ജില്ലാ എംപ്ളോയ്മെന്റ് എക്സ്ചേഞ്ചിന്റെ ഭാഗമായ എംപ്ലോയബിലിറ്റി സെന്ററിന്റെ ആഭിമുഖ്യത്തില്‍ പ്രമുഖ ധനകാര്യ സ്ഥാപനങ്ങളിലേക്ക് പ്രൊബേഷനറി മാനേജര്‍, ഫിനാന്‍ഷ്യല്‍ കണ്‍സല്‍ട്ടന്റ്, കസ്റ്റമര്‍ റിലേഷന്‍ഷിപ്പ് ഓഫീസര്‍, ലൈഫ്പ്ലാനര്‍, ടീം ലീഡര്‍ എന്നീ തസ്തികകളില്‍ എംപ്ലോയബിലിറ്റി സെന്ററില്‍ രജിസ്റ്റര്‍ ചെയ്തവര്‍ക്ക് കൂടിക്കാഴ്ച നടത്തുന്നു. താല്‍പ്പര്യമുള്ളവര്‍ ഒക്ടോബര്‍ 11ന് രാവിലെ 10 ന്  മലപ്പുറം എംപ്ലോയബിലിറ്റി സെന്ററില്‍ എത്തണം. യോഗ്യത എസ്.എസ്.എല്‍.സി, പ്ലസ്ടു, ഡിഗ്രി.

സംസ്ഥാനത്ത് പട്ടികവര്‍ഗ്ഗ വിഭാഗത്തില്‍പ്പെട്ട ഭൂരഹിത കുടുംബങ്ങള്‍ക്ക് വിതരണം ചെയ്യുന്നതിനായി ഭൂമി വില്‍ക്കുന്നതിന് തയ്യാറുള്ള ഭൂവുടമകളില്‍ നിന്നു നേരിട്ട് അപേക്ഷകള്‍ ക്ഷണിച്ചു. ആദിവാസി പുനരധിവാസ മിഷന്‍ ജില്ലാമിഷന്‍ ചെയര്‍മാന്‍ കൂടിയായ ജില്ലാകലക്ടര്‍ മുഖേന ഭൂമി വാങ്ങുന്നതിലേക്ക് പ്രസ്തുത ഭൂമിയുടെ ഉടമസ്ഥര്‍ തങ്ങളുടെ ഉടമസ്ഥതയിലുളള വാസയോഗ്യമായ ഭൂമി (കുടിവെള്ള ലഭ്യത, റോഡ്, വൈദ്യുതി തുടങ്ങയവയടക്കം യാതൊരുവിധ നിയമക്കുരുക്കുകളിലും ഉള്‍പ്പെടാത്ത, ബാധ്യതകളില്ലാത്ത വാസയോഗ്യമായ ഭൂമി) വില്‍ക്കുന്നതിന് തയ്യാറാണെന്ന സമ്മതപത്രം ഉള്‍പ്പെടെയാണ് കലക്ടര്‍ക്ക് അപേക്ഷ സമര്‍പ്പിക്കേണ്ടത്.

പ്രളയാന്തര കാര്‍ഷികമേഖലയുടെ പുനഃസൃഷ്ടിക്കായി കൃഷി വകുപ്പിന്റെ ആഭിമുഖ്യത്തില്‍ തിരൂര്‍ നഗരസഭയില്‍ കാര്‍ഷിക സെമിനാര്‍ സംഘടിപ്പിച്ചു. തിരൂര്‍ മുന്‍സിപ്പല്‍ ടൗണ്‍ ഹാളില്‍ നടന്ന സെമിനാര്‍ നഗരസഭ ചെയര്‍മാന്‍ കെ.ബാവ ഉദ്ഘാടനം ചെയ്തു. ശാസ്ത്രീയ രീതിയിലൂടെയുള്ള കൃഷിയിലൂടെ കാര്‍ഷിക മേഖലയുടെ പുനഃസൃഷ്ടിയും കര്‍ഷകരില്‍ കൂടുതല്‍ അവബോധമുണ്ടാക്കുന്നതും ലക്ഷ്യമിട്ടായിരുന്നു സെമിനാര്‍.

ഗാന്ധി ജയന്തിയോടനുബന്ധിച്ച്  ജില്ലാ ഇന്‍ഫര്‍മേഷന്‍ ഓഫീസും നെഹ്റു യുവ കേന്ദ്രയും ഗാന്ധി ദര്‍ശന്‍ സമിതിയും സംയുക്തമായി വിദ്യാര്‍ഥികള്‍ക്ക് വിവിധ രചനാ മത്സരങ്ങള്‍ നടത്തി.

       പട്ടികവര്‍ഗ്ഗ യുവജനങ്ങള്‍ക്കായി സില്‍ക്കിന്റെ സഹകരണത്തോടെ 3 മാസത്തെ സൗജന്യ കമ്പ്യൂട്ടര്‍ പരിശീലന പരിപാടി  തിരുവനന്തപുരം മണത്തലയില്‍ തുടങ്ങുന്നു.   ഐ.ടി. മേഖലയില്‍ തൊഴില്‍ സാധ്യതയുള്ള ഈ കോഴ്സിന് 1000 രൂപ പ്രതിമാസ സ്‌റ്റൈപ്പന്റ്,  താമസം, ഭക്ഷണം എന്നിവയും ലഭിക്കും.   എസ്.എസ്.എല്‍.സി/ +2/ഡിഗ്രി യോഗ്യതയുള്ളവര്‍ പ്രവേശനത്തിനുള്ള കൂടിക്കാഴ്ചക്കായി  ഒക്ടോബര്‍ 11ന് രാവിലെ 10 ന് നിലമ്പൂര്‍ ഐ.റ്റി.ഡി.പി. ഓഫീസില്‍ എത്തണം.

