ലോക മുലയൂട്ടല്‍ വാരത്തോടനുബന്ധിച്ച്  അഴിയൂര്‍ ഗ്രാമപഞ്ചായത്ത് ബേബിഷോ, ക്വിസ് മത്സരം,  പാചകമത്സരം എന്നിവ സംഘടിപ്പിച്ചു. പ്രസിഡണ്ട് ഇ. ടി അയൂബ് പരിപാടി  ഉദ്ഘാടനം ചെയ്തു.  മെമ്പര്‍  ശ്രിജേഷ് കുമാര്‍  അധ്യക്ഷത വഹിച്ചു. വടകര പി.എച്ച്. സി യിലെ സജീവന്‍, ഷൈനീഷ്, ഷര്‍മ്മിള, രമണി എന്നിവര്‍ നേതൃത്വം നല്‍കി. ഐ. സി.ഡി. എസ് സൂപ്പര്‍വൈസര്‍ . ഷീജ. സി. കെ, മെമ്പര്‍ വി.പി ജയന്‍, മെമ്പര്‍ അലി മനോളി, വര്‍ക്കര്‍ മഹിജ എന്നിവര്‍ സംസാരിച്ചു.

സംസ്ഥാന വനിതാ വികസന കോര്‍പ്പറേഷന്‍, ഈ മാസം 25 മുതല്‍ 50 വയസ് വരെയുളള പട്ടികജാതി വിഭാഗത്തില്‍ ഉള്‍പ്പെടുന്ന വനിതകള്‍ക്കായി (35 നുമേല്‍ പ്രായമുളള അവിവാഹിതകള്‍, വിവാഹമോചിതര്‍, അവിവാഹിതരായ അമ്മമാര്‍ എന്നിവര്‍ ഉള്‍പ്പെടെ) ത്രിദിന സംരംഭകത്വ വികസന പരിശീലന പരിപാടി സംഘടിപ്പിക്കും. ഒറ്റപ്പെട്ടുപോയ സ്ത്രീകളെ സ്വയം പര്യാപ്തതയിലേക്ക് നയിക്കുന്നതിനും സാമ്പത്തിക കാര്യങ്ങള്‍ കൈകാര്യം ചെയ്യുന്നതിനും പ്രാപ്തരാക്കുന്ന പരിശീലനം വിജയകരമായി പൂര്‍ത്തിയാക്കുന്നവര്‍ക്ക് ദേശീയ പട്ടികജാതി കോര്‍പ്പറേഷന്‍ മുഖേന 4 ശതമാനം പലിശയ്ക്ക് 10 ലക്ഷം രൂപ വരെ സ്വയം തൊഴില്‍ വായ്പ, നിബന്ധനകള്‍ക്ക് വിധേയമായി അനുവദിക്കും.

താമരശ്ശേരി താലൂക്കുമായി ബന്ധപ്പെട്ട് ജില്ലാ കലക്ടറുടെ നേതൃത്വത്തില്‍ നടക്കുന്ന പരാതി പരിഹാര അദാലത്ത് ഈ മാസം 18ന് രാവിലെ 10ന് താമരശ്ശേരി രാജീവ്ഗാന്ധി ഓഡിറ്റോറിയത്തില്‍ നടക്കും. മുഖ്യമന്ത്രിയുടെ ദുരിതാശ്വാസ നിധി, റേഷന്‍ കാര്‍ഡ്, സര്‍വ്വെ സ്റ്റാറ്റിയൂട്ടറിയായി ലഭിക്കേണ്ട കാര്യങ്ങള്‍ എന്നിവ ഒഴികെ വിവിധ വകുപ്പുകളുമായി ബന്ധപ്പെട്ട പരാതികള്‍ ജില്ലാ കലക്ടര്‍ സ്വീകരിച്ച് അദാലത്തില്‍ പങ്കെടുക്കുന്ന വകുപ്പ് മേധാവികളുമായി ബന്ധപ്പെട്ട് പരിഹാരം കാണും. എല്ലാ പഞ്ചായത്ത് സെക്രട്ടറിമാരും താലൂക്കതല ഓഫീസ് മേധാവികളും അദാലത്തില്‍ പങ്കെടുക്കണമെന്ന് തഹസില്‍ദാര്‍ അറിയിച്ചു.  
 

    ഓണം ബക്രീദ് ഖാദി മേള 2018 ന്റെ ഭാഗമായി കേരള ഖാദി ഗ്രാമ വ്യവസായ ബോര്‍ഡും ഖാദി സ്ഥാപനങ്ങളും ചേര്‍ന്ന് ആവിഷ്‌ക്കരിച്ച സമ്മാന പദ്ധതിയില്‍  ഓരോ  1,000 രൂപയുടെ പര്‍ച്ചേസിനും ഒരു സമ്മാന കൂപ്പണ്‍ ലഭിക്കും. മെഗാ നറുക്കെടുപ്പില്‍ ഒന്നാം സമ്മാനം വാഗണ്‍ ആര്‍ കാറും, രണ്ടാം സമ്മാനം 5 പവന്‍ സ്വര്‍ണ്ണ നാണയവും, മൂന്നാം സമ്മാനം 1 പവന്‍ സ്വര്‍ണ്ണ നാണയവുമാണ്.

കെട്ടിട നിര്‍മാണ രംഗത്ത് ഉറച്ച കാല്‍വെപ്പുമായി കുടുംബശ്രീയുടെ ജില്ലയിലെ ആദ്യ നിര്‍മാണ യൂണിറ്റ് യാഥാര്‍ഥ്യമായി. പുതുപ്പാടി ഗ്രാമപഞ്ചായത്തിലെ കുടുംബശ്രീ അംഗങ്ങളായ 10 പട്ടികവര്‍ഗ വനിതകള്‍ ചേര്‍ന്ന് രൂപീകരിച്ചതാണ് ജില്ലയിലെ ആദ്യ കെട്ടിട നിര്‍മാണ യൂണിറ്റ്. ഗ്രാമപഞ്ചായത്തിലെ കുടുംബശ്രീ സിഡിഎസിലെ 20-ാം വാര്‍ഡ് പയോണ പട്ടികവര്‍ഗ കോളനിയിലെ പ്രിയം കുടുംബശ്രീ അംഗങ്ങളുടെ ഈ സംരംഭം മട്ടിക്കുന്ന് വാര്‍ഡിലെ മൈഥിലി എന്ന ലൈഫ് ഗുണഭോക്താവിന്റെ വീടിന്റെ തറക്കല്ലിട്ടുകൊണ്ട് ജില്ലാ പഞ്ചായത്ത് പ്രസിഡന്റ് ബാബു പറശേരി ഉദ്ഘാടനം ചെയ്തു.