കല്‍പ്പറ്റ എന്‍.എം.എസ്.എം ഗവ. കോളേജില്‍ ചരിത്ര വിഭാഗത്തില്‍ നിലവിലുള്ളതും ഉണ്ടാകാന്‍ സാധ്യതയുള്ളതുമായ അധ്യാപക ഒഴിവിലേയ്ക്ക് നിയമനം നടത്തുന്നു. ബന്ധപ്പെട്ട വിഷയത്തില്‍ ബിരുദാനന്തര ബിരുദവും നെറ്റും, കോളേജ് വിദ്യാഭ്യാസ വകുപ്പ് കോഴിക്കോട് മേഖലാ ഓഫീസില്‍ ഗസ്റ്റ് അധ്യാപകരുടെ പാനലില്‍ രജിസ്റ്റര്‍ ചെയ്തിട്ടുള്ളതുമായ ഉദ്യോഗാര്‍ത്ഥികള്‍ക്ക് നേരിട്ടുള്ള അഭിമുഖത്തില്‍ പങ്കെടുക്കാം. വിദ്യാഭ്യാസ യോഗ്യതകളുടെയും മറ്റ് രേഖകളുടെയും അസലും പകര്‍പ്പും അഭിമുഖത്തില്‍ ഹാജരാക്കണം. ഫോണ്‍: 04936 204569.
 

കോളനി സംഗമവും സമൂഹപ്രതിജ്ഞയും നടത്തി
ആദിവാസി മേഖലയെ ലഹരി മുക്തമാക്കുക എന്ന ലക്ഷ്യത്തോടെ നടപ്പാക്കുന്ന പുതുജീവിതം പദ്ധതിയുടെ ഭാഗമായി കോളനി സംഗമവും സമൂഹ പ്രതിജ്ഞയും നടത്തി. വെങ്ങപ്പള്ളി മൂപ്പന്‍ കോളനിയില്‍ നടന്ന ചടങ്ങ് സി.കെ ശശീന്ദ്രന്‍ എം.എല്‍.എ ഉദ്ഘാടനം ചെയ്തു. പരിപാടിയുടെ ഭാഗമായി ഊരിലെ കുട്ടികളുടെ കലാപരിപാടികള്‍ സംഘടിപ്പിച്ചു. കരള്‍ ഡോക്യുമെന്ററിയുടെ പ്രദര്‍ശനവും നടന്നു. ഊരിലെ ആളുകള്‍ ഒരുമിച്ച് ചേര്‍ന്ന് ലഹരിയ്ക്ക് എതിരായി സമൂഹ പ്രതിജ്ഞ എടുത്തു.പച്ചപ്പ് പദ്ധതി, കുടുംബശ്രീ ജില്ലാ മിഷന്‍, സ്നേഹിത എന്നിവരുടെ ആഭിമുഖ്യത്തിലാണ്  പുതുജീവനം പദ്ധതി നടപ്പാക്കുന്നത്.  

മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ ജില്ലാ ഓഫീസിലേക്ക്  രണ്ട് കമ്പ്യൂട്ടര്‍, ഒരു പ്രിന്റര്‍ എന്നിവ വിതരണം ചെയ്യുന്നതിന് മത്സര സ്വഭാവമുള്ള ടെണ്ടറുകള്‍ ക്ഷണിച്ചു.  ടെണ്ടറുകള്‍  മുദ്ര വെച്ച കവറില്‍ ഫെബ്രുവരി 17 ഉച്ചയ്ക്ക് 12ന് മുമ്പായി ജോയിന്റ് പ്രോഗ്രാം കോര്‍ഡിനേറ്ററുടെ ഓഫീസില്‍ ലഭ്യമാക്കണം. അന്നേ ദിവസം വൈകീട്ട് 3 ന് ടെണ്ടര്‍ തുറക്കും. ഫോണ്‍ നമ്പര്‍ 04936 205959, 296959.

ഒ.ആര്‍. കേളു എം.എല്‍.എയുടെ ആസ്തി വികസന ഫണ്ടില്‍ ഉള്‍പ്പെടുത്തി എടവക ഗ്രാമപഞ്ചായത്തിലെ കമ്മോം- അത്യോറ- കുഴിനിലം - പുളിഞ്ഞാമ്പറ്റ റോഡ് സൈഡ് കെട്ട് ആന്റ് ഫോര്‍മേഷനായി 10 ലക്ഷം രൂപ ഭരണാനുമതി നല്‍കി.
 

