കണ്ണൂര്‍ ജില്ലാ സൈനിക ക്ഷേമ ഓഫീസിന്റെ നേതൃത്വത്തില്‍ വിമുക്തഭടന്മാര്‍ക്കും അവരുടെ ആശ്രിതര്‍ക്കുമായി ഒക്ടോബര്‍ 26 ന് രാവിലെ 10.30 ന് പയ്യന്നൂര്‍ മൂരിക്കൊവ്വല്‍ സ്വാമി ആനന്ദ തീര്‍ത്ഥ ഓഡിറ്റോറിയത്തിൽ ബോധവത്കരണ സെമിനാര്‍ നടത്തുമെന്ന് ജില്ലാ സൈനിക ക്ഷേമ ഓഫീസര്‍ അറിയിച്ചു. ഫോണ്‍ - 0497 2700069

വയനാട് ലോക് സഭ ഉപതെരഞ്ഞെടുപ്പുമായി ബന്ധപ്പെട്ട മാതൃകാ പെരുമാറ്റച്ചട്ടം നിലവിലുള്ളതിനാല്‍ തവനൂര്‍ വിത്തുല്‍പ്പാദനകേന്ദ്രത്തിലേക്ക് തൊഴിലാളികളെ തെരഞ്ഞെടുക്കുന്നതിന് ഒക്ടോബര്‍ 25,26 തീയതികളില്‍ നടത്താനിരുന്ന കൂടിക്കാഴ്ച മാറ്റിവച്ചതായി പ്രിന്‍സിപ്പല്‍ കൃഷി ഓഫീസര്‍ അറിയിച്ചു. പുതുക്കിയ തീയതി പിന്നീടറിയിക്കും.

പൊന്നാനി താലൂക്കിലെ എ.എ.വൈ, ജി.എച്ച്.എച്ച് കാര്‍ഡുകളില്‍ വിരല്‍ പതിയാത്തതിനാല്‍ ഇനിയും മസ്റ്ററിംഗ് ചെയ്യാനാകാത്തവര്‍ക്ക് ഐറിസ് സ്‌കാനര്‍ ഉപയോഗിച്ച്  മസ്റ്ററിംഗ് ചെയ്യാന്‍ ഒക്ടോബര്‍ 23, 24 തീയതികളില്‍ രാവിലെ ഒമ്പത് മുതല്‍ വൈകീട്ട് ഏഴ് വരെ ക്യാമ്പ് സംഘടിപ്പിക്കുമെന്ന് താലൂക്ക് സപ്ലൈ ഓഫീസര്‍ അറിയിച്ചു. മസ്റ്ററിങ് കേന്ദ്രങ്ങള്‍ സംബന്ധിച്ച വിവരം അതത് റേഷന്‍ കടകളില്‍ നിന്ന് ലഭിക്കും.
 

ചിറക്കല്‍ കുടുംബാരോഗ്യ കേന്ദ്രം സായാഹ്ന ഒപി യിലേക്ക് ദിവസ വേതനാടിസ്ഥാനത്തില്‍ താൽക്കാലികമായി ഡോക്ടറെ നിയമിക്കുന്നു. ഉദ്യോഗാര്‍ഥികള്‍  നവംബര്‍ ഏഴിന് രാവിലെ 10 ന് നിശ്ചിത യോഗ്യതയുള്ള അസ്സല്‍ സര്‍ട്ടിഫിക്കറ്റ് സഹിതം ചിറക്കല്‍ എഫ്.എച്ച്.സി യില്‍ അഭിമുഖത്തിന് എത്തണം. കൂടുതല്‍ വിവരങ്ങള്‍ ഓഫീസില്‍ ലഭ്യമാണ്. ഫോണ്‍- 0497 2777280.
 

കുടുംബശ്രീ ജില്ലാ മിഷന്‍ കാര്‍ഷിക ഉപജീവന മേഖലയില്‍ ഫാര്‍മിങ് ക്ലസ്റ്റര്‍ പദ്ധതി ആരംഭിക്കുന്നു. കാര്‍ഷിക മേഖലയിലെ ഉല്‍പാദനക്ഷമതയും മൂല്യ വര്‍ധന സാധ്യതകളും വര്‍ധിപ്പിക്കുക, കര്‍ഷകര്‍ക്ക് സ്ഥഥിരവരുമാനം ഉറപ്പുവരുത്തുക എന്നിവയാണ് പദ്ധതിയുടെ ലക്ഷ്യം. കാര്‍ഷിക വിള ഉല്‍പാദനം, ലൈവ് സ്റ്റോക്‌സ്, മത്സ്യബന്ധനം, കാര്‍ഷിക സംരംഭങ്ങള്‍, കസ്റ്റം ഹയറിങ് സെന്റര്‍ എന്നിവ പദ്ധതിയുടെ ഭാഗമായി ആരംഭിക്കുമെന്ന് ജില്ലാ മിഷന്‍ കോ ഓര്‍ഡിനേറ്റര്‍ അറിയിച്ചു. ജില്ലയിലെ മാലൂര്‍, വയക്കര, ചെറുതാഴം, തില്ലങ്കേരി, കുറുമാത്തൂര്‍, പടിയൂര്‍ സിഡിഎസ് കളിലായി 300 കുടുംബങ്ങളെ കേന്ദ്രീകരിച്ചാണ് ക്ലസ്റ്റര്‍ രൂപീകരിക്കുന്നത്.

