കുടുംബശ്രീ  വിപണിയിലെത്തിക്കുന്ന അരിയായ 'ഗ്രാമശ്രീ'യുടെ ആദ്യ വില്‍പ്പന നടത്തി.  സംസ്ഥാന സര്‍ക്കാരിന്റെ 1000 ദിനാഘോഷങ്ങളുടെ ഭാഗമായി നാഗമ്പടം മൈതാനിയില്‍ നടന്നു വരുന്ന ഉത്പന്ന പ്രദര്‍ശന വിപണന മേളയുടെ  വേദിയില്‍ വെച്ച് ജില്ലാ കളക്ടര്‍ പി.കെ സുധീര്‍ ബാബുവിന് നല്‍കി സി.കെ ആശ എം.എല്‍.എ നിര്‍വഹിച്ചു.

പൊതു വിദ്യാഭ്യാസ യജ്ഞത്തിലൂടെ വിദ്യാര്‍ത്ഥികളുടെ സമഗ്ര പുരോഗതി സാധ്യമാക്കാന്‍ സാധിച്ചതായി  വിദ്യാഭ്യാസ സെമിനാര്‍ വിലയിരുത്തി. സര്‍ക്കാരിന്റെ 1000 ദിനത്തോടനുബന്ധിച്ച് നാഗമ്പടം മൈതാനിയില്‍ വിദ്യാഭ്യാസ വകുപ്പ് സംഘടിപ്പിച്ച 'ഭാവി കേരളത്തിനായുള്ള പൊതു വിദ്യാഭ്യാസം' എന്ന സെമിനാറിലാണ് വിലയിരുത്തല്‍. ഭൗതിക സൗകര്യങ്ങള്‍ മെച്ചപ്പെടുത്തുന്നതിലാണ് പൊതുവിദ്യാഭ്യാസ സംരക്ഷണയഞ്ജം മുന്‍തൂക്കം നല്‍കുന്നത്. മെച്ചപ്പെട്ട വിദ്യാഭ്യാസം നല്‍കുന്നതിന്  നല്ല ഭൗതിക സാഹചര്യങ്ങള്‍ അനിവാര്യമാണെന്ന് സെമിനാര്‍ നയിച്ച പൊതു വിദ്യാഭ്യാസ സംരക്ഷണ യജ്ഞം സംസ്ഥാന കോര്‍ഡിനേറ്റര്‍ രതീഷ് കാളിയാടന്‍ പറഞ്ഞു. 

മണ്ണറിഞ്ഞ് കൃഷി ചെയ്യാന്‍ ഇനി കര്‍ഷകര്‍ക്ക് നെട്ടോട്ടമോടേണ്ട. മണ്ണിന്റെ പോഷക ഗുണങ്ങള്‍ അറിയാനുള്ള  മൊബൈല്‍ ആപ്ലിക്കേഷന്‍  മണ്ണുപര്യവേക്ഷണ - മണ്ണ് സംരക്ഷണ വകുപ്പ് പ്രകാശനം ചെയ്തു.

പ്രളയത്തില്‍ വീട് നഷ്ടപ്പെട്ടവര്‍ക്കായി പുതിയ വീട് നിര്‍മ്മിച്ച് നല്‍കുന്നതിന് സഹകരണ വകുപ്പാക്കുന്ന കെയര്‍ ഹോം പദ്ധതിയില്‍ നിര്‍മ്മാണം പൂര്‍ത്തീകരിച്ച 29 വീടുകളുടെ താക്കോല്‍ കൈമാറ്റം നടത്തി. സംസ്ഥാനസര്‍ക്കാര്‍ 1000 ദിനം പൂര്‍ത്തീകരിച്ചതിന്റെ ജില്ലാതല ആഘോഷം നടക്കുന്ന നാഗമ്പടം മൈതാനിയില്‍ സംഘടിപ്പിച്ച ചടങ്ങില്‍ ഭക്ഷ്യ സിവില്‍ സപ്ലൈസ് വകുപ്പ് മന്ത്രി പി. തിലോത്തമന്‍, സി.കെ ആശ എം.എല്‍.എ എന്നിവര്‍ ചേര്‍ന്ന് താക്കോല്‍ ദാനം നിര്‍വഹിച്ചു.

