കേന്ദ്രസര്‍ക്കാറിന്റെ സമ്പൂര്‍ണ്ണ വൈദ്യുതീകരണ പദ്ധതിയായ ദീന്‍ദയാല്‍ ഉപധ്യായ ഗ്രാമജ്യോതി യോജന (ഡി.ഡി.യു.ജി.ജെ.വൈ) പ്രകാരം സൗജന്യ വൈദ്യുതി കണക്ഷന്‍ ലഭിച്ച ജില്ലയിലെ ഉപഭോക്താക്കള്‍ പ്രധാനമന്ത്രിയുമായി സംവദിച്ചു. രാജ്യത്തെമ്പാടുമുള്ള ഡി.ഡി.യു.ജി.ജെ.വൈ ഗുണഭോക്താക്കളുമായുള്ള സംവാദത്തിന്റെ ഭാഗമായാണ് ജില്ലയിലെ ഗുണഭോക്താക്കളോടും വീഡിയോ കോണ്‍ഫ്രന്‍സിലൂടെ പ്രധാനമന്ത്രി സംവദിച്ചത്. ജില്ലയില്‍ നിന്നും  തെരഞ്ഞെടുത്ത 18 ഗുണഭോക്താക്കളാണ് സിവില്‍ സ്റ്റേഷനിലെ നാഷണല്‍ ഇന്‍ഫര്‍മാറ്റിക് സെന്ററിലിരുന്ന്  പ്രധാനമന്ത്രിയുമായി സംവദിച്ചത്. രാവിലെ 9.30 മുതല്‍ 10.30 വരെയായിരുന്നു വീഡിയോ കോണ്‍ഫ്രന്‍സ്.

സാമ്പത്തിക-ആരോഗ്യ-പാരിസ്ഥിതിക പ്രശ്‌നങ്ങള്‍ക്ക് കാരണമായേക്കാവുന്ന   ഉപയോഗശൂന്യമായ മരുന്നുകളുടെ സംസ്‌കരണത്തിനായി പെരിന്തല്‍മണ്ണ നഗരസഭയില്‍ പ്രത്യേക പദ്ധതി ആരംഭിച്ചു.സമ്പൂര്‍ണ ശുചിത്വ പദ്ധതിയായ ജീവനം പദ്ധതിയുടേയും അല്‍ശിഫ കോളേജ് ഓഫ് ഫാര്‍മസിയുടേയും നേതൃത്വത്തിലാണ് പദ്ധതി     ആവിഷ്‌കരിച്ചത്.

സംസ്ഥാന ഔഷധസസ്യബോര്‍ഡിന്റെ നേതൃത്വത്തില്‍ നടപ്പാക്കുന്ന ഗൃഹചൈതന്യം പദ്ധതിയുടെ ഭാഗമായി ജില്ലാതല ശില്പശാല സംഘടിപ്പിച്ചു. വീട്ടില്‍ ഒരു വേപ്പും കറിവേപ്പും എന്നതാണ് പദ്ധതി. ജില്ലാപഞ്ചായത്ത് പ്രസിഡന്റ് എ.പി. ഉണ്ണികൃഷ്ണന്‍ ശില്പശാല ഉദ്ഘാടനം ചെയ്തു. പഞ്ചായത്ത് പ്രസിഡന്റുമാര്‍, ഉദ്യോഗസ്ഥര്‍ എന്നിവര്‍ ശില്പശാലയില്‍ പങ്കെടുത്തു.

