പാലക്കാട് കെല്‍ട്രോണ്‍ നോളജ് സെന്ററില്‍ സായാഹ്ന കോഴ്‌സുകളിലേക്ക് അപേക്ഷ ക്ഷണിച്ചു. ഗ്രാഫിക്‌സ്ആന്‍ഡ് വിഷ്വല്‍ എഫക്ട്‌സ്, പ്രൊഫഷനല്‍ ഡിപ്ലോമ ഇന്‍ ലോജിസ്റ്റിക്‌സ് ആന്‍ഡ് സപ്ലൈ ചെയിന്‍ മാനേജ്‌മെന്റ്, വേര്‍ഡ് പ്രൊസ്സസിങ് ആന്‍ഡ് ഡാറ്റ എന്‍ട്രി മുതലായ കോഴ്‌സുകളിലേക്ക് അപേക്ഷിക്കാം. അവസാന തീയതി നവംബര്‍ 15. ഫോണ്‍: 0491 2504599, 8590605273.

കൊല്ലങ്കോട് ബ്ലോക്ക് പഞ്ചായത്തിലെ വിവിധ റോഡുകള്‍ ഉദ്ഘാടനം ചെയ്തു. കൊല്ലങ്കോട് ബ്ലോക്ക് പഞ്ചായത്ത് പ്രസിഡന്റ് ആര്‍ ചിന്നക്കുട്ടന്‍ ഉദ്ഘാടനം നിര്‍വഹിച്ചു. കറുമണി റോഡ്, ചെട്ടിയത്ത്കുളമ്പ്, പുത്തന്‍കുളമ്പ് തുടങ്ങിയ റോഡുകളുടെ ഉദ്ഘാടനമാണ് നടന്നത്. പെരുവെമ്പ് ഗ്രാമപഞ്ചായത്തിലെ 2024 -25 സാമ്പത്തിക വര്‍ഷ പദ്ധതിയില്‍ ഉള്‍പ്പെടുത്തി 80,000 രൂപ ചെലവഴിച്ചാണ്  കറുമണി റോഡിന്റെ നിര്‍മ്മാണം പൂര്‍ത്തീകരിച്ചത്. പുതുനഗരം ഗ്രാമപഞ്ചായത്തിലെ 9,50,000 ചെലവഴിച്ചാണ്  പുത്തന്‍കുളമ്പ് റോഡിന്റെ നിര്‍മ്മാണം പൂര്‍ത്തീകരിച്ചത്.

വിജിലന്‍സ് ആന്റ് ആന്റി കറപ്ഷന്‍ ബ്യൂറോ പാലക്കാട് യുണിറ്റിന്റെ ആഭിമുഖ്യത്തില്‍ ബ്ലോക്ക് പഞ്ചായത്ത് ഹാളില്‍ നടന്ന ബോധവല്‍ക്കരണ ക്ലാസ് ബ്ലോക്ക് പഞ്ചായത്ത് പ്രസിഡന്റ് ശോഭന രാജേന്ദ്ര പ്രസാദ് ഉദ്ഘാടനം ചെയ്തു. വിജിലന്‍സ് ബോധവത്കരണ വാരാചരണത്തിന്റെ ഭാഗമായാണ് ക്ലാസ് സംഘടിപ്പിച്ചത്.

കൊടുവായൂര്‍ സാമൂഹികാരോഗ്യകേന്ദ്രത്തിലെ ബലക്ഷയമുള്ള ഇമ്മ്യൂണൈസേഷന്‍ കെട്ടിടം പൊളിച്ച് മാറ്റുന്നതിന് ലേലം ചെയ്യുന്നു. താല്‍പര്യമുള്ള വ്യക്തികള്‍ നവംബര്‍ 11ന് രാവിലെ 11 ന് ഓഫീസില്‍ നടത്തുന്ന ലേലത്തില്‍ മുദ്രവെച്ച കവറിലൂടെയോ, നേരിട്ടോ പങ്കെടുക്കാമെന്ന് സൂപ്രണ്ട് അറിയിച്ചു. നിരതദ്രവ്യം ആയിരം രൂപ. കൂടുതല്‍ വിവരങ്ങള്‍ക്ക് ഫോണ്‍: 04923 252930

കോങ്ങാട് ഗ്രാമപഞ്ചായത്തിന്റെ നേതൃത്വത്തില്‍ വയോജനങ്ങള്‍ക്കായി കട്ടിലുകള്‍ വിതരണം ചെയ്തു. ഗ്രാമപഞ്ചായത്ത് പ്രസിഡന്റ് ടി അജിത് ഉദ്ഘാടനം നിര്‍വഹിച്ചു. ഗ്രാമപഞ്ചായത്തിന്റെ 2025-26 വാര്‍ഷിക വികസന പദ്ധതിയില്‍ ഉള്‍പ്പെടുത്തി 165 വ്യക്തികള്‍ക്കാണ് കട്ടിലുകള്‍ വിതരണം ചെയ്തത്.

നവംബര്‍ മാസത്തിലെ ആലത്തൂര്‍ താലൂക്ക് വികസനസമിതി യോഗം നവംബര്‍ ഒന്നിന് രാവിലെ 10.30ന് ആലത്തൂര്‍ താലൂക്ക് ഓഫീസ് കോണ്‍ഫറന്‍സ് ഹാളില്‍ ചേരുമെന്ന് തഹസില്‍ദാര്‍ അറിയിച്ചു.

തച്ചമ്പാറ ഗ്രാമപഞ്ചായത്തിന്റെ നേതൃത്വത്തില്‍ പട്ടികജാതി വിദ്യാര്‍ഥികള്‍ക്കായി ഫര്‍ണിച്ചറുകള്‍ വിതരണം ചെയ്തു. ഗ്രാമപഞ്ചായത്ത് പ്രസിഡന്റ് നൗഷാദ് ബാബു പരിപാടി ഉദ്ഘാടനം നിര്‍വഹിച്ചു. ഗ്രാമപഞ്ചായത്തിന്റെ 2025-26 വാര്‍ഷിക വികസന പദ്ധതിയില്‍ ഉള്‍പ്പെടുത്തി പട്ടികജാതി വിദ്യാര്‍ഥികള്‍ക്ക് പഠനത്തിന് ആവശ്യമായ മേശയും കസേരകളുമാണ് വിതരണം ചെയ്തത്.