പ്രളയബാധിതരെ സഹായിക്കുന്നതിനുള്ള 36 ടണ്‍ സാധനങ്ങളുമായി വലിയ കണ്ടെയിനര്‍ ലോറി ഇന്നലെ കലക്ടറേറ്റില്‍ നിന്ന് ആലപ്പുഴയിലേക്ക് തിരിച്ചു. ഇതിനു പുറമെ ഇന്നലെ മറ്റൊരു കണ്ടെയ്‌നര്‍ ലോറി എറണാകുളത്തേക്കും തിരിച്ചു. 

സംസ്ഥാനമാകെ പ്രളയം ദുരന്തം വിതച്ച സമയത്ത് നടന്ന ഗൃഹപ്രവേശനത്തിന് സമ്മാനമായി ലഭിച്ച മുഴുവന്‍ സാധനങ്ങളും ദുരിതബാധിതരുടെ കണ്ണീരൊപ്പാനായി നല്‍കി ഗൃഹനാഥന്‍ മാതൃകയായി. മാവിലായി കീഴറയിലെ കെ കെ മഹേഷാണ് തന്റെ ഗൃഹപ്രവേശനത്തിനോടനുബന്ധിച്ച് സമ്മാനമായി ലഭിച്ച ഫര്‍ണിച്ചര്‍, വീട്ടുപകരണങ്ങള്‍ തുടങ്ങി മുഴുവന്‍ സാധനങ്ങളും ദുരിതാശ്വാസത്തിനായി സംഭാവന ചെയ്തത്. 

പ്രളയക്കെടുതിയില്‍ നിന്ന് കേരളത്തെ രക്ഷിക്കാനുള്ള കണ്ണൂരിന്റെ കൂട്ടായ ശ്രമങ്ങള്‍ക്ക് ശക്തിയേറുന്നു. ഇന്നലെ (ആഗസ്ത് 20) മാത്രം മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള സംഭാവനയായി കലക്ടറേറ്റില്‍ ലഭിച്ചത് ഒരു കോടിയോളം രൂപ. 84,77,356 രൂപ ചെക്കായും 13,32,090 രൂപ പണമായും ആകെ 98,09,446. ഞായറാഴ്ച വരെ ലഭിച്ച 1,37,42,260 രൂപ ഉള്‍പ്പെടെ 2,35,51,706 രൂപയാണ് ഇതിനകം കലക്ടറേറ്റില്‍ ലഭിച്ചത്. 

പ്രളയ ദുരിതാശ്വാസത്തിനായുള്ള സാധനങ്ങള്‍ ആഗസ്ത് 22 ന് വൈകിട്ട് അഞ്ച് മണി വരെ കണ്ണൂര്‍ കലക്ടറ്റേില്‍ എത്തിക്കാമെന്ന് ജില്ലാ കലക്ടര്‍ മീര്‍ മുഹമ്മദലി അറിയിച്ചു. ബെഡ്ഷീറ്റ്, പായ, ബേബിഫുഡ്, പുതിയ വസ്ത്രങ്ങള്‍(ലുങ്കി, തോര്‍ത്ത്, നൈറ്റി, അടിവസ്ത്രങ്ങള്‍) തുടങ്ങിയവയാണ് ശേഖരിക്കുന്നത്. കണ്ണൂര്‍ കലക്ടറേറ്റില്‍ നിന്ന് ഇവ വിവിധ ജില്ലകളിലെ ആവശ്യത്തിന്നുസരിച്ച് അയച്ചുകൊടുക്കുകയാണ് ചെയ്യുന്നത്. വസ്ത്രങ്ങളടക്കുമുള്ള എല്ലാ സാധനങ്ങളും പുതിയവ ആയിരിക്കണം.

      കാര്യങ്കോട് പുഴക്ക് കുറുകെയുണ്ടായിരുന്ന മുളപ്പാലങ്ങള്‍ പുനര്‍നിര്‍മിച്ചതിനെത്തുടര്‍ന്ന് ചെറുപുഴ പഞ്ചായത്തിലെ രാജഗിരി ദുരിതാശ്വാസ ക്യാമ്പില്‍ കഴിഞ്ഞ കുടുംബങ്ങള്‍ കോളനികളിലേക്ക് മടങ്ങി. കനത്ത മഴയും കര്‍ണാടക വനത്തിലുണ്ടായ ഉരുള്‍പൊട്ടലിനെയും തുടര്‍ന്ന് കഴിഞ്ഞ വ്യാഴാഴ്ചയാണ് കാര്യങ്കോട് പുഴയില്‍ വെള്ളം കയറി ഇടക്കോളനി, കാനംവയല്‍ പട്ടികവര്‍ഗ കോളനി എന്നിവിടങ്ങളിലെ മുളപ്പാലങ്ങള്‍ തകര്‍ന്നത്.

ജില്ലയില്‍ പ്രളയത്തിന്റെയും ഉരുള്‍പൊട്ടലിന്റെയും ഭാഗമായി ജില്ലയില്‍ ആഗസ്റ്റ് ഒമ്പതിന് ശേഷം കാര്‍ഷിക മേഖലയില്‍ മാത്രം അഞ്ച് കോടി രൂപയുടെ നാഷനഷ്ടം ഉണ്ടായതായി കണക്കാക്കി. കാലവര്‍ഷം തുടങ്ങിയതു മുതല്‍ കാര്‍ഷികമേഖലയില്‍ ജില്ലയിലുണ്ടായ നഷ്ടം 24 കോടി 62 ലക്ഷം രൂപയുടേതാണ്. 929 ഹെക്ടര്‍ സ്ഥലമാണ് ആകെ നശിച്ചത്. 113 വീടുകള്‍ പൂര്‍ണമായും 2625 വീടുകള്‍ ഭാഗികമായും തകര്‍ന്നു.

കാലാവര്‍ഷക്കെടുതിയെത്തുടര്‍ന്ന് ആരംഭിച്ച ദുരിതാശ്വാസ ക്യാമ്പുകളില്‍ തിങ്കളാഴ്ച പ്രവര്‍ത്തിച്ചത് നാലെണ്ണം. ഞായറാഴ്ച വരെ ഏഴ് ക്യാമ്പുകളാണ് ഉണ്ടയിരുനത്. മഴയുടെ ശക്തി കുറഞ്ഞ സാചര്യത്തില്‍ പയ്യന്നൂര്‍, തളിപ്പറമ്പ്, കേളകം എന്നീ പ്രദേശങ്ങളിലെ ക്യാമ്പുകള്‍ പിരിച്ചുവിട്ടു.  കൊട്ടിയൂര്‍ വില്ലേജിലെ നാല് ക്യാമ്പുകളാണ് നിലവിലുള്ളത്. കേളകം ക്യാമ്പിലെ രണ്ട് കുടുംബങ്ങളെ വാടകയ്ക്ക് താമസിപ്പിക്കാനാണ് തീരുമാനം. നിലവിലുള്ള ക്യാമ്പുകള്‍.