പ്രധാനമന്ത്രി കൃഷി സിന്‍ചായി യോജന പ്രകാരം കാര്‍ഷികാവശ്യത്തിനായി പമ്പ് സ്ഥാപിക്കുന്നതിനും കിണറുകളും ചെറിയ കുളങ്ങളും നിര്‍മിക്കുന്നതിനും സബ്‌സിഡി ലഭിക്കുന്നതിന് കര്‍ഷകര്‍ക്ക് അപേക്ഷിക്കാം. 

കൃഷി ആവശ്യത്തിനായി ഡീസല്‍, ഇലക്ട്രിക്കല്‍ മോട്ടോര്‍ പമ്പുകളും അനുബന്ധ സാമഗ്രികളും സ്ഥാപിക്കുന്നതിനായി അടങ്കല്‍ തുകയുടെ 50 ശതമാനമോ പരമാവധി 15000 രൂപയോ പുതിയ കിണറുകളുടെയും ചെറിയ കുളങ്ങളുടെയും നിര്‍മാണത്തിന് അടങ്കല്‍ തുകയുടെ 50 ശതമാനമോ പരമാവധി 10000 രൂപയോ സബ്‌സിഡി ലഭിക്കും. 

ഇലന്തൂര്‍ ബ്ലോക്ക് പഞ്ചായത്തിന്റെ വാര്‍ഷിക പദ്ധതിയില്‍ ഉള്‍പ്പെടുത്തി 13 പട്ടികജാതി യുവാക്കള്‍ക്ക് ഓട്ടോറിക്ഷ നല്‍കി. ഓട്ടോറിക്ഷയുടെ വിതരണം ബ്ലോക്ക് പഞ്ചായത്ത് പ്രസിഡന്റ് എം.ബി സത്യന്‍ നിര്‍വഹിച്ചു. വൈസ് പ്രസിഡന്റ് ജെസ്സി തോമസ് അദ്ധ്യക്ഷത വഹിച്ച യോഗത്തില്‍ സ്ഥിരം സമിതി അധ്യക്ഷരായ കെ.എസ് പാപ്പച്ചന്‍, എന്‍.ശിവരാമന്‍, ജെ ഇന്ദിരാദേവി, അംഗങ്ങളായ ജെറിമാത്യു സാം, ബിജിലി.പി.ഈശോ, രമാദേവി.പി, എ.എന്‍ ദീപ, ജോണ്‍.വി.തോമസ്, വത്സമ്മ മാത്യു, സാലി തോമസ്, ആലീസ് രവി, സെക്രട്ടറി സി.പി രാജേഷ് കുമാര്‍, വ്യവസായ വികസന ഓഫീസര്‍ ജോണ്‍ സാം എന്നിവര്‍ പങ്കെടുത്തു. (പിഎന്‍പി 614/19)

അറ്റകുറ്റപ്പണികള്‍ നടക്കുന്നതിനാല്‍ കുളത്തൂര്‍ ഇലക്ട്രിക്കല്‍ സെക്ഷന്‍ പരിധിയില്‍ കിഴക്കുംകര, മണ്‍വിള മുരുകന്‍കോവില്‍ എന്നീ  പ്രദേശങ്ങളില്‍ നാളെ (ഫെബ്രുവരി 18) രാവിലെ ഒന്‍പത് മുതല്‍ വൈകുന്നേരം അഞ്ചു വരെ വൈദ്യുതി മുടങ്ങും.

