തദ്ദേശ സ്വയംഭരണ സ്ഥാപനങ്ങളിലേക്കുള്ള തെരെഞ്ഞെടുപ്പിന് ജില്ലയിലെ ഒരുക്കങ്ങള്‍ അവസാനഘട്ടത്തില്‍. ഉദ്യോഗസ്ഥര്‍ക്കുള്ള പരിശീലനം, വോട്ടിംഗ് യന്ത്രങ്ങളുടെ പരിശോധന തുടങ്ങിയവ പൂര്‍ത്തിയായിവരുന്നു. പ്രിസൈഡിങ് ഓഫീസര്‍മാരടക്കമുള്ള തെരഞ്ഞെടുപ്പ് ഉദ്യോഗസ്ഥരുടെ മാസ്റ്റര്‍ ട്രെയിനര്‍മാര്‍ക്കുള്ള പരിശീലനം അടുത്ത ദിവസം ആരംഭിക്കും.

സംസ്ഥാനത്ത് മൂന്നു ഘട്ടങ്ങളിലായി നടത്തുന്ന തദ്ദേശ തെരഞ്ഞെടുപ്പില്‍ കോഴിക്കോട് ജില്ലയിലെ വോട്ടെടുപ്പ് ഡിസംബര്‍ 14ന്.  മാതൃകാ പെരുമാറ്റച്ചട്ടം നിലവില്‍ വന്നു.  ഡിസംബര്‍ 8, 10, 14 തീയതികളിലാണ് സംസ്ഥാനത്ത് തെരഞ്ഞെടുപ്പ് നടക്കുക.  ഡിസംബര്‍ എട്ടിന് തിരുവനന്തപുരം,
 കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളിലും 10ന് കോട്ടയം, എറണാകുളം, തൃശൂര്‍, പാലക്കാട്, വയനാട് ജില്ലകളിലും 14 ന് മലപ്പുറം, കോഴിക്കോട്, കണ്ണൂര്‍, കാസര്‍കോട് ജില്ലകളിലും തെരഞ്ഞെടുപ്പ് നടക്കും.  വോട്ടെണ്ണല്‍ ഡിസംബര്‍ 16ന്.  

ദേശീയ ആരോഗ്യ ദൗത്യത്തിനു കീഴില്‍ കരാര്‍ അടിസ്ഥാനത്തില്‍ ജിബിവിഎം കോ ഓര്‍ഡിനേറ്റര്‍ തസ്തികയിലേക്ക് വനിതകളില്‍നിന്നും
 അപേക്ഷ ക്ഷണിച്ചു.  

ഫിഷറീസ് വകുപ്പില്‍ കോഴിക്കോട് ജില്ലയില്‍ ആരംഭിക്കുന്ന റീജ്യണല്‍ കണ്‍ട്രോള്‍ റൂമിലേക്ക്  സിസ്റ്റം അഡ്മിനിസ്ട്രേറ്ററെ ഒരു വര്‍ഷത്തേക്ക് കരാര്‍ അടിസ്ഥാനത്തില്‍ നിയമിക്കുന്നതിന് അപേക്ഷ ക്ഷണിച്ചു. യോഗ്യത - കമ്പ്യൂട്ടര്‍ സയന്‍സ് അല്ലെങ്കില്‍ ഇലക്ടോണിക്സ് കമ്മ്യൂണിക്കേഷന്‍ ബി ടെക് ബിരുദം.  വേതനം പ്രതിമാസം 25000 രൂപ.  പ്രായപരിധി 22 നും 45 നുമിടയില്‍. അപേക്ഷകള്‍ ഫിഷറീസ് ഡെപ്യൂട്ടി ഡയറക്ടര്‍, ഫിഷറീസ് ഡെപ്യൂട്ടി ഡയറക്ടര്‍ ഓഫീസ്, വെസ്റ്റ്ഹില്‍, കോഴിക്കോട് 673005 എന്ന വിലാസത്തില്‍ നവംബര്‍ 16 ന് വൈകീട്ട് അഞ്ചിനകം ലഭിക്കണം. കൂടുതല്‍ വിവരങ്ങള്‍ക്ക്  0495 2383780.

 ഭാരതീയ ചികിത്സാ വകുപ്പും കോഴിക്കോട് ജില്ല പഞ്ചായത്തും സംയുക്തമായി പുറക്കാട്ടിരിയിലെ എ.സി.ഷണ്‍മുഖദാസ് മെമ്മോറിയല്‍ ആയുര്‍വ്വേദ ചൈല്‍ഡ് ആന്റ് അഡോളസെന്റ് കെയര്‍ സെന്ററില്‍ നടപ്പാക്കുന്ന  സ്പന്ദനം പ്രോജക്ടില്‍ പുരുഷ ഫിസിയോതെറാപ്പിസ്റ്റ് ഒഴിവിലേക്ക് നവംബര്‍ 13ന് രാവിലെ 10.30ന് കൂടിക്കാഴ്ച നടത്തും. യോഗ്യത - ബിഒടി, ബിപിടി തുല്യത.  ഫോണ്‍: 0495 2371486.

തെക്കേടത്ത് കടവ് - നിരത്ത് കടവ് റോഡില്‍ നവീകരണ പ്രവൃത്തിയുടെ ഭാഗമായ കലുങ്ക് നിര്‍മ്മാണം നടക്കുന്നതിനാല്‍ നവംബര്‍ ഒന്‍പത് മുതല്‍ പ്രവൃത്തി തീരുന്നതുവരെ ഇതുവഴിയുളള ഗതാഗതം നിരോധിച്ചു.  വാഹനങ്ങള്‍ തെക്കേടത്ത് കടവ് കുനിയോട്- വടക്കുമ്പാട് ഹൈസ്‌കൂള്‍ റോഡ് വഴി പോകണമെന്ന് എക്സിക്യൂട്ടീവ് എഞ്ചിനീയര്‍ അറിയിച്ചു.

 മലാപ്പറമ്പ് വനിതാപോളിടെക്നിക് കോളേജില്‍ ഒന്നാംവര്‍ഷ പോളിടെക്നിക് ഡിപ്ലോമ കോഴ്സ് അലോട്ട്മെന്റ് ലിസ്റ്റില്‍ ഉള്‍പ്പെട്ട വിദ്യാര്‍ഥികളില്‍  ഇലക്ട്രോണിക്സ് വിഭാഗം പട്ടികയിലുള്ളവര്‍ നവംബര്‍ ഒന്‍പതിനും കൊമേര്‍ഷ്യല്‍ പ്രാക്ടീസ് വിഭാഗത്തിലുള്ളവര്‍ 10നും രാവിലെ 10ന് അസ്സല്‍ സര്‍ട്ടിഫിക്കറ്റുകളും ഫീസും സഹിതം പ്രവേശന നടപടികളില്‍ പങ്കെടുക്കണമെന്ന് പ്രിന്‍സിപ്പാള്‍ അറിയിച്ചു.  ഫോണ്‍: 495 2370714.