ഇത്തിക്കര ബ്ലോക്ക്പഞ്ചായത്തിന്റെയും കലയ്‌ക്കോട് കുടുംബാരോഗ്യകേന്ദ്രത്തിന്റെയും സംയുക്താഭിമുഖ്യത്തില്‍ പാലിയേറ്റീവ് കുടുംബ സംഗമം സംഘടിപ്പിച്ചു. ചാത്തന്നൂര്‍ ഇസിയാന്‍ ഇന്‍ഡോര്‍ സ്റ്റേഡിയത്തില്‍ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് എം കെ ശ്രീകുമാര്‍ നിര്‍വഹിച്ചു. ബോധവല്‍ക്കരണ ക്ലാസുകള്‍, കിറ്റ്‌വിതരണം, കലാസാംസ്‌കാരിക പരിപാടികള്‍ തുടങ്ങിയവയും നടന്നു.

ഉത്രാളിക്കാവ് പൂരം അഖിലേന്ത്യാ എക്സിബിഷൻ  ഫെബ്രുവരി 16 ന് വൈകീട്ട് 6 ന് സംസ്ഥാന ജലവിഭവ വകുപ്പ് മന്ത്രി റോഷി അഗസ്റ്റിൻ ഉദ്ഘാടനം ചെയ്യും. സേവ്യർ ചിറ്റിലപ്പിള്ളി എംഎൽഎ അദ്ധ്യക്ഷനാകും. ഉത്രാളിക്കാവ് പൂരത്തിന്റെ  സാംസ്‌കാരിക, ടൂറിസം പ്രാധാന്യം കണക്കിലെടുത്ത് സംസ്കാരം, പൈതൃകം, പരിസ്ഥിതി എന്നിവയുടെ സംരക്ഷണത്തിനും പരിപോഷണത്തിനുമായി സംസ്ഥാന സർക്കാർ 5 ലക്ഷം രൂപ  അനുവദിച്ചിട്ടുണ്ട്. ഈ വർഷം മുതൽ സംസ്ഥാന സർക്കാരിന്റെ ടൂറിസം കലണ്ടറിലും ഉത്രാളിക്കാവ് പൂരം ഇടം പിടിച്ച് ആഗോള ശ്രദ്ധ നേടുകയാണ്.

പൊന്നാനിൽ നിന്നും മത്സ്യബന്ധനത്തിന്  പോയി ആഴകടലില്‍ കുടുങ്ങിയ ആറ് മത്സ്യതൊഴിലാളികളെ ഫിഷറീസ് വകുപ്പിന്റെ സീ റെസ്ക്യൂ ടീം രക്ഷാപ്രവര്‍ത്തനം നടത്തി മുനക്കകടവ് ഹാർബറിൽ എത്തിച്ചു. പൊന്നാനി സ്വദേശി അബ്ദുള്ളക്കുട്ടി എന്നയാളുടെ ഉടമസ്ഥതയിലുളള ഭാരത്
എന്ന ബോട്ടിലെ മത്സ്യ തൊഴിലാളികളെയാണ് രക്ഷപ്പെടുത്തിയത്. ചാവക്കാട് ലൈറ്റ് ഹൗസിൽ നിന്നും എട്ട് നോട്ടിക്കല്‍ മൈല്‍  അകലെ വടക്ക് പടിഞ്ഞാറ് കടലിലാണ്  ബോട്ടിന്റെ ‍എഞ്ചിൻ നിലച്ചതിനെ തുടർന്ന് മത്സ്യത്തൊഴിലാളികൾ കുടുങ്ങിയത്. 

കുന്നംകുളം നഗരസഭ 2024-25 വാര്‍ഷിക പദ്ധതി അംഗീകാരത്തിന് ജില്ലാ ആസൂത്രണ സമിതിക്ക് സമര്‍പ്പിച്ച പദ്ധതികളില്‍ 146 എണ്ണത്തിന് ഡി പി സി അംഗീകാരം ലഭിച്ചതായി ചെയര്‍പേഴ്സണ്‍ സീത രവീന്ദ്രന്‍ അറിയിച്ചു. 

പൊതുവിഭാഗത്തില്‍ 16.12 കോടി രൂപയുടെയും പട്ടികജാതി വിഭാഗത്തില്‍ 4.41 കോടി രൂപയുടെയും പ്രവര്‍ത്തനങ്ങള്‍ അടക്കം ആകെ 20,53,90,518 രൂപയുടെ പദ്ധതി പ്രവര്‍ത്തനങ്ങള്‍ക്കാണ് ഡി പി സി അംഗീകാരം നല്‍കിയത്.

ട്രാൻസ്ജെൻഡർ വ്യക്തികളുടെ സർഗ്ഗ വാസനയും കലാഅഭിരുചിയും പരിപോഷിപ്പിക്കുക, അവരെ സമൂഹത്തിന്റെ മുഖ്യധാരയിലേക്ക് ഉയർത്തിക്കൊണ്ടുവരുക എന്ന ലക്ഷ്യത്തോടെ 2019 ൽ തുടക്കം കുറിച്ച ട്രാൻസ്ജെൻഡർ ഫെസ്റ്റ് സംസ്ഥാന കലോൽസവം ഈ വർഷം 'വർണ്ണപ്പകിട്ട് 2024' എന്ന പേരിൽ ഫെബ്രുവരി 17, 18, 19 തിയതികളിലായി തൃശ്ശൂരിൽ നടക്കും. 

