കോട്ടയം: കേരള സന്ദര്‍ശനത്തിന്റെ ഭാഗമായി കോട്ടയത്ത് എത്തിയ രാഷ്ട്രപതി ദ്രൗപതി മുര്‍മു കോട്ടയം പോലീസ് പരേഡ് ഗ്രൗണ്ടില്‍നിന്ന് ഹെലികോപ്ടർമാര്‍ഗം എറണാകുളത്തേക്ക് പോയി.  ഹെലിപ്പാഡില്‍  ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കറുടെ നേതൃത്വത്തില്‍ രാഷ്ട്രപതിക്ക് യാത്രയയപ്പ്  നല്‍കി. സഹകരണം-ദേവസ്വം-തുറമുഖ വകുപ്പ് മന്ത്രി വി.എന്‍. വാസവന്‍, ജില്ലാ കളക്ടര്‍ ചേതന്‍കുമാര്‍ മീണ,  ജില്ലാ പോലീസ് മേധാവി എ. ഷാഹുല്‍ ഹമീദ് എന്നിവരും സന്നിഹിതരായിരുന്നു.
 

'ലഹരിക്കെതിരെ കായിക ലഹരി' എന്ന സന്ദേശമുയർത്തി കേരള സംസ്ഥാന എക്സൈസ് വകുപ്പ്, വിമുക്തി മിഷൻ, ജില്ലാ സ്പോർട്സ് കൗൺസിൽ, ടി എം ടി സി സ്പോർട്സ് ഫൗണ്ടേഷൻ എന്നിവ ഒക്ടോബർ 25 ശനിയാഴ്ച രാവിലെ 10 മണിക്ക് ജില്ലാ ഇന്റർ കോളേജ് വോളിബോൾ ചാമ്പ്യൻഷിപ്പ് സംഘടിപ്പിക്കുന്നു. കണ്ണൂർ കൃഷ്ണമേനോൻ സ്മാരക ഗവ. വനിതാ കോളേജിൽ നടക്കുന്ന പരിപാടി ജില്ലാ സ്പോർട്സ് കൗൺസിൽ പ്രസിഡന്റ് പി.എം അഖിൽ ഉദ്ഘാടനം ചെയ്യും. കണ്ണൂർ ഡെപ്യൂട്ടി എക്സൈസ് കമ്മീഷണർ പി.കെ സതീഷ് കുമാർ അധ്യക്ഷനാവും. ഇന്ത്യൻ ഇന്റർനാഷണൽ വോളിബോൾ പ്ലെയർ മനു ജോസഫ് വിശിഷ്ടാതിഥിയാവും.

ജില്ലാ ലൈബ്രറി കൗൺസിൽ യു.പി വിഭാഗം വിദ്യാർഥികൾക്കും വനിതകൾക്കുമായി സംഘടിപ്പിക്കുന്ന മേഖലാതല വായനാമത്സരം ഒക്ടോബർ 26ന് നടക്കും. അഞ്ച് താലൂക്കുകളിലെ 18 കേന്ദ്രങ്ങളിലാണ് മത്സരം. ഗ്രന്ഥശാലാതലത്തിൽ ഒന്നാം സ്ഥാനം നേടിയവരാണ് പങ്കെടുക്കേണ്ടത്. 

സംസ്ഥാനത്തെ ഫിഷ് പീലിംഗ്, ഫിഷ് കാനിംഗ്, ഫ്രീസിംഗ് ആന്റ് എക്‌സ്‌പോര്‍ട്ടിംഗ് ഓഫ് സീഫുഡ്സ് എന്ന മേഖലയിലെ മിനിമം വേതനം പുതുക്കി നിശ്ചയിക്കുന്നതിനായി ആലപ്പുഴ, എറണാകുളം, തൃശ്ശൂര്‍ ജില്ലകള്‍ക്ക് വേണ്ടി മിനിമം വേതന ഉപദേശക ഉപസമിതി തെളിവെടുപ്പ് യോഗം നടത്തുന്നു. എറണാകുളം ഗവ. ഗസ്റ്റ് ഹൗസിലെ ബാങ്ക്വിറ്റ് ഹാളില്‍ നവംബര്‍ ആറിന് രാവിലെ 11 ന് യോഗം ചേരും.

കോട്ടയം: സംസ്ഥാന സര്‍ക്കാര്‍ സ്ഥാപനമായ കാലാവസ്ഥാ വ്യതിയാന പഠന കേന്ദ്രം (ഐ.സി.സി.എസ്) വികസിപ്പിച്ച  കാലാവസ്ഥാ വിവരശേഖരണ ആപ്ലിക്കേഷനായ വെതര്‍ ലോഗിന്റെ   ഉപഭോക്തൃ പരിശീലന പരിപാടി സംഘടിപ്പിച്ചു. സമഗ്ര ശിക്ഷാ കേരള കോട്ടയവു(എസ്.എസ്.കെ)മായി ചേര്‍ന്നു നടത്തിയ പരിപാടി ഐ.സി.സി.എസ്. ഡയറക്ടര്‍ ഡോ.കെ. രാജേന്ദ്രന്‍ ഉദ്ഘാടനം ചെയ്തു. 

എസ്.എസ്.കെ. സ്റ്റേറ്റ് പ്രോഗ്രാം ഓഫീസര്‍ ഡോ. ബി. ഷാജി പ്രസംഗിച്ചു. സമഗ്ര ശിക്ഷാ കേരളയുടെ കീഴിലുള്ള 13 സ്‌കൂളുകളില്‍നിന്നുള്ള പ്രതിനിധികള്‍ പരിശീലന പരിപാടിയില്‍ പങ്കെടുത്തു.

ജില്ലയിലെ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി ഓംബുഡ്‌സ്മാൻ 2025-26 സാമ്പത്തികവർഷത്തിലെ ആദ്യ അർധവർഷത്തിൽ പരിഹരിച്ചത് 47 പരാതികൾ. പ്രവർത്തന റിപ്പോർട്ട്  ഓംബുഡ്സ്മാൻ കെ.എം രാമകൃഷ്ണൻ സർക്കാരിന് സമർപ്പിച്ചു.

ആവശ്യപ്പെട്ടിട്ടും ജോലി ലഭിക്കാത്ത അവസ്ഥ, വ്യക്തിഗത ആസ്തികൾ നിർമിച്ച് മാസങ്ങൾ കഴിഞ്ഞിട്ടും സാമ്പത്തിക ആനുകൂല്യം ലഭ്യമാവാത്തത്, ചികിത്സാ ചെലവ് ലഭ്യമാവാത്തത്, എൻ എം എം എസ് ചെയ്യുമ്പോഴുള്ള തെറ്റുകൾ, മേറ്റിന് അർഹമായ വേതനം ലഭ്യമാവാത്തത് എന്നീ പരാതികളായിരുന്നു കൂടുതൽ. പ്രവൃത്തി സ്ഥലങ്ങളിൽ തൊഴിലാളികൾക്ക് സുരക്ഷ ഒരുക്കാൻ ഓംബുഡ്‌സ്മാൻ പഞ്ചായത്തുകൾക്ക് നിർദേശം നൽകി. 

2025-27 വര്‍ഷത്തേക്കുള്ള ഡി.എല്‍.എഡ് കോഴ്‌സിന്റെ സ്വാശ്രയ ടി.ടി.ഐകളിലെ സയന്‍സ്, കൊമേഴ്‌സ്, ഹ്യുമാനിറ്റീസ് വിഷയങ്ങളില്‍ നിലവിലുള്ള ഒഴിവുകളിലേക്ക് സ്‌പോട്ട് അഡ്മിഷന്‍ നടത്തുന്നു. ഉദ്യോഗാര്‍ത്ഥികള്‍ യോഗ്യത, ആനുകൂല്യം എന്നിവ തെളിയിക്കുന്ന അസ്സല്‍ രേഖകള്‍ സഹിതം നവംബര്‍ ഒന്നിന് രാവിലെ 11 നകം തൃശ്ശൂര്‍ വിദ്യാഭ്യാസ ഉപഡയറക്ടറുടെ ഓഫീസില്‍ ഹാജരാകണമെന്ന് ജില്ലാ വിദ്യാഭ്യാസ ഉപഡയറക്ടര്‍ അറിയിച്ചു. നേരത്തെ അപേക്ഷ സമര്‍പ്പിച്ചിരുന്നവര്‍ക്ക് മുന്‍ഗണന ലഭിക്കും.
 

മാലിന്യമുക്ത കേരളം എന്ന ലക്ഷ്യത്തിന് അധുനിക ശ്മശാനങ്ങൾ അവിഭാജ്യ ഘടകമാണെന്ന് തദ്ദേശസ്വയംഭരണ വകുപ്പ് മന്ത്രി എം.ബി രാജേഷ് പറഞ്ഞു. മയ്യിൽ ഗ്രാമപഞ്ചായത്തിലെ കണ്ടക്കൈ പറമ്പ് ശാന്തിവനത്തിൽ നിർമിച്ച വാതക ശ്മശാനം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. മാലിന്യമുക്ത കേരളത്തിനായി തദ്ദേശ സ്വയംഭരണ സ്ഥാപനങ്ങളിൽ ബോട്ടിൽ ബൂത്തുകളും മറ്റ് മാലിന്യ സംസ്‌കരണ സംവിധാനങ്ങളും ഒരുക്കിയിട്ടുണ്ട്. എങ്കിലും മാലിന്യം വലിച്ചെറിയുന്നവർക്കെതിരെ മുഖം നോക്കാതെ നടപടിയെടുക്കണമെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്റ് അഡ്വ. കെ.കെ രത്നകുമാരി അധ്യക്ഷയായി.

തൃശ്ശൂര്‍ താലൂക്ക് പുറനാട്ടുകര വില്ലേജില്‍ മിച്ചഭൂമിയായി ഏറ്റെടുത്ത റീസര്‍വ്വെ 244/6ല്‍പ്പെട്ട 0.7487 ഹെക്ടര്‍ കോള്‍ പാടം 2025-26 സാമ്പത്തികവര്‍ഷം നെല്‍കൃഷിക്കായി ലേലം ചെയ്യുന്നു. ഒക്ടോബര്‍ 30 ന് രാവിലെ 11 മണിക്ക് പുറനാട്ടുകര വില്ലേജ് ഓഫീസില്‍ തഹസില്‍ദാരോ അല്ലെങ്കില്‍ അദ്ദേഹം അധികാരപ്പെടുത്തിയ ഉദ്യോഗസ്ഥനോ പരസ്യമായി ലേലം ചെയ്യും. ലേലത്തില്‍ പങ്കെടുക്കാന്‍ താല്‍പര്യമുള്ളവര്‍ നിരതദ്രവ്യമായ 6100 രൂപ കെട്ടിവെച്ച് നിശ്ചിത സമയത്ത് വില്ലേജ് ഓഫീസില്‍ എത്തിച്ചേരണം. ഫോണ്‍: 0487 2331443.