കേരള സ്റ്റേറ്റ് സെന്റർ ഫോർ അഡ്വാൻസ്ഡ് പ്രിന്റിംഗ് & ട്രെയിനിംഗിന്റെ ആഭിമുഖ്യത്തിൽ തിരുവനന്തപുരത്തുള്ള ട്രെയിനിംഗ് ഡിവിഷനിൽ ആരംഭിക്കുന്ന ഡിപ്ലോമ ഇൻ കമ്പ്യൂട്ടറൈസ്ഡ് ഫിനാൻഷ്യൽ മാനേജ്‌മെന്റ് (ടാലി), ഡിപ്ലോമ ഇൻ ഡി.റ്റി.പി, 3ഡി ആനിമേഷൻ, മൊബൈൽ ഫോൺ സർവ്വീസിംഗ്, ഡിജിറ്റൽ വീഡിയോഗ്രാഫി ആന്റ് നോൺ ലീനിയർ വിഡിയോ എഡിറ്റിംഗ്, കമ്പ്യൂട്ടർ ഹാർഡ് വെയർ ആന്റ് നെറ്റ്‌വർക്കിംഗ്, ഡോട്ട്‌നെറ്റ് ടെക്‌നോളജി എന്നീ ഗവൺമെന്റ് അംഗീകൃത തൊഴിലധിഷ്ഠിത കോഴ്‌സുകളിലേക്ക് പ്രവേശനം ആരംഭിച്ചു.

കോളേജ് വിദ്യാഭ്യാസ വകുപ്പിൽ മാർച്ച് ഏഴ് രാവിലെ പത്ത് മുതൽ തിരുവനന്തപുരം സർക്കാർ വനിതാ കോളേജിൽ മെഗാഫയൽ അദാലത്ത് സംഘടിപ്പിക്കുന്നു. മുൻപ് പരാതികൾ നൽകിയിരുന്നവരും/പുതുതായി പരാതി ഉള്ളവരും പരാതിയുടെ പകർപ്പും മറ്റ് രേഖകളും സഹിതം രാവിലെ ഒൻപതിന് എത്തണമെന്ന് കോളേജ് വിദ്യാഭ്യാസ ഡയറക്ടർ അറിയിച്ചു. 

പി.എൻ.എക്സ്. 870/19

2018 ഏപ്രിൽ മുതൽ നവംബർ വരെയുളള എട്ട് മാസത്തെ തൊഴിൽരഹിതവേതന വിതരണത്തിന് സർക്കാർ ഫണ്ട് അനുവദിച്ചു. തൊഴിൽരഹിതവേതനം തദ്ദേശ സ്വയംഭരണ സ്ഥാപനങ്ങൾ മുഖേന ഗുണഭോക്താക്കൾക്ക് വിതരണം നടത്തുന്നതിന് 14 ജില്ലാ എംപ്ലോയ്‌മെന്റ് ഓഫീസർമാർക്കും എംപ്ലോയ്‌മെന്റ് ഡയറക്ടർ ഫണ്ട് അനുവദിച്ച് നൽകിയിട്ടുണ്ട്. കൂടുൽ വിവരങ്ങൾക്ക് ഗുണഭോക്താക്കൾ അതാത് തദ്ദേശസ്വയംഭരണ സ്ഥാപനങ്ങളുമായി ബന്ധപ്പെടണം.

പി.എൻ.എക്സ്. 869/19

കേരള ദേവസ്വം റിക്രൂട്ട്‌മെന്റ് ബോർഡിൽ കോൺഫിഡൻഷ്യൽ അസിസ്റ്റന്റ് തസ്തികയിലേക്ക് ഇന്റർവ്യൂവിന് ക്ഷണിയ്ക്കാൻ യോഗ്യരായ ഉദ്യോഗർത്ഥികളുടെ ചുരുക്കപ്പട്ടിക പ്രസിദ്ധീകരിച്ചു. ലിസ്റ്റിൽ ഉൾപ്പെട്ടിട്ടുളളവർ പേര്, ജനനത്തീയതി, വിദ്യാഭ്യാസ യോഗ്യത, സമുദായം ഇവ തെളിയിക്കുന്ന സർട്ടിഫിക്കറ്റുകളുടെ സ്വയം സാക്ഷ്യപ്പെടുത്തിയ ശരിപ്പകർപ്പ് കെ.ഡി.ആർ.ബിയുടെ ഓഫീസിൽ നേരിട്ടോ തപാൽ മാർഗമോ എത്തിക്കണം. ലിസ്റ്റിന്റെ പകർപ്പ് കേരള ദേവസ്വം റിക്രൂട്ട്‌മെന്റ് ബോർഡിന്റെ ഓഫീസിലും വെബ്‌സൈറ്റിലും (www.kdrb.kerala.gov.in)  പരിശോധനയ്ക്ക് ലഭ്യമാണ്. 

