ഹയര്‍സെക്കന്‍ഡറി, വൊക്കേഷനല്‍ ഹയര്‍സക്കന്‍ഡറി  പ്രിന്‍സിപ്പല്‍മാര്‍ക്കായി കൈറ്റ് സംഘടിപ്പിക്കുന്ന സമഗ്ര പോര്‍ട്ടല്‍ പരിശീലനം തുടങ്ങി. ജില്ലയിലെ അഞ്ച് കേന്ദ്രങ്ങളിലായി നടക്കുന്ന പരിശീലനത്തിന്റെ ജില്ലാ തല ഉദ്ഘാടനം കൈറ്റ് ജില്ലാ കേന്ദ്രത്തില്‍ ഹയര്‍സെക്കന്‍ഡറി റീജിയണല്‍ ഡെപ്യൂട്ടി ഡയറക്ടര്‍ ഷൈല റാം ഉദ്ഘാടനം ചെയ്തു.
കൈറ്റ് ജില്ലാ കോ ഓര്‍ഡിനേറ്റര്‍ ടി.കെ. അബ്ദുല്‍ റഷീദ് അധ്യക്ഷത വഹിച്ചു. ഡോ.എന്‍.സക്കീര്‍ എന്ന സൈനുദ്ദീന്‍, പി.കെ. കുട്ടിഹസ്സന്‍, അന്‍വര്‍ ഗൗസ്, മുഹമ്മദ് ബഷീര്‍ ചെമ്മല ക്ലാസെടുത്തു. പരിശീലനം ഇന്നു സമാപിക്കും.

ജില്ലാ പൊലീസ് സ്ത്രീ സുരക്ഷാ പരിശീലന പരിപാടിയുടെ പ്രചരണാര്‍ത്ഥം നിര്‍മ്മിച്ച സേഫ്റ്റി പിന്‍ എന്ന ഡോക്യുഫിഷന്‍ ഇന്ന് (സെപ്തംബര്‍ 26) രാവിലെ 10.30ന് ജില്ലാ പൊലീസ് മേധാവിയുടെ ഓഫീസ് അനക്‌സില്‍ പ്രകാശനം ചെയ്യും.   ജില്ലാ പൊലീസ് മേധാവി പ്രതീഷ്‌കുമാര്‍ ജില്ലാ കലക്ടര്‍ അമിത് മീണക്ക് നല്‍കിയാണ് പ്രകാശനം നിര്‍വ്വഹിക്കുക.

കാലവര്‍ഷക്കെടുതിയുമായി ബന്ധപ്പെട്ട സ്ഥിതിഗതികള്‍ വിലയിരുത്തുന്നതിന്  ഐക്യരാഷ്ട്രസഭാ സംഘം ഇന്ന് (സെപ്റ്റംബര്‍ 26) ജില്ലയിലെത്തും. യുനിസെഫിലെ ഡോ. ജാഫറിന്റെ നേതൃത്വത്തിലുള്ള സംഘമാണ് ജില്ലയില്‍ എത്തുന്നത്. രാവിലെ 10.30 ന് ജില്ലാ കലക്ടറും ജില്ലാതല ഉദ്യോഗസ്ഥരാമായി ചര്‍ച്ച നടത്തും. പ്രളയത്തിന്റെ സാമൂഹ്യ പ്രത്യാഘാതങ്ങള്‍, നേരിട്ട രീതി, മുന്‍കരുതലുകള്‍ തുടങ്ങിയവ സംഘം പരിശോധിക്കും.  

കേന്ദ്ര കുടിവെള്ള - ശുചിത്വ മന്ത്രാലയത്തിന്റെ  നേതൃത്വത്തില്‍ ഗ്രാമവികസന വകുപ്പ് സംഘടിപ്പിക്കുന്ന 'സ്വച്ഛതാ ഹി സേവ' ദിനാചരണ പരിപാടിക്ക് ഇളംദേശം ബ്ലോക്കില്‍് തുടക്കമായി.  കുടിവെള്ള സംരക്ഷണത്തിനും ശുചിത്വ പ്രവര്‍ത്തനങ്ങള്‍ക്കുമായി സെപ്റ്റംബര്‍ 25 ന് തദ്ദേശ സ്വയംഭരണ വകുപ്പിന് കീഴിലാണ് 'സ്വച്ഛതാ ഹി സേവ' ദിനാചരണം സംഘടിപ്പിച്ചിട്ടുള്ളത്.

ജില്ലാ ശിശുക്ഷേമ സമിതിയുടെ 18-ാമത് വാര്‍ഷിക പൊതുയോഗം ഇന്ന് (26ന്) രാവിലെ 11 മണിക്ക് കലക്ട്രേറ്റ് കോണ്‍ഫറന്‍സ് ഹാളില്‍ ചേരും. സമിതി സംസ്ഥാന ട്രഷറര്‍ ജി. രാധാകൃഷ്ണന്‍ പങ്കെടുക്കും. 

മാട്ടുപ്പെട്ടി ഡാമിന്റെ പൂര്‍ണ്ണ സംഭരണശേഷിയായ 1599.59 മീറ്ററിലേക്ക് ജലവിതാനം ഉയരുന്നത് നിയന്ത്രിക്കുന്നതിനുവേണ്ടി സെപ്തംബര്‍ 27ന് രാവിലെ എട്ട് മുതല്‍ ഡാമിന്റെ ഒരു ഷട്ടര്‍ തുറന്ന് 6.00 ക്യുമെക്‌സ് ജലം സ്പില്‍വെ ഗേറ്റിലൂടെ മുതിരപ്പുഴ വഴി മൂന്നാറിലുള്ള ആര്‍.എ ഹെഡ് വര്‍ക്‌സ് ജലസംഭരണിയിലേക്ക് ഒഴുക്കി വിടുന്നതാണ്. മൂന്നാര്‍, മുതിരപ്പുഴ, കല്ലാര്‍കുട്ടി, ലോവര്‍ പെരിയാര്‍ എന്നീ മേഖലകളിലുള്ളവര്‍ അതീവ ജാഗ്രത പാലിക്കണമെന്ന് ജില്ലാകലക്ടര്‍ അറിയിച്ചു.