ജില്ലാ ലേബര്‍ ഓഫീസില്‍ നിന്നും കേരള മരം കയറ്റ തൊഴിലാളി അവശതാ പെന്‍ഷന്‍ പദ്ധതിയില്‍  തുക കൈപ്പറ്റുന്നവര്‍ സാക്ഷ്യപത്രം ഹാജരാക്കണമെന്ന് ജില്ലാ ലേബര്‍ ഓഫിസര്‍ അറിയിച്ചു.  സര്‍വ്വീസ് പെന്‍ഷനന്‍ വാങ്ങുന്നില്ലെന്നും  ആദായ നികുതി നല്‍കുന്നില്ലെന്നും, തന്റെയോ കുടുംബത്തിന്റെയോ പേരില്‍ 2 ഏക്കറില്‍ കൂടുതല്‍ ഭൂമിയില്ലായെന്നും സാക്ഷ്യപ്പെടുത്തണം. ഭൂമി പരിധി പട്ടിക വര്‍ഗ്ഗ വിഭാഗക്കാര്‍ക്ക് ബാധകമല്ല. വാര്‍ഷിക വരുമാനം ഒരു ലക്ഷം രൂപയില്‍ കവിയരുത്. ഇത് തെളിയിക്കുന്നതിനായി വില്ലേജ് ഓഫീസറുടെ സാക്ഷ്യപത്രം നല്‍കണം.  മറ്റു പെന്‍ഷനുകള്‍  വാങ്ങുന്നവര്‍ അവയുടെ വിവരവും സമര്‍പ്പിക്കണം.

കയര്‍ തൊഴിലാളി ക്ഷേമനിധി  ബോര്‍ഡ് ഡിഗ്രി, പ്രൊഫഷണല്‍ കോഴ്‌സുകള്‍ക്ക് നല്‍കുന്ന  വിദ്യാഭ്യാസ ധനസഹായത്തിന് അപേക്ഷ ക്ഷണിച്ചു. ക്ഷേമനിധിയില്‍ അംഗത്വമെടുത്ത് 2017 മെയ് 31 നു രണ്ടു വര്‍ഷം കുടിശ്ശിക കൂടാതെ വിഹിതം അടച്ചു വരുന്ന   തൊഴിലാളികളുടെ മക്കള്‍ക്കാണ് ധനസഹായം നല്‍കുക. കേരളത്തിലെ ഗവ: അംഗീകൃത സ്ഥാപനങ്ങളില്‍ മുഴുവന്‍ സമയ കോഴ്‌സുകളില്‍ ഉപരിപഠനം നടത്തുന്നതിനാണ് ധനസഹായം അനുവദിക്കുന്നത്.
പൂരിപ്പിച്ച അപേക്ഷ ബോര്‍ഡിന്റെ കോഴിക്കോട് റീജിയണല്‍  ഓഫീസില്‍ ഫെബ്രുവരി 28 വരെ സ്വീകരിക്കുന്നതാണെന്ന് ചീഫ് എക്‌സിക്യൂട്ടീവ് ഓഫീസര്  അറിയിച്ചു.

മോയിന്‍ക്കുട്ടി വൈദ്യര്‍ മാപ്പിളകലാ അക്കാദമിയിലെ ടി എ റസാഖ് തിയേറ്ററില്‍ നടക്കുന്ന പ്രതിവാര ചലച്ചിത്ര പ്രദര്‍ശനം ഫെബ്രുവരി 18 മുതല്‍ ഞായറാഴ്ചകളില്‍ വൈകിട്ട് അഞ്ചു മണിക്ക് നടക്കുമെന്ന് സെക്രട്ടറി അറിയിച്ചു.

പട്ടികവര്‍ഗ്ഗ വികസന വകുപ്പിന്റെ തിരുവനന്തപുരം ഞാറനീലിയില്‍ പ്രവര്‍ത്തിക്കുന്ന ഡോ.അംബേദ്കര്‍ വിദ്യാനികേതന്‍ സി.ബി.സി.ഇ സ്‌ക്കൂളിലേക്കും, കുറ്റിച്ചലില്‍ പ്രവര്‍ത്തിക്കുന്ന ജി.കാര്‍ത്തികേയന്‍ മെമ്മോറിയല്‍ സി.ബി.എസ്.ഇ. സ്‌ക്കൂളിലേക്കും ഒന്നാം ക്ലാസ്സിലേക്ക് പ്രവേശനത്തിന് പട്ടികവര്‍ഗ്ഗ വിദ്യാര്‍ത്ഥികളുടെ രക്ഷിതാക്കളില്‍ നിന്നും അപേക്ഷ ക്ഷണിച്ചു.  വിദ്യാര്‍ത്ഥികളുടെ വിദ്യാഭ്യാസം, ഭക്ഷണം, താമസം തുടങ്ങി  മുഴുവന്‍ ചെലവുകളും സര്‍ക്കാര്‍ വഹിക്കുന്നതാണ്.

