സമഗ്ര ശിക്ഷാ കേരളം ഭിന്നശേഷിക്കാരായ കുട്ടികളുടെ ഉൾചേർച്ചാ വിദ്യാഭ്യാസത്തിന്റെ ഭാഗമായി സംഘടിപ്പിക്കുന്ന 'മഴവില്ല്' കലോത്സവത്തിന് ജില്ലയിൽ തുടക്കമായി. ടാഗോർ വിദ്യാനികേതനിൽ കഥാകൃത്ത് ടി പത്മനാഭൻ ഉദ്ഘാടനം ചെയ്തു. ഭിന്നശേഷിക്കാരായ കുട്ടികളെ ഉയർത്തിക്കൊണ്ടുവരുന്നതിനായി സർക്കാർ നടത്തുന്ന പ്രവർത്തനങ്ങളിൽ അഭിമാനമുണ്ടെന്ന് അദ്ദേഹം പറഞ്ഞു.

മാടായി ഗവ.ബോയ്‌സ് വൊക്കേഷണൽ ഹയർ സെക്കൻഡറി സ്‌കൂളിന്റെ പുതിയ ഹയർ സെക്കണ്ടറി കോംപ്ലക്‌സിന്റെ ഉദ്ഘാടനം ടി വി രാജേഷ് എംഎൽഎ നിർവ്വഹിച്ചു. സാധാരണക്കാരന്റെ മക്കൾ പഠിക്കുന്ന സർക്കാർ സ്‌കൂളുകൾ ഏത് സ്വകാര്യ സ്‌കൂളിനെയും കിടപിടിക്കുന്ന രീതിയിൽ മികച്ച നിലവാരത്തിൽ എത്തിയിരിക്കുകയാണെന്ന് അദ്ദേഹം പറഞ്ഞു. സ്‌കൂളിന് ബസ് സൗകര്യം അനുവദിക്കുമെന്ന് എം എൽ എ അറിയിച്ചു. ജില്ലാ പഞ്ചായത്ത് പ്രസിഡൻറ് കെ വി സുമേഷ് അധ്യക്ഷത വഹിച്ചു. 

സംസ്ഥാന ബാലാവകാശ സംരക്ഷണ കമീഷൻ ബാലാവകാശ സംരക്ഷണവുമായി ബന്ധപ്പെട്ട് വിവിധ ജില്ലകളിൽ നടത്തിയ ശിൽപശാലകളുടെ സംസ്ഥാനതല സമാപനം മാർച്ച് ഒന്നിന് കണ്ണൂർ ദിനേശ് ഓഡിറ്റോറിയത്തിൽ നടക്കും. പരിപാടിക്കായി ജില്ലാ പഞ്ചായത്ത് പ്രസിഡൻറ് കെ.വി സുമേഷ് ചെയർമാനായും ജില്ലാ കലക്ടർ മീർ മുഹമ്മദ് അലി വൈസ് ചെയർമാനായും ജില്ലാ ചൈൽഡ് പ്രൊട്ടക്ഷൻ ഓഫീസർ എം.പി അബ്ദുറഹ്മാൻ കൺവീനറായും സംഘാടക സമിതി രൂപീകരിച്ചു. യോഗത്തിൽ ജില്ലാ പഞ്ചായത്ത് പ്രസിഡൻറ് കെ.വി. സുമേഷ്, ബാലവകാശ സംരക്ഷണ കമീഷൻ ചെയർമാൻ പി. സുരേഷ്, മെംബർ ഡോ.എം.പി ആൻറണി, ജില്ലാതല ഉദ്യോഗസ്ഥർ തുടങ്ങിയവർ സംബന്ധിച്ചു. 

