ജനുവരി 26 ന് 10000 സര്‍ക്കാര്‍ ഓഫീസുകള്‍ ഹരിത ഓഫീസുകളാക്കി മാറ്റുന്നതിന്റെ ഭാഗമായുള്ള ഹരിത ഓഡിറ്റിന്റെ ജില്ലാതല ഉദ്ഘാടനം ജില്ലാ എംപ്ലോയ്മെന്റ് ഓഫീസില്‍ ജില്ലാ പഞ്ചായത്ത് പ്രസിഡന്റ്  കാനത്തില്‍ ജമീല നിര്‍വ്വഹിച്ചു. ഹരിത ഓഡിറ്റ് പരിശോധനാ സൂചികയിലെ ചോദ്യങ്ങള്‍ ചോദിക്കുകയും ഓഫീസ് പരിശോധന നിര്‍വ്വഹിക്കുകയും ചെയ്തുകൊണ്ടാണ് ഉദ്ഘാടനം നിര്‍വ്വഹിച്ചത്.

നെല്‍വയല്‍ തണ്ണീര്‍ തട സംരക്ഷണ നിയമം ലംഘിച്ച് മണ്ണ് നിക്ഷേപിച്ച് തരം മാറ്റിയ സ്ഥലം പൂര്‍വസ്ഥിതിയിലാക്കാന്‍ നടപടി. നറുകര വില്ലേജിലെ കോട്ടുപ്പറ്റ പ്രദേശത്ത് നിക്ഷേപിച്ച 1000.425 ക്യൂബിക് മീറ്റര്‍ മണ്ണ് ഇന്ന് രാവിലെ 10.30ന് (ജനുവരി 22ന്)  പെരിന്തല്‍മണ്ണ സബ് കലക്ടര്‍ കെ.എസ് അഞ്ജുവിന്റെ സാന്നിധ്യത്തില്‍ നീക്കം ചെയ്യും. മണ്ണ് എടുത്തുമാറ്റാന്‍ ജെസിബി ഉള്‍പ്പെടെ നാല് വാഹനങ്ങള്‍ക്ക്  അനുമതി നല്‍കി. അനധികൃതമായി തരംമാറ്റിയ ഭൂമി പൂര്‍വ സ്ഥിതിയിലാക്കിയിട്ടില്ലെന്ന് പരിശോധനയില്‍ കണ്ടെത്തിയ സാഹചര്യത്തിലാണിത്.  ജില്ലാ കലക്ടര്‍ കെ.ഗോപാലകൃഷ്ണന്റെ ഉത്തരവിന്റെ അടിസ്ഥാനത്തിലാണ് നടപടി.  

വെള്ളപ്പൊക്ക ബാധിത പ്രദേശങ്ങളിലുള്ളവരുടെ സംരക്ഷണവും കാര്‍ഷികാഭിവൃദ്ധിയും ലക്ഷ്യമിട്ടുള്ള താനൂര്‍ നടുവത്തിതോടിന്റെ നവീകരണത്തിന് നടപടികള്‍ അന്തിമഘട്ടത്തില്‍. അഞ്ച് കോടി രൂപ വിനിയോഗിച്ച് നടുവത്തിതോട് നവീകരിച്ച് സംരക്ഷിക്കാനും വിസിബി കം ബ്രിഡ്ജ് സ്ഥാപിക്കാനുമുള്ള പദ്ധതിയ്ക്ക് എത്രയും വേഗത്തില്‍ ഭരണാനുമതി നല്‍കുമെന്ന് ജലവിഭവ വകുപ്പ് മന്ത്രി കെ. കൃഷ്ണന്‍കുട്ടി വ്യക്തമാക്കി. വി.അബ്ദുറഹ്‌മാന്‍ എം.എല്‍.എ നിയമസഭയില്‍ ഉന്നയിച്ച സബ്മിഷന് മറുപടിയായാണ് മന്ത്രി ഇക്കാര്യം വ്യക്തമാക്കിയത്.
 

കോഴിക്കോട് -വെളളിപറമ്പ് -മായനാട് റോഡില്‍ പുനരുദ്ധാരണ പ്രവൃത്തി നടക്കുന്നതിനാല്‍ ഇന്ന് (ജനുവരി 21) മുതല്‍ പ്രവൃത്തി തീരുന്നതുവരെ ഈ റോഡിലൂടെയുളള വാഹനഗതാഗതം ഭാഗികമായി നിയന്ത്രിച്ചതായി എക്സിക്യൂട്ടീവ് എഞ്ചിനീയര്‍ അറിയിച്ചു.
 

കീരംകുണ്ട് പാലത്തിന്റെ  നിര്‍മാണോദ്ഘാടനം ജനുവരി  27ന് പൊതുമരാമത്ത് വകുപ്പ് മന്ത്രി ജി.സുധാകരന്‍ ഓണ്‍ലൈനായി നിര്‍വഹിക്കും. ചടങ്ങില്‍ ടി.എ അഹമ്മദ് കബീര്‍ എം.എല്‍.എ  അധ്യക്ഷനാകും. കൂട്ടിലങ്ങാടി, കുറുവ ഗ്രാമ പഞ്ചായത്തുകളെ ബന്ധിപ്പിക്കുന്ന കീരംകുണ്ട് പാലം പൊളിച്ചുമാറ്റി വീതി കൂട്ടി പുനര്‍ നിര്‍മിക്കുന്ന പ്രവൃത്തിയുടെ നിര്‍മാണോദ്ഘാടനമാണ് നടക്കുന്നത്. മൂന്നുകോടി രൂപ ചെലവഴിച്ചാണ് പാലം പുനര്‍നിര്‍മിക്കുന്നത്.