റീ ബില്‍ഡ് കേരള ഇനീഷ്യേറ്റീവില്‍ ഉള്‍പ്പെടുത്തി പുനര്‍നിര്‍മ്മിക്കുന്ന വൈത്തിരി - തരുവണ റോഡിന്റെ നിര്‍മാണോദ്ഘാടനം ഇന്ന് (വ്യാഴം) മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വ്വഹിക്കും. വൈകീട്ട് 3.30ന് പടിഞ്ഞാറത്തറ സാംസ്‌കാരിക നിലയത്തില്‍ നടക്കുന്ന ചടങ്ങില്‍ പൊതുമരാമത്ത് രജിസ്ട്രേഷന്‍ വകുപ്പ് മന്ത്രി ജി. സുധാകരന്‍ അധ്യക്ഷത വഹിക്കും.

കേരള കാര്‍ഷിക ക്ഷേമ വകുപ്പ്, കുടുംബശ്രീ, ആത്മ വയനാട്, അമ്പലവയല്‍ കാര്‍ഷിക ഗവേഷണ കേന്ദ്രം എന്നിവരുടെ സംയുക്താഭിമുഖ്യത്തില്‍ നടപ്പാക്കുന്ന ഗ്രീന്‍ കാര്‍പ്പറ്റ് പരിശീലനം തുടങ്ങി. 14 ദിവസം നീണ്ട് നില്‍ക്കുന്ന പരിശീലന പരിപാടിയില്‍ മട്ടുപ്പാവ് കൃഷി, ഔഷധ തോട്ടം, വെര്‍ട്ടിക്കല്‍ ഗാര്‍ഡനിംഗ്, ഗ്രീന്‍ ഹൗസ്, മഴമറ, ബോണ്‍സായ് മേക്കിംങ്, അലങ്കാര മത്സ്യകൃഷി എന്നിങ്ങനെ വിവിധ വിഷയങ്ങളിലാണ് പരിശീലനം നല്‍കുന്നത്. അമ്പലവയല്‍ കാര്‍ഷിക ഗവേഷണ കേന്ദ്രത്തിലാണ് പരിശീലനം.

സുല്‍ത്താന്‍ ബത്തേരി താലൂക്ക് ആശുപത്രി കെട്ടിടത്തിന്റെ പ്രവൃത്തി നടക്കുന്ന സ്ഥലത്ത് ശേഖരിച്ച അധികമുള്ള മണ്ണ് കല്‍പ്പറ്റ പൊതുമരാമത്ത് വകുപ്പ് കെട്ടിട ഉപവിഭാഗത്തിന്റെ നേതൃത്വത്തില്‍ ലേലം ചെയ്യും. ഫെബ്രുവരി 18 രാവിലെ 11ന് പ്രവൃത്തി നടക്കുന്ന സ്ഥലത്താണ് ലേലം. ഫോണ്‍: 04936 206077.

പത്താംക്ലാസ് യോഗ്യത നിശ്ചയിച്ചിട്ടുള്ള വിവിധ തസ്തികകള്‍ക്കായി കേരള പബ്ലിക് സര്‍വീസ് കമ്മീഷന്‍ നടത്തുന്ന പൊതു പ്രാഥമിക പരീക്ഷയുടെ ഫെബ്രുവരി 20 ന് നടക്കുന്ന ഒന്നാം ഘട്ട പരീക്ഷയ്ക്കും 25 ന് നടക്കുന്ന രണ്ടാം ഘട്ട പരീക്ഷയ്ക്കും അഡ്മിറ്റ് ചെയ്തിട്ടുള്ളവര്‍ അഡ്മിഷന്‍ കാര്‍ഡും തിരിച്ചറിയല്‍ രേഖയുമായി പരീക്ഷയ്ക്ക് ഹാജരാകണമെന്ന് ജില്ലാ പി.എസ്.സി. ഓഫീസര്‍ അറിയിച്ചു.  മാര്‍ച്ച് 6 ന് നടത്തുന്ന മൂന്നാം ഘട്ട പരീക്ഷയുടെയും 13 ന് നടത്തുന്ന നാലാംഘട്ട പരീക്ഷയുടെയും അഡ്മിഷന്‍ കാര്‍ഡ് ഇന്ന് (ഫെബ്രുവരി 12) മുതല്‍ ലഭ്യമാകും.