നൂതന സാങ്കേതിക സംവിധാനങ്ങളായ ഇന്റർനെറ്റ് ഓഫ് തിംഗ്‌സ് (ഐ.ഒ.ടി.) ത്രീഡി ക്യാരക്ടർ മോഡലിങ്ങ് തുടങ്ങിയവ സ്‌കൂൾ വിദ്യാർഥികൾക്ക് പരിചയപ്പെടുത്തുന്ന ദ്വിദിന ലിറ്റിൽ കൈറ്റ്‌സ് ജില്ലാ സഹവാസ ക്യാമ്പിന് തുടക്കമായി. ഉപജില്ലാ ക്യാമ്പുകളിൽ പങ്കെടുത്ത 1012 പേരിൽ നിന്നും തിരഞ്ഞെടുത്ത 89 പേരാണ് സി.എച്ച്.എം.ഹയർ സെക്കന്ററി സ്‌ക്കൂൾ, എളയാവൂരിൽ  നടക്കുന്ന കേരള ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷന്റെ (കൈറ്റ്) നേതൃത്വത്തിൽ നടപ്പാക്കുന്ന ക്യാമ്പിൽ പങ്കെടുക്കുന്നത്.

വ്യവസായ വളർച്ചയിൽ ഉത്തരമലബാറിന് തിലകക്കുറിയായി പിണറായി ഹൈടെക് വീവിംഗ് മിൽ ഉദ്ഘാടനത്തിനൊരുങ്ങി. ഏറെ കാലത്തെ കാത്തിരിപ്പിനൊടുവിൽ ഏവരുടെയും ചിരകാലസ്വപ്‌നം ഫെബ്രുവരി 28ന് മുഖ്യമന്ത്രി പിണറായി വിജയൻ നാടിന് സമർപ്പിക്കും.

തല ചായ്ക്കാനിടമില്ലാത്തവർക്കായി സംസ്ഥാന സർക്കാർ ആവിഷ്‌ക്കരിച്ച ലൈഫ് ഭവന പദ്ധതിയുടെ മൂന്നാം ഘട്ടത്തിൽ ഭൂരഹിത ഭവനരഹിതർക്ക് അഞ്ചിടങ്ങളിലായി ഭവന സമുച്ചയത്തിന് സ്ഥലം കണ്ടെത്തി. കുറുമാത്തൂർ, പയ്യന്നൂർ, കണ്ണപുരം, കൂടാളി, കടമ്പൂർ എന്നിവിടങ്ങളിലാണ് ഭവന സമുച്ചയം നിർമ്മിക്കുക.  എടക്കാട് ബ്ലോക്കിലെ കടമ്പൂർ ഗ്രാമപഞ്ചായത്തിൽ ആദ്യ ഭവന സമുച്ചയം പണിയുന്നതിന് സംസ്ഥാന ലൈഫ് മിഷൻ തൃശ്ശൂർ ആസ്ഥാനമായ ടി.ഡി.എൽ.സി.എസ് എന്ന സ്ഥാപനത്തിന് ടെണ്ടർ നൽകിയിട്ടുണ്ട്.   അവർ  സ്ഥലസന്ദർശനം നടത്തുകയും സ്ഥലത്തിന്റെ രേഖകൾ കടമ്പൂർ ഗ്രാമപഞ്ചായത്ത് കൈമാറുകയും ചെയ്തു.   മണ്ണു പരിശോധന നടത്തിയിട്ടുണ്ട്.

ദേശീയ ആരോഗ്യ ദൗത്യം പദ്ധതിക്ക് കീഴില്‍ ഡെന്റല്‍ സര്‍ജന്‍, ബയോമെഡിക്കല്‍ എഞ്ചിനീയര്‍, ക്വാളിറ്റി അഷ്വറന്‍സ് ഓഫീസര്‍, ഫാര്‍മസിസ്റ്റ്, ലാബ് ടെക്നീഷ്യന്‍, സ്റ്റാഫ് നഴ്സ്, ഡയാലിസിസ് ടെക്നീഷ്യന്‍ എന്നീ തസ്തികകളില്‍ നിയമനം നടത്തുന്നു.  താല്‍പര്യമുള്ളവര്‍ അസ്സല്‍ സര്‍ട്ടിഫിക്കറ്റുകളുടെ കോപ്പികള്‍, ഫോട്ടോ പതിച്ച തിരിച്ചറിയല്‍ കാര്‍ഡ് സഹിതം ഫെബ്രുവരി 18 ന് രാവിലെ പത്തിന് മുമ്പായി ജില്ലാ നാഷണല്‍ ഹെല്‍ത്ത് മിഷന്‍ ഓഫീസില്‍ രജിസ്റ്റര്‍ ചെയ്ത് അഭിമുഖത്തിന് പങ്കെടുക്കണം. സ്‌റ്റൈപ്പന്റ് നല്‍കാതെ മൂന്ന് മാസത്തേക്കാണ് നിയമനം. ഫോണ്‍: 0497 2709920.

