മുതിരിപ്പറമ്പ ജി.എം.യു.പി.സ്‌കൂള്‍, ചെമ്മങ്കടവ് ജി.എം.യു.പി.സ്‌കൂള്‍, വടക്കേമണ്ണ ജി.എം.എല്‍.പി.സ്‌കൂള്‍, ആനക്കയം ജി.എല്‍.പി.സ്‌കൂള്‍ എന്നീ സ്‌കൂ ളുകളിലേക്ക് പി.ഉബൈദുള്ള എംഎല്‍എയുടെ ആസ്തി വികസന ഫണ്ട് ഉപയോഗിച്ച് വാങ്ങിയ ബസ്സുകള്‍ കൈമാറി. മലപ്പുറം മണ്ഡലം സമഗ്ര വിദ്യാഭ്യാസ പദ്ധതിയുടെ ഭാഗമായി ഇതോടെ പതിനാറ് വിദ്യാലയങ്ങള്‍ക്കാണ്  ബസുകള്‍ കൈമാറിയത്. സ്‌കൂള്‍ ബസുകളുടെ ഫ്‌ളാഗ് ഓഫ് പി ഉബൈദുള്ള എംഎല്‍എ നിര്‍വഹിച്ചു.

       ജില്ലയില്‍ കുടിവെള്ളക്ഷാമം രൂക്ഷമായ ഗ്രാമപഞ്ചായത്തുകള്‍ക്ക് വരള്‍ച്ച ദുരിതാശ്വാസ ഫണ്ടില്‍ നിന്ന് സര്‍ക്കാര്‍ അനുവദിച്ചത് 50 ലക്ഷം രൂപ. കുടിവെള്ള വിതരണത്തിന് വരള്‍ച്ച ദുരിതാശ്വാസ ഫണ്ട് ആവശ്യപ്പെട്ട ഒന്‍പത് പഞ്ചായത്തുകള്‍ക്കാണ് 50 ലക്ഷം രൂപ അനുവദിച്ചിട്ടുള്ളത്. പുളിക്കല്‍, ചേലേമ്പ്ര, പുഴക്കാട്ടിരി, വള്ളിക്കുന്ന്, താനൂര്‍, മക്കരപ്പറമ്പ്, മൂര്‍ക്കനാട്, വാഴക്കാട് തുടങ്ങിയ ഒന്‍പത് ഗ്രാമപഞ്ചായത്തുകളാണ് ഫണ്ട് ആവശ്യപ്പെട്ടിരുന്നത്.

കുട്ടികള്‍ക്കെതിരെയുള്ള അതിക്രമങ്ങള്‍ തടയുന്നതിനും രക്ഷിതാക്കളെ ശാക്തീകരിക്കുന്നതിനുമായി വനിതാശിശുവികസന വകുപ്പിന്റെ നേതൃത്വത്തില്‍ നടത്തുന്ന 'കരുതല്‍ സ്പര്‍ശം - കൈകോര്‍ക്കാം കുട്ടികള്‍ക്കായി' ക്യാമ്പയിന്  ജില്ലയില്‍ തുടക്കമായി.  അന്താരാഷ്ട്ര പാരന്റിങ് ദിനമായ ജൂണ്‍ ഒന്നിന് ശില്പശാലയോടെയാണ് ജില്ലയില്‍ ക്യാംപയ്ന്‍ തുടങ്ങിയത്. ക്യാമ്പയിന്‍ കാലയളവില്‍ കുട്ടികളുടെ ക്ഷേമത്തിനായി വിവിധ പദ്ധതികള്‍ ആവിഷ്‌കരിച്ചിട്ടുണ്ട്. രക്ഷിതാക്കള്‍ക്കും കുട്ടികള്‍ക്കുമായി ബോധവത്കരണവും പ്രചരണ പരിപാടിയും ഇക്കാലയളവില്‍ നടക്കും.

