മലബാര്‍ ദേവസ്വം ബോര്‍ഡിന് കീഴിലുള്ള ക്ഷേത്രങ്ങളിലെ സ്ഥിരം ജീവനക്കാര്‍ക്ക് 2025 ലെ ഉത്സവബത്തയായി 7,000 രൂപ വീതവും താല്‍ക്കാലിക ജീവനക്കാര്‍ക്ക് പരമാവധി 3,500 രൂപയും അനുവദിക്കും. ഉത്സവബത്ത നല്‍കാന്‍ മതിയായ വരുമാനം ഇല്ലാത്ത ഗ്രേഡ് മൂന്ന്, ഗ്രേഡ് നാല് ക്ഷേത്രങ്ങളിലെ ജീവനക്കാര്‍ക്ക് കൂടി ആനുകൂല്യം ലഭ്യമാക്കും. ക്ഷേത്ര ജീവനക്കാര്‍ക്ക് മലബാര്‍ ദേവസ്വം മാനേജ്മെന്റ് ഫണ്ടില്‍നിന്ന് അനുവദിക്കാന്‍ ബാക്കിയുള്ള ശമ്പളം പരമാവധി കൊടുത്തുതീര്‍ക്കാന്‍ ഗ്രാന്റ്-ഇന്‍-എയ്ഡില്‍ രണ്ടാം ഗഡുവായി 5,22,93,600 രൂപ സര്‍ക്കാര്‍ അനുവദിച്ചിരുന്നു.

ജില്ലയില്‍ എന്‍ വി എച്ച് സി പി, എന്‍ ആര്‍ സി പി പരിപാടികളുമായി ബന്ധപ്പെട്ട് നാല് ചക്ര വാഹങ്ങളായ ബൊലേറോ, എറ്റിയോസ്, ടവേര, ഇന്നോവ, എര്‍ടിഗ, സ്വിഫ്റ്റ് ഡിസയര്‍ എന്നിവയോ മറ്റ് ടാക്‌സി വാഹനങ്ങളോ ലഭ്യമാക്കുന്നതിന് വാഹന ഉടമകളില്‍ നിന്നോ ട്രാവല്‍ ഏജന്‍സികളില്‍ നിന്നോ മുദ്രവച്ച ക്വട്ടേഷനുകള്‍ ക്ഷണിച്ചു. ജില്ലാ മെഡിക്കല്‍ ഓഫീസര്‍ (ആരോഗ്യം), കണ്ണൂര്‍ എന്ന വിലാസത്തില്‍ സെപ്റ്റംബര്‍ എട്ടിന് രാവിലെ 11 നകം ലഭിക്കണം. ഫോണ്‍- 04972700709

ജില്ലാ മാനസികാരോഗ്യ പദ്ധതിയുടെ സമഗ്ര മാനസികാരോഗ്യ പരിപാടിയുടെ ഭാഗമായി സ്‌കൂള്‍ മെന്റല്‍ ഹെല്‍ത്ത് സമ്പൂര്‍ണ്ണ മാനസികാരോഗ്യം പരിപാടിയില്‍ പ്രോജക്ട് ഓഫീസറെ നിയമിക്കുന്നു. എം.എസ്.ഡബ്ല്യൂ/ മെഡിക്കല്‍ ആന്‍ഡ് സൈക്യാട്രി യോഗ്യതയുള്ളവര്‍ സെപ്റ്റംബര്‍ 16 ന് രാവിലെ 11 മണിക്ക് ജില്ലാ ആശുപത്രി സൂപ്രണ്ടിന്റെ ചേംബറില്‍ അഭിമുഖത്തിനെത്തണം. ഇമെയില്‍ dmhpkannur@gmail.com. ഫോണ്‍: 04972734343

സാങ്കേതിക വിദ്യാഭ്യാസ വകുപ്പിന്റെ കീഴിലുള്ള നടുവില്‍ സര്‍ക്കാര്‍ ടെക്‌നിക്കല്‍ ഹൈസ്‌കൂളിലേക്ക് എച്ച് എസ് എ ഫിസിക്കല്‍ സയന്‍സ് തസ്തികയില്‍ ദിവസവേതന അടിസ്ഥാനത്തില്‍ അപേക്ഷ ക്ഷണിച്ചു. ഉദ്യോഗാര്‍ഥികള്‍ സെപ്റ്റംബര്‍ ഒമ്പതിന് രാവിലെ 11 മണിക്ക് സൂപ്രണ്ട് മുമ്പാകെ ഹാജരാകണം. ഫോണ്‍- 9400006493, 0460251091.