കേരള സംസ്ഥാന വഖ്ഫ് ബോര്‍ഡില്‍ രജിസ്റ്റര്‍ ചെയ്തിട്ടുള്ള തിരുവനന്തപുരം ഡിവിഷണല്‍ ഓഫീസിന്റെ പ്രവര്‍ത്തന പരിധിയില്‍പ്പെട്ട തിരുവനന്തപുരം, കൊല്ലം, പത്തനംതിട്ട ജില്ലകളിലെ വിഹിത കുടിശിക വരുത്തിയിട്ടുള്ള വഖ്ഫ് സ്ഥാപനങ്ങള്‍ ഈ ഓഫീസുമായി ബന്ധപ്പെട്ട് ഫെബ്രുവരി 28 ന് മുമ്പായി കുടിശിക തുക മുഴുവനായും അടച്ചു തീര്‍ത്ത് റവന്യൂ റിക്കവറി നടപടികള്‍ ഒഴിവാക്കണമെന്ന് തിരുവനന്തപുരം ഡിവിഷണല്‍ വഖ്ഫ് ഓഫീസര്‍ അറിയിച്ചു.  കൂടുതല്‍ വിവരങ്ങള്‍ക്ക് 0471 2724432, 9495203283.
(പി.ആര്‍.പി. 235/2019)

വസ്തുനികുതി കുടിശിക ഒറ്റത്തവണയായി അടയ്ക്കുന്ന ഗ്രാമപഞ്ചായത്ത് പ്രദേശങ്ങളിലെ നികുതിദായകര്‍ക്ക് പിഴപ്പലിശ മാര്‍ച്ച് 31 വരെ ഒഴിവാക്കി സര്‍ക്കാര്‍ ഉത്തരവായി. നിയമപരമായി വസ്തുനികുതി അടയ്ക്കാന്‍ ബാദ്ധ്യസ്ഥരായ മുഴുവന്‍ വ്യക്തികളും സ്ഥാപന ഉടമകളും ആനുകൂല്യം പ്രയോജനപ്പെടുത്തി കുടിശ്ശിക ഉള്‍പ്പെടെയുള്ള വസ്തുനികുതി ബന്ധപ്പെട്ട ഗ്രാമപഞ്ചായത്തുകളില്‍ അടയ്ക്കണമെന്ന് പഞ്ചായത്ത് ഡയറക്ടര്‍ അറിയിച്ചു. ഈ ആനുകൂല്യം വരുന്ന സാമ്പത്തിക വര്‍ഷങ്ങളില്‍ അനുവദിക്കില്ലെന്നും ഡയറക്ടര്‍ അറിയിച്ചു.
(പി.ആര്‍.പി. 234/2019)

ഉഴമലയ്ക്കല്‍ ഗ്രാമപഞ്ചായത്തിലെ പുതുക്കുളങ്ങര എല്‍.പി.എസ് സ്‌കൂളിലെ നവീകരിച്ച ക്ലാസ് മുറിയുടെയും ഓപ്പണ്‍ എയര്‍ ഓഡിറ്റോറിയത്തിന്റെയും ഉദ്ഘാടനം ഗ്രാമപഞ്ചായത്ത് പ്രസിഡന്റ് എ. റഹിം നിര്‍വഹിച്ചു. ഗ്രാമപഞ്ചായത്തിന്റെ തനതു ഫണ്ടുപയോഗിച്ചാണ് നിര്‍മാണം പൂര്‍ത്തിയാക്കിയത്. വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാന്‍ കെ. ജയകുമാര്‍ അദ്ധ്യക്ഷത വഹിച്ച ചടങ്ങില്‍ വെള്ളനാട് ബ്ലോക്ക് പഞ്ചായത്ത് അംഗങ്ങള്‍, ഉഴമലയ്ക്കല്‍ ഗ്രാമപഞ്ചായത്തംഗങ്ങള്‍, ഉദ്യാഗസ്ഥര്‍ തുടങ്ങിയവര്‍ സംബന്ധിച്ചു.
(പി.ആര്‍.പി. 233/2019)