കേരള മോട്ടോർ തൊഴിലാളി ക്ഷേമനിധി ബോർഡിൽ അംഗങ്ങളായ തൊഴിലാളികളുടെ മക്കൾക്ക് സൗജന്യമായി ലാപ്ടോപ്പ് വിതരണം ചെയ്യുന്നു.

വള്ളിക്കീഴ് സര്‍ക്കാര്‍ ഹയര്‍സെക്കന്‍ഡറി സ്‌കൂളിന്റെ വാര്‍ഷികാഘോഷവും പുതുതായി നിര്‍മിച്ച പാചകശാലയുടെ ഉദ്ഘാടനവും മേയര്‍ പ്രസന്ന ഏണസ്റ്റ് നിര്‍വഹിച്ചു. കിച്ചണ്‍, സ്റ്റോര്‍-ഡൈനിങ്ങ് റൂം എന്നിവയുമുണ്ട്. സ്‌കൂള്‍ ഓഡിറ്റോറിയത്തിന് പുതിയ സൗണ്ട് സിസ്റ്റവും. ജനകീയസൂത്രണ പദ്ധതി പ്രകാരമാണ് നടപ്പിലാക്കിയത്.

ഉറുകുന്ന് കോളനി നിവാസികള്‍ക്ക് അവശ്യരേഖകളെല്ലാം ലഭ്യമാക്കുന്ന പ്രവര്‍ത്തനം സാക്ഷാത്കരിച്ചു. എ ബി സി ഡി (അക്ഷയ ബിഗ് ക്യാമ്പയിന്‍ ഫോര്‍ ഡോക്യുമെന്റ് ഡിജിറ്റലൈസേഷന്‍) പദ്ധതി മുഖേനയാണ് സാധ്യമാക്കിയത്. രേഖകളെല്ലാം ഇനി ഡിജിലോക്കറില്‍ സുരക്ഷിതം. ആധാര്‍-റേഷന്‍ കാര്‍ഡുകള്‍, ജനന സര്‍ട്ടിഫിക്കറ്റ്, ഇലക്ഷന്‍ ഐ ഡി, ആരോഗ്യ ഇന്‍ഷുറന്‍സ്, ബാങ്ക് പാസ്ബുക്ക് തുടങ്ങിയ രേഖകളുടെ വിതരണമാണ് പട്ടികവര്‍ഗ്ഗവികസന വകുപ്പ് ഉറുകുന്ന് കോളനി നിവാസികള്‍ക്കായി സംഘടിപ്പിച്ച ക്യാമ്പിലൂടെ നടത്തിയത്. ജില്ലയിലെ രണ്ടാമത്തെ ക്യാമ്പാണിത്. അഞ്ചല്‍ ബ്ലോക്ക് പഞ്ചായത്ത് പ്രസിഡന്റ് ഓമന മുരളി ഉദ്ഘാടനം ചെയ്തു

കരിയര്‍ ഗൈഡന്‍സ് ആന്റ് കൗണ്‍സിലിങ് സെല്ലിന്റെ കരിയര്‍ മാസ്റ്റര്‍ അവാര്‍ഡ് 2024 -ന്റെ വിതരണം ഫെബ്രുവരി 16ന് ഉച്ചയ്ക്ക് രണ്ടിന് തിരുവനന്തപുരം മണ്‍വിള അഗ്രികള്‍ച്ചറല്‍ സ്റ്റാഫ് ട്രെയിനിങ് കോളജില്‍ നടത്തും. പൊതുവിദ്യാഭ്യാസ ഡയറക്ടര്‍ എസ് ഷാനവാസ് ഉദ്ഘാടനം നിര്‍വഹിക്കും. അവാര്‍ഡ് ജേതാക്കള്‍ പങ്കെടുക്കണമെന്ന് വകുപ്പ് മേധാവി അറിയിച്ചു.

പൊതുവിദ്യാഭ്യാസ വകുപ്പില്‍ വൊക്കേഷണല്‍ ഹയര്‍ സെക്കന്‍ഡറി വിഭാഗത്തില്‍ കരിയര്‍ ഗൈഡന്‍സ് ആന്റ് കൗണ്‍സലിംഗ് സെല്ലിന്റെ 2022-23ലെ സംസ്ഥാന ബെസ്റ്റ് കരിയര്‍ മാസ്റ്റര്‍ അവാര്‍ഡ് വെണ്ടാര്‍ ശ്രീ വിദ്യാധിരാജ വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ കൊമേഴ്‌സ് വിഭാഗം അധ്യാപകനും കരിയര്‍ മാസ്റ്ററുമായ തലവൂര്‍ മഞ്ഞക്കാല സ്വദേശി പി.എ.സജിമോന് ലഭിച്ചു.

കേരള സര്‍ക്കാരിന്റെ സംസ്ഥാന അദ്ധ്യാപക അവാര്‍ഡ്, നാഷണല്‍ സര്‍വ്വീസ് സ്‌കീം ബെസ്റ്റ് പ്രോഗ്രാം ഓഫീസര്‍ അവാര്‍ഡ് എന്നിവ നേടിയിട്ടുണ്ട്.