കാട്ടിക്കുളം ഇലക്ട്രിക്കൽ സെക്ഷൻ   പരിധിയിൽ അറ്റകുറ്റ പ്രവൃത്തി നടക്കുന്നതിനാൽ ഇന്ന് ( മാർച്ച് 26)  പനവല്ലി എമ്മടി മുതൽ അപ്പപ്പാറ ഫോറസ്റ്റ് ഓഫീസ് വരെ രാവിലെ ഒൻപത് മുതൽ വൈകിട്ട്  അഞ്ച് വരെ  ഗതാഗതം നിരോധിച്ചു.

എന്‍ ഊര് ഗോത്ര പൈതൃക ഗ്രാമത്തിലേക്കുള്ള റോഡില്‍ അറ്റകുറ്റ പണികള്‍ നടക്കുന്നതിനാല്‍ ഇന്ന് (മാര്‍ച്ച് 26) എന്‍ ഊര് ഗോത്ര പൈതൃക ഗ്രാമം തുറന്ന് പ്രവര്‍ത്തിക്കില്ലെന്ന് അധികൃതര്‍ അറിയിച്ചു.

വള്ളിയൂർക്കാവ് മഹോത്സവത്തോടനുബന്ധിച്ചുള്ള ട്രേഡ് ഫെയറിൽ മാനന്തവാടി ഗവ പോളിടെക്‌നിക് കോളേജ് സ്റ്റാൾ ശ്രദ്ധേയമാകുന്നു. പത്താം ക്ലാസിന് ശേഷം മൂന്ന് വർഷം കൊണ്ടും പ്ലസ് ടു സയൻസ് കഴിഞ്ഞവർക്ക് രണ്ട് വർഷം കൊണ്ടും എൻജിനീയറിങ് ഡിപ്ലോമ നേടാനുള്ള അവസരങ്ങളെക്കുറിച്ചും തൊഴിൽ സാധ്യതകളെക്കുറിച്ചുള്ള വിവരങ്ങൾ സ്റ്റാളിൽ ലഭ്യമാണ്. വിവിധ ഡിപ്ലോമ കോഴ്‌സുകളും ഉപരിപഠന സാധ്യതകളും സംബന്ധിച്ച വിശദാംശങ്ങളും സ്റ്റാളിൽ ലഭിക്കും.   കോളേജ് പ്രിൻസിപ്പൽ എം.ജെ ബിജു സ്റ്റാൾ ഉദ്ഘാടനം ചെയ്തു.

ഭാരതീയ ചികിത്സാ വകുപ്പിന്റെ ആഭിമുഖ്യത്തിൽ   വളളിയൂർക്കാവ് ക്ഷേത്ര മഹോത്സവത്തിന്റെ ഭാഗമായി ആയുർവ്വേദ മെഡിക്കൽ ക്യാമ്പ് നടത്തി. 
താഴെക്കാവ് സ്റ്റേജിൽ അസ്ഥിരോഗ- സ്ത്രീരോഗ- ജീവിതശൈലീ രോഗ-നേത്ര രോഗ വിഭാഗങ്ങൾ ഉൾപ്പെടെ പത്തോളം വിദഗ്‌ധ ഡോക്‌ടർമാരുടെ സേവനം ലഭ്യമാക്കി. ജീവിതശൈലീ രോഗ നിർണയ രക്തപരിശോധനയും സൗജന്യ മരുന്നു വിതരണവും നടത്തി. മെഡിക്കൽ ക്യാമ്പിൽ 300 ഓളം ആളുകൾ പങ്കെടുത്തു. 

ക്ഷയ രോഗത്തിനെതിരെ ജനങ്ങളുടെ കൂട്ടായ കരുത്തിന് ആഹ്വാനം ചെയ്ത് ലോക ക്ഷയരോഗ ദിനാചരണം സംഘടിപ്പിച്ചു. ആരോഗ്യ വകുപ്പിൻ്റെയും ആരോഗ്യ കേരളത്തിൻ്റെയും ജില്ലാ ടിബി കേന്ദ്രത്തിൻ്റെയും ആഭിമുഖ്യത്തിൽ സംഘടിപ്പിച്ച ജില്ലാതല ദിനാചരണ പരിപാടി അസിസ്റ്റൻ്റ് കളക്ടർ പി.പി അർച്ചന ഉദ്ഘാടനം ചെയ്തു. 2026ലെ ക്ഷയരോഗമുക്ത 100 ദിന കർമ്മപരിപാടിയുടെ പ്രഖ്യാപനവും നിർവ്വഹിച്ചു. ജില്ലയിൽ ഏറ്റവും കൂടുതൽ ക്ഷയരോഗ പ്രതിരോധ കഫ പരിശോധന നടത്തിയ ആരോഗ്യ സ്ഥാപനങ്ങൾ അസിസ്റ്റൻ്റ് കളക്ടറിൽ നിന്ന് അവാർഡ് ഏറ്റുവാങ്ങി. മികച്ച ബോധവത്ക്കരണ പ്രവർത്തനങ്ങൾ നടത്തിയ ടിബി വിജയേതാക്കളെ ജില്ലാ മെഡിക്കൽ ഓഫീസർ (ആരോഗ്യം) ഡോ കെ ടി രേഖ ആദരിച്ചു.

