സഹകരണ വകുപ്പിന്റെ സഹകരണ അംഗ സമാശ്വാസ നിധി പദ്ധതി പ്രകാരം അനുവദിച്ച തുക ഗുണഭോക്താക്കൾക്ക് വിതരണം ചെയ്യുന്നതിനായി ജില്ലയിലെ സഹകരണ സ്ഥാപനങ്ങൾക്കുള്ള ചെക്ക് കെ.വി സുമേഷ് എം.എൽ.എ കൈമാറി. സഹകരണ സംഘങ്ങളിൽ അംഗങ്ങളായ മാരക രോഗബാധിതർ, അപകടത്തെ തുടർന്ന് ശയ്യാവലംബരായവർ, മാതാപിതാക്കളുടെ മരണത്തെ തുടർന്ന് നിരാലംബരായ കുട്ടികൾ ഉൾപ്പടെയുള്ള 232 പേരാണ് ഗുണഭോക്താക്കൾ. ഇതിനായി 53.2 ലക്ഷം രൂപയാണ് അനുവദിച്ചിട്ടുള്ളത്. 84 സഹകരണ സ്ഥാപനങ്ങൾ വഴി ഓണത്തിന് മുമ്പായി തുക വിതരണം ചെയ്യും. കണ്ണൂർ സഹകരണ ഓഡിറ്റ് ജോയിന്റ് ഡയറക്ടർ പി.വി വത്സരാജ് അധ്യക്ഷനായി. ജോയിന്റ് രജിസ്ടാർ ഇൻ ചാർജ്ജ് എം.കെ സൈബുന്നിസ പങ്കെടുത്തു.

വനം-വന്യജീവി സംഘർഷം ലഘൂകരിക്കുന്നതിനായി ആരോഗ്യ വകുപ്പ് ജില്ലയിൽ നടത്തിയ ബോധവൽക്കരണ ക്യാമ്പുകൾ ഉൾപ്പെടെയുള്ള  പ്രവർത്തനങ്ങളെ കലക്ടറേറ്റിൽ നടന്ന യോഗത്തിൽ മനുഷ്യ-വന്യജീവി സംഘർഷം ജില്ലാതല നിയന്ത്രണ സമിതി അനുമോദിച്ചു. 

പെരിങ്ങോം താലൂക്ക് ആശുപത്രിയുടെ 2010 മോഡല്‍ ടാറ്റാ സ്പേഷ്യോ വാഹനം സെപ്റ്റംബര്‍ 15 ന് ഉച്ചയ്ക്ക് 12 മണിക്ക് പെരിങ്ങോം താലൂക്ക് ആശുപത്രിയില്‍ റീടെണ്ടര്‍ നടത്തുന്നു. ടെണ്ടര്‍ ഫോം താലൂക്ക് ആശുപത്രി ഓഫീസില്‍ നിന്നും സെപ്റ്റംബര്‍ എട്ട് മുതല്‍ 12 ന് ഉച്ചയ്ക്ക് മൂന്ന് മണിവരെ ലഭിക്കും. ടെണ്ടറുകള്‍ സെപ്റ്റംബര്‍ 15 ന് രാവിലെ 11 മണി സ്വീകരിക്കും. ഫോണ്‍: 04985 236215

നടുവില്‍ ഗവ. പോളിടെക്നിക് കോളേജ് ഓട്ടോമൊബൈല്‍ എഞ്ചിനീയറിംഗ് വിഭാഗത്തില്‍ ദിവസ വേതനാടിസ്ഥാനത്തില്‍ ലക്ചറെ നിയമിക്കുന്നു. കേരള പബ്ലിക് സര്‍വീസ് കമ്മീഷന്‍ അംഗീകരിച്ച യോഗ്യതയുള്ള ഉദ്യോഗാര്‍ഥികള്‍ വിദ്യാഭ്യാസ യോഗ്യത, തൊഴില്‍ പരിചയം എന്നിവ തെളിയിക്കുന്ന അസ്സല്‍ സര്‍ട്ടിഫിക്കറ്റുകള്‍ സഹിതം സെപ്റ്റംബര്‍ പത്തിന് രാവിലെ 10.30 ന് കോളേജില്‍ അഭിമുഖത്തിന് എത്തണം. 
 