കാര്‍ത്തികപ്പള്ളി കുടിവെള്ള പദ്ധതി ഉദ്ഘാടനം ചെയ്തതോടെ കാര്‍ത്തികപ്പള്ളി പഞ്ചായത്തിന്റെ വിവിധ പ്രദേശങ്ങളില്‍ നിലനിന്നിരുന്ന കുടിവെള്ള ക്ഷാമത്തിന് പരിഹാരമായി. ഹരിപ്പാട് ബ്ലോക്ക് പഞ്ചായത്തിന്റെ 2017-18 സാമ്പത്തിക വര്‍ഷത്തിലെ നിക്ഷേപ പദ്ധതിയില്‍ ഉള്‍പ്പെടുത്തി 14.33 ലക്ഷം രൂപ വിനിയോഗിച്ചാണ് കാര്‍ത്തികപ്പള്ളി പ്രാധമികാരോഗ്യ കേന്ദ്രത്തിന്റെ പരിസരത്ത് കുഴല്‍ കിണറും പമ്പ് ഹൗസും ഉള്‍പ്പെടുന്ന ശുദ്ധജല വിതരണ പദ്ധതി സ്ഥാപിച്ചത്. പ്രദേശവാസികളുടെ ദീര്‍ഘകാല സ്വപ്നമായിരുന്ന ഈ പദ്ധതിയുടെ ഉദ്ഘാടന ചടങ്ങില്‍ പങ്കെടുക്കാന്‍ നൂറ് കണക്കിന് ആളുകളാണ് എത്തിയത്.

ഹരിപ്പാട്: 14.33 ലക്ഷം രൂപ വിനിയോഗിച്ച് നിര്‍മിച്ച കാര്‍ത്തികപ്പള്ളി കുടിവെള്ള പദ്ധതിയുടെ ഉദ്ഘാടനം നടത്തി. ഹരിപ്പാട് ബ്ലോക്ക് പഞ്ചായത്ത് ഫണ്ട് വിനിയോഗിച്ച് പൂര്‍ത്തീകരിച്ച പദ്ധതിയുടെ ഉദ്ഘാടനം പ്രതിപക്ഷ നേതാവ് രമേശ് ചെന്നിത്തലയാണ് നിര്‍വഹിച്ചത്. 450 കോടി രൂപ ചെലവില്‍ നിര്‍മ്മിക്കുന്ന ഹരിപ്പാട് കുടിവെള്ള പദ്ധതിയുടെ ഒന്നാം ഘട്ടം പള്ളിപ്പാട് പൂര്‍ത്തിയായി വരുകയാണെന്നും പമ്പയാറ്റില്‍ നിന്നുള്ള വെള്ളം ശുദ്ധീകരിച്ച് ഹരിപ്പാട് നഗരസഭ, വിവിധ പഞ്ചായത്തുകള്‍ എന്നിവിടങ്ങളില്‍ എത്തിക്കുന്ന ഈ പദ്ധതി രണ്ട് വര്‍ഷത്തിനകം യാഥാര്‍ത്ഥ്യമാകുമെന്നും അദ്ദേഹം പറഞ്ഞു.

ആലപ്പുഴ: ആലപ്പുഴ വണ്ടാനം മെഡിക്കൽ കോളജ് ആശുപത്രിയിലെ  ആവശ്യത്തിനായി   ബ്രഷ്‌ലെസ് ടേബിൾ ടോപ്പ്, ഡിസ്‌പോസബിൾ മൈക്രോടിപ്പ്,, സ്‌ക്രൂ കേപ്പഡ് ബ്ലഡ് കളക്ഷൻ വിയാൽ, ബീക്കർ,മൈക്രോപിപ്പറ്റ്, പെൻഡ്രൈവ്, പ്രിന്റർ കാഡ്രിഡ്ജ്, എഫോർ പേപ്പർ, ഒ.എച്ച്.പി പേൻ, ഫയൽ ഫോള്ഡർ, പ്ലാസ്റ്റിക് ഗ്ലൗവ്‌സ് എന്നീ സാധനങ്ങൾ വിതരണം ചെയ്യുന്നതിന് ക്വട്ടേഷൻ ക്ഷണിച്ചു.   ക്വട്ടേഷൻ ജൂൺ 11  ഉച്ചകഴിഞ്ഞ് മൂന്നിനകം സൂപ്രണ്ട്, മെഡിക്കൽ  കോളജ്  ആശുപത്രി, വണ്ടാനം, ആലപ്പുഴ  എന്ന വിലാസത്തിൽ ലഭിക്കണം.