കുഷ്ഠരോഗം കണ്ടെത്തി തടയുന്നതിന് ആരോഗ്യ വകുപ്പിന്റെ നേതൃത്വത്തില്‍ വിപുലമായ പ്രവര്‍ത്തനങ്ങള്‍ക്ക് ആഗസ്റ്റ് 15 ന് തുടക്കമാകും. കുഷ്ഠരോഗം ഭയപ്പെടേണ്ട ഒന്നല്ലെന്നും ഫലപ്രദമായ ചികിത്സയുണ്ടെന്ന് മനസ്സിലാക്കുകയും നേരത്തേ കണ്ടെത്തി ചികിത്സ ആരംഭിക്കുകയുമാണ് വേണ്ടതെന്നും ജനങ്ങള്‍ തിരിച്ചറിയണമെന്ന് ജില്ലാ മെഡിക്കല്‍ ഓഫീസര്‍ ഡോ. കെ സക്കീന പറഞ്ഞു.

കഴിഞ്ഞ വര്‍ഷം പുതുതായി 53 കേസുകളാണ് ജില്ലയില്‍ കണ്ടെത്തിയത്. ഇതില്‍ 13 പേര്‍ കുട്ടികളാണ് എന്നത് സാഹചര്യത്തിന്റെ ഗൗരവം വര്‍ധിപ്പിക്കുന്നു. നാലുപേര്‍ക്ക് പ്രകടമായ അംഗവൈകല്യം വന്നിട്ടുണ്ട് എന്നതും ആശങ്കാജനകമാണ്.

കോട്ടയ്ക്കല്‍ നഗരസഭയ്ക്കു കീഴില്‍ പ്രവര്‍ത്തിക്കുന്ന ജെന്‍ഡര്‍ റിസോഴ്‌സ് സെന്ററില്‍ വനിതാ ജാഗ്രതാ സമിതി കോഓര്‍ഡിനേറ്റര്‍ തസ്തികയില്‍ നിയമിക്കുന്നതിന് യോഗ്യതയുള്ളവരില്‍ നിന്നും അപേക്ഷ ക്ഷണിച്ചു. ഒരു വര്‍ഷത്തേക്ക് താല്‍ക്കാലികാടിസ്ഥാനത്തിലാണ് നിയമനം. എം.എസ്.ഡബ്യു- മെഡിക്കല്‍ & സൈക്യാട്രി സ്‌പെഷ്യലൈസേഷന്‍/ എം.എ സൈക്കോളജിയാണ് യോഗ്യത. ബന്ധപ്പെട്ട മേഖലയില്‍ രണ്ടു വര്‍ഷത്തെ പ്രവൃത്തിപരിചയമുള്ളവര്‍ക്ക് മുന്‍ഗണന ലഭിക്കും. താല്‍പര്യമുള്ളവര്‍ ജൂലൈ 24 ന് രാവിലെ 11 മണിക്ക് നഗരസഭാ ഓഫീസില്‍ നടക്കുന്ന കൂടിക്കാഴ്ചക്ക് ഹാജരാകണം.

 
കോട്ടയ്ക്കല്‍ നഗരസഭയുടെ ആഭിമുഖ്യത്തില്‍ ജനപ്രതിനിധികള്‍ക്ക് കമ്പ്യൂട്ടര്‍ പരിശീലനം നല്‍കി. ഇ ഗവേണ്‍സിന്റെയും എം ഗവേണ്‍സിന്റെയും സാദ്ധ്യതകള്‍ ഉപയോഗപ്പെടുത്തുന്നതിലും കമ്പ്യൂട്ടര്‍ പ്രാവീണ്യം വര്‍ദ്ധിപ്പിക്കുന്നതിനുമായിരുന്നു പരിശീലനം. ജി.ടെക് കമ്പ്യൂട്ടര്‍ എജ്യുക്കേഷന്റെ സഹായത്തോടെ നടത്തിയ പരിശീലനത്തില്‍ ജി.ടെക് മാര്‍ക്കറ്റിംഗ് മാനേജര്‍ അന്‍വര്‍സാദത്ത് ക്ലാസെടുത്തു. നഗരസഭാ വൈസ് ചെയര്‍പേഴ്‌സണ്‍ ബുഷറ ഷബീര്‍, അനൂജ്, അനസ് ഇബ്രാഹിം തുടങ്ങിയവര്‍ നേതൃത്വം നല്‍കി.