ചൊവ്വ ഹയര്‍സെക്കന്‍ഡറി സ്‌കൂളില്‍ പ്ലസ് ടു വിഭാഗത്തില്‍ കമ്പ്യൂട്ടര്‍ ആപ്ലിക്കേഷന്‍ (സീനിയര്‍), കമ്പ്യൂട്ടര്‍ സയന്‍സ് (ജൂനിയര്‍), മലയാളം (സീനിയര്‍) താല്‍കാലിക അധ്യാപക തസ്തികകളിലേക്കുള്ള അഭിമുഖം സെപ്റ്റംബര്‍ 18 ന് രാവിലെ 10 മണിക്ക് നടക്കും. യോഗ്യതയുള്ളവര്‍ സര്‍ട്ടിഫിക്കറ്റുകള്‍ സഹിതം സ്‌കൂളില്‍ അഭിമുഖത്തിന് എത്തണം. ഫോണ്‍: 04972 725242, 9895606211

2025-26 വര്‍ഷത്തില്‍ പരമ്പരാഗത മത്സ്യത്തൊഴിലാളികള്‍ക്ക് ഇന്‍സുലേറ്റഡ് ഫിഷ് ബോക്സ് വിതരണം ചെയ്യുന്ന പദ്ധതിയിലേക്ക് പരമ്പരാഗത മത്സ്യത്തൊഴിലാളി ഗ്രൂപ്പുകളില്‍നിന്നും അപേക്ഷ ക്ഷണിച്ചു. ആഴക്കടല്‍ മത്സ്യബന്ധനം നടത്തുന്ന പരമ്പരാഗത മത്സ്യത്തൊഴിലാളി ഗ്രൂപ്പുകള്‍ക്ക് മുന്‍ഗണന. 70 നും 700 ലിറ്ററിനും ഇടയില്‍ സംഭരണശേഷിയുള്ള ഇന്‍സുലേറ്റഡ് ഫിഷ് ബോക്സ് 75 ശതമാനം സബ്സിഡിയില്‍ ലഭിക്കും. അപേക്ഷകള്‍ സെപ്റ്റംബര്‍ 16 വരെ സ്വീകരിക്കും. കൂടുതല്‍ വിവരങ്ങള്‍ കണ്ണൂര്‍ ഫിഷറീസ് ഡെപ്യൂട്ടി ഡയറക്ടറുടെ ഓഫീസിലോ അതത് മത്സ്യഭവനുകളിലോ ലഭിക്കും. ഫോണ്‍: 04972731081

ശാരീരിക - മാനസിക പരിമിതികളെ അതിജീവിച്ച് സമൂഹത്തില്‍ തങ്ങളുടെതായ ഇടം കണ്ടെത്തുകയും യുവതയ്ക്ക് പ്രചോദനമായി തീരുകയും ചെയ്ത യുവജനങ്ങള്‍ക്ക് കേരള സംസ്ഥാന യുവജന കമ്മീഷന്‍ യുവപ്രതിഭാ പുരസ്‌കാരം നല്‍കുന്നു. പുരസ്‌കാരത്തിനായി നാമനിര്‍ദേശം നല്‍കാവുന്നതോ സ്വമേധയാ അപേക്ഷ സമര്‍പ്പിക്കാവുന്നതോ ആണ്. പൊതുജനങ്ങളില്‍ നിന്നും കിട്ടുന്ന നിര്‍ദേശങ്ങള്‍ പരിഗണിച്ച് വിദഗ്ധ ജൂറിയുടെ തീരുമാനത്തിനു വിധേയമായി മൂന്ന് പേര്‍ക്കാണ് പുരസ്‌കാരം നല്‍കുന്നത്. യുവപ്രതിഭാ പുരസ്‌കാര ജേതാക്കള്‍ക്ക് 20000 രൂപയുടെ ക്യാഷ് അവാര്‍ഡും ബഹുമതി ശില്‍പവും നല്‍കും.

