ജില്ലാ പഞ്ചായത്തിന്റെ  ജോബ് സ്‌കൂള്‍ പദ്ധതി പ്രകാരം പട്ടിക വര്‍ഗ്ഗ വിദ്യാര്‍ത്ഥികള്‍ക്ക് പി.എസ്.സി പരിശീലനം നല്‍കുന്നതിനായി പരിശീലകരെ നിയമിക്കുന്നു. താല്‍പര്യമുള്ളവര്‍ വാക് ഇന്‍ ഇന്റര്‍വ്യൂനായി ജില്ലാ പഞ്ചായത്ത് ഹാളില്‍ ഒക്ടോബര്‍ 28ന് രാവിലെ 10.30 ന്  യോഗ്യത, പ്രവൃത്തി പരിചയം എന്നിവ തെളിയിക്കുന്ന രേഖകളുമായി നേരിട്ട് എത്തിച്ചേരണമെന്ന് പട്ടികവര്‍ഗ്ഗ വികസന ഓഫീസര്‍ അറിയിച്ചു. ഫോണ്‍: 0491-2505383

കേരളസര്‍ക്കാര്‍ കുടുംബശ്രി വഴി നടപ്പാക്കുന്ന കഫേ കുടുംബശ്രി പ്രീമിയം റെസ്റ്റോറന്റിന്റെ ഉദ്ഘാടനം തദ്ദേശ സ്വയംഭരണ-എക്‌സൈസ് പാര്‍ലമെന്ററികാര്യ വകുപ്പ്  മന്ത്രി എം.ബി രാജേഷ്  ഇന്ന് (ഒക്ടോബര്‍ 23) നിര്‍വഹിക്കും. പന്തലാംപാടം വഴിയോര വിശ്രമ കേന്ദ്രത്തില്‍ വൈകിട്ട് 6.30ന് നടക്കുന്ന പരിപാടിയില്‍ പി.പി സുമോദ് എംഎല്‍എ അധ്യക്ഷനാകും.ജില്ലാപഞ്ചായത്ത് പ്രസിഡന്റ് കെ.ബിനുമോള്‍ മുഖ്യാതിഥിയാകും.

ജില്ലയിലെ കാര്‍ഷിക വികസനത്തിന് കുതിപ്പേകാന്‍ അനങ്ങനടി ഗ്രാമപഞ്ചായത്തിലെ നവീകരണം പൂര്‍ത്തീകരിച്ച സ്റ്റേറ്റ് സീഡ് ഫാം ഉദ്ഘാടനത്തിനൊരുങ്ങി. അനങ്ങനടി പത്താംകുളത്ത് കെ.എല്‍.ഡി.സി മുഖാന്തിരം ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി 3.30 കോടി രൂപ ചെലവഴിച്ചാണ് പദ്ധതി യാഥാര്‍ത്ഥ്യമാക്കിയത്. പുതുതലമുറയെ കൃഷിയിലേക്കാകര്‍ഷിക്കുവാന്‍ കഴിയും വിധത്തില്‍ ഫാം ടൂറിസം ഉള്‍പ്പെടെയുള്ള പദ്ധതികളാണ് സീഡ് ഫാമില്‍ വിഭാവനം ചെയ്തിട്ടുള്ളത്.

സംസ്ഥാന സര്‍ക്കാരിന്റെ 'വിഷൻ 2031' സംസ്ഥാന സെമിനാറുകളുടെ ഭാഗമായി എക്സൈസ് വകുപ്പിന്റെ ആഭിമുഖ്യത്തിൽ സംഘടിപ്പിക്കുന്ന സംസ്ഥാനതല സെമിനാർ ഇന്ന് (ഒക്ടോബര്‍ 23) രാവിലെ 9.30 മുതല്‍ ഉച്ചയ്ക്ക് 1.30 വരെ പാലക്കാട് കോസ്മോപൊളിറ്റന്‍ ക്ലബ്ബില്‍ നടക്കും. നാലു വേദികളിലായി നാലു സെഷനുകളായാണ് സെമിനാര്‍ നടക്കുന്നത്.  2031 വർഷത്തോടെ എക്സൈസ് വകുപ്പിന്റെ പ്രവർത്തന കാഴ്ചപ്പാട് രൂപീകരിക്കുകയാണ് സെമിനാറിന്റെ പ്രധാന ലക്ഷ്യം.

ജില്ലയിലെ ഒരു സര്‍ക്കാര്‍ സ്ഥാപനത്തില്‍ നഴ്‌സ് തസ്തികയില്‍ താല്‍ക്കാലിക ഒഴിവുണ്ട്. പ്ലസ്ടു സയന്‍സ്/ തത്തുല്യവും ജി.എന്‍.എംല്‍ ഡിപ്ലോമയും കേരള നഴ്‌സസ് ആന്‍ഡ് മിഡ് വൈവ്‌സ് കൗണ്‍സില്‍ രജിസ്‌ട്രേഷനുമാണ് യോഗ്യത. പെയിന്‍ ആന്‍ഡ് പാലിയേറ്റീവ് കെയറില്‍ പ്രാഥമിക സര്‍ട്ടിഫിക്കറ്റും വേണം. 18നും 41 നും മധ്യേയാണ് പ്രായപരിധി. ഉദ്യോഗാര്‍ഥികള്‍ അസ്സല്‍ സര്‍ട്ടിഫിക്കറ്റുകളുമായി നവംബര്‍ മൂന്നിന് മുന്‍പായി അതാത് എംപ്ലോയ്‌മെന്റ് എക്‌സ്‌ചേഞ്ചുകളില്‍ രജിസ്റ്റര്‍ ചെയ്യണമെന്ന് ജില്ലാ എംപ്ലോയ്‌മെന്റെ ഓഫീസര്‍ അറിയിച്ചു