ബാവലി  തടി ഡിപ്പോയിലെത്തിച്ച വിവിധ ക്ലാസുകളിലുള്ള തേക്ക് തടികള്‍ ഏപ്രില്‍ 23 ന് ഇ-ലേലം ചെയ്ത് വില്പന നടത്തുമെന്ന് ബാവലി  ഡിപ്പോ ഓഫീസര്‍ അറിയിച്ചു. താത്പര്യമുള്ളവര്‍ www.mstcecommerce.com ല്‍ രജിസ്റ്റര്‍ ചെയ്യണം. ഫോണ്‍ - 8848048470, 9847261598.

മനുഷ്യാവകാശങ്ങളുമായി ബന്ധപ്പെട്ട വിവരങ്ങള്‍ നല്‍കുന്നതിന്  പ്രതിമാസ വാര്‍ത്താക്കുറിപ്പ് ദേശീയ മനുഷ്യാവകാശ കമ്മീഷന്റെ വെബ് സൈറ്റിലെ https://nhrc.nic.in/ മീഡിയ വിഭാഗത്തില്‍ ലഭ്യമാണെന്ന് മനുഷ്യാവകാശ കമ്മീഷന്‍ അറിയിച്ചു.

ആഹാരത്തിലൂടെ ആരോഗ്യം എന്ന സന്ദേശവുമായി ആരോഗ്യ വകുപ്പിന്റെയും ആരോഗ്യ കേരളത്തിന്റെയും കുടുംബശ്രീ മിഷന്റെയും പനമരം സിഡിഎസിന്റെയും ആഭിമുഖ്യത്തില്‍ പോഷകാഹാര ശില്‍പശാലയും പ്രദര്‍ശനവും സംഘടിപ്പിച്ചു. പനമരം ഗ്രാമപഞ്ചായത്ത് ഹാളില്‍ ജില്ലാ മെഡിക്കല്‍ ഓഫീസര്‍ ഡോ കെ.ടി രേഖ ഉദ്ഘാടനം ചെയ്തു. പനമരം സി ഡി എസ് ചെയര്‍പേഴ്‌സണ്‍ ജാനകി ബാബു അധ്യക്ഷയായി. സ്റ്റേറ്റ് ന്യൂട്രീഷന്‍ ആന്റ് ഡയറ്റ് റിലേറ്റഡ് ഇന്റര്‍വെന്‍ഷന്‍ പരിപാടിയുടെ ഭാഗമായി സംഘടിപ്പിച്ച ശില്‍പശാലയില്‍ ട്രൈബല്‍ മേഖലയില്‍ നിന്നുള്ള പോഷകാഹാരങ്ങള്‍ക്കാണ് പ്രാധാന്യം നല്‍കിയത്.

#പോളിം​ഗ് ഉദ്യോ​ഗസ്ഥർക്കുള്ള പരിശീലന കേന്ദ്രങ്ങളും കളക്ടർ സന്ദർശിച്ചു#

നിയമസഭാ പൊതുതിരഞ്ഞെടുപ്പിന്റെ ഭാ​ഗമായി വോട്ടിം​ഗ് മെഷീനുകളുടെ ജില്ലയിലെ സ്വീകരണ വിതരണ കേന്ദ്രങ്ങളും സ്‌ട്രോങ് റൂമുകളും പോളിംഗ് ഉദ്യോഗസ്ഥര്‍ക്കുള്ള പരിശീലനം നടക്കുന്ന പരിശീലന കേന്ദ്രങ്ങളും ജില്ലാ തിരഞ്ഞെടുപ്പ് ഉദ്യോഗസ്ഥയായ ജില്ലാ കളക്ടർ അനു കുമാരി സന്ദര്‍ശിച്ചു.

മാർ ഇവാനിയോസ് കോളേജ്, മാർ ബസേലിയോസ് എഞ്ചിനീയറിം​ഗ് കോളേജ്, പട്ടം കേന്ദ്രീയ വിദ്യാലയം എന്നിവിടങ്ങളിൽ കളക്ടർ നേരിട്ടെത്തി മുന്നൊരുക്കങ്ങൾ വിലയിരുത്തി.