ജില്ലാ പൊലീസ് പരാതി അതോറിറ്റി സിറ്റിംഗ് ഇന്ന്(ഒക്‌ടോബര്‍ 11) രാവിലെ 11 മണിക്ക് കലക്ടറേറ്റില്‍ നടക്കും.

     പാപ്പിനിശ്ശേരി ഇലക്ട്രിക്കല്‍ സെക്ഷന്‍ പരിധിയിലെ കച്ചേരിത്തറ, ഇരിണാവ് കൂര്‍മ്പക്കാവ്, സുനാമി കോളനി, മടക്കര, ഐക്കല്‍, കല്ലായിക്കല്‍, ഈന്തോട് ഭാഗങ്ങളില്‍ ഇന്ന്(ഒക്‌ടോബര്‍ 11) രാവിലെ ഒമ്പത് മുതല്‍ വൈകിട്ട് അഞ്ച് മണി വരെ വൈദ്യുതി മുടങ്ങും.
     താഴെ ചൊവ്വ ഇലക്ട്രിക്കല്‍ സെക്ഷന്‍ പരിധിയിലെ തെഴുക്കില്‍പീടിക, താഴെ ചൊവ്വ, കിഴക്കേകര, ബൈപാസ് റോഡ് ഭാഗങ്ങളില്‍ ഇന്ന്(ഒക്‌ടോബര്‍ 11) രാവിലെ ആറ് മുതല്‍ 11 മണി വരെയും കിഴുത്തള്ളി, ഓവുപാലം, കേരള വാട്ടര്‍ അതോറിറ്റി, കെ വി ആര്‍ ഭാഗങ്ങളില്‍ 11 മുതല്‍ വൈകിട്ട് അഞ്ച് മണി വരെയും വൈദ്യുതി മുടങ്ങും.

    കൈത്തറി വികസന വകുപ്പിന്റെ  കീഴില്‍  പ്രവര്‍ത്തിക്കുന്ന പ്രാഥമിക സഹകരണ സംഘങ്ങളിലെ സെക്രട്ടറിമാര്‍, ഹാന്റെക്‌സ്, ഹാന്റ്‌വീവ് തുടങ്ങിയ സ്ഥാപനങ്ങളിലെ ഉദ്യോഗസ്ഥര്‍ എന്നിവര്‍ക്കായി ജി.എസ്.ടി, ഷോറൂം മാനേജ്മെന്റ്, ഇ-ഗവേണന്‍സ്  എന്നീ  വിഷയങ്ങളില്‍ ഏകദിന പരിശീലന പരിപാടി സംഘടിപ്പിക്കുന്നു. വ്യവസായ വകുപ്പിന്റെ  കീഴില്‍  പ്രവര്‍ത്തിക്കുന്ന കേരള  ഇന്‍സ്റ്റിറ്റ്യൂട്ട്  ഫോര്‍  എന്റര്‍പ്രണര്‍ഷിപ്പ് ഡവലപ്‌മെന്റ് സംഘടിപ്പിക്കുന്ന  പരിശീലനം ഒക്‌ടോബര്‍ 11 ന് രാവിലെ 10  മുതല്‍ കണ്ണൂര്‍ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ്  ഹാന്റ്‌ലൂം ടെക്‌നോളജിയില്‍  നടക്കും.  ഫോണ്‍: 0484-2550322, 9447974031, 9539772373.

     ചരക്ക് സേവന നികുതി നിയമ പ്രകാരം സര്‍ക്കാര്‍, അര്‍ധ സര്‍ക്കാര്‍, തദ്ദേശസ്വ്യംഭരണ സ്ഥാപനങ്ങള്‍, പൊതുമേഖലാ സ്ഥാപനങ്ങള്‍ എന്നിവ ഉറവിടത്തില്‍ നിന്നും നികുതി കുറവ് ചെയ്യേണ്ടതുമായി ബന്ധപ്പെട്ട വ്യവസ്ഥകളെ കുറിച്ചുള്ള ബോധവല്‍ക്കരണ പരിശീലന ക്ലാസ് ഒക്‌ടോബര്‍ 12 ന് കണ്ണൂര്‍ ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടക്കും.

