തദ്ദേശ സ്വയംഭരണ സ്ഥാപന തെരഞ്ഞെടുപ്പില്‍ സ്ഥാനാര്‍ത്ഥികളുടെയും രാഷ്ട്രീയ കക്ഷികളുടെയും യോഗങ്ങള്‍ക്ക് നിയന്ത്രണം. കോവിഡ് മാനദണ്ഡങ്ങള്‍ പാലിക്കുന്നതിന് പുറമെ ക്രമസമാധാനം പാലിക്കുന്നതിനും ഗതാഗതം നിയന്ത്രിക്കുന്നതിനും ആവശ്യമായ സജ്ജീകരണങ്ങളൊരുക്കാന്‍ പൊലീസിന് കഴിയുന്ന തരത്തില്‍ യോഗം നടത്തുന്ന സ്ഥലവും സമയവും സ്ഥാനാര്‍ത്ഥികളും രാഷ്ട്രീയ കക്ഷികളും അതത് പ്രദേശത്തെ പൊലീസ് അധികൃതരെ മുന്‍കൂട്ടി അറിയിക്കണം. മറ്റു കക്ഷികളുടെ യോഗങ്ങളും ജാഥകളും അനുയായികള്‍ തടസ്സപ്പെടുത്തുകയോ പ്രശ്‌നങ്ങളുണ്ടാക്കുകയോ ചെയ്യുന്നില്ലെന്ന് അതത് രാഷ്ട്രീയ കക്ഷികളും സ്ഥാനാര്‍ത്ഥികളും ഉറപ്പുവരുത്തുകയും വേണം.

തദ്ദേശ തെരഞ്ഞെടുപ്പിനായി സ്ഥാനാര്‍ത്ഥികള്‍ സമര്‍പ്പിച്ച നാമനിര്‍ദേശപത്രികകള്‍ പിന്‍വലിക്കുന്നത് ജില്ലയില്‍ തുടരുന്നു. ഇന്ന് (നവംബര്‍ 21) വൈകീട്ട് 6.30 വരെയുള്ള കണക്കനുസരിച്ച് മലപ്പുറം ജില്ലയില്‍ 94 ഗ്രാമ പഞ്ചായത്തുകളിലേക്കും 12 നഗരസഭകളിലേക്കും 15 ബ്ലോക്ക് പഞ്ചായത്തുകളിലേക്കും ജില്ലാ പഞ്ചായത്തിലേക്കുമായി അംഗീകരിച്ച 15,557 പത്രികകളില്‍ 371 പത്രികകള്‍ പിന്‍വലിച്ചു. ജില്ലയിലിപ്പോള്‍ 15,186 പേരാണ് മത്സര രംഗത്ത് തുടരുന്നത്.

തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ ഭാഗമായുള്ള പെരുമാറ്റച്ചട്ടം കര്‍ശനമായി പാലിക്കുന്നുണ്ടോയെന്ന് ഉറപ്പുവരുത്താന്‍ പൊതുമരാമത്ത് വകുപ്പ് കെട്ടിടം വിഭാഗം ഡിവിഷനിലെ അസിസ്റ്റന്റ് എഞ്ചിനീയര്‍മാരുടെ നേതൃത്വത്തില്‍ ആന്റിഡീഫേസ്‌മെന്റ് സ്‌ക്വാഡ് രൂപീകരിച്ചു.

ശബരിമല തീര്‍ത്ഥാടനത്തോടനുബന്ധിച്ച് തീര്‍ത്ഥാടകരുടെ ഇടത്താവളമായ കുറ്റിപ്പുറം മിനി പമ്പയിലും ചമ്രവട്ടം അയ്യപ്പക്ഷേത്ര പരിസരത്തും  വേണ്ട സൗകര്യങ്ങള്‍ സജ്ജമാക്കുന്നതിന്   സുരക്ഷ ക്രമീകരണ യോഗം നടന്നു. മിനി പമ്പയിലെ കെടിഡിസിയുടെ ആരാം ഓഡിറ്റോറിയത്തില്‍ തിരൂര്‍ ആര്‍ഡിഒ രാമചന്ദ്രന്റെ നേതൃത്വത്തില്‍ നടന്ന യോഗത്തില്‍ വിവിധ വകുപ്പുകളുടെ കീഴില്‍   സുരക്ഷ സംവിധാനങ്ങള്‍ ഒരുക്കുന്നതിനും ക്രമീകരണങ്ങള്‍ സജ്ജമാക്കാനും തീരുമാനിച്ചു. കോവിഡ് 19 സാഹചര്യത്തില്‍ ശബരിമല ഭക്തക്കര്‍ക്കായി മികച്ച സുരക്ഷാ ക്രമീകരണങ്ങളാണ് മിനി പമ്പയില്‍ ഒരുക്കുന്നത്.