ഒക്ടോബര്‍ മാസത്തെ ജില്ലാ വികസന സമിതി യോഗം 26 ന് ശനി രാവിലെ 11 ന് കളക്ടറേറ്റ് ഓഡിറ്റോറിയത്തില്‍ നടക്കും.

സര്‍ക്കസ് പെന്‍ഷന്‍ ലഭ്യമാകുന്നതിനായി ഗുണഭോക്താക്കള്‍ ഇ പി എഫ് പെന്‍ഷന്‍ കൈപ്പറ്റുന്നുണ്ട്/ഇല്ല എന്നുള്ള സത്യവാങ്മൂലം നല്‍കണം. ഇതിനായി ആധാര്‍ കാര്‍ഡ്, സര്‍ക്കസ് പെന്‍ഷന്‍ അനുവദിച്ച ഉത്തരവ്, 2024-2025 സാമ്പത്തിക വര്‍ഷത്തെ ലൈഫ് സര്‍ട്ടിഫിക്കറ്റ് എന്നിവ ഹാജരാക്കാത്തവര്‍ ബന്ധപ്പെട്ട വില്ലേജില്‍ ഹാജരാകണമെന്ന് ജില്ലാ കളക്ടര്‍ അറിയിച്ചു. ഫോണ്‍ 0497 2700645

അഞ്ചരക്കണ്ടി, പെരളശ്ശേരി കുടിവെളള പദ്ധതിയുടെ പരിധിയിലുള്ള പെരളശ്ശേരി, കടമ്പൂര്‍, മുഴപ്പിലങ്ങാട്, ചെമ്പിലോട്, പിണറായി, അഞ്ചരക്കണ്ടി, വേങ്ങാട്, എരഞ്ഞോളി, കതിരൂര്‍ പഞ്ചായത്തുകളിലും കണ്ണൂര്‍ കോര്‍പറേഷന്‍ പരിധിയിലുള്ള ചേലോറ സോണിലും അടുത്ത രണ്ടാഴ്ച കാലയളവില്‍ കുടിവെളള വിതരണത്തില്‍ നിയന്ത്രണം ഏര്‍പ്പെടുത്താന്‍ സാധ്യതയുണ്ട്.  ഉപഭോക്താക്കള്‍ സഹകരിക്കണമെന്ന് അസിസ്റ്റന്റ് എക്സിക്യൂട്ടീവ് എഞ്ചിനീയര്‍ അറിയിച്ചു.

ജില്ലയിലെ ബസ് സ്റ്റാന്‍ഡുകളിലെ മാലിന്യ സംസ്‌കരണ സംവിധാനങ്ങള്‍ സംബന്ധിച്ച് അവസ്ഥാ പഠനം സംഘടിപ്പിക്കുമെന്ന് ഹരിത കേരളം മിഷന്‍ ജില്ലാ കോ ഓര്‍ഡിനേറ്റര്‍ അറിയിച്ചു. തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ ഹരിത കേരളം മിഷനും ശുചിത്വമിഷനും ചേര്‍ന്നാണ് ഒക്ടോബര്‍ മൂന്നാം വാരത്തില്‍ അവസ്ഥാ പഠനം സംഘടിപ്പിക്കുന്നത്. മൂന്ന് കെ.എസ്.ആര്‍.ടി.സി സ്റ്റാന്‍ഡുകളും 30 തദ്ദേശ ഭരണ സ്ഥാപന ഉടമസ്ഥതയിലുള്ള ബസ് സ്റ്റാന്‍ഡുകളുമാണ് ജില്ലയിലുള്ളത്. ഇവയുടെ ശുചിത്വ - മാലിന്യ സംസ്‌കരണ സംവിധാനങ്ങള്‍, പരിപാലനം, ബസ് സ്റ്റാന്‍ഡ് സൗന്ദര്യ വല്‍ക്കരണം തുടങ്ങിയവയാണ് അവസ്ഥാ പഠനത്തില്‍ ഉള്‍പ്പെടുക.