വീടുകളില്‍ പഠന സൗകര്യമില്ലാത്ത പട്ടികജാതി വിഭാഗങ്ങളിലെ വിദ്യാര്‍ഥികള്‍ക്കായി പഠനമുറിയൊരുക്കാന്‍ രണ്ട് ലക്ഷം രൂപ വീതം നല്‍കുമെന്ന് പട്ടികജാതി-പട്ടികവര്‍ഗ വകുപ്പ് മന്ത്രി എ കെ ബാലന്‍ പറഞ്ഞു. 

കാലപഴക്കം കൊണ്ട്‌ ജീര്‍ണ്ണാവസ്ഥയിലായ അക്കിക്കാവ്‌, അണ്ടത്തോട്‌, കല്ലേറ്റുംകര, കുന്നംകുളം, മുണ്ടൂര്‍, പഴയന്നൂര്‍, തൃപ്രയാര്‍ എന്നീ എഴ്‌ സബ്‌ രജിസ്‌ട്രാഫീസുകള്‍ക്ക്‌ പുതിയ കെട്ടിടം നിര്‍മ്മിക്കാനുളള സൈറ്റുകള്‍ കേരള കണ്‍സ്‌ട്രക്ഷന്‍ കോര്‍പ്പറേഷനു കൈമാറി. ഇതിന്റെ നിര്‍മ്മാണോദ്‌ഘാടനം ഉടനെ നടക്കുമെന്ന്‌ ജില്ലാ രജിസ്‌ട്രാര്‍ ജനറല്‍ അറിയിച്ചു. കിഫ്‌ബി പദ്ധതിയില്‍ ഉള്‍പ്പെടുത്തി സംസ്ഥാന സര്‍ക്കാര്‍ നടപ്പിലാക്കുന്നു. കൂടാതെ സബ്‌ രജിസ്‌ട്രാര്‍ ഓഫീസിന്‌ മിനി സിവില്‍ സ്റ്റേഷനില്‍ കൂടുതല്‍ സൗകര്യങ്ങളോടെ പുതിയ കെട്ടിടം നല്‍കി.

കുന്നംകുളത്തെ മാലിന്യ പ്രശ്‌നങ്ങള്‍ക്ക്‌ ശാശ്വത പരിഹാരമായി പ്രവര്‍ത്തിക്കുന്ന കുറുക്കന്‍പാറ ഗ്രീന്‍ പാര്‍ക്കില്‍ ചകിരി യൂണീറ്റിന്റെ നിര്‍മ്മാണം തുടങ്ങി. ബാക്ടീരിയ ഇനോക്കുലം ചേര്‍ത്ത ചകിരിച്ചോറാണ്‌ ഇവിടെ മാലിന്യ സംസ്‌കരണത്തിനായി ഉപയോഗിക്കുന്നത്‌. മാസത്തില്‍ നാലരടണ്‍ ചകിരിച്ചോറാണ്‌ ഇതിനായി ആവശ്യം വരുന്നത്‌. ധനമന്ത്രി ടിഎം തോമസ്‌ ഐസക്ക്‌ ഗ്രീന്‍പാര്‍ക്ക്‌ സന്ദര്‍ശിച്ചപ്പോഴാണ്‌ ചകിരി നിര്‍മ്മാണ യൂണീറ്റ്‌ സ്വന്തമായി തുടങ്ങുന്നതിനുള്ള ആശയം പങ്കുവെച്ചത്‌. മന്ത്രിയുടെ നിര്‍ദ്ദേശത്തെ തുടര്‍ന്ന്‌ കയര്‍ ബോര്‍ഡിന്റെ സഹകരണവും ലഭിച്ചു.