കിളിമാനൂര്‍ പഞ്ചായത്തിലെ വിലങ്ങറ വാര്‍ഡ് നിവാസികളുടെ സ്വപ്നമായ വട്ടപ്പാറ കാലയ്ക്കോട്-മാവുവിള റോഡിന്റെ പുനര്‍നിര്‍മാണ പ്രവര്‍ത്തികള്‍ക്കു തുടക്കമായി. നവീകരണ പ്രവര്‍ത്തനങ്ങള്‍ ജില്ലാ പഞ്ചായത്ത് സ്ഥിരം സമിതി അധ്യക്ഷന്‍ ബി.പി മുരളി ഉദ്ഘാടനം ചെയ്തു.

ജില്ലാ പഞ്ചായത്തിന്റെ വികസന ഫണ്ടില്‍ നിന്നും ഒരു കോടി രൂപ ചെലവഴിച്ച് ആധുനിക രീതിയില്‍ റോഡ് നവീകരണം പൂര്‍ത്തിയാക്കാനാണ് ഉദ്ദേശ്യം. തകര്‍ന്നു കിടന്ന റോഡ് പുനര്‍നിര്‍മിക്കുന്നതിലൂടെ പ്രദേശവാസികളുടെ ദീര്‍ഘകാല ആഗ്രഹമാണ് സഫലമാകുന്നത്.

ആറ്റിങ്ങലില്‍ നെല്ല് സംസ്‌കരണത്തിന് ആവശ്യമായ സൗകര്യമൊരുക്കാന്‍ തീരുമാനം. കരവാരത്തുള്ള നെല്ല് സംസ്‌കരണ കേന്ദ്രം പൂര്‍ണതോതില്‍ പ്രവര്‍ത്തനസജ്ജമാക്കാനും ജൈവകാര്‍ഷിക മണ്ഡലം നിര്‍വഹണ സമിതി യോഗം തീരുമാനിച്ചു. തരിശു നിലങ്ങള്‍ ഏറ്റെടുത്തു നെല്‍ക്കൃഷി വ്യാപകമാക്കിയതിനു പിന്നാലെയാണു മണ്ഡലത്തില്‍ നെല്ല് സംസ്‌കരണത്തിന് വിപുലമായ സൗകര്യമേര്‍പ്പെടുത്തുന്നത്.

കാസര്‍കോട് കുടുംബശ്രീയുടെ പട്ടികവര്‍ഗ സുസ്ഥിര വികസന പദ്ധതിയുടെ ഭാഗമായി ആരംഭിക്കുന്ന കൊറഗ പ്രൊജക്ടിലേക്ക് ഈ വര്‍ഷത്തില്‍ നടപ്പിലാക്കേണ്ട വികസന പരിപാടികള്‍ സംഘടിപ്പിക്കുന്നതിന് ജില്ലയില്‍ കൊറഗ വിഭാഗത്തില്‍ നിന്നും ആനിമോര്‍ കോ ഓര്‍ഡിനേറ്ററെ തിരഞ്ഞടുക്കുന്നു. എംഎസ്ഡബ്ല്യു അഥവാ എംഎ സോഷ്യാളജി ബിരുദാനന്തര ബിരുദം യോഗ്യതയുള്ളവരെയാണ് ആവശ്യം. താല്‍പര്യമുള്ളവര്‍ ഒക്ടോബര്‍ 22ന് തീയതി വിദ്യാനഗര്‍സിവില്‍ സ്റ്റേഷനിലുള്ള കുടുംബശ്രീ ജില്ലാ മിഷന്‍ ഓഫീസില്‍ ഒറിജിനല്‍ യോഗ്യത സര്‍ട്ടിഫിക്കറ്റുകളും പകര്‍പ്പുകളും സഹിതം ഹാജരാകണം. ഫോണ്‍:  04994 256111, 9447489078.

