന്നതിനും സുരക്ഷിത ജീവിതശൈലി ദൈനംദിന ജീവിതത്തിന്റെ ഭാഗമാക്കുന്നതിനുമുള്ള കാമ്പെയ്‌നിന്റെ ഭാഗമായാണു തെരുവ് നാടകമെന്ന് കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ അറിയിച്ചു.
(പി.ആര്‍.പി. 2535/2018)

ആയുര്‍വേദ മെഡിക്കല്‍ ഓഫീസര്‍ തസ്തികയില്‍ ദിവസ വേതനാടിസ്ഥാനത്തില്‍ താല്‍ക്കാലിക നിയമനത്തിനുള്ള വാക്ക് ഇന്‍ ഇന്റര്‍വ്യൂ നവംബര്‍ 11 ന് രാവിലെ 9.30 ന് നടക്കും.  അംഗീകൃത സര്‍വകലാശാലയില്‍ നിന്നുള്ള ബി.എ.എം.എസ് ബിരുദമാണ് യോഗ്യത.  താല്‍പര്യമുള്ളവര്‍ അസല്‍ സര്‍ട്ടിഫിക്കറ്റുകള്‍ സഹിതം ആയുര്‍വേദ കോളേജിന് സമീപമുളള ജില്ലാ മെഡിക്കല്‍ ഓഫീസ് കാര്യാലയത്തില്‍ എത്തണമെന്ന് ജില്ലാ മെഡിക്കല്‍ ഓഫീസര്‍ (ഐ.എസ്.എം.) അറിയിച്ചു.
(പി.ആര്‍.പി. 2532/2018)