ഒക്ടോബര്‍ 24 ന് മന്ത്രി എം.ബി.രാജേഷ് ഉദ്‌ഘാടനം ചെയ്യും 

പട്ടികജാതി വിഭാഗത്തില്‍പ്പെട്ട കുടുംബങ്ങള്‍ക്കായി ഏഴോം ഗ്രാമപഞ്ചായത്തില്‍ നിര്‍മിച്ച ഭവന സമുച്ചയം ഒക്ടോബര്‍ 24 ന് വൈകീട്ട് നാല് മണിക്ക് തദ്ദേശ സ്വയംഭരണ എക്‌സൈസ് വകുപ്പ് മന്ത്രി എം.ബി രാജേഷ് ഉദ്ഘാടനം ചെയ്യുമെന്ന് ജില്ലാപഞ്ചായത്ത് പ്രസിഡന്റ് അഡ്വ. കെ.കെ രത്‌നകുമാരി വാർത്താ സമ്മേളനത്തില്‍ അറിയിച്ചു. എം വിജിന്‍ എം എല്‍ എ അധ്യക്ഷനാകും. 

കണ്ണൂർ ഗവ. സിറ്റി ഹയര്‍ സെക്കന്‍ഡറി സ്‌കൂളിന്റെ പുതിയ കെട്ടിടത്തിന് 2.8 കോടി രൂപയുടെ ഭരണാനുമതി ലഭിച്ചു. ഇരുനില കെട്ടിടത്തില്‍ അഞ്ച് ക്ലാസ് റൂം, രണ്ട് ടോയ്‌ലറ്റ് ബ്ലോക്ക്,  പ്രിന്‍സിപ്പല്‍ റൂം, സ്റ്റാഫ്‌റൂം എന്നീ സൗകര്യങ്ങളുണ്ടാകും. പുതിയ കെട്ടിടത്തിന്റെ നടപടിക്രമങ്ങള്‍ വേഗത്തില്‍ പൂര്‍ത്തിയാക്കി പ്രവൃത്തി തുടങ്ങാന്‍ രജിസ്‌ട്രേഷന്‍ വകുപ്പ് മന്ത്രി രാമചന്ദ്രന്‍ കടന്നപ്പള്ളി ബന്ധപ്പെട്ടവര്‍ക്ക് നിര്‍ദേശം നല്‍കി.

കാഞ്ഞിരോട് സാംസ്‌കാരിക നിലയം സ്ഥാപിക്കുന്നതിന് രജിസ്‌ട്രേഷന്‍ വകുപ്പ് മന്ത്രി രാമചന്ദ്രന്‍ കടന്നപ്പള്ളിയുടെ എം എൽ എ ആസ്തി വികസന ഫണ്ടില്‍ നിന്നും 96 ലക്ഷത്തിന്റെ ഭരണാനുമതിയായി. പ്രവൃത്തി ഉദ്ഘാടനം നവംബര്‍ നാലിന് രാവിലെ 9.30 ന് മന്ത്രി രാമചന്ദ്രന്‍ കടന്നപ്പള്ളി നിര്‍വഹിക്കും. മുന്‍ എം പി കെ.കെ രാഗേഷ് അധ്യക്ഷനാകും. ജില്ലാപഞ്ചായത്ത് പ്രസിഡന്റ് അഡ്വ. കെ.കെ രത്‌നകുമാരി, ബ്ലോക്ക് പഞ്ചായത്ത് പ്രസിഡന്റ് പി.കെ പ്രമീള, മുണ്ടേരി ഗ്രാമപഞ്ചായത്ത് പ്രസിഡന്റ് എ അനിഷ, താലൂക്ക് ലൈബ്രറി കൗണ്‍സില്‍ സെക്രട്ടറി കെ.ടി ശശി എന്നിവര്‍ പങ്കെടുക്കും.

മാനേജ്മെന്റുകൾക്ക് കീഴിലുള്ള വിദ്യാഭ്യാസ സ്ഥാപനങ്ങളിൽ നടക്കുന്ന തൊഴിൽ ചൂഷണങ്ങൾ സംബന്ധിച്ച് പരിശോധന നടത്തി റിപ്പോർട്ട് സമർപ്പിക്കാൻ വിദ്യാഭ്യാസ വകുപ്പിനോട് ആവശ്യപ്പെട്ടതായി വനിതാ കമ്മീഷൻ ചെയർപേഴ്സൺ അഡ്വ.പി.സതീദേവി പറഞ്ഞു. കണ്ണൂർ കളക്ട്രേറ്റ് ഓഡിറ്റോറിയത്തിൽ നടന്ന കമ്മീഷൻ  അദാലത്തിനു ശേഷം മാധ്യമങ്ങളോട് സംസാരിക്കുകയായിരുന്നു പി.സതീദേവി. 