ആലപ്പുഴ: അർത്തുങ്കൽ ഗവ:റീജിയണൽ ഫിഷറീസ് ടെക്‌നിക്കൽ ഹൈസ്‌കൂളിൽ കെയർ ടേക്കറുടെയും വാർഡൻ കം ട്യൂട്ടറുടെയും ഒഴിവിലേക്ക് താൽകാലിക നിയമനത്തിന് അപേക്ഷ ക്ഷണിച്ചു. ബിരുദം ,ബിഎഡ് ആണ് കെയർ ടേക്കറുടെ യോഗ്യത.നിർദിഷ്ട യോഗ്യതയുള്ള പുരുഷന്മാർ അസ്സൽ  സർട്ടിഫിക്കറ്റുകളുമായി  ജൂൺ മൂന്നിനു പകൽ  12നു സ്‌കൂളിൽ എത്തണം .ഫോൺ: 9744293930. ബിഎഡ്, ബിപിഎഡ് (ഫിസിക്കൽ എഡ്യൂക്കേഷൻ) ആണ് വാർഡ് കം ട്യൂട്ടറുടെ യോഗ്യത. നിർദിഷ്ട യോഗ്യതയുള്ള പുരുഷന്മാർ അസൽ  സർട്ടിഫിക്കറ്റുകളുമായി ജൂൺ മൂന്നിനു പകൽ 11 ന് സ്‌കൂളിൽ എത്തണം . ഫോൺ: 9495518264

ആലപ്പുഴ: പുന്നപ്ര ഡോ. അംബേദ്കർ മെമ്മോറിയൽ ഗവ. മോഡൽ റസിഡൻഷ്യൽ സ്‌കൂളിൽ ബസിന്റെ ഡ്രൈവർ ഗ്രേഡ്- ഒന്ന് തസ്തികയിലേക്ക് ദിവസക്കൂലിയിനത്തിൽ നിയമിക്കുന്നതിന് അപേക്ഷ ക്ഷണിച്ചു. വാക്ക്-ഇൻ-ഇന്റർവ്യൂവിലുടെയാണ് നിയമനം. താത്പര്യമുള്ളവർ ജൂൺ  ആറിന്് ഉച്ചയ്ക്ക് രണ്ടിന് ഡോ.അംബേദ്കർ മെമ്മോറിയൽ ഗവ. മോഡൽ റസിഡൻഷ്യൽ സ്‌കൂളിൽ  എത്തണം. നിയമനം താൽകാലികവും പി.എസ്.സി വഴിയോ, എംപ്ലോയ്‌മെന്റ് വഴിയോ നിയമനം നടത്തുന്നത് വരയോ മാത്രമായിരിക്കും.  പങ്കെടുക്കുന്നവർക്ക് നിർബന്ധമായും ഹെവി ഡ്രൈവിങ് ലൈസൻസ്, ലൈറ്റ് മോട്ടോർ ബാഡ്ജ്, ആർ.ടി ഓഫീസിൽ നിന്നുള്ള ട്രാക്കിങ് റെക്കോർഡ്‌സ്, 10 വർഷം പ്രവൃത്തി പരിചയം എന്നിവ ഉണ്ടായിരിക്കണം.