ആര്‍ദ്രം പദ്ധതിയിലുള്‍പ്പെടുത്തി ചെക്യാട് പ്രാഥമികാരോഗ്യകേന്ദ്രത്തെ കുടുംബാരോഗ്യ കേന്ദമായി ഉയര്‍ത്തി.   പ്രഖ്യാപനം ആരോഗ്യ വകുപ്പ് മന്ത്രി കെ.കെ.ശൈലജ ടീച്ചര്‍  ഓണ്‍ലൈനില്‍ നിര്‍വ്വഹിച്ചു. ഇ.കെ.വിജയന്‍ എം.എല്‍.എ. അദ്ധ്യക്ഷത വഹിച്ചു. കുടുംബാരോഗ്യ കേന്ദ്രമായി മാറുന്നതോടെ മൂന്ന് ഡോക്ടര്‍മാരുടെ സേവനം ലഭിക്കും.  ലാബ് രാവിലെ 9 മണി മുതല്‍ വൈകുന്നേരം 6 മണി വരെ പ്രവര്‍ത്തിക്കും. എം.എല്‍.എ ഫണ്ടില്‍ നിന്ന് 40 ലക്ഷം രൂപ ചെലവില്‍ പുതിയ ബ്ലോക്ക് നിര്‍മ്മിച്ചിട്ടുണ്ട്.

രാമനാട്ടുകര നഗരസഭ പുതുതായി നിര്‍മ്മിക്കുന്ന കെട്ടിടത്തിന്റെ പ്രവൃത്തി ഉദ്ഘാടനം വീഡിയോ കോണ്‍ഫറന്‍സിലൂടെ തൊഴില്‍ വകുപ്പ് മന്ത്രി ടി പി രാമകൃഷ്ണന്‍ നിര്‍വഹിച്ചു. വി.കെ.സി മമ്മദ് കോയ എം.എല്‍.എ അധ്യക്ഷത വഹിച്ചു.രാമനാട്ടുകരയില്‍ ഒരു ഏക്കര്‍ രണ്ട് സെന്റ് സ്ഥലത്താണ് എല്ലാ സൗകര്യങ്ങളോടും കൂടിയ കെട്ടിടം നിര്‍മ്മിക്കുന്നത്. കിഫ് ബി 12 കോടി 40 ലക്ഷം രൂപ അനുവദിച്ചിട്ടുണ്ട്. 

കാരശ്ശേരി - ചെറുവാടി - കാവിലട റോഡില്‍ കോട്ടമുഴി പാലത്തിന്റെ പുനരുദ്ധാരണ പ്രവൃത്തി നടക്കുന്നതിനാല്‍ ഇന്ന് (നവംബര്‍ ആറ്) മുതല്‍ പ്രവൃത്തി തീരുന്നതു വരെ ഇതു വഴിയുളള വാഹന ഗതാഗതം നിരോധിച്ചു. ഇതു വഴി വരുന്ന വാഹനങ്ങള്‍ കാരക്കുറ്റി വഴിയും ചേന്ദമംഗലൂര്‍ വഴിയും കടന്നു പോകണമെന്ന് എക്സിക്യൂട്ടീവ് എഞ്ചിനീയര്‍ അറിയിച്ചു.

നെല്‍വയല്‍ സംരക്ഷണത്തിന്റെ ഭാഗമായി നെല്‍വയല്‍ ഉടമകള്‍ക്ക് കേരള സര്‍ക്കാര്‍ പ്രഖ്യാപിച്ച നെല്‍കൃഷി റോയല്‍റ്റി സാമ്പത്തിക ആനുകൂല്യത്തിന് ഓണ്‍ ലൈന്‍ വഴി അപേക്ഷ സമര്‍പ്പിക്കുന്നതിന്  ബാലുശ്ശേരി കൃഷിഭവന്‍ സൗജന്യ രജിസ്‌ടേഷന്‍ ക്യാമ്പ് സംഘടിപ്പിച്ചു.  ക്യാമ്പ് പഞ്ചായത്ത് പ്രസിഡന്റ്  രൂപലേഖ കൊമ്പിലാട് ഉദ്ഘാടനം ചെയ്തു. ക്യാമ്പില്‍ ഇന്നും  (നവംബര്‍ ആറ്) കര്‍ഷകര്‍ക്ക് അപേക്ഷ സമര്‍പ്പിക്കാം.

