കുഷ്ഠരോഗ വിമുക്ത ഭാരതം എന്ന മഹാത്മജിയുടെ സ്വപ്‌നം സാക്ഷാത്കരിക്കുന്നതിനായി രോഗത്തെക്കുറിച്ചുള്ള ശരിയായ അറിവ് ആര്‍ജിക്കുകയും, രോഗ ലക്ഷണങ്ങള്‍ ഉള്ളവര്‍ ചികിത്സയ്ക്കായി സന്നദ്ധരാകുകയും വേണമെന്ന് വീണാ ജോര്‍ജ് എംഎല്‍എ പറഞ്ഞു. ഇതിനായി ഓരോ പൗരനും മുന്നോട്ടു വരണമെന്നും എംഎല്‍എ പറഞ്ഞു. ദേശീയ കുഷ്ഠരോഗ പക്ഷാചരണത്തിന്റെ ജില്ലാതല ഉദ്ഘാടനം ഓമല്ലൂരില്‍ നിര്‍വഹിച്ചു സംസാരിക്കുകയായിരുന്നു എംഎല്‍എ. 

തൃപ്പുണിത്തുറ ഗവൺമെന്റ് ആയുർവേദ കോളേജിൽ അഗദതന്ത്ര അധ്യാപക തസ്തികയിലേക്ക് കരാർ നിയമനത്തിന് ഫെബ്രുവരി ഒൻപതിന് വാക്ക്-ഇൻ-ഇന്റർവ്യൂ നടത്തും. കരാർ കാലാവധി ഒരു വർഷമാണ്.
അഗദതന്ത്ര വിഷയത്തിൽ ബിരുദാനന്തര ബിരുദം, എ ക്ലാസ് മെഡിക്കൽ കൗൺസിലർ രജിസ്‌ട്രേഷൻ, പ്രവൃത്തിപരിചയം എന്നിവയാണ് യോഗ്യത. രാവിലെ 11ന് പ്രിൻസിപ്പൽ ഓഫീസിലാണ് ഇന്റർവ്യൂ. ബയോഡാറ്റ, ജനനത്തീയതി, വിദ്യാഭ്യാസ യോഗ്യത, മുൻപരിചയം എന്നിവ തെളിയിക്കുന്നതിനുള്ള അസ്സൽ സർട്ടിഫിക്കറ്റുകൾ ഹാജരാക്കണം.
പി.എൻ.എക്സ്. 525/2021

കേരള റോഡ് സുരക്ഷാ അതോറിറ്റിയിൽ ക്ലാർക്ക് തസ്തികയിലേക്ക് ഡെപ്യൂട്ടേഷൻ നിയമനത്തിന് അപേക്ഷ ക്ഷണിച്ചു.
സർക്കാർ വകുപ്പുകളിൽ തത്തുല്യ തസ്തികയിലുള്ള കമ്പ്യൂട്ടർ പരിജ്ഞാനമുള്ള ജീവനക്കാർക്ക് അപേക്ഷിക്കാം. ശമ്പള സ്‌കെയിൽ 19,000-43,600 രൂപ. കേരള സർവീസ് റൂൾ പാർട്ട് ഒന്നിലെ ചട്ടം 144 അനുസരിച്ചുള്ള നിശ്ചിത മാതൃകയിൽ അപേക്ഷ ബന്ധപ്പെട്ട വകുപ്പു മേധാവി മുഖാന്തിരം കേരള റോഡ് സുരക്ഷാ കമ്മീഷണർ, ട്രാൻസ് ടവേഴ്‌സ്, തിരുവനന്തപുരം-14 എന്ന വിലാസത്തിൽ 10 ദിവസത്തിനകം ലഭിക്കണം. ഫോൺ: 0471-2336369.
പി.എൻ.എക്സ്. 523/2021
 

തദ്ദേശ സ്വയംഭരണ സ്ഥാപനങ്ങളുടെ 2020-21 വാര്‍ഷിക പദ്ധതി അവലോകനം നടത്തുന്നതിനും 2021-2022 വാര്‍ഷിക പദ്ധതി രൂപീകരണ പുരോഗതി വിലയിരുത്തുന്നതിനുമായി ജില്ലാ ആസൂത്രണ സമിതി യോഗം രണ്ട് ദിനമായി ചേര്‍ന്നു. ജില്ലാ പഞ്ചായത്ത് ഹാളില്‍ നടന്ന യോഗത്തില്‍ ആസൂത്രണ സമിതി ചെയര്‍മാന്‍കൂടിയായ ജില്ലാ പഞ്ചായത്ത് പ്രസിഡന്റ് അഡ്വ. ഓമല്ലൂര്‍ ശങ്കരന്‍ അധ്യക്ഷത വഹിച്ചു. ജില്ലാ കളക്ടര്‍ ഡോ. നരസിംഹുഗാരി തേജ് ലോഹിത് റെഡ്ഡി പങ്കെടുത്തു.

രക്തസാക്ഷി ദിനാചരണത്തിന്റെ ഭാഗമായി മുഖ്യമന്ത്രി പിണറായി വിജയൻ പാളയം രക്തസാക്ഷി മണ്ഡപത്തിൽ പുഷ്പചക്രം അർപ്പിച്ചു. കേരള പോലീസിന്റെ രക്തസാക്ഷി ദിന പരേഡിൽ മുഖ്യമന്ത്രി അഭിവാദ്യം സ്വീകരിച്ചു.
ചടങ്ങിൽ ചീഫ് സെക്രട്ടറി ഡോ: വിശ്വാസ് മേത്ത, സംസ്ഥാന പോലീസ് മേധാവി ലോക്നാഥ് ബെഹ്റ, പ്രിൻസിപ്പൽ സെക്രട്ടറി കെ.ആർ. ജ്യോതിലാൽ, മുതിർന്ന പോലീസ് ഉദ്യോഗസ്ഥർ തുടങ്ങിയവർ സംബന്ധിച്ചു.
പി.എൻ.എക്സ്. 521/2021

ലോകായുക്ത ജസ്റ്റിസ് സിറിയക് ജോസഫിന്റെ മുൻപാകെ ജസ്റ്റിസ് ഹാറൂൺ- അൽ-റഷീദ് ഉപലോകായുക്തയായി ഒന്നിന് രാവിലെ 11ന് സത്യപ്രതിജ്ഞ ചെയ്യും. നിയമസഭാ മന്ദിരത്തിലെ അഡ്മിനിസ്‌ട്രേറ്റീവ് ബ്ലോക്കിലെ ബാങ്ക്വറ്റ് ഹാളിലാണ് ചടങ്ങ് നടക്കുക.
പി.എൻ.എക്സ്. 520/2021
 

നവകേരളം-യുവകേരളം-ഉന്നതവിദ്യാഭ്യാസത്തിന്റെ ഭാവി എന്ന വിഷയത്തെ അടിസ്ഥാനമാക്കി കേരളത്തിലെ സർവ്വകലാശാലകളിലെ വിദ്യാർത്ഥികളുമായി മുഖ്യമന്ത്രി പിണറായി വിജയൻ നടത്തുന്ന ആശയ സംവാദത്തിന്റെ ഒരുക്കങ്ങൾ പൂർത്തിയായി. കേരളത്തിലെ അഞ്ച് സർവ്വകലാശാല ക്യാമ്പസുകളിൽ ഫെബ്രുവരി ഒന്ന്, ആറ്, എട്ട്, 11, 13 തീയതികളിലാണ് പരിപാടി.