കോട്ടക്കല്‍ ഗവ.വനിതാ പോളിടെക്‌നിക് കോളജിലെ ഒന്നാം വര്‍ഷ വിവിധ ഡിപ്ലോമ പ്രോഗ്രാമുകളിലേക്ക് സ്‌പോട്ട് അഡ്മിഷനുള്ള രജിസ്‌ട്രേഷന്‍  നവംബര്‍ 24ന് വൈകീട്ട് നാല് വരെ നടത്താം. സ്‌പോട്ട് അലോട്ട്‌മെന്റിന് രജിസ്റ്റര്‍ ചെയ്തവരെ മാത്രമേ  സെലക്ഷന് പരിഗണിക്കുകയുള്ളൂ. കമ്പ്യൂട്ടര്‍ ആപ്ലീക്കേഷന്‍ ആന്‍ഡ് ബിസിനസ് മാനേജ്‌മെന്റ്, ഇലക്ട്രോണിക്‌സ് ആന്‍ഡ് കമ്യൂനിക്കേഷന്‍ എഞ്ചിനീയറിങ്, ഇലക്ട്രോണിക്‌സ് എഞ്ചിനീയറിങ്, ഇനന്‍സ്ട്രൂമെന്റേഷന്‍ എഞ്ചിനീയറിങ്  എന്നീ ഡിപ്ലോമ പ്രോഗ്രാമുകളിലാണ് സ്‌പോട്ട് അഡ്മിഷന്‍.

തദ്ദേശ സ്ഥാപനങ്ങളിലേക്ക് നിഷ്പക്ഷവും നീതിപൂര്‍വകവുമായി തെരഞ്ഞെടുപ്പ് നടത്തുന്നതിനായി കമ്മീഷനെ സഹായിക്കാന്‍ ഉയര്‍ന്ന റാങ്കിലുള്ള സര്‍ക്കാര്‍ ഉദ്യോഗസ്ഥര്‍ നിരീക്ഷകരായെത്തും. വോട്ടെടുപ്പ് ദിനത്തിലെ ബൂത്തുപിടിക്കല്‍, വോട്ടര്‍മാരെ തടയല്‍ തുടങ്ങി വോട്ടെടുപ്പ് മന്ദഗതിയിലാക്കുന്ന കാര്യങ്ങള്‍ തടയുക, ക്രമസമാധാനം ഉറപ്പാക്കുന്നതിനുള്ള നടപടികള്‍ സ്വീകരിക്കുക, വോട്ടെടുപ്പ് ദിവസവും വോട്ടെണ്ണല്‍ ദിവസവും തെരെഞ്ഞെടുപ്പ് നടപടികള്‍ തടസ്സപ്പെടുന്ന മറ്റ് സാഹചര്യങ്ങള്‍ ഇല്ലാതാക്കുക തുടങ്ങിയവയാണ് നിരീക്ഷകര്‍ക്കുള്ള ചുമതലകള്‍.

തദ്ദേശ സ്ഥാപനങ്ങളിലേക്കുള്ള  പൊതു തെരഞ്ഞെടുപ്പുമായി ബന്ധപ്പെട്ട് സംസ്ഥാന തെരഞ്ഞെടുപ്പ് കമ്മീഷന്റെ നിര്‍ദേശപ്രകാരം ജില്ലയില്‍ മീഡിയ റിലേഷന്‍സ് സമിതിയുണ്ടാകും. പൊതു തെരഞ്ഞെടുപ്പിനോടനുബന്ധിച്ച് സംസ്ഥാന തെരഞ്ഞെടുപ്പ് കമ്മീഷന്‍ പുറത്തിറക്കിയ മാധ്യമ പ്രവര്‍ത്തനങ്ങളുമായി ബന്ധപ്പെട്ട മാര്‍ഗ നിര്‍ദ്ദേശങ്ങള്‍ ലംഘിച്ചത് സംബന്ധിച്ച് പരാതികളിലും മറ്റ് മാധ്യമ സംബന്ധിയായ കാര്യങ്ങളില്‍ തീര്‍പ്പ് കല്‍പ്പിക്കുന്നതിനും ജില്ലാ തെരഞ്ഞെടുപ്പ് ഓഫീസറെ സഹായിക്കുന്നതിനുമാണ് ജില്ലാതല മീഡിയ റിലേഷന്‍സ് സമിതി.  ജില്ലാ തെരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കലക്ടറാണ്് മീഡിയ റിലേഷന്‍സ് സമിതിയുടെ ചെയര്‍മാന്‍.