 കേരള സംസ്ഥാന സാക്ഷരതാ മിഷന്‍ അതോറിറ്റി ജയിലുകളില്‍ നടത്തി വരുന്ന സാക്ഷരതാ ക്ലാസ്സുകളില്‍ പങ്കെടുക്കുന്നവര്‍ക്കായി ഫെബ്രുവരി 17 ന് സാക്ഷരതാ പരീക്ഷ നടത്തും. വായന, എഴുത്ത്, ഗണിതം എന്നിങ്ങനെ മൂന്ന് ഭാഗങ്ങളായുള്ള പരീക്ഷ രാവിലെ 10 മണിക്ക് ആരംഭിക്കും. ജില്ലാതല ഉദ്ഘാടനം മഞ്ചേരിയില്‍ നടക്കും. ജനപ്രതിനിധികള്‍ ഉദ്യോഗസ്ഥര്‍ പ്രേരക്മാര്‍ സാക്ഷരതാ ഇന്‍സ്ട്രക്ടര്‍മാര്‍ തുടങ്ങിയവര്‍ പരീക്ഷയ്ക്ക് നേതൃത്വം നല്‍കും.

പഞ്ചായത്ത് ദിനാഘോഷത്തോടനുബന്ധിച്ച നടക്കുന്ന എക്‌സിബിഷന്‍ 17 വൈകിട്ട് മൂന്നിന്  അല്‍ഷിഫ സെന്ററില്‍ തുടങ്ങും. ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ ഉദ്ഘാടനം ചെയ്യും.

പഞ്ചായത്ത് ദിനാഘോഷത്തോടനുബന്ധിച്ച് ഫെബ്രുവരി 17 രാവിലെ 10ന് അല്‍ഷിഫ കണ്‍വെന്‍ഷന്‍ സെന്ററില്‍ സംസ്ഥാന തല ക്വസ് മത്സരം നടക്കും. പഞ്ചായത്ത് രാജ് നവകേരളം എന്ന വിഷയത്തെ അടിസ്ഥാനമാക്കി നടക്കുന്ന പരിപാടിയില്‍ ജില്ലാ തലത്തിലെ  വിജയികളാണ് മത്സരത്തില്‍ പങ്കെടുക്കുക.

പഞ്ചായത്ത് ദിനാഘോഷത്തിന്റെ ഭാഗമായി നടക്കുന്ന സെമിനാറുകളില്‍ ചര്‍ച്ച ചെയ്യുന്ന വിഷയങ്ങള്‍, പഞ്ചായത്തുകളുടെ പദ്ധതികള്‍, പ്രവര്‍ത്തനങ്ങള്‍ തുടങ്ങിയ  സംബന്ധിച്ച അഭിപ്രായങ്ങളും നിര്‍ദ്ദേശങ്ങളും സമര്‍പ്പിക്കുന്നതിനും സംശയങ്ങള്‍ ദൂരികരിക്കുന്നതിന് വെബ് സൈറ്റില്‍ ക്രമീകരണം ഏര്‍പ്പെടുത്തിയിരുന്നു. എന്നാല്‍ ചില പഞ്ചായത്തുകള്‍ മാത്രമാണ് ഈ സൗകര്യം ഉപയോഗിക്കുന്നതെന്ന് ജനറല്‍ കണ്‍വീനര്‍ അറിയിച്ചു.

കുടുംബശ്രീ വഴി നടപ്പാക്കുന്ന ദീന്‍ദയാല്‍ ഉപാധ്യായ ഗ്രാമീണ്‍ കൗശല്യയോജന പദ്ധതിയിലൂടെ നടത്തുന്ന സൗജന്യ തൊഴില്‍ പരിശീലനത്തിനുള്ള കൗണ്‍സിലിംഗ്  ഫെബ്രുവരി 17 രാവിലെ  10.30 ന് ചീക്കോട്  പൊന്നാട് സി.എച്ച്.സി ഹാളില്‍  വെച്ച് നടത്തുന്നു.  പ്രസ്തുത പരിശീലനത്തില്‍  ഗ്രാമീണ മേഖലയിലെ 18-നും 35-നും ഇടയില്‍ പ്രായമുള്ള ബി.പി.എല്‍, കുടുംബശ്രീ തൊഴിലുറപ്പ്, ആശ്രയ എന്നീ പദ്ധതികളില്‍ ഉള്‍പ്പെട്ട എസ്.സി, മൈനോറിറ്റി എന്നീ വിഭാഗത്തിലുള്ളവര്‍ക്ക് പങ്കെടുക്കാം. പരിശീലനം പൂര്‍ത്തിയാക്കുന്നവര്‍ക്ക് ജോലിയില്‍ നിയമനം നല്‍കുന്നതാണ്. വിദ്യാഭ്യാസ യോഗ്യത: എസ്.എസ്.എല്‍.സി. ഫോണ്‍ 9747807096, 04832 733470