ഓണാവധിക്കാലത്ത് സഞ്ചാരികളുടെ തിരക്ക് വര്‍ദ്ധിച്ചുവരുന്നതിനാല്‍ ജലയാനങ്ങള്‍ യാത്രക്കാരുടെ സുരക്ഷിത യാത്ര ഉറപ്പു വരുത്തണമെന്ന് അഴീക്കല്‍ സീനിയര്‍ പോര്‍ട്ട് കണ്‍സര്‍വേറ്റര്‍ അറിയിച്ചു. നിയമപ്രകാരമുളളതും സാധുതയുള്ളതുമായ രജിസ്‌ട്രേഷന്‍/സര്‍വ്വേ സര്‍ട്ടിഫിക്കറ്റുകള്‍, ഐ.വി ആക്ട് പ്രകാരമുള്ള പേഴ്സണല്‍/തേര്‍ഡ് പാര്‍ട്ടി ഇന്‍ഷുറന്‍സ് എന്നിവയുള്ള യാനങ്ങള്‍ മാത്രമേ സര്‍വ്വീസ് നടത്തുവാന്‍ പാടുളളൂ. കൂടാതെ യാനത്തിന്റെ സര്‍വ്വേ റിപ്പോര്‍ട്ട് പ്രകാരമുള്ള സുരക്ഷാ സംവിധാനങ്ങള്‍ യാനത്തില്‍ ഒരുക്കുകയും യാത്രക്കാര്‍ കാണത്തക്കവിധത്തില്‍ പാസഞ്ചര്‍ കപ്പാസിറ്റി  രേഖപ്പെടുത്തുകയും ചെയ്യണം.

വൈദ്യുത അപകടങ്ങൾ ഒഴിവാക്കാനാവശ്യമായ നടപടി സ്വീകരിക്കുന്നതിന്റെ ഭാഗമായി കല്യാശ്ശേരി മണ്ഡലതല സുരക്ഷാ സമിതി രൂപീക്കരിച്ചു. എം വിജിൻ എം എൽ എ അധ്യക്ഷനായി. ഇലക്ട്രിക്കൽ ഡിവിഷൻ എക്സിക്യുട്ടീവ് എഞ്ചിനീയർ എ.വി പ്രകാശൻ സുരക്ഷാ സമിതിയുമായി ബന്ധപ്പെട്ട വിശദീകരണം നടത്തി. വൈദ്യുത അപകടങ്ങൾ ഒഴിവാക്കുന്നതിന് വിവിധങ്ങളായ നടപടികൾ സ്വീകരിച്ച് വരുന്നതായി യോഗം വിലയിരുത്തി.

സംസ്ഥാന ടൂറിസം വകുപ്പും ജില്ലാ ടൂറിസം പ്രൊമോഷൻ കൗൺസിലും ചേർന്ന സംഘടിപ്പിക്കുന്ന ഓണാഘോഷ പരിപാടികൾക്ക് കണ്ണൂർ ടൗൺ സ്‌ക്വയറിൽ തുടക്കമായി. സെപ്റ്റംബർ ഒൻപത് വരെ നീളുന്ന കലാപരിപാടികൾക്ക് ബുധനാഴ്ച വൈകിട്ട് തുടക്കമാവും. ഓണാഘോഷത്തിന്റെ ഉദ്ഘാടനം സെപ്റ്റംബർ നാലിന് വൈകീട്ട് രജിസ്ട്രേഷൻ വകുപ്പ് മന്ത്രി രാമചന്ദ്രൻ കടന്നപ്പള്ളി നിർവഹിക്കും.
ചൊവ്വാഴ്ച തിരുവാതിര കളി  മൽസരം, പ്രദർശന വടം വലി മത്സരം നടന്നു.
ഓണാഘോഷ പരിപാടികളുടെ ഭാഗമായി കണ്ണൂർ നഗരത്തിലെ സർക്കാർ, അർദ്ധ സർക്കാർ, പൊതുമേഖലാ സ്ഥാപനങ്ങൾക്കായി  പൂക്കള മത്സരവും നടന്നു. 