    കേരളാ തീരത്ത് വടക്ക് പടിഞ്ഞാറ് ദിശയില്‍ മണിക്കൂറില്‍ 35-50 കീലോമീറ്റര്‍ വേഗതയില്‍ കാറ്റ് വീശാനും കടല്‍ പ്രക്ഷുബ്ധമാകാനും സാധ്യതയുള്ളതിനാല്‍ മത്സ്യത്തൊഴിലാളികള്‍ അറബിക്കടലിന്റെ മധ്യ പടിഞ്ഞാറന്‍ തീരങ്ങളിലും വടക്കു പടിഞ്ഞാറന്‍ തീരങ്ങളിലും ഒക്‌ടോബര്‍ 13 വരെ മത്സ്യബന്ധനത്തിന്  പോകരുതെന്ന്  ഫിഷറീസ് കണ്‍ട്രോള്‍ റൂം  അറിയിച്ചു.

    ജനങ്ങളുടെ ആരോഗ്യ സുരക്ഷ ഉറപ്പുവരുത്തുന്നതിന് ആരോഗ്യ ഭവനം പദ്ധതിയുമായി തില്ലങ്കേരി ഗ്രാമ പഞ്ചായത്ത്. പദ്ധതിയുടെ ഉദ്ഘാടനം ഒക്ടോബര്‍ 16 ന് വൈകുന്നേരം മൂന്നു മണിക്ക് പി കെ ശ്രീമതി ടീച്ചര്‍ എം പി നിര്‍വഹിക്കും. മണ്ണിനെയും മരങ്ങളെയും സംരക്ഷിച്ചുകൊണ്ട് പകര്‍ച്ച വ്യാധികളില്‍ നിന്നും മറ്റ് ആരോഗ്യ പ്രശ്‌നങ്ങളില്‍ നിന്നും ജനങ്ങളെ സുരക്ഷിതരാക്കുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.

    കണ്ണൂര്‍ മാപ്പിളബേ ഫിഷറീസ് കോംപ്ലക്‌സില്‍ മത്സ്യത്തൊഴിലാളി പരിശീലന കേന്ദ്രം കെട്ടിട നിര്‍മ്മാണോദ്ഘാടനം ഒക്‌ടോബര്‍ 11ന് ഉച്ച രണ്ടിന് ഫിഷറീസ് വകുപ്പ് മന്ത്രി ജെ. മേഴ്‌സിക്കുട്ടിയമ്മ നിര്‍വഹിക്കും. പൊതുമുറി ബ്ലോക്കിന്റെ ഉദ്ഘാടനവും നടക്കും. തുറമുഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി അധ്യക്ഷത വഹിക്കും. കോര്‍പറേഷന്‍ മേയര്‍ ഇ.പി ലത, പി.കെ. ശ്രീമതി ടീച്ചര്‍ എം.പി, കണ്ണൂര്‍ ജില്ലാ പഞ്ചായത്ത് പ്രസിഡന്റ് കെ.വി. സുമേഷ്, കലക്ടര്‍ മീര്‍ മുഹമ്മദ് അലി തുടങ്ങിയവര്‍ സംസാരിക്കും.

    അനുഭവത്തില്‍ നിന്ന് പഠിക്കാന്‍ നമ്മള്‍ തയ്യാറായില്ലെങ്കില്‍ ദുരന്തങ്ങള്‍ ആവര്‍ത്തിക്കുമെന്ന് ജില്ലാ പഞ്ചായത്ത് പ്രസിഡന്റ് കെ വി സുമേഷ്. പ്രളയം നമുക്ക് കാണിച്ചു തന്ന യാഥാര്‍ത്ഥ്യങ്ങളോട് മുഖം തിരിച്ചിട്ട് കാര്യമില്ലെന്നും പ്രകൃതിദുരന്തം മൂലം കേരളത്തിലെ പരിസ്ഥിതി-ജൈവ--ആവാസവ്യവസ്ഥകള്‍ക്കുണ്ടായ ആഘാത പഠനത്തിനു മുന്നോടിയായി സംസ്ഥാന ജൈവവൈവിധ്യ ബോര്‍ഡിന്റെ നേതൃത്വത്തില്‍ നടത്തിയ ജില്ലാതല ശില്‍പ്പശാലയില്‍ അദ്ദേഹം പറഞ്ഞു. ജില്ലയില്‍ പ്രളയം ബാധിച്ച 12 പഞ്ചായത്തുകളിലാണ് പഠനം നടത്തുന്നത്.