അങ്കണവാടി പ്രവേശനോല്‍സവത്തിന്റെ ജില്ലാതല ഉദ്ഘാടനം ഇന്ന് (മെയ് 30) രാവിലെ 10.30 ന് പുതുശ്ശേരി പഞ്ചായത്ത് കമ്മ്യൂണിറ്റി ഹാളില്‍ നടക്കും. അങ്കണവാടികളുടെ പ്രാധാന്യം സമൂഹത്തില്‍ വര്‍ധിപ്പിക്കുക, പ്രീ - സ്‌കൂള്‍ കുട്ടികളുടെ എണ്ണം വര്‍ദ്ധിപ്പിക്കുക ലക്ഷ്യമിട്ട് നടത്തുന്ന പരിപാടി ജില്ലാപഞ്ചായത്ത് ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ബിന്ദു സുരേഷ് ഉദ്ഘാടനം ചെയ്യും. ആദിവാസി മേഖലയ്ക്ക് പ്രാധാന്യം കൊടുക്കുന്നതിന്റെ ഭാഗമായാണ് മലമ്പുഴ ഐ.സി.ഡി.എസ്. പ്രോജക്ടിലെ പുതുശ്ശേരി ഗ്രാമപഞ്ചായത്തിലെ അങ്കണവാടികളെ പ്രവേശനോല്‍സവത്തിനായി തിരഞ്ഞെടുത്തത്. 

മലമ്പുഴ വനിത ഐ.ടി.ഐയില്‍ അരിത്മാറ്റിക് കം ഡ്രോയിംഗ് ട്രേഡിലേയ്ക്ക് ഗസ്റ്റ് ഇന്‍സ്ട്രക്ടര്‍ ഒഴിവുണ്ട്. ഏതെങ്കിലും ബ്രാഞ്ചില്‍ എഞ്ചിനീയറിംഗ് ഡിപ്ലോമ അഥവാ എഞ്ചിനീയറിംഗ് ഡിഗ്രിയാണ് യോഗ്യത. അര്‍ഹരായവര്‍ ജൂണ്‍ ഒന്നിന് രാവിലെ 11ന് നടക്കുന്ന കൂടിക്കാഴ്ചയില്‍ അസ്സല്‍ സര്‍ട്ടിഫിക്കറ്റുകളുമായി പങ്കെടുക്കണമെന്ന് പ്രിന്‍സിപ്പാള്‍ അറിയിച്ചു. ഫോണ്‍: 0491 2815181

മലമ്പുഴ വനിത ഐടിഐയുടെ പി.പി.പി സ്‌കീമില്‍ ടാലി, എംഎസ് ഓഫീസ് കോഴ്‌സുകള്‍ പഠിപ്പിക്കുന്നതിന് ഉദ്യോഗാര്‍ത്ഥികള്‍ക്ക് അവസരം. കമ്പ്യൂട്ടര്‍ സയന്‍സ്, ഡിഗ്രി, ഡിപ്ലോമയാണ്  യോഗ്യത. അര്‍ഹരായവര്‍ അസ്സല്‍ സര്‍ട്ടിഫിക്കറ്റുകളുമായി ജൂണ്‍ ഒന്നിന് രാവിലെ 11ന് നടക്കുന്ന കൂടിക്കാഴ്ചയില്‍ പങ്കെടുക്കണമെന്ന് പ്രിന്‍സിപ്പാള്‍ അറിയിച്ചു. ടാലി പരിജ്ഞാനമുള്ളവര്‍ക്ക് മുന്‍ഗണന. ഫോണ്‍: 0491 2815181. 

ചിറ്റൂര്‍ ജി.എച്ച്.എസ് ബോയ്‌സ് സ്‌കൂളില്‍ യു.പി സ്‌കൂള്‍ അധ്യാപകന്റെ ഒഴിവുണ്ട്. ബിരുദവും ടി.ടി.സി.യുമാണ് യോഗ്യത. ബി.എഡ് ഉള്ളവര്‍ക്ക് മുന്‍ഗണന. താല്‍പര്യമുള്ളവര്‍ അസ്സല്‍ സര്‍ട്ടിഫിക്കറ്റുകളുമായി ജൂണ്‍ ഒന്ന് രാവിലെ 10.30ന് സ്‌കൂളില്‍ എത്തണമെന്ന് ഹെഡ്മിസ്ട്രസ് അറിയിച്ചു

വാണിജ്യനികുതി കുടിശ്ശികയായ 6523280 രൂപ അടയ്ക്കുന്നതില്‍ വീഴ്ച വരുത്തിയതിനെ തുടര്‍ന്ന് കൊല്ലങ്കോട് ചിക്കനംപാറ കൊട്ടമേട്ടില്‍ വീട്ടിലെ ഉമൈബയുടെ 2015 ജനുവരി 27ന് ജപ്തി ചെയ്ത 528/15 റീസര്‍വെ നമ്പറിലുള്ള 0.0202 ഹെക്ടര്‍ നിലം ലേലം ചെയ്യും. ചിറ്റൂര്‍ താലൂക്കിലെ 14-ാം ബ്ലോക്കിലാണ് സ്ഥലം. ജൂണ്‍ 29ന് രാവിലെ 11ന് കൊല്ലങ്കോട് 1 വില്ലേജ് ഓഫീസിലാണ് ലേലം നടക്കുന്നത്.