സംസ്ഥാന ടൂറിസം വകുപ്പും ജില്ലാ ടൂറിസം പ്രൊമോഷൻ കൗൺസിലും ചേർന്ന് സംഘടിപ്പിക്കുന്ന ഓണാഘോഷ പരിപാടികളുടെ ഭാഗമായി കണ്ണൂർ നഗരത്തിലെ സർക്കാർ, അർദ്ധ സർക്കാർ, പൊതുമേ ഖലാ, സ്വകാര്യ സ്ഥാപനങ്ങൾക്കായി നടത്തിയ പൂക്കള മത്സരത്തിൽ കണ്ണൂർ സ്റ്റേറ്റ് ബാങ്ക് ഓഫ് ഇന്ത്യ മെയിൻ ബ്രാഞ്ച് ഒന്നാം സമ്മാനം നേടി. കണ്ണൂർ കെഎസ്എഫ്ഇ റീജിയണൽ ഓഫീസ് രണ്ടാം സ്ഥാനവും കണ്ണൂർ താലൂക്ക് ഓഫീസ് മൂന്നാം സ്ഥാനവും നേടി.

ഐ എച്ച് ആർ ഡി യുടെ കീഴിൽ കല്ല്യാശ്ശേരിയിൽ പ്രവർത്തിക്കുന്ന ഇ കെ നായനാർ മെമ്മോറിയൽ മോഡൽ പോളിടെക്നിക് കോളേജിൽ ഒന്നാം വർഷ ബയോമെഡിക്കൽ എഞ്ചിനീയറിംഗ്, ഇലക്ട്രോണിക്‌സ് ആൻഡ് കമ്മ്യൂണിക്കേഷൻ എഞ്ചിനീയറിംഗ്, കമ്പ്യൂട്ടർ ഹാർഡ് വെയർ എഞ്ചിനീയറിംഗ്, ഇലക്ട്രിക്കൽ ആൻഡ് ഇലക്ട്രോണിക്സ് എഞ്ചിനീയറിംഗ്, കമ്പ്യൂട്ടർ എഞ്ചിനീയറിംഗ് കോഴ്സുകളിൽ നിലവിലുള്ള ഒഴിവുകളിലേക്ക് അവസാന സ്പോട്ട് അഡ്മിഷൻ നടത്തുന്നു. മുമ്പ് റാങ്ക് ലിസ്റ്റിൽ ഉൾപ്പെട്ടവർക്കും നിലവിൽ ഇതുവരെ അപേക്ഷ സമർപ്പിച്ചിട്ടില്ലാത്തവർക്കും പങ്കെടുക്കാം. എസ് സി, എസ് ടി, ഒ ഇ സി വിങാഗക്കാർക്ക് അർഹമായ ഫീസിളവ് ലഭിക്കും. എസ്.എസ്.എൽ.സിയാണ് അടിസ്ഥാന യോഗ്യത.

പാട്യം ഗ്രാമപഞ്ചായത്തിൽ അതിദാരിദ്ര നിർമാർജനത്തിന്റെ തുടർച്ചയായുള്ള സൗജന്യ ഓണക്കിറ്റ് വിതരണം ഗ്രാമപഞ്ചായത്ത് പ്രസിഡന്റ് എൻ.വി ഷിനിജ ഉദ്ഘാടനം ചെയ്തു. 83 കുടുംബങ്ങൾക്കാണ് കിറ്റ്. ഓരോ കുടുംബങ്ങളുടെയും വീടുകളിൽ കിറ്റ് എത്തിക്കാൻ ആവശ്യമായ സൗകര്യവും പഞ്ചായത്ത് ഒരുക്കിയിട്ടുണ്ട്. പഞ്ചായത്ത് ഭരണസമിതി അംഗങ്ങൾ, ഉദ്യോഗസ്ഥർ തുടങ്ങിയവർ പങ്കെടുത്തു.