    വ്യവസായ സംരംഭകര്‍ക്ക് പ്രളയാന്തര സഹായം നല്‍കുന്നതിന്റെ ഭാഗമായി ജില്ലാ വ്യവസായ കേന്ദ്രങ്ങള്‍ മുഖേന എടുത്തിട്ടുളള വായ്പകളുടെ മാര്‍ജിന്‍ മണി കുടിശ്ശിക ഒറ്റത്തവണയായി അടച്ച് തീര്‍ക്കാന്‍ അവസരം. ഏപ്രില്‍ 30നകം തുക അടയ്ക്കുന്നവര്‍ക്ക് പിഴപലിശ പൂര്‍ണ്ണമായും ഒഴിവാക്കി നല്‍കും. മാര്‍ജിന്‍ മണിയുടെ സാധാരണ പലിശയുടെ 50 ശതമാനം ഇളവ് അനുവദിക്കും. സംരംഭകര്‍ ജില്ലാ വ്യവസായ കേന്ദ്രവുമായി ബന്ധപ്പെടണം. ഫോണ്‍: 0481 2573259 

     ജില്ലാ ഭക്ഷ്യോപദേശക വിജിലന്‍സ് ആന്റ് പ്രൈസ് മോണിറ്ററി സംയുക്ത സമിതി യോഗം മാര്‍ച്ച് രണ്ടിന് കളക്‌ട്രേറ്റില്‍ ചേരും. രാവിലെ 11.30ന് ചേരുന്ന യോഗത്തില്‍ ജില്ലാ കളക്ടര്‍ പി. കെ സുധീര്‍ ബാബു അദ്ധ്യക്ഷത വഹിക്കും.  

                                                          (കെ.ഐ.ഒ.പി.ആര്‍-388/19)

      ഏറ്റുമാനൂര്‍-കോട്ടയം റെയില്‍വേ സ്റ്റേഷനുകള്‍ക്കിടയിലെ കൊച്ചടിച്ചിറ ഗേറ്റ് ഇന്ന് (ഫെബ്രുവരി 27) രാവിലെ എട്ടു മുതല്‍ ആറ് വരെ അടിയന്തിര അറ്റകുറ്റപണികള്‍ക്കായി അടച്ചിടുമെന്ന് എഡിഎം അറിയിച്ചു. 

                                                              (കെ.ഐ.ഒ.പി.ആര്‍-387/19)

      പള്ളം ബ്ലോക്ക് പഞ്ചായത്തില്‍ നടപ്പാക്കുന്ന കൃഷി സിഞ്ചായി യോജന പദ്ധതിയില്‍ ദിവസ വേതനാടിസ്ഥാനത്തില്‍ ഡബ്ല്യു.ഡി.റ്റി എന്‍ജിനീയര്‍ നിയമനത്തിനുള്ള എഴുത്ത് പരീക്ഷ മാര്‍ച്ച് ഒന്ന് രാവിലെ 10 ന് കോട്ടയം ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടത്തും. വിജയിക്കുന്നവര്‍ക്കുള്ള അഭിമുഖം  ഉച്ചയ്ക്ക് നടത്തും. അപേക്ഷ സമര്‍പ്പിച്ചിട്ടുള്ളവര്‍ അസല്‍ സര്‍ട്ടിഫിക്കറ്റ്, തൊഴില്‍ പരിചയ സര്‍ട്ടിഫിക്കറ്റ്, തിരിച്ചറിയല്‍ രേഖ എന്നിവ സഹിതം രാവിലെ ഒന്‍പതിന് എത്തണമെന്ന്                   പി.എ.യു പ്രോജക്ട് ഡയറക്ടര്‍ അറിയിച്ചു.

    ആയിരം ദിനാഘോഷത്തിന്റെ ഭാഗമായി നാഗമ്പടം മൈതാനിയില്‍ ഇന്ന്      (ഫെബ്രുവരി 27) നവകേരളത്തിന്റെ സുസ്ഥിര നിര്‍മ്മാണം സംബന്ധിച്ച് സെമിനാര്‍ നടത്തും. ഉച്ചയ്ക്ക രണ്ടിന് നടക്കുന്ന സെമിനാര്‍ ടൂറിസം വകുപ്പ് ജോയിന്റ് ഡയറക്ടര്‍ കെ.പി നന്ദകുമാര്‍ നയിക്കും. എം.ജി യൂണിവേഴ്‌സിറ്റി ടൂറിസം ഡിപ്പാര്‍ട്ട്‌മെന്റ് മേധാവി റോബിനെറ്റ്, ടൂറിസം വകുപ്പ് ഡെപ്യൂട്ടി ഡയറക്ടര്‍ ബിജു വര്‍ഗ്ഗീസ്,ഡിറ്റിപിസി സെക്രട്ടറി ഡോ.ബിന്ദുകുമാരി, ടൂറിസം ക്ലബ് ജില്ലാ കോ-ഓര്‍ഡിനേറ്റര്‍ കടനാട് സെന്റ് സെബാസ്റ്റ്യന്‍സ് എച്ച്എസ്എസ് അധ്യാപകന്‍ സാജു മാത്യു എന്നിവര്‍ സംസാരിക്കും.