ലോക ലഹരിവിരുദ്ധ ദിനത്തില്‍ മലപ്പുറം ചൈല്‍ഡ്ലൈന്റെ ബോധവത്കരണ പരിപാടി ശ്രദ്ധേയമായി. ലഹരിയുടെ ചതിക്കുഴികളെ കുറിച്ചും രക്ഷനേടുന്നതിനെ കുറിച്ചുമെല്ലാം അറിവ് നല്‍കുന്നതായിരുന്നു പരിപാടി. ലഹരിയുടെ ആരോഗ്യ, സാമൂഹിക, സാമ്പത്തിക, മാനസിക പ്രശ്നങ്ങളും മാജികിലൂടെ മജീഷ്യന്‍ മലയില്‍ ഹംസ വിദ്യാര്‍ഥികള്‍ക്ക് വിശദീകരിച്ച് നല്‍കി.

    വിദ്യാഭ്യാസ സ്ഥാപനങ്ങളെയും യുവാക്കളെയും കേന്ദ്രീകരിച്ച്  ലഹരി മാഫിയകള്‍ സജീവമാകുന്ന സഹചര്യത്തില്‍ ലഹരി വിരുദ്ധ പ്രചരണ പ്രവര്‍ത്തനങ്ങള്‍ പൊതു സമൂഹം ഏറ്റെടുക്കണമെന്ന് ജില്ലാ കലക്ടര്‍ ജാഫര്‍ മലിക് പറഞ്ഞു. സര്‍ക്കാര്‍ ഏജന്‍സികള്‍ക്കോ വകുപ്പുകള്‍ക്കോ മാത്രം നേരിടാവുന്ന ഒരു പ്രശ്‌നത്തിനപ്പുറത്തേക്ക് കാര്യങ്ങള്‍ വളര്‍ന്നിട്ടുണ്ടെന്നും അദ്ദേഹം പറഞ്ഞു. അന്താരാഷ്ട്ര മയക്കു മരുന്നു വിരുദ്ധ ദിനാചരണത്തിന്റെ ജില്ലാതല ഉദ്ഘാടനം മലപ്പുറം മുന്‍സിപ്പല്‍ ടൗണ്‍ ഹാളില്‍ നിര്‍വഹിക്കുകയായിരുന്നു ജില്ലാ കലക്ടര്‍.

കിഡ്‌നി രോഗികളെ സഹായിക്കുന്നതിനായി ജില്ലാ പഞ്ചായത്തിന്റെ കീഴിലുള്ള  ജീവനം  പദ്ധതിക്കായി ഇന്ന് ജില്ലയില്‍ ജനകീയ ഫണ്ട് ശേഖരണം നടക്കും. 2019-20 വാര്‍ഷിക പദ്ധതിയില്‍ ജില്ലാ പഞ്ചായത്ത് 30 ലക്ഷം രൂപയാണ് പദ്ധതിക്കായി നീക്കിവെച്ചിട്ടുള്ളത്. 70 ലക്ഷം രൂപ പൊതുജനങ്ങളില്‍ നിന്നു ശേഖരിക്കും. എല്ലാ പഞ്ചായത്തുകളിലും പഞ്ചായത്ത് പ്രസിഡന്റുമാര്‍ ചെയര്‍മാനായുള്ള ജനകീയ കമ്മിറ്റികള്‍ രൂപീകരിച്ചിട്ടുണ്ട്. പാലിയേറ്റീവ് പ്രവര്‍ത്തകര്‍ കണ്‍വീനറും ജില്ലാ പഞ്ചായത്ത് അംഗങ്ങളും മറ്റു ജനപ്രതിനിധികളും സന്നദ്ധ സംഘടനകളും രാഷ്ട്രീയ പ്രസ്ഥാനങ്ങളുമെല്ലാം അംഗങ്ങളായുള്ള ജനകീയ കമ്മിറ്റികളുടെ ആഭിമുഖ്യത്തിലാണ് ധനസമാഹരണം.

    കമ്പളക്കാട് ഗവ. യു.പി സ്‌കൂളില്‍ ലഹരി വിരുദ്ധദിനം ആചരിച്ചു. പ്രധാനാധ്യാപിക ഷെര്‍ളി തോമസ് ലഹരിവിരുദ്ധ ബോധവല്‍ക്കരണ ക്ലാസ്സെടുത്തു. അധ്യാപകന്‍ ഗഫൂര്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. മുതിര്‍ന്ന അധ്യാപിക അല്‍ഫോന്‍സ ലഹരിവിരുദ്ധ സന്ദേശം നല്‍കി.

കല്‍പ്പറ്റ എന്‍.എം.എസ്.എം ഗവ. കോളജില്‍ ഇംഗ്ലീഷ് വിഷയത്തില്‍ ഗസ്റ്റ് ലക്ചറര്‍ നിയമനം നടത്തുന്നു. കൂടിക്കാഴ്ച ജൂലൈ ഒന്നിന് രാവിലെ 11ന് നടക്കും. യോഗ്യരായ ഉദ്യോഗാര്‍ത്ഥികള്‍ രേഖകള്‍ സഹിതം കോളജില്‍ ഹാജരാവണം. ഫോണ്‍: 04936 204569.

      പൊരുന്നന്നൂര്‍ സാമൂഹ്യാരോഗ്യ കേന്ദ്രത്തില്‍ ദിവസവേതനാടിസ്ഥാനത്തില്‍ ലാബ് ടെക്‌നീഷ്യന്‍ നിയമനത്തിനുളള കൂടിക്കാഴ്ച ജൂലൈ 3ന് രാവിലെ 10ന് സാമൂഹ്യാരോഗ്യ കേന്ദ്രത്തില്‍ നടക്കും. യോഗ്യത: ഗവ. അംഗീകൃത ബി.എസ്.സി (എം.എല്‍.ടി)/ഡി.എം.എല്‍.ടി. പ്രവൃത്തിപരിചയമുളളവര്‍ക്ക് മുന്‍ഗണന. താല്‍പര്യമുളളവര്‍ അസ്സല്‍ സര്‍ട്ടിഫിക്കറ്റുകള്‍ സഹിതം ഹാജരാകണം. ഫോണ്‍: 04935 240864.