പൊന്നാനി താലൂക്കിലെ റേഷന്‍ കാര്‍ഡുടമകള്‍ക്ക്  സെപ്തംബര്‍ മാസത്തെ റേഷന്‍ വിഹിതം എന്‍.പി.എസ്, എന്‍.പി.എന്‍.എസ് (നീല, വെളള)  റേഷന്‍ കാര്‍ഡുടമകള്‍ക്ക് കാര്‍ഡൊന്നിന് 5 കിഗ്രാം വീതമുളള (കിലോഗ്രാമിന് 1 രൂപ നിരക്കില്‍) അരിയും  ഒക്ടോബര്‍ 10 വരെ ലഭിക്കുമെന്ന് താലൂക്ക് സപ്ലൈ ഓഫീസര്‍ അറിയിച്ചു.

    ഖാദി ഗ്രാമ വ്യവസായ ബോര്‍ഡിന്റെ സി.ബി.സി പദ്ധതി പ്രകാരം വായ്പ എടുത്ത് കുടിശ്ശികയായ കേസ്സുകളില്‍ ഒക്ടോബര്‍ 15 മുതല്‍ ആറ് മാസത്തേക്ക് പിഴ പലിശയില്ലാതെ കുടിശ്ശിക അടവാക്കാമെന്ന് പ്രൊജക്ട് ഓഫീസര്‍ അറിയിച്ചു.  ഫോണ്‍ 0483 2734807.

    കോട്ടപ്പടി മുനിസ്സിപ്പല്‍ ബസ്റ്റാന്റിലുള്ള ഖാദി ഗ്രാമ സൗഭാഗ്യയിലും ബോര്‍ഡിന്റെ മറ്റു ഖാദി ഷോറൂമുകളിലും ഖാദി തുണിത്തരങ്ങള്‍ക്ക് ഗാന്ധി ജയന്തി പ്രമാണിച്ച് ഒക്ടോബര്‍ 15 വരെ 30 ശതമാനം വരെ റിബേറ്റ് അനുവദിച്ചു.

    താനൂര്‍ ബ്ലോക്ക് പഞ്ചായത്തിലെ തുവ്വക്കാട് വാര്‍ഡില്‍ ഒക്ടോബര്‍ 11ന് ഉപതെരഞ്ഞെടുപ്പ് നടക്കുന്നതിനാല്‍  വളവനൂര്‍ ഗ്രാമ പഞ്ചായത്തിലെ കടുങ്ങല്ലൂര്‍, തുവ്വക്കാട്, പാറക്കല്ല്, കുറുങ്ങാട് ഗ്രാമ പഞ്ചായത്ത് വാര്‍ഡുകളിലെ സര്‍ക്കാര്‍ സ്ഥാപനങ്ങള്‍ക്കും വിദ്യാഭ്യാസ സ്ഥാപനങ്ങള്‍ക്കും ഒക്ടോബര്‍ 11നും പോളിങ് സ്റ്റേഷനുകളായ നൂറുല്‍ ഇസ്ലാം മദ്രസ, കരുവാത്തുകുന്ന് തലിം മുസ്ലീം ബിയാല്‍ മദ്രസ്സ, പറവന്നൂര്‍  ജി.എം.എല്‍.പി സ്‌കൂള്‍, ക•നം നോര്‍ത്ത് എ.എം.എല്‍.പി സ്‌കൂള്‍ എന്നീ വിദ്യാഭ്യാസ സ്ഥാപനങ്ങക്ക് ഒക്ടോബര്‍ 10, 11 തിയ്യതികളിലും ജില്ലാ കലക്ടര്‍ അവധി പ്രഖ്യാപ്പിച്ചു.

    താനൂര്‍ ബ്ലോക്ക് പഞ്ചായത്തിലെ തുവ്വക്കാട് വാര്‍ഡില്‍ ഒക്ടോബര്‍ 11ന് ഉപതെരഞ്ഞെടുപ്പ് നടക്കുന്നതിനാല്‍  വളവനൂര്‍ ഗ്രാമ പഞ്ചായത്തിലെ കടുങ്ങല്ലൂര്‍, തുവ്വക്കാട്, പാറക്കല്ല്, കുറുങ്ങാട് ഗ്രാമ പഞ്ചായത്ത് വാര്‍ഡുകളില്‍ ഒക്ടോബര്‍ ഒമ്പതിന് വൈകുന്നേരം അഞ്ച് മുതല്‍ ഒക്ടോബര്‍ 11ന് വൈകുന്നേരം അഞ്ച് വരെയും വോട്ടെണ്ണല്‍ ദിവസമായ ഒക്ടോബര്‍ 12നും മദ്യനിരോധനം ഏര്‍പ്പെടുത്തി ജില്ലാ കലക്ടര്‍ ഉത്തരവായി.