ജില്ലയില്‍ ഭൂമിയുടെ ന്യായവില പുനര്‍നിര്‍ണയം മൂന്ന് മാസത്തിനകം പൂര്‍ത്തികരിക്കുമെന്ന് ജില്ലാ കലക്ടര്‍ അമിത് മീണ. ന്യായവില നിര്‍ണയവുമായി ബന്ധപ്പെട്ട് റവന്യൂ ജീവനക്കാര്‍ക്ക് നല്‍കിയ പരിശീലനം ഉദ്ഘാടനം ചെയ്യുകയായിരുന്നു അദ്ദേഹം. നവംബര്‍ ഒന്നിന് വിലനിര്‍ണയത്തിന് തുടക്കമാവും. മൂന്നു മാസംകൊണ്ട് വിവരശേഖരണം പൂര്‍ത്തിയാക്കി സമഗ്രമായ പുനര്‍നിര്‍ണയമാണ് ലക്ഷ്യമിടുന്നത്. റവന്യൂ, രജിസ്‌ട്രേഷന്‍, സര്‍വേ, നികുതി, തദ്ദേശ സ്ഥാപനങ്ങള്‍ തുടങ്ങിയ വകുപ്പുകളുടെ സഹകരണത്തോടെയാണ് പദ്ധതി യാഥാര്‍ഥ്യമാക്കുന്നത്.

കേരള ലളിതകലാ അക്കാദമിയുടെ കോഴിക്കോട് ആര്‍ട്ട് ഗ്യാലറിയില്‍ ഈ മാസം 13 മുതല്‍ 19 വരെ അണ്‍കണ്‍സീല്‍മെന്റ് എന്ന പേരില്‍ സംഘചിത്ര പ്രദര്‍ശനം നടത്തും. മനോജ് നാരായണന്‍, സാജു അയ്യംപിള്ളി, രഞ്ജിത് ലാല്‍, വേണു ആര്‍ എന്നിവര്‍ ചേര്‍ന്ന് നടത്തുന്ന പ്രദര്‍ശനത്തിന്റെ ഉദ്ഘാടനം 13 ന് വൈകീട്ട് 4 മണിക്ക് നോവലിസ്റ്റ് സുഭാഷ് ചന