ലോക്‌സഭാ തെരഞ്ഞെടുപ്പുമായി ബന്ധപ്പെട്ട് ജില്ലാ ഭരണകൂടം നടത്തുന്ന ഹരിതതെരഞ്ഞെടുപ്പ് 2019ന്റെ ഭാഗമായി ശുചിത്വമിഷന്റെ നേതൃത്വത്തില്‍ ഹയര്‍ സെക്കന്‍ഡറി,  കോളജ് വിദ്യാര്‍ഥികള്‍ക്കായി 17ന് ഉച്ചയ്ക്ക് 12 മുതല്‍ വൈകിട്ട് നാല് വരെ കളക്ടറേറ്റില്‍  പെയിന്റിംഗ് മത്സരം നടത്തും. ക്യാന്‍വാസിലാണ് ചിത്രങ്ങള്‍ വരയ്‌ക്കേണ്ടത്. ഹരിതതെരഞ്ഞെടുപ്പുമായി ബന്ധപ്പെട്ട കാര്യങ്ങളാണ് വിഷയം.

ലോക്സഭാ തെരഞ്ഞെടുപ്പിനോടനുബന്ധിച്ച് ഓരോ നിയമസഭാ നിയോജകമണ്ഡലങ്ങളിലെയും  ബൂത്ത് അടിസ്ഥാനത്തിലുള്ള വോട്ടിംഗ് യന്ത്രങ്ങളുടെ തരംതിരിക്കല്‍ പൂര്‍ത്തിയായി.  രണ്ടാംഘട്ട കമ്പ്യൂട്ടര്‍വല്‍കൃത തരംതിരിക്കലാണ് ഇന്നലെ  പൂര്‍ത്തിയായത്. തെരഞ്ഞെടുപ്പ് പൊതുനിരീക്ഷകന്‍ സഹദേബ് ദാസ് ഐഎഎസ്, ജില്ലാ കളക്ടര്‍ പി ബി നൂഹ്, തിരുവല്ല സബ് കളക്ടര്‍ ഡോ വിനയ് ഗോയല്‍, ഇലക്ഷന്‍ ഡെപ്യൂട്ടി കളക്ടര്‍ എസ് സന്തോഷ് കുമാര്‍, രാഷ്ട്ടീയ പാര്‍ട്ടി പ്രതിനിധികള്‍ എന്നിവരുടെ സാന്നിധ്യത്തില്‍ കളക്ടറേറ്റിലാണ് തരംതിരിക്കല്‍ നടന്നത്. ഇവിഎം മാനേജ്‌മെന്റ് സിസ്റ്റം എന്ന സോഫ്റ്റ് വെയറിന്റെ സഹായത്തോടെയാണ് തരംതിരിക്കല്‍ നടത്തിയത്.

വരണാധികാരി (റിട്ടേണിംഗ് ഓഫീസര്‍)

തെരഞ്ഞെടുപ്പ് ജോലിയില്‍നിന്നും എങ്ങനെയും ഒഴിവാകാന്‍ ശ്രമിക്കുന്ന ജീവനക്കാരുണ്ട്. ചുമതലയില്‍നിന്നും ഒഴിവാകാന്‍ ശ്രമിക്കുമ്പോള്‍ ഓര്‍ക്കണം, തെരഞ്ഞെടുപ്പ് പ്രവര്‍ത്തനങ്ങളുമായി ബന്ധപ്പെട്ട് രാവും പകലുമില്ലാതെ ജോലിചെയ്യുന്ന കുറച്ചുപേരുണ്ടെന്ന്. എണ്ണയിട്ട യന്ത്രംപോലെ അവര്‍ പ്രവര്‍ത്തിക്കുകയാണ്. തെരഞ്ഞെടുപ്പ് അറിയിപ്പു പുറത്തുവന്ന മാര്‍ച്ച് 10ന് തുടങ്ങിയ ഈ കഠിനാധ്വാനം മെയ് 23 ഫലപ്രഖ്യാപനംവരെ നീണ്ടുനില്‍ക്കും. വോട്ടര്‍പട്ടികയില്‍ പേര് ചേര്‍പ്പിക്കല്‍ മുതല്‍ പുതിയ ലോക്‌സഭാംഗത്തെ പ്രഖ്യാപിക്കല്‍വരെ... ഒരുപാടുപേരുടെ ഉറക്കമില്ലാതുള്ള അധ്വാനമുണ്ട് ഇതിനുപിന്നില്‍.

