കാര്‍ഷിക സമൃദ്ധിയ്ക്കും മാലിന്യ സംസ്‌കരണത്തിന്നും ജല സംരക്ഷണത്തിനും ഊന്നല്‍ നല്‍കി അഴൂര്‍ പഞ്ചായത്തില്‍ ഹരിത ഭവനം പദ്ധതിയ്ക്ക് തുടക്കമായി.  വീടുകള്‍ തോറും തൈകളും  വളങ്ങളും വിതരണം ചെയ്യുകയാണ് പദ്ധതിയുടെ പ്രധാന ലക്ഷ്യം. ഇതോടൊപ്പം മാലിന്യ സംസ്‌കരണം കിണര്‍ റീച്ചാര്‍ജിംഗ് കോഴി വളര്‍ത്തല്‍ എന്നിവയും ഉള്‍പ്പെടും.   

ദേശീയ നഗര ഉപജീവന ദൗത്യത്തിന്റെ ഭാഗമായി ആറ്റിങ്ങലില്‍ തൊഴില്‍ നൈപുണ്യ പരിശീലന പദ്ധതിക്ക് തുടക്കമായി. ഫ്രണ്ട് ഓഫീസ് അസിസ്റ്റന്റ്, ജനറല്‍ നഴ്സിംഗ് അസിസ്റ്റന്റ്, ഫാഷന്‍ ഡിസൈനിംഗ് തുടങ്ങി 98 ഓളം  തൊഴില്‍ നൈപുണ്യ കോഴ്സുകളിലാണ് പരിശീലനം നല്‍കുന്നത്.

പദ്ധതിയുടെ കീഴില്‍ ആരംഭിച്ച അക്കൗണ്ടിംഗ് കോഴ്സിന്റെ ആദ്യ ബാച്ച് പരിശീലനം പൂര്‍ത്തിയാക്കി.  30 കുട്ടികളാണ് ആദ്യ ബാച്ചില്‍ ഉണ്ടായിരുന്നത്. ഇവരുടെ സര്‍ട്ടിഫിക്കറ്റുകള്‍ നഗരസഭയില്‍ വച്ച് നടന്ന ചടങ്ങില്‍ ചെയര്‍മാന്‍ എം. പ്രദീപ് വിതരണം ചെയ്തു.

ലോകയുവജന നൈപുണ്യദിനത്തോടനുബന്ധിച്ചു യുനെസ്‌കോ -യൂണിവോക്്‌സംഘടിപ്പിച്ച സ്‌കില്‍സ് ഇന്‍ ആക്ഷന്‍ ഫോട്ടോഗ്രാഫി മത്സരത്തില്‍ ആദ്യ ഇരുപതില്‍ സ്ഥാനം നേടി മലയാളിയായ സൗമ്യയും. സംസ്ഥാനത്തെ നൈപുണ്യവികസന പദ്ധതിയായ അസാപ്പിലെ ആലപ്പുഴ ഡിസ്ട്രിക്ട് യൂണിറ്റിലെ പ്രോഗ്രാംഎക്‌സിക്യൂട്ടീവാണ് സൗമ്യ. ലോകമെമ്പാടുമുള്ള അപേക്ഷാര്‍ത്ഥികളോട് മത്സരിച്ചാണ് സൗമ്യ നേട്ടം കൈവരിച്ചത്.

കൊച്ചിന്‍ യൂണിവേഴ്‌സിറ്റി ഓഫ് സയന്‍സ് ആന്റ് ടെക്‌നോളജി (കുസാറ്റ്)യില്‍ പുതിയ വൈസ് ചാന്‍സലര്‍ നിയമനത്തിന് ശുപാര്‍ശകള്‍ സമര്‍പ്പിക്കാന്‍ സെര്‍ച്ച് കമ്മിറ്റി രൂപീകരിച്ച് ഗവര്‍ണര്‍ പി. സദാശിവം ഉത്തരവായി. യു.ജി.സി പ്രതിനിധിയായി ഡോ. എം. ജഗദീഷ് കുമാര്‍ (വൈസ് ചാന്‍സലര്‍, ജെ.എന്‍.യു), ഡോ. ബി. ഇക്ബാല്‍ (സിന്‍ഡിക്കേറ്റ് പ്രതിനിധി), ടോം ജോസ് (ചീഫ് സെക്രട്ടറി) എന്നിവരാണ് കമ്മിറ്റി അംഗങ്ങള്‍.

ഗാന്ധിജിയുടെ 150-ാം ജന്മ വാര്‍ഷികാഘോഷത്തോടനുബന്ധിച്ച് ഫുഡ് സേഫ്റ്റി & സ്റ്റാന്‍ഡേര്‍ഡ്‌സ് അതോറിറ്റി ഓഫ് ഇന്‍ഡ്യ 'സ്വസ്ത് ഭാരത് യാത്ര' എന്ന പേരില്‍ രാജ്യമൊട്ടാകെ  സൈക്ലാത്തോണ്‍ സംഘടിപ്പിക്കും.  സംസ്ഥാനതല ഉദ്ഘാടനം ഒക്‌ടോബര്‍ 16ന് വൈകുന്നേരം നാലിന് കനകക്കുന്ന് കൊട്ടാരത്തില്‍ ആരോഗ്യമന്ത്രി കെ.കെ.ശൈലജ ടീച്ചര്‍ നിര്‍വ്വഹിക്കും. സൈക്ലാത്തോണിന്റെ ഫ്‌ളാഗ് ഓഫ് 17ന് കിഴക്കേക്കോട്ട ഗാന്ധിപാര്‍ക്കില്‍ രാവിലെ ഏഴിന് നടക്കും.

വയനാട് ജില്ലയില്‍ കാലവര്‍ഷക്കെടുതിമൂലം നാശനഷ്ടം സംഭവിച്ച കുടുംബങ്ങള്‍ക്ക് അപ്പീല്‍ കേസുകളില്‍ ആശ്വാസധനസഹായ വിതരണത്തിനായി മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് അധികതുക അനുവദിച്ച് ഉത്തരവായി.

അപ്പീല്‍കേസുകളില്‍ അര്‍ഹരായ 217 കുടുംബങ്ങള്‍ക്ക് 6200 രൂപ നിരക്കില്‍ 13,45,400 രൂപ അനുവദിക്കണമെന്ന ജില്ലാ കളക്ടറുടെ അപേക്ഷ അംഗീകരിച്ചാണ് തുക അനുവദിച്ചത്.