ഹയര്‍ സെക്കന്‍ഡറി വിദ്യാര്‍ഥികള്‍ക്ക് പഠന - കരിയര്‍ പിന്തുണ ഉറപ്പാക്കുന്നതിന് സമഗ്ര ശിക്ഷാകേരളം നടപ്പിലാക്കുന്ന സ്‌കഫോള്‍ഡ് മൂന്നാം ബാച്ച് ക്യാമ്പിന് തുടക്കമായി. ചിത്രകാരന്‍ പൊന്ന്യം ചന്ദ്രന്‍ ഉദ്ഘാടനം ചെയ്തു. സമഗ്ര ശിക്ഷാകേരളം ജില്ലാ പ്രൊജക്ട് കോ ഓര്‍ഡിനേറ്റര്‍ ഇ.സി വിനോദ് അധ്യക്ഷനായി. കരിയര്‍ സാധ്യതകള്‍ എന്ന വിഷയത്തില്‍ പി.ഒ മുരളീധരന്‍ ക്ലാസെടുത്തു. പ്രജീഷ് വേങ്ങ തിയേറ്റര്‍ ആക്ടിവിറ്റി അവതരിപ്പിച്ചു. പാരീസ് പ്രസിഡന്‍സിയില്‍ നടന്ന പരിപാടിയില്‍ ഡി പി ഒ ഡോ. രാജേഷ് കടന്നപ്പള്ളി, ബി പി സി ടി.വി സഖീഷ്, അനാമിക പ്രേമരാജന്‍, അഞ്ജന രാജേഷ് എന്നിവര്‍ പങ്കെടുത്തു.

ഹരിത കേരളം മിഷന്റെയും കൃഷ്ണമേനോന്‍ ഗവ. വനിതാ കോളേജ് 19, 22 എന്‍ എസ് എസ് യൂണിറ്റിന്റെയും എടച്ചേരി സൗത്ത് റസിഡന്‍സ് അസോസിയേഷന്റെയും നേതൃത്വത്തില്‍ എടച്ചേരി പഴശ്ശി ഇറിഗേഷന്‍ കനാല്‍ സൈറ്റില്‍ പച്ചത്തുരുത്ത് ഒരുക്കുന്ന പ്രവര്‍ത്തനങ്ങള്‍ക്ക് തുടക്കമായി. കൃഷ്ണമേനോന്‍ സ്മാരക ഗവ. വനിതാ കോളേജ് പ്രിന്‍സിപ്പല്‍ ഡോ. കെ.ടി ചന്ദ്രമോഹനന്‍ ഉദ്ഘാടനം ചെയ്തു. എന്‍ എസ് എസ് ജില്ലാ കോ ഓര്‍ഡിനേറ്റര്‍ ഡോ. കെ.പി നിധീഷ് അധ്യക്ഷനായി. പ്രദേശത്തെ മാലിന്യങ്ങള്‍ ശേഖരിച്ച് നീക്കം ചെയ്ത് വൃക്ഷതൈകള്‍ നട്ടുവളര്‍ത്തുകയാണ് പദ്ധതി.

ഓണം, നബിദിനം തുടങ്ങിയ  വിവിധ ഉത്സവ ആഘോഷങ്ങളുടെ ഭാഗമായി വിവിധ ഇടങ്ങളില്‍ ഭക്ഷണവും പാനീയവും തയ്യാറാക്കി പൊതുജനങ്ങള്‍ക്ക് വിതരണം ചെയ്യുന്നതിന് ആരോഗ്യ വകുപ്പ് മാർഗ നിർദേശം പുറത്തിറക്കി.

* ഉത്സവഘോഷത്തിന് പാനീയങ്ങള്‍ തയ്യാറാക്കുമ്പോൾ  ശുദ്ധമായ ജലത്തിലും ഐസിലും മാത്രമേ ഇത്തരം പാനീയങ്ങള്‍ തയ്യാറാക്കാനും വിതരണം ചെയ്യാനും പാടുള്ളൂ. ഇക്കാര്യം ആരോഗ്യ വകുപ്പ് ഉദ്യോഗസ്ഥർ നിരീക്ഷിക്കും. 

* ഭക്ഷണ പാനീയങ്ങൾ തയ്യാർ ചെയ്തു വിതരണം ചെയ്യുന്നവർക്ക് ഹെൽത്ത് കാർഡ് ഉണ്ടായിരിക്കണം. വിതരണം ചെയ്യുന്നവർ കയ്യുറ ധരിച്ചിരിക്കണം.