ലോക്‌സഭാ തെരഞ്ഞെടുപ്പിനോട് അനുബന്ധിച്ച്് ജില്ലയിലെ അഞ്ച്് നിയമസഭാ മണ്ഡലങ്ങളിലായി ഒരുങ്ങുന്നത് 25 സ്ത്രീ- സൗഹൃദ പോളിംഗ് ബൂത്തുകള്‍. തിരുവല്ല, റാന്നി, ആറന്മുള, കോന്നി, അടൂര്‍ എന്നീ മണ്ഡലങ്ങളിലെ അഞ്ച്  പോളിംഗ് ബൂത്തുകള്‍ വീതമാണ്  സ്ത്രീ സൗഹൃദ പോളിംഗ് ബൂത്തുകളാക്കി മാറ്റിയിരിക്കുന്നത്. ഈ ബൂത്തുകളിലെ പോളിംഗ് ഉദ്യോഗസ്ഥരും സ്ത്രീകളാണ്.                     (ഇലക്ഷന്‍: 172/19)

പത്തനംതിട്ട ലോക്‌സഭാ മണ്ഡലത്തില്‍ ആകെ 1437 പോളിംഗ് ബൂത്തുകള്‍. ജില്ലയിലെ പോളിംഗ് ബൂത്തുകള്‍ 1077 ആണ്. 360 ബൂത്തുകള്‍ കാഞ്ഞിരപ്പള്ളി, പൂഞ്ഞാര്‍ നിയമസഭാ മണ്ഡലങ്ങളിലും. ആകെയുള്ളതില്‍ 171 ബൂത്തുകള്‍ പ്രശ്‌ന സാധ്യതയുള്ള ബൂത്തുകള്‍. കഴിഞ്ഞതവണത്തെക്കാള്‍ 20 ബൂത്തുകളുടെ വര്‍ധനവുണ്ട്. 11 മേഖലകളിലായി 22 വള്‍ണറബിള്‍ ബൂത്തുകളും മണ്ഡലത്തിലുണ്ട്. 

രാഷ്ട്രീയ പാര്‍ട്ടികളും സ്ഥാനാര്‍ഥികളും നടത്തുന്ന പ്രചാരണ പ്രവര്‍ത്തനങ്ങളില്‍ തെരഞ്ഞെടുപ്പ് പെരുമാറ്റച്ചട്ട ലംഘനം, പ്രചാരണ ചെലവ് എന്നിവ സംബന്ധിച്ച പരാതികള്‍  ടോള്‍ ഫ്രീ നമ്പറായ 04682-32094 2, 04682-320943,  എന്നിവയില്‍ വിളിച്ച് കളക്ടറേറ്റ് കണ്‍ട്രോള്‍ റൂമില്‍ അറിയിക്കാം. 24 മണിക്കൂറും ഈ ടോള്‍ ഫ്രീ നമ്പര്‍ പ്രവര്‍ത്തനസജ്ജമായിരിക്കും. തെരഞ്ഞെടുപ്പുമായി ബന്ധപ്പെട്ട സംശയങ്ങളും മാതൃകാ പെരുമാറ്റച്ചട്ടം സംബന്ധിച്ച് ശ്രദ്ധയില്‍ പെട്ടുന്ന പരാതികളും ഈ ട്രോള്‍ ഫ്രീ നമ്പരില്‍ അറിയിക്കാം. കൃത്യമായ മറുപടികളും പരിഹാരങ്ങളും കണ്‍ട്രോള്‍ റൂമില്‍ നിന്നും ലഭിക്കും.