കോട്ടയം: കേരള കർഷകതൊഴിലാളി ക്ഷേമനിധി ബോർഡ് കോട്ടയം ജില്ലാ ഓഫീസിൽ 2015  സെപ്റ്റംബർ മുതൽ 2025 സെപ്റ്റംബർ  വരെയുള്ള 10 വർഷ കാലപരിധിക്കുള്ളിൽ 24 മാസത്തിൽ കൂടുതൽ അംശദായ കുടിശ്ശിക വരുത്തി അംഗത്വം നഷ്ടപ്പെട്ട തലയാഴം വില്ലേജിലെ തൊഴിലാളികൾക്ക് അംശദായ കുടിശ്ശിക പിഴ സഹിതം അടച്ച് അംഗത്വം പുനഃസ്ഥാപിക്കുന്നതിന് അവസരം. ഇതിനായി ക്ഷേമനിധി ഉദ്യോഗസ്ഥർ ഒക്ടോബർ 25ന് രാവിലെ 10 മുതൽ മൂന്നുവരെ തലയാഴം ഗ്രാമപഞ്ചായത്ത് ഹാളിൽ സിറ്റിംഗ് നടത്തും. വിശദവിവരത്തിന് ജില്ലാ എക്സിക്യൂട്ടീവ് ഓഫീസുമായി ബന്ധപ്പെടണം. ഫോൺ: 0481 2585604.

കോട്ടയം: തലയോലപ്പറമ്പ് കാർത്യായനി ടെംപിൾ റോഡിൽ ഇന്റർലോക്കിങ് ജോലികൾ ആരംഭിക്കുന്നതിനാൽ ഒക്ടോബർ 22 മുതൽ ഇതുവഴിയുള്ള വാഹനഗതാഗതം ഇനി അറിയിപ്പുണ്ടാകുന്നത് വരെ നിരോധിച്ചതായി പി.ഡബ്ല്യു.ഡി അസിസ്റ്റന്റ് എൻജിനീയർ അറിയിച്ചു.

കോട്ടയം: കേരള സർക്കാർ സ്ഥാപനമായ ഇൻസ്റ്റിറ്റ്യൂട്ട് ഫോർ ക്ലൈമറ്റ് ചെയ്ഞ്ച് സ്റ്റഡീസിൽ പ്രോജക്ട് സയന്റിസ്റ്റ് ഒഴിവുകളിലേക്ക് അപേക്ഷ ക്ഷണിച്ചു. വിശദവിവരത്തിന് www.iccs.res.in എന്ന വെബ്സൈറ്റ് സന്ദർശിക്കുക.

സംസ്ഥാന സര്‍ക്കാറിന്റെ ആഭിമുഖ്യത്തില്‍ തദ്ദേശ സ്വയംഭരണ വകുപ്പും ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പും സംയുക്തമായി  സംഘടിപ്പിക്കുന്ന വികസന സദസ് വടകരപ്പതി ഗ്രാമപഞ്ചായത്തില്‍ നടന്നു. വടകരപതി ഗ്രാമപഞ്ചായത്ത് പ്രസിഡന്റ് ഡി. ജോസി ബ്രിട്ടോ  ഉദ്ഘാടനം ചെയ്തു. സംസ്ഥാന പദ്ധതികളുടെ അവതരണം റിസോഴ്‌സ് പേഴ്‌സണ്‍ പി.എം കുഞ്ഞുകുഞ്ഞ് നിര്‍വഹിച്ചു. തദ്ദേശ സ്ഥാപനതല റിപ്പോര്‍ട്ട് വടകരപ്പതി പഞ്ചായത്ത് സെക്രട്ടറി എ. മേരി ബിബിയാന അവതരിപ്പിച്ചു.

സംസ്ഥാന വനിതാക്കമ്മിഷന്‍ ഇടുക്കി ജില്ല അദാലത്തില്‍ 13 പരാതികള്‍ തീര്‍പ്പാക്കി. കമ്മിഷന്‍ അംഗമായ അഡ്വ. എലിസബത്ത് മാമന്‍ മത്തായിയുടെ നേതൃത്വത്തില്‍ ഇടുക്കി കളക്ടറേറ്റ് കോണ്‍ഫറന്‍സ് ഹാളില്‍ നടത്തിയ അദാലത്തില്‍ 40 പരാതികളാണ് പരിഗണനയ്ക്കു വന്നത്. അതില്‍ ഒരു പരാതി പൊലീസ് റിപ്പോര്‍ട്ടിനായി നല്‍കി. 26 പരാതികള്‍ അടുത്ത അദാലത്തിലേക്ക് മാറ്റി. അദാലത്തില്‍ കൗണ്‍സിലര്‍ റുബിയ, പൊലീസ് വനിതാ സെല്ലിലെ ഉദ്യോഗസ്ഥര്‍ തുടങ്ങിയവരും പങ്കെടുത്തു.

ചിത്രം: ഇടുക്കി ജില്ലയില്‍ സംഘടിപ്പിച്ച അദാലത്തില്‍ നിന്ന്

മനുഷ്യാവകാശലംഘന പ്രശ്‌നങ്ങള്‍ നേരിട്ട് മനസിലാക്കുന്നതിന് മനുഷ്യാവകാശ കമ്മിഷന്‍ ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസ് തൊടുപുഴ പൊതുമരാമത്ത് റെസ്റ്റ് ഹൗസില്‍ ഹിയറിങ് നടത്തി. 30 പരാതികളാണ് പരിഗണനയ്ക്കു വന്നത്. അതില്‍ 23 പരാതികള്‍ തീര്‍പ്പാക്കി. ബാക്കിയുള്ളവ തുടര്‍ നടപടികള്‍ക്കായി മാറ്റിവച്ചു.