സ്ഥാനാര്‍ത്ഥികള്‍ക്ക് തെരഞ്ഞെടുപ്പ് ചിഹ്നം ശുപാര്‍ശ ചെയ്യുന്നതിന്  സംസ്ഥാന കമ്മിറ്റി ചുമതലപ്പെടുത്തിയ ജില്ലാ പാര്‍ട്ടി ഭാരവാഹിയുടെ കത്ത് നാമനിര്‍ദേശ പത്രിക പിന്‍വലിക്കുന്ന ദിവസം (നവംബര്‍ 23) വൈകീട്ട് മൂന്നിനകം സമര്‍പ്പിക്കാവുന്നതാണെന്ന് സംസ്ഥാന തെരഞ്ഞെടുപ്പ് കമ്മീഷണര്‍ വി. ഭാസ്‌കരന്‍ അറിയിച്ചു. സ്ഥാനാര്‍ത്ഥികളുടെ പേരും ചിഹ്നവും 23ന് വൈകീട്ട് മൂന്നിന് ശേഷമാണ് വരണാധികാരി ഫാറം 6ല്‍ രേഖപ്പെടുത്തി സൈറ്റില്‍ നല്‍കുക. ചിഹ്നം അനുവദിക്കുന്നതിനായി സ്ഥാനാര്‍ത്ഥിയോ നിര്‍ദേശകനോ റിട്ടേണിങ് ഓഫീസര്‍ മുമ്പാകെ ഹാജരാകുകയും വേണം.

തദ്ദേശ തെരഞ്ഞെടുപ്പില്‍ മത്സരിക്കുന്ന സ്ഥാനാര്‍ത്ഥികളെ തിരിച്ചറിയാന്‍ പേരിനൊപ്പം കൂട്ടിച്ചേര്‍ക്കലുകള്‍ നടത്താന്‍ അവസരം. ഒരേ വാര്‍ഡിലോ നിയോജക മണ്ഡലത്തിലോ മത്സരിക്കുന്ന സമാന പേരുള്ള സ്ഥാനാര്‍ത്ഥികളെയും നാട്ടില്‍ മറ്റ് പേരുകളില്‍ അറിയപ്പെടുന്നവരെയും വോട്ടര്‍മാര്‍ക്ക് തിരിച്ചറിയാനുള്ള സൗകര്യത്തിനായാണ് കൂട്ടിച്ചേര്‍ക്കലുകള്‍ക്ക് അവസരം നല്‍കുന്നത്.

തദ്ദേശസ്വയംഭരണ തെരഞ്ഞെടുപ്പിനുള്ള പോസ്റ്റല്‍ ബാലറ്റുമായി ബന്ധപ്പെട്ട ഫോറങ്ങളും കവറുകളും വിതരണം ചെയ്തു. 15,16,17 നമ്പര്‍  ഫോറങ്ങളും 18,19 നമ്പര്‍ കവറുകളും ബിഗ് കവറുകളുമാണ് വിതരണം ചെയ്തത്. വോട്ടെണ്ണല്‍ ഏജന്റിന്റെ നിയമനം, പിന്‍വലിക്കല്‍, റിസള്‍ട്ട് ഷീറ്റ്, തെരഞ്ഞെടുപ്പ് സര്‍ട്ടിഫിക്കറ്റ്, തെരഞ്ഞെടുപ്പ് ഏജന്റിന്റെ നിയമനം, പിന്‍വലിക്കല്‍ എന്നീ ഫോറങ്ങളാണ് വര്‍ണാധികാരികള്‍ക്കും ഉപ വര്‍ണാധികാരികള്‍ക്കും നല്‍കിയത്. ജില്ലാ പഞ്ചായത്ത്, 15 ബ്ലോക്ക് പഞ്ചായത്ത്, 12 നഗരസഭകള്‍ എന്നിവിടങ്ങളിലേക്കുള്ള ഫോറങ്ങളാണ് വിതരണം ചെയ്തത്.