ചെമ്മനാട് ഗ്രാമപഞ്ചായത്തിലെ റോഡുകളിലും, നടപ്പാതകളിലും കാല്‍നടയാത്രക്കാര്‍ക്കും പൊതുജനങ്ങള്‍ക്കും തടസം സൃഷ്ടിക്കുന്ന രീതിയില്‍ അനധികൃതമായി സ്ഥാപിച്ചിരിക്കുന്ന ഫ്‌ളക്‌സുകള്‍, പരസ്യബോര്‍ഡുകള്‍, ഹോള്‍ഡിംഗ്‌സുകള്‍ എന്നിവ ഈ മാസം 15നകം വ്യക്തികള്‍ തന്നെ നീക്കം ചെയ്യണമെന്ന് സെക്രട്ടറി അറിയിച്ചു. അല്ലാത്തപക്ഷം പഞ്ചായത്ത് നേരിട്ട് നീക്കംചെയ്യുന്നതും സ്ഥാപിച്ചവര്‍ക്കെതിരെ നിയമപ്രകാരമുളള കര്‍ശന നടപടി സ്വീകരിക്കുന്നതുമായിരിക്കും. പഞ്ചായത്തിന്റെ മുന്‍കൂര്‍ അനുമതിയില്ലാതെ പരസ്യ ബോര്‍ഡുകള്‍ (ഹോള്‍ഡിംഗ്‌സുകള്‍, ബാനറുകള്‍ എന്നിവ സ്ഥാപിക്കാന്‍ പാടില്ലെന്നും സെക്രട്ടറി അറിയിച്ചു.

എറണാകുളം ജില്ലാ ഉപഭോക്തൃ തര്‍ക്കപരിഹാര ഫോറത്തില്‍ ഒഴിവുവരുന്ന മുഴുവന്‍ സമയ അംഗത്തിന്റെ തസ്തികയിലേക്ക് നിയമനത്തിന് അപേക്ഷ ക്ഷണിച്ചു. അപേക്ഷകര്‍ അംഗീകൃത യൂണിവേഴ്‌സിറ്റി ബിരുദമുള്ളവരും, 35 വയസോ അതിനു മുകളിലോ പ്രായമുള്ളവരായിരിക്കണം. ധനതത്വം, നിയമം, കൊമേഴ്‌സ്, അക്കൗണ്ടന്‍സി, വ്യവസായം, പൊതുകാര്യങ്ങള്‍, ഭരണനിര്‍വഹണം എന്നീ വിഷയങ്ങള്‍ കൈകാര്യം ചെയ്യുന്നതില്‍ 10 വര്‍ഷത്തില്‍ കുറയാത്ത പ്രവൃത്തി പരിചയം ഉള്ളവരും , കഴിവും, ആര്‍ജവവും ഉള്ളവരും ആയിരിക്കണം. നിയമന കാലാവധി അഞ്ച് വര്‍ഷം വരെയോ, 65 വയസ് വരെയോ (ഏതാണോ ആദ്യം അതുവരെ) ആണ്.

 കാസര്‍കോട്, കോഴിക്കോട് ജില്ലാ ഉപഭോക്തൃ തര്‍ക്കപരിഹാര ഫോറത്തില്‍ ഒഴിവുവരുന്ന മുഴുവന്‍ സമയ വനിത അംഗത്തിന്റെ തസ്തികയിലേക്ക് നിയമനത്തിന് അപേക്ഷ ക്ഷണിച്ചു. അപേക്ഷകര്‍ അംഗീകൃത യൂണിവേഴ്‌സിറ്റി ബിരുദമുള്ളവരും, 35 വയസോ അതിനു മുകളിലോ പ്രായമുള്ളവരായിരിക്കണം. ധനതത്വം, നിയമം, കൊമേഴ്‌സ്, അക്കൗണ്ടന്‍സി, വ്യവസായം, പൊതുകാര്യങ്ങള്‍, ഭരണനിര്‍വഹണം എന്നീ വിഷയങ്ങള്‍ കൈകാര്യം ചെയ്യുന്നതില്‍ 10 വര്‍ഷത്തില്‍ കുറയാത്ത പ്രവൃത്തി പരിചയം ഉള്ളവരും , കഴിവും, ആര്‍ജവവും ഉള്ളവരും ആയിരിക്കണം. നിയമന കാലാവധി അഞ്ച് വര്‍ഷം വരെയോ, 65 വയസ് വരെയോ (ഏതാണോ ആദ്യം അതുവരെ) ആണ്.