സംസ്ഥാനത്തെ കരകൗശല വിദഗ്ദരെ ആദരിക്കാനായി കരകൗശല അവാര്‍ഡ് 2024ലേക്ക് അപേക്ഷ ക്ഷണിച്ചു. കരകൗശല മേഖലയിലെ ഏഴ് വിഭാഗങ്ങളിലെ സൃഷ്ടികള്‍ക്കാണ് അവാര്‍ഡ് നല്‍കുന്നത്. ദാരു ശില്‍പ്പങ്ങള്‍, പ്രകൃതി ദത്ത നാരുകളില്‍ തീര്‍ത്ത ശില്‍പ്പങ്ങള്‍, ചൂരല്‍, മുള എന്നിവയില്‍ തീര്‍ത്ത ശില്‍പ്പങ്ങള്‍, ചരട്, നാട, കസവ് ഉപയോഗിച്ചുള്ള ചിത്രത്തുന്നല്‍, ലോഹശില്‍പ്പങ്ങള്‍, ചിരട്ട ഉപയോഗിച്ച് നിര്‍മ്മിച്ച ശില്‍പ്പങ്ങള്‍ എന്നീ വിഭാഗങ്ങളിലാണ് അവാര്‍ഡ് നല്‍കുന്നത്. നവംബര്‍ 11 വരെയാണ് അപേക്ഷിക്കേണ്ടത്. കൂടുതല്‍ വിവരങ്ങള്‍ക്ക് ഫോണ്‍: 0491 2505385, 2505408, 9605610109

പാലക്കാട് സ്ത്രീകളുടെയും കുട്ടികളുടെയും ആശുപത്രിയിലേക്ക് കരാര്‍ അടിസ്ഥാനത്തില്‍ അസിസ്റ്റന്റ് നഴ്‌സ് തസ്തികയില്‍ നിയമനം നടത്തുന്നു. എസ്.എസ്.എല്‍.സി, എ.എന്‍.എം യോഗ്യതയുള്ളവര്‍ക്കാണ് അവസരം. പ്രായപരിധി 35 വയസ്. താല്‍പര്യമുള്ളവര്‍ ഒക്ടോബര്‍ 30 രാവിലെ 11ന് രേഖകള്‍ സഹിതം ആശുപത്രി സൂപ്രണ്ടിന്റെ ചേംബറില്‍ എത്തണമെന്ന് സൂപ്രണ്ട് അറിയിച്ചു.

സംസ്ഥാന ഭാഗ്യക്കുറി ഏജന്റുമാരുടെയും വില്‍പ്പനക്കാരുടെയും ക്ഷേമനിധി ബോര്‍ഡ് അംഗങ്ങളുടെയും മക്കള്‍ക്ക് സ്‌കോളര്‍ഷിപ്പിന് അപേക്ഷിക്കാം. എസ്.എസ്.എല്‍.സി പരീക്ഷയില്‍ 80ശതമാനം മാര്‍ക്കോടെ വിജയിച്ച് റഗുലര്‍ ഹയര്‍സെക്കന്‍ഡറിതല പഠനത്തിനോ മറ്റോ റഗുലര്‍ കോഴ്‌സുകളില്‍ ഉപരിപഠനത്തിനോ ചേര്‍ന്ന വിദ്യാര്‍ഥികള്‍ക്കും, റഗുലര്‍ പ്രൊഫഷണല്‍ കോഴ്‌സുകള്‍, ബിരുദ, ബിരുദാനന്തര കോഴ്‌സുകള്‍, ഡിപ്ലോമ കോഴ്‌സുകള്‍ എന്നിവയ്ക്ക് ഉപരിപഠനത്തിന് ചേര്‍ന്ന ക്ഷേമനിധി അംഗങ്ങളുടെ മക്കള്‍ക്കുമാണ് അവസരം. അപേക്ഷകള്‍ നവംബര്‍ 20നുള്ളില്‍ ജില്ലാ ഭാഗ്യക്കുറി ക്ഷേമനിധി ഓഫീസില്‍ ലഭ്യമാക്കണം. ഫോണ്‍: 0491 2505170

പ്രാധാനമന്ത്രി രാഷ്ട്രീയ കൃഷി വികാസ് യോജന-ഒരോ തുള്ളിയിലും കൂടുതല്‍ വിളവ് എന്ന കേന്ദ്രാവിഷ്‌കൃത പദ്ധതിയുടെ ഭാഗമായി ജില്ലയിലെ ഏകദിന ശില്‍പ്പശാല ഇന്ന്(ഒക്ടോബര്‍ 23) നടക്കും. ധോണി ലീഡ് കോളേജ് ഓഡിറ്റോറിയത്തില്‍ രാവിലെ 10.30ന് വൈദ്യുതി വകുപ്പ് മന്ത്രി കെ. കൃഷ്ണന്‍ കുട്ടി ഉദ്ഘാടനം ചെയ്യും. പ്രഭാകരന്‍ എം.എല്‍.എ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് കെ.ബിനുമോള്‍ മുഖ്യാതിഥിയാവും. സംസ്ഥാന കൃഷി വകുപ്പ് നടപ്പാക്കുന്ന കേന്ദ്രാവിഷ്‌കൃത പദ്ധതിയുടെ ഭാഗമായാണ് ശില്‍പ്പശാല നടത്തുന്നത്.