സിവില്‍ സപ്ലൈസ് വകുപ്പിന്റെ ആഭിമുഖ്യത്തില്‍ ഇ-പോസ് മെഷീനുകളുടെ പ്രവര്‍ത്തന രീതിയെ കുറിച്ചും പൊതുവിതരണ രംഗത്തെ മാറ്റങ്ങളെ കുറിച്ചു ജില്ലാ - ബ്ലോക്ക് പഞ്ചായത്തുകളിലെ ജനപ്രതിനിധികള്‍ക്ക് അവബോധം നല്‍കുവാന്‍ ഫെബ്രുവരി 25ന് രാവിലെ 10.30ന് മലപ്പുറം നഗരസഭാ ബസ്റ്റാന്റ് ഓഡിറ്റോറിയത്തില്‍ ശില്‍പശാല സംഘടിപ്പിക്കുന്നു.  ശില്‍പശാല ജില്ലാ പഞ്ചായത്ത് പ്രസിഡന്റ് എ.പി. ഉണ്ണികൃഷ്ണന്‍ ഉദ്ഘാടനം ചെയ്യും.  

കേരള വനിതാ കമ്മീഷന്‍ ഫെബ്രുവരി 25 ന് രാവിലെ 10.30 മുതല്‍ ജില്ലാ പഞ്ചായത്ത് ഹാളില്‍ മെഗാ അദാലത്ത് നടത്തും.  

പൊതു വിദ്യാലയങ്ങളില്‍ ഭൗതിക സൗകര്യങ്ങള്‍ക്കൊപ്പം അക്കാദമിക് രംഗത്തും മുന്നേറാനാവണമെന്ന് വി.അബ്ദുറഹിമാന്‍ എം.എല്‍.എ. ഇക്കാര്യത്തില്‍ സ്‌കൂള്‍ പി.ടി.എ കള്‍ക്ക് കാര്യമായ ഇടപെടല്‍ നടത്താനാവുമെന്നും അദ്ദേഹം പറഞ്ഞു. സര്‍ക്കാറിന്റെ 1000 ദിനങ്ങളുടെ ആഘോഷ പരിപാടി 'മികവി'ന്റെ ഭാഗമായി ജില്ലാ ഇന്‍ഫര്‍മേഷന്‍ ഓഫീസിന്റെയും നാഷനല്‍ പാരന്റ്‌സ് അസോസിയേഷന്റെയും ആഭിമുഖ്യത്തില്‍  സംഘടിപ്പിച്ച പൊതു വിദ്യാഭ്യാസ സംരക്ഷണത്തില്‍ പി.ടി.എ കളുടെ പങ്ക് എന്ന സെമിനാര്‍  ഉദ്ഘാടനം ചെയ്യുകയായിരുന്നു എം.എല്‍.എ.

 രക്ത സമ്മര്‍ദവും ഷുഗറും പരിശോധിക്കാം സൗജന്യമായി. സംസ്ഥാന സര്‍ക്കാരിന്റെ ആയിരം ദിനാഘോഷങ്ങളുടെ ഭാഗമായി തിരൂര്‍ സാംസ്‌കാരിക സമുച്ചയത്തില്‍ നടത്തുന്ന 'മികവ്' പ്രദര്‍ശനത്തില്‍ ജില്ലാ ആരോഗ്യ വകുപ്പ് ഒരുക്കിയിരിക്കുന്ന സ്റ്റാളിലാണ് സൗജന്യ പരിശോധന ഒരുക്കിയിരിക്കുന്നത്. ബോഡി മാസ് ഇന്‍ഡക്‌സ് അറിയാനുള്ള സൗകര്യവും സ്റ്റാളിലുണ്ട്. ഒആര്‍എസ് ലായനി ഉണ്ടാക്കുന്നതിനാവശ്യമായ പൊടിയും സ്റ്റാളില്‍ ലഭിക്കും.

സംസ്ഥാന സര്‍ക്കാര്‍ 1000 ദിനങ്ങള്‍പൂര്‍ത്തിയാക്കുന്നതിന്റെ ഭാഗമായി തിരൂരില്‍ നടക്കുന്ന ജില്ലാതല പരിപാടികളില്‍ ഇന്ന് (ഫെബ്രുവരി 24 ഞായര്‍) വൈകിട്ട് നാലിന് പരിസ്ഥിതിയും പാര്‍പ്പിടവും കേരളാ പുനര്‍ നിര്‍മ്മിതിയില്‍ എന്ന വിഷയത്തില്‍ സെമിനാര്‍ നടക്കും. സെമിനാറില്‍ ഡി.ആര്‍.ഡി.എ പ്രൊജക്ട് ഓഫീസര്‍ പ്രീതി മേനോന്‍, കെ.ടി കുഞ്ഞിക്കണ്ണന്‍, എ. ശ്രീധരന്‍, ബീനാ സണ്ണി എന്നിവര്‍ പങ്കെടുക്കും.