ജില്ലാബാലശാസ്ത്ര കോണ്‍ഗ്രസ് ഒക്‌ടോബര്‍ 30, 31 തീയതികളില്‍ പെരിയ നവോദയവിദ്യാലയത്തില്‍ നടക്കും. ഗൈഡ് ടീച്ചറുടെ നേതൃത്വത്തില്‍ രണ്ട് വിദ്യാര്‍ത്ഥികള്‍വീതം ചേര്‍ന്ന് തയ്യാറാക്കുന്ന പ്രോജക്ടുകള്‍  അവതരിപ്പിക്കാം.     എത്ര പ്രോജക്ടുകള്‍ വേണമെങ്കിലും അയക്കാം. 10 നും 14 നും ഇടയിലുള്ള കുട്ടികള്‍ ജൂനിയര്‍ വിഭാഗത്തിലും 14 നും 17 നും ഇടയിലുള്ള വിദ്യാര്‍ത്ഥികള്‍ സീനിയര്‍വിഭാഗത്തിലും മത്സരിക്കാം. തിരഞ്ഞെടുക്കപ്പെടുന്നവര്‍ നവംബര്‍ 16, 17 തീയ്യതികളില്‍ വയനാട് നടക്കുന്ന സംസ്ഥാന തലമത്സരത്തില്‍ പങ്കെടുക്കാം.

സംസ്ഥാന കൈത്തറി വസ്ത്ര വികസന വകുപ്പും, കേരള ഇന്‍സ്റ്റിറ്റ്യൂട്ട് ഫോര്‍ എന്റര്‍പ്രണര്‍ഷിപ്പ് ഡവലപ്‌മെന്റും സംയുക്തമായി കൈത്തറി മേഖലയില്‍ പ്രവര്‍ത്തിക്കുന്ന സഹകരണ സംഘം സെക്രട്ടറിമാര്‍ക്കും, ഹാന്‍ടെക്‌സ്, ഹാന്‍വീവ്, ജില്ല വ്യവസായ കേന്ദ്രം ഇന്‍സ്‌പെക്ടര്‍മാര്‍ക്കുമായി ഏകദിന പരിശീലനം സംഘടിപ്പിച്ചു. കണ്ണൂര്‍ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഹാന്‍ഡ്‌ലും ടെക്‌നോളജിയില്‍ നടത്തിയ പരിശീലനം സംസ്ഥാന കൈത്തറി വികസന ക്ഷേമനിധി ബോര്‍ഡ് ചെയര്‍മാന്‍ അരക്കന്‍ ബാലന്‍ ഉദ്ഘാടനം ചെയ്തു.

   കാസര്‍കോട് അശരണരായ വിധവകളെ സംരക്ഷിക്കുന്നവര്‍ക്ക് ധനസഹായം നല്‍കുന്നതിന് അഭയകിരണം പദ്ധതി പ്രകാരം അപേക്ഷകള്‍ ക്ഷണിച്ചു. വാര്‍ഷികവരുമാനം ഒരു ലക്ഷം രൂപ കവിയാത്ത 50 വയസിന് മുകളില്‍ പ്രായമുളള അശരണരായ വിധവകളുടെ സംരക്ഷകര്‍ക്ക് അപേക്ഷ സമര്‍പ്പിക്കാം. വിധവന്‍ഷന്‍ ഒഴികെ മറ്റ് പെന്‍ഷനുകള്‍ കൈപ്പറ്റുന്ന വിധവകള്‍ ഈ ധനസഹായത്തിന് അര്‍ഹരല്ല. അപേക്ഷാ ഫോമും വിശദ വിവരങ്ങളും swd.kerala.gov.in  എന്ന വെബ്‌സൈറ്റിലും, ശിശുവികസന പദ്ധതി ഓഫീസുകളിലും ലഭിക്കും. അപേക്ഷകള്‍ ഒക്ടോബര്‍ 17 മുന്‍പ് ബന്ധപ്പെട്ട ശിശുവികസന പദ്ധതി ഓഫീസുകളില്‍ സമര്‍പ്പിക്കണം.