ഏഴംകുളം ഗ്രാമപഞ്ചായത്തിലെ വാര്‍ഡ് 7 (കുലശ്ശേരി കോളനി ഉള്‍പ്പെടുന്ന പ്രദേശം), കുന്നന്താനം ഗ്രാമപഞ്ചായത്തിലെ വാര്‍ഡ് 2 (മറ്റയ്ക്കാട്ടുകുഴി കോളനി, കനകകുന്ന് - പുളിന്താനം, മഠത്തിക്കാവ് ജംഗ്ഷന്‍ - കനകകുന്ന് പ്രദേശം) എന്നീ പ്രദേശങ്ങളെ നവംബര്‍ 6 മുതല്‍ കണ്ടെയ്ന്‍മെന്റ് സോണ്‍ നിയന്ത്രണത്തില്‍ നിന്നും ഒഴിവാക്കി ജില്ലാ കളക്ടര്‍ പി.ബി നൂഹ് ഉത്തരവ് പുറപ്പെടുവിച്ചു.

ഇരവിപേരൂര്‍ ഗ്രാമപഞ്ചായത്തിലെ വാര്‍ഡ് 3-ല്‍(വൈഎംസിഎ മുതല്‍ പൊടിപ്പാറ വട്ടക്കോട്ട ഭാഗം വരെ) നവംബര്‍ 05 മുതല്‍ 7 ദിവസത്തേക്ക് കണ്ടെയ്ന്‍മെന്റ് സോണ്‍ നിയന്ത്രണം.  രോഗം സ്ഥിരീകരിച്ചവരുടെ പ്രാഥമിക സമ്പര്‍ക്കപട്ടിക ഉയരുന്നതുകണക്കിലെടുത്ത് ജില്ലാ മെഡിക്കല്‍ ഓഫീസറുടെ (ആരോഗ്യം) ശുപാര്‍ശ പ്രകാരമാണ് പുതിയ കണ്ടെയ്ന്‍മെന്റ് സോണുകള്‍ ജില്ലാ കളക്ടര്‍ പി.ബി. നൂഹ് പ്രഖ്യാപിച്ചത്.

 ബേപ്പൂര്‍, നടുവട്ടത്തുളള കേരളസര്‍ക്കാര്‍ ക്ഷീര പരിശീലന കേന്ദ്രത്തില്‍  'ക്ഷീരകര്‍ഷക ക്ഷേമനിധി' എന്ന വിഷയത്തില്‍ നവംബര്‍ 10 ന്  വൈകീട്ട് 3.30 ന് ഓണ്‍ലൈന്‍ ക്ലാസ് സംഘടിപ്പിക്കും. താല്‍പ്പര്യമുള്ള ക്ഷീരകര്‍ഷകര്‍ dtckkdonlinetrg@gmail.com  ല്‍  ഇ-മെയില്‍ മുഖേന പേരും ഫോണ്‍ നമ്പറും നവംബര്‍ ഒന്‍പതിനകം  നല്‍കണമെന്ന് പ്രിന്‍സിപ്പാള്‍ അറിയിച്ചു. ഫോണ്‍  : 0495 2414579.

ആലപ്പുഴ: ആലപ്പുഴ നഗരത്തിലെ പ്രധാന റോഡുകൾ നവീകരിക്കുന്ന പദ്ധതിയായ സിറ്റി റോഡ് ഇമ്പ്രൂവ്മെന്റ് പ്രോജെക്ടിൽ ഉൾപ്പെടുത്തി 31.25കി.മീ. നീളമുള്ള 20 റോഡുകൾ പുനർനിർമിക്കുന്നതിനായി 55.21 കോടി രൂപയാണ് അനുവദിച്ചിരിക്കുന്നത്. ആലപ്പുഴ  മണ്ഡലത്തിലെ 5 റോഡുകളുടെ നിർമാണ ഉദ്ഘാടനം വൈകുന്നേരം 6 മണിക്ക് പൊതുമരാമത്തു വകുപ്പ് മന്ത്രി ജി സുധാകരൻ നിർവഹിക്കും. ധനമന്ത്രി ഡോ.ടി എം തോമസ് ഐസക് അധ്യക്ഷത വഹിക്കും. മുനിസിപ്പൽ ചെയർമാൻ ഇല്ലിക്കൽ കുഞ്ഞുമോൻ, എ എം ആരിഫ് എം പി,മത്സ്യഫെഡ് ചെയർമാൻ  പി പി ചിത്തരഞ്ജൻ എന്നിവർ മുഖ്യതിഥികളാകും.