ഒക്‌ടോബര്‍ 2 മുതല്‍ 8 വരെ ജില്ലയില്‍ സംഘടിപ്പിക്കുന്ന ഗാന്ധിജയന്തി വാരാഘോഷ പരിപാടികളുടെ നടത്തിപ്പുമായി ബന്ധപ്പെട്ട  സംഘാടക സമിതി രൂപീകരിക്കുന്നതിന് ഇന്ന് (സെപ്റ്റംബര്‍ 26) വൈകുന്നേരം 4ന് കളക്‌ട്രേറ്റില്‍ യോഗം ചേരും. വിവിധ വകുപ്പ് മേധാവികള്‍ പങ്കെടുക്കുന്ന യോഗത്തില്‍ ജില്ലാ കളക്ടര്‍ ഡോ. ബി. എസ്. തിരുമേനി അദ്ധ്യക്ഷത വഹിക്കും.   

ജില്ലാ പഞ്ചായത്തിന് കീഴിലെ സര്‍ക്കാര്‍ സ്‌കൂളുകളിലെ വിദ്യാര്‍ത്ഥികളുടെ പഠന നിലവാരം, ഹാജര്‍ നില തുടങ്ങിയ വിവരങ്ങള്‍ രക്ഷിതാക്കളെ മൊബൈല്‍ ഫോണില്‍ എസ്.എം.എസ് വഴി അറിയിക്കുന്നതിനായി തയ്യാറാക്കിയ വെബ് അധിഷ്ടിത സംവിധാനമായ സഹായ സോഫ്റ്റ് വെയറിന്റെ ഉദ്ഘാടനം ജില്ലാ പഞ്ചായത്ത് പ്രസിഡന്റ് എ.പി. ഉണ്ണികൃഷ്ണന്‍ നിര്‍വ്വഹിച്ചു. ജില്ലാ പഞ്ചായത്ത് ഹാളില്‍ നടന്ന ചടങ്ങില്‍ ജില്ലാ പഞ്ചായത്തിന് കീഴിലുള്ള 88 ഹൈസ്‌കൂള്‍, ഹയര്‍ സെക്കന്ററി, വൊക്കേഷണല്‍ ഹയര്‍ സെക്കന്ററി സ്‌കൂളുകള്‍ക്ക് ഒരു വര്‍ഷത്തേക്കുള്ള വൈദ്യുതി ചിലവിലേക്കുള്ള 15.35 ലക്ഷം രൂപയുടെ വിതരണവും അദ്ദേഹം നിര്‍വ്വഹിച്ചു.

പ്രളയബാധിത പ്രദേശത്തെ നിസ്തുല്യ സേവനത്തിന് പൊ•ണ പി.എച്ച്.സിയിലെ ജീവനക്കാരെ എം.എല്‍.എ ആബിദ് ഹുസൈന്‍ തങ്ങള്‍ അനുമോദിച്ചു. ജീവനക്കാര്‍ക്ക് വേണ്ടി മെഡിക്കല്‍ ഓഫീസര്‍ നിഗാര്‍ കാസിം ഉപഹാരം ഏറ്റുവാങ്ങി.  പി.എച്ച്.എസിയില്‍ നടന്ന ചടങ്ങില്‍ പഞ്ചായത്ത് പ്രസിഡന്റ് മൊയ്തീന്‍ അധ്യക്ഷത വഹിച്ചു.

സംസ്ഥാനത്ത് ക്ഷയരോഗ നിയന്ത്രണം, പകര്‍ച്ചവ്യാധി പ്രതിരോധ പ്രവര്‍ത്തനം തുടങ്ങിയ ലക്ഷ്യങ്ങളോടെ  നാഷണല്‍ അര്‍ബന്‍ ഹെല്‍ത്ത് മിഷന്റെയും സ്റ്റേറ്റ് ടി.ബി. സെല്ലിന്റെയും സംയുക്താഭിമുഖ്യത്തില്‍ മൊബൈല്‍ മെഡിക്കല്‍ യൂണിറ്റിന്റെ പ്രയാണം ജില്ലയില്‍ ആരംഭിച്ചു.
   കലക്‌ട്രേറ്റ് പരിസരത്ത് ജില്ലാ ടി.ബി. ഓഫീസര്‍ ഡോ. ഹരിദാസന്‍ ഫ്‌ളാഗ് ഓഫ് ചെയ്തു.  ഡോക്ടറും പാരാമെഡിക്കല്‍ സംഘവും ഉള്‍പ്പെടുന്ന മൊബൈല്‍ മെഡിക്കല്‍ യൂണിറ്റ് ജില്ലയിലെ തെരഞ്ഞെടുത്ത കേന്ദ്രങ്ങളില്‍ ക്ഷയരോഗ നിര്‍ണയ പരിശോധനയും പകര്‍ച്ചവ്യാധി പ്രതിരോധ പ്രവര്‍ത്തനങ്ങളും ആരോഗ്യ ബോധവത്കരണ പ്രവര്‍ത്തനങ്ങളും നടത്തും.

സെപ്തംബര്‍ 30 ന് തിരുവനന്തപുരത്ത് നടക്കുന്ന സംസ്ഥാന മാസ്റ്റേര്‍സ് നീന്തല്‍ മത്സരത്തില്‍ പങ്കെടുക്കുന്നതിനുള്ള ജില്ലാ ടീം തെരെഞ്ഞെടുപ്പ് 28 ന് പന്തല്ലൂര്‍ പഞ്ചായത്ത് കുളത്തില്‍ നടത്തും. 25 വയസ്സിന് മുകളിലുള്ള പുരുഷന്‍മാര്‍ക്കും വനിതകള്‍ക്കും പങ്കെടുക്കാം.   താല്‍പര്യമുള്ളവര്‍ വയസ്സ് തെളിയിക്കുന്ന രേഖകളും നീന്തല്‍ കിറ്റും സഹിതം രാവിലെ ഒമ്പതിന് റിപ്പോര്‍ട്ട് ചെയ്യണം. ഫോണ്‍-8086042566

ജില്ലയിലെ കേന്ദ്രാവിഷ്‌കൃത പദ്ധതികള്‍ അവലോകനം നടത്തുന്നതിന് ജില്ലാതല കോര്‍ഡിനേഷന്‍ ആന്‍ഡ് മോണിറ്ററിങ് സമിതി (ദിശ)യുടെ രണ്ടാംപാദ യോഗം സെപ്തംബര്‍ 29ന് ഉച്ചക്ക് രണ്ടിന് കലക്‌ട്രേറ്റ് സമ്മേളന ഹാളില്‍ നടക്കും.