ജീവിതശൈലീരോഗങ്ങളില്‍ നിന്ന്‌ മുക്തി നേടാനും ആരോഗ്യമുള്ള മനസ്സും ശരീരവും വാര്‍ത്തെടുക്കാനും സ്‌ത്രീകള്‍ക്കായി പെരിഞ്ഞനം പഞ്ചായത്തില്‍ വനിതാ ഹെല്‍ത്ത്‌ ക്ലബ്‌ ആരംഭിച്ചു. വനിതാ ആരോഗ്യത്തിനായി 2018-19 വാര്‍ഷികപദ്ധതിയില്‍ ഉള്‍പ്പെടുത്തിയ തനത്‌ ഫണ്ടില്‍ നിന്നാണ്‌ ആധുനികരീതിയിലുള്ള ഫിറ്റ്‌നസ്‌ സെന്റര്‍ സജ്ജമാക്കിയിരിക്കുന്നത്‌. രണ്ടേമുക്കാല്‍ ലക്ഷം രൂപയുടെ ഉപകരണങ്ങളാണ്‌ പരിശീലനത്തിനായി വാങ്ങിയിരിക്കുന്നത്‌.

ശ്രീനാരായണപുരം പഞ്ചായത്ത്‌, പടിഞ്ഞാറെ വെമ്പല്ലൂര്‍ പ്രാഥമികാരോഗ്യകേന്ദ്രം എന്നിവയുടെ സംയുക്താഭിമുഖ്യത്തില്‍ പഞ്ചായത്തിലെ പാലിയേറ്റീവ്‌ രോഗികള്‍ക്കായി രോഗീബന്ധുസംഗമം നടത്തി. പടിഞ്ഞാറെ വെമ്പല്ലൂര്‍ പ്രാഥമികാരോഗ്യകേന്ദ്രത്തില്‍ നടന്ന സംഗമം മതിലകം ബ്ലോക്ക്‌ പഞ്ചായത്ത്‌ പ്രസിഡണ്ട്‌ കെ.കെ. അബീദലി ഉദ്‌ഘാടനം ചെയ്‌തു. ചടങ്ങില്‍ രോഗികളെ ആദരിച്ച്‌ ഉപഹാരങ്ങള്‍ നല്‍കി. മികച്ച സേവനത്തിന്‌ പാലിയേറ്റീവ്‌ കെയര്‍ സിന്ധു.കെ.ആറിനെ ഫലകം നല്‍കി ആദരിച്ചു. രോഗികള്‍ക്കായി സൗജന്യകലാവിരുന്നും നടത്തി. പഞ്ചായത്ത്‌ പ്രസിഡണ്ട്‌ ഇ.കെ. മല്ലിക അദ്ധ്യക്ഷത വഹിച്ചു. പി.എച്ച്‌.സി മെഡിക്കല്‍ ഓഫീസര്‍ ഡോ.കെ.എം.

പൂത്തൂര്‍ സുവോളജിക്കല്‍ പാര്‍ക്ക്‌ പ്രദേശത്തുനിന്നും 1000 ടണ്ണോളമുള്ള മുള 8 കൂപ്പുകളായി ലേലം ചെയ്യുന്നു. മാര്‍ച്ച്‌ 11 വൈകീട്ട്‌ 3 ന്‌ പട്ടിക്കാട്‌ റെയിഞ്ചാഫീസിലാണ്‌ ലേലം. കൂടുതല്‍ വിവരങ്ങള്‍ക്ക്‌ ഫോണ്‍ : 8547601690, 8547601707.

നഗര-പട്ടണ പ്രദേശങ്ങളില്‍ നടക്കുന്ന ജനനമരണത്തെ സംബന്ധിച്ച വിവരങ്ങള്‍ ശേഖരിക്കുന്ന സ്‌പോട്ട്‌ ചെക്ക്‌ സര്‍വെ ജില്ലയില്‍ ആരംഭിച്ചു. സ്‌പോട്ട്‌ ചെക്ക്‌ സര്‍വെയുടെ ജില്ലാതല ഉദ്‌ഘാടനം കോര്‍പ്പറേഷന്‍ ആരോഗ്യ വികസന സ്റ്റാന്‍ഡിങ്‌ കമ്മിറ്റി ചെയര്‍പേഴ്‌സണ്‍ എം എല്‍ റോസി കോര്‍പ്പറേഷന്‍ സാമ്പിള്‍ വാര്‍ഡിലെ വീട്‌ നമ്പര്‍ 14/74 വിനോദിന്റെ വസതിയില്‍ നിന്നും വിവരങ്ങള്‍ ശേഖരിച്ചു നിര്‍വഹിച്ചു. സാമ്പത്തിക സ്ഥിതിവിവരകണക്ക്‌ വകുപ്പ്‌ ഡെപ്യൂട്ടി ഡയറക്‌ടര്‍ എ പി ഷോജന്‍ അദ്ധ്യക്ഷത വഹിച്ചു.

