കേന്ദ്ര കാലാവസ്ഥ  നിരീക്ഷണ കേന്ദ്രം ഇന്ന് (സെപ്തംബര്‍ 26) മലപ്പുറം, പത്തനംതിട്ട, ഇടുക്കി, പാലക്കാട്, വയനാട് ജില്ലകളിലും നാളെ (സെപ്തംബര്‍ 27) പത്തനംതിട്ട, ഇടുക്കി എന്നീ ജില്ലകളിലും  28ന് ഇടുക്കി, പാലക്കാട്, വയനാട് എന്നീ ജില്ലകളിലും മഞ്ഞ   അലര്‍ട്ട്  പ്രഖ്യാപിച്ചു.

കാലവര്‍ഷ കെടുതിയിലും പ്രളയത്തിലും നശിച്ചുപോകുകയോ ഭാഗികമായി കേടുപാടു സംഭവിക്കുകയോ ചെയ്ത മല്‍സ്യബന്ധന യാനങ്ങള്‍, എഞ്ചിനുകള്‍, വലകള്‍ എന്നിവയുടെ നഷ്ടപരിഹാരം നല്‍കുന്നതിന്റെ ഭാഗമായി ഇവയുടെ മതിപ്പുവില നേരില്‍ പരിശോധിച്ച് തിട്ടപ്പെടുത്തുന്നതിനായി ഫിഷറീസ് വകുപ്പിലേയും മല്‍സ്യഫെഡിലേയും വിദഗ്ദരടങ്ങുന്ന സംഘം ഇന്ന് (സെപ്തംബര്‍ 26) രാവിലെ 11ന് ഉണ്യാല്‍ ഡിസാസ്റ്റര്‍ ഷെല്‍ട്ടറില്‍ ഹിയറിംഗ് നടത്തും.  അപകടത്തില്‍ പെട്ടയാനങ്ങളുടെ മുഴുവന്‍ രേഖകളുമായി ഉടമസ്ഥന്‍ നേരിട്ട് എത്തണമെന്ന് ഫിഷറീസ് ഡെ.ഡയറക്ടര്‍ അറിയിച്ചു.

    കേരള അഗ്രോ ഇന്‍ഡസ്ട്രീസ് കോര്‍പ്പറേഷന്റെ അരിമ്പൂര്‍ പരിശീലന കേന്ദ്രത്തില്‍ കര്‍ഷകര്‍ക്കും സ്വയംതൊഴില്‍ അന്വേഷകര്‍ക്കും രണ്ടു മാസത്തെ ട്രാക്ടര്‍ ഡ്രൈവിങ് പരിശീനത്തിന് അപേക്ഷ ക്ഷണിച്ചു.  യോഗ്യത എട്ടാം ക്ലാസ് ജയവും 18 വയസ്സ് പൂര്‍ത്തിയായവരും ആയിരിക്കണം.  കോഴ്‌സ് ഫീ 6,050 രൂപ.  താമസ സൗകര്യം ലഭിക്കും.  താല്‍പര്യമുള്ളവര്‍ സെപ്തംബര്‍ 30നകം അപേക്ഷ നല്‍കണം.  ഫോണ്‍ 0487 2310983.

പൊന്നാനി താലൂക്കിലെ മുന്‍ഗണനേതര, മുന്‍ഗണനേതര സബ്‌സിഡി (വെളള, നീല) കാര്‍ഡുടമകള്‍ക്ക് നിലവിലുളള റേഷന് പുറമേ സെപ്തംബര്‍  മാസത്തേയ്ക്ക് കാര്‍ഡാന്നിന് 5 കിഗ്രാം അരി ഒരു രൂപാ നിരക്കില്‍ ലഭിക്കും.  

ഭവന നിര്‍മാണ പദ്ധതികളിലെ കാലതാമസം ഒഴിവാക്കി പി.എം.എ.വൈ പദ്ധതി വേഗത്തില്‍ പൂര്‍ത്തീകരിക്കാന്‍ പൊന്നാനി നഗരസഭ കൗണ്‍സില്‍ യോഗം തീരുമാനിച്ചു.  നഗരസഭാ ചെയര്‍മാന്‍ സി.പി മുഹമ്മദ് കുഞ്ഞിയുടെ നേതൃത്വത്തിലായിരുന്നു യോഗം.
പദ്ധതിയുടെ കാലതാമസം ഒഴിവാക്കാന്‍ സര്‍ക്കാര്‍ നിര്‍ദ്ദേക പ്രകാരം ഹഡ്‌കോയില്‍ നിന്ന് വായ്പ എടുത്താണ് പി.എം.എ.വൈ ലൈഫ് പദ്ധതി  സമയബന്ധിതമായി പൂര്‍ത്തീകരിക്കാനൊരുങ്ങുന്നത്. പദ്ധതിയില്‍ നഗരസഭയില്‍ നിന്ന് 1376 പേരാണ് ഡി.പി.ആര്‍ സമര്‍പ്പിച്ചത്. എന്നാല്‍ വിവിധ കാരണങ്ങളാല്‍ 152 പേര്‍ ഒഴിവായതോടെ 1194 പേരാണ് പദ്ധതിയുടെ ഗുണഭോക്താക്കള്‍.

കെല്‍ട്രോണിന്റെ  പെരിന്തല്‍മണ്ണ നോളഡ്ജ് സെന്ററില്‍ വിവിധ കമ്പ്യൂട്ടര്‍ കോഴ്‌സുകളിലേക്കുള്ള പുതിയ ബാച്ചുകള്‍ ആരംഭിക്കുന്നു.  വിവരങ്ങള്‍ക്ക് കെല്‍ട്രോണ്‍ നോളജ് സെന്റര്‍, കൊളക്കാടന്‍ ആര്‍കേഡ്, ഊട്ടി റോഡ്, പെരിന്തല്‍മണ്ണ വിലാസത്തില്‍ ബന്ധപ്പെടാം. ഫോണ്‍: 9188056312

ജില്ലാ വികസന സമിതിയുടെ സാധാരണ യോഗം സെപ്തംബര്‍ 29ന് രാവിലെ 11ന് കലക്‌ട്രേറ്റ് സമ്മേളന ഹാളില്‍ ചേരും.  യോഗത്തില്‍ ജില്ലാതല ഉദ്യോഗസ്ഥന്‍മാര്‍ പങ്കെടുക്കും.

പ്രളയാനന്തരം നേരിടുന്ന കുടിവെള്ള ക്ഷാമത്തിന് പരിഹാരമായി പൊന്നാനി നഗരസഭയില്‍ ജല ശുദ്ധീകരണ പ്ലാന്റ് ഉദ്ഘാടനം ചെയ്തു. നഗരസഭ ഓഫീസ് പരിസരത്ത്  പ്ലാന്റിന്റെ പ്രവര്‍ത്തോനാദ്ഘാടനം നഗരസഭ ചെയര്‍മാന്‍ സി.പി മുഹമ്മദ് കുഞ്ഞി നിര്‍വ്വഹിച്ചു.