മത്സ്യതൊഴിലാളി കടാശ്വാസ കമ്മീഷന്റെ മാര്‍ച്ച് മാസത്തെ അദാലത്ത് മാര്‍ച്ച് 20ന് രാവിലെ പത്തിന് സര്‍ക്കാര്‍ ഗസ്റ്റ് ഹൗസില്‍ നടക്കും. അപേക്ഷ സമര്‍പ്പിച്ചവരില്‍ കടാശ്വാസവുമായി ബന്ധപ്പെട്ട് പരാതിയുള്ളവര്‍ ഫെബ്രുവരി 28നു മുന്‍പ് സെക്രട്ടറി, കേരള മത്സ്യത്തൊഴിലാളി കടാശ്വാസ കമ്മീഷന്‍, റ്റി.സി 11/884/2, നളന്ദ റോഡ്, നന്ദന്‍കോട്, കവടിയാര്‍ 695003 എന്ന വിലാസത്തില്‍ പരാതി നല്‍കണം. കൂടുതല്‍ വിവരങ്ങള്‍ക്ക് 0471-2312010.
(പി.ആര്‍.പി. 232/2019)

ടാറിംഗ് പ്രവര്‍ത്തികള്‍ നടക്കുന്നതിനാല്‍ വട്ടവിള ജംഗ്ഷന്‍ മുതല്‍ പിരായുംമൂട് ജംഗ്ഷന്‍ വരെയുള്ള പ്രദേശത്ത് ഫെബ്രുവരി 18 മുതല്‍ 28 വരെ ഗതാഗത നിയന്ത്രണമുണ്ടാകുമെന്ന് പൊതുമരാമത്ത് വകുപ്പ് അസിസ്റ്റന്റ് എഞ്ചിനീയര്‍ പ്രിമി എസ് അറിയിച്ചു. ഇതുവഴി പോകേണ്ട യാത്രക്കാര്‍ ഉദിയന്‍കുളങ്ങര-വട്ടവിള-വ്‌ളാത്താങ്കര വഴി പോകണമെന്നും അറിയിപ്പില്‍ പറയുന്നു.
(പി.ആര്‍.പി. 231/2019)

സുജലം സുഫലം കൃഷി മാര്‍ഗരേഖയുടെ മേഖലാ പരിശീലനം അതിയന്നൂര്‍ ബ്ലോക്ക് പഞ്ചായത്ത് ഹാളില്‍ സബ് കളക്ടര്‍ കെ. ഇമ്പശേഖര്‍ ഉദ്ഘാടനം ചെയ്തു.  കേരള ഇന്‍സ്റ്റിറ്റ്യൂട്ട് ഓഫ് ലോക്കല്‍ അഡ്മിനിസ്‌ട്രേഷന്റെയും ഹരിതകേരളം ജില്ലാ മിഷന്റെയും നേതൃത്വത്തിലാണ് പരിപാടി സംഘടിപ്പിച്ചത്.  
ഹരിതകേരളം മിഷനിലെ മൂന്നാമത്തെ ഉപദൗത്യമായ കൃഷി വികസനം 'സുജലം - സുഫലം' എന്ന പദ്ധതിയിലുള്‍പ്പെടുത്തിയാണ് നടപ്പാക്കുന്നത്.  ജൈവകൃഷി, നെല്‍കൃഷി, പച്ചക്കറി കൃഷി, മാലിന്യ സംസ്‌കരണം എന്നീ മേഖലകളിലാണ് വിവിധ പരിപാടികള്‍ സംഘടിപ്പിക്കുന്നത്.    

നെടുമങ്ങാട് ജില്ലാ ആശുപത്രിയിലെ താത്കാലിക നിയമനങ്ങള്‍ സംബന്ധിച്ച് ഉയര്‍ന്നിരിക്കുന്ന വിവാദം അടിസ്ഥാനരഹിതവും ഗൂഢലക്ഷ്യത്തോടെയുള്ളതുമാണെന്ന് ആശുപത്രി മാനേജ്‌മെന്റ് കമ്മിറ്റി. ആശുപത്രിയിലെ താത്കാലിക നിയമനങ്ങള്‍ നിയമപരവും വ്യവസ്ഥാപിത മാര്‍ഗത്തിലൂടെയുള്ളതുമാണെന്ന് എച്ച്.എം.സി. ചെയര്‍മാന്‍കൂടിയായ ജില്ലാ പഞ്ചായത്ത് പ്രസിഡന്റ് വി.കെ. മധു വാര്‍ത്താ സമ്മേളനത്തില്‍ പറഞ്ഞു.