കയര്‍ തൊഴിലാളി ക്ഷേമനിധി ബോര്‍ഡില്‍ നിന്നും പെന്‍ഷന്‍ കൈപ്പറ്റുന്നവര്‍ ഏപ്രില്‍ മാസത്തില്‍ ലൈഫ്‌ സര്‍ട്ടിഫിക്കറ്റ്‌ ഹാജരാക്കണമെന്ന്‌ വടക്കന്‍ പറവൂര്‍ റീജിയണല്‍ ഓഫീസര്‍ അറിയിച്ചു. ലൈഫ്‌ സര്‍ട്ടിഫിക്കറ്റിന്‌ ഒപ്പം ക്ഷേമനിധി പാസ്‌ബുക്കിന്റെ/ പെന്‍ഷന്‍ കാര്‍ഡിന്റെ പകര്‍പ്പ്‌ കൂടി നല്‍കണം. ലൈഫ്‌ സര്‍ട്ടിഫിക്കറ്റ്‌ ഹാജരാക്കുന്നതിന്‌ പെന്‍ഷണര്‍ നേരിട്ട്‌ ഹാജരാകണമെന്നില്ല ദൂതന്‍ മുഖേനയോ തപാല്‍ മുഖനയോ ബന്ധപ്പെട്ട രേഖകള്‍ സഹിതം ലൈഫ്‌ സര്‍ട്ടിഫിക്കറ്റ്‌ നല്‍കാണം. കൂടുതല്‍ വിവരങ്ങള്‍ക്ക്‌ ഫോണ്‍ : 0484- 2441945.

ലോകസഭ തെരഞ്ഞെടുപ്പിന്റെ നടത്തിപ്പുമായി ബന്ധപ്പെട്ട്‌ നോഡല്‍ ഓഫീസര്‍മാരുടെ യോഗം മാര്‍ച്ച്‌ 11 രാവിലെ 10.30 ന്‌ ജില്ലാ കളക്‌ടറുടെ ചേമ്പറില്‍ ചേരും.

ബാലസൗഹൃദജില്ലാ അനുബന്ധ പ്രവര്‍ത്തനങ്ങള്‍ പദ്ധതിക്ക്‌ ജില്ലയില്‍ തുടക്കമായി. കുട്ടികളുടെ കുഞ്ഞുലോകം മഹത്തരവും ശ്രേഷ്‌ഠവുമാക്കുന്നതിനുള്ള നടപടികളുടെ ഭാഗമായി വിജ്ഞാനപ്രദമായ ബോര്‍ഡുകള്‍ സ്ഥാപിക്കുക എന്ന ജില്ലാപഞ്ചായത്ത്‌ വിഭാവനം ചെയ്‌ത പദ്ധതിയുടെ ഉദ്‌ഘാടനം കളക്‌ട്രേറ്റ്‌ കോമ്പൗണ്ടില്‍ ജില്ലാ പഞ്ചായത്ത്‌ പ്രസിഡണ്ട്‌ മേരി തോമസ്‌ നിര്‍വ്വഹിച്ചു. ജില്ലാ പഞ്ചായത്ത്‌ വൈസ്‌ പ്രസിഡണ്ട്‌ ഉദയപ്രകാശ്‌, ചെയര്‍പേഴ്‌സണ്‍മാരായ പദ്‌മിനി ടീച്ചര്‍, ജെന്നിടീച്ചര്‍, മഞ്‌ജുള അരുണന്‍, വനിതാശിശുവികസന വകുപ്പ്‌ പ്രോഗ്രാംഓഫീസര്‍ ചിത്രലേഖ, ജില്ലാ പഞ്ചായത്ത്‌ ടി.എസ്‌മജീദ്‌ തുടങ്ങിയവര്‍ പങ്കെടുത്തു.

ഗ്രാമപഞ്ചായത്ത്‌ പ്രദേശങ്ങളില്‍ അനധികൃതമായി സ്ഥാപിച്ച ബാനറുകള്‍, ഫ്‌ളക്‌സ്‌ പരസ്യബോര്‍ഡുകള്‍, ഹോര്‍ഡിങ്ങുകള്‍, കൊടികള്‍ എന്നിവ നീക്കുന്നതിനുളള നോഡല്‍ ഓഫീസറായി പഞ്ചായത്ത്‌ ഡെപ്യൂട്ടി ഡയറക്‌ടറെ നിയോഗിച്ചു. ഹൈക്കോടതി ഉത്തരവനുസരിച്ചാണിത്‌. ഇത്‌ സംബന്ധിച്ച പരാതികള്‍ ddptcr@gmail.com. എന്ന മെയിലോ 9469046010 ഫോണിലോ 9387058110 വാട്‌സ്‌ അപ്പ്‌ നമ്പറിലോ അറിയിക്കുക.

ലോകസഭ പൊതുതിരഞ്ഞെടുപ്പിന്റെ ഭാഗമായി സ്ഥാനാര്‍ത്ഥികള്‍ക്ക്‌ / വിവിധ രാഷ്‌ട്രീയ പാര്‍ട്ടികള്‍ക്ക്‌ ആവശ്യമായ ഇലക്ഷന്‍ പോസ്റ്ററുകള്‍, പാംലേറ്റുകള്‍ എന്നിവ അച്ചടിച്ച്‌ പ്രസിദ്ധീകരിക്കുന്ന ജില്ലയിലെ പബ്ലിഷര്‍മാര്‍ / പ്രിന്റര്‍മാര്‍ ജനപ്രാതിനിധ്യ നിയമം 1951 ലെ സെക്ഷന്‍ 127 (എ) ല്‍ പ്രതിപാദിച്ചിട്ടുളള നടപടിക്രമങ്ങള്‍ പൂര്‍ണ്ണമായും പാലിച്ചുമാത്രമേ അത്തരം ജോലികളില്‍ ഏര്‍പ്പെടാവൂ എന്ന്‌ ജില്ലാ തിരഞ്ഞെടുപ്പ്‌ ഉദ്യോഗസ്ഥാന്‍ അറിയിച്ചു. കമാനങ്ങളുടെ നിര്‍മ്മിതി, ഫ്‌ളക്‌സ്‌ ബോര്‍ഡുകള്‍ സ്ഥാപിക്കല്‍ എന്നിവ ജനപ്രാതിനിധ്യ നിയമം 1951 ലെ സെക്ഷന്‍ 127 (എ) യുടെ പരിധിയില്‍ വരുന്നതാണ്‌.