പി.എൻ.എക്സ്. 867/19

കേരള നിയമസഭയുടെ പാർലമെന്ററി പഠന പരിശീലന കേന്ദ്രം നടത്തുന്ന സർട്ടിഫിക്കറ്റ് കോഴ്‌സിന്റെ (സർട്ടിഫിക്കറ്റ് കോഴ്‌സ് ഇൻ പാർലമെന്റെറി പ്രാക്ടീസ് ആന്റ് പ്രൊസീജിയർ) ഫിനിഷിംഗ് ക്ലാസുകൾ മാർച്ച് ഒൻപതിന് തിരുവനന്തപുരം നിയമസഭാ സമുച്ചയത്തിലെ ബാങ്ക്വറ്റ് ഹാളിലും 17ന് കോഴിക്കോട് നടക്കാവ് ഗവ. വി.എച്ച്.എസ്.എസ് ഫോർ ഗേൾസിലും രാവിലെ ഒൻപത് മുതൽ വൈകുന്നേരം 5.15 വരെ നടത്തും. കോഴ്‌സിന്റെ അഡ്മിഷൻ ഫീ, ട്യൂഷൻ ഫീ, പരീക്ഷാ ഫീ എന്നിവ അടച്ച പഠിതാക്കൾക്ക് ക്ലാസിൽ പങ്കെടുക്കാം. കൂടുതൽ വിവരങ്ങൾ നിയമസഭയുടെ വെബ്‌സൈറ്റിൽ  (www.niyamasabha.org)  ലഭ്യമാണ്.

പി.എൻ.എക്സ്. 866/19

      ദേശീയ സ്‌കൂൾ മത്സരങ്ങളിൽ 2016-17, 2017-18 വർഷങ്ങളിൽ മെഡൽ കരസ്ഥമാക്കിയ കുട്ടികൾക്കും കോച്ച്, മാനേജർ (മെഡൽ കരസ്ഥമാക്കിയ ടീമിന്റെ) എന്നിവർക്ക് ക്യാഷ് അവാർഡ് നൽകുന്നു. ഇതിനായി dpisports.in  എന്ന വെബ്‌സൈറ്റ് സന്ദർശിച്ച് മാർച്ച് 12ന് മുമ്പ് രജിസ്റ്റർ ചെയ്യണമെന്ന് പൊതുവിദ്യാഭ്യാസ ഡയറക്ടർ അറിയിച്ചു.

പി.എൻ.എക്സ്. 865/19

കാഞ്ഞിരംകുളം കെ.എൻ.എം. ഗവൺമെന്റ് ആർട്‌സ് & സയൻസ് കോളേജിന് 3.5 ഏക്കർ സ്ഥലം ഒരുമിച്ച് ലഭ്യമാക്കുവാൻ കോളേജിന്റെ പരിസരത്തുള്ള വസ്തു വില്പ്പനക്ക് താല്പര്യമുള്ളവരിൽ നിന്ന് സമ്മതപത്രം ക്ഷണിച്ചു. മാർച്ച് 18 ന് വൈകിട്ട് നാല് മണിയ്ക്കകം നിബന്ധനകൾക്ക് അനുസൃതമായി സമ്മതപത്രം ലഭ്യമാക്കണമെന്ന് കോളേജ് പ്രിൻസിപ്പാൾ അറിയിച്ചു. കൂടുതൽ വിവരങ്ങൾക്ക്: 0471-2260092.

പി.എൻ.എക്സ്. 864/19

കെമാറ്റ് കേരള രണ്ടാമത് പരീക്ഷ ജൂൺ 16ന് നടത്തും. അപേക്ഷകൾ ഓൺലൈനായി സമർപ്പിക്കാം. വിശദ വിവരങ്ങൾ  kmatkerala.in  എന്ന വെബ് സൈറ്റിൽ ലഭ്യമാണ്. ഓൺലൈൻ അപേക്ഷ സമർപ്പിക്കേണ്ട അവസാന തീയതി മേയ് 31 വൈകുന്നേരം നാല് വരെ ആണ്. അപേക്ഷാഫീസ് : ജനറൽ വിഭാഗത്തിന് 1000 രൂപയും എസ്.സി/എസ്.റ്റി വിഭാഗത്തിന് 750 രൂപയും ആണ്. അവസാന വർഷ ബിരുദ വിദ്യാർത്ഥികൾക്കും പരീക്ഷാഫലം പ്രതീക്ഷിക്കുന്നവർക്കും അപേക്ഷിക്കാം. സംശയ നിവാരണങ്ങൾക്ക് 0471-2335133, 8547255133 എന്ന നമ്പരുകളിൽ ബന്ധപ്പെടണം. 

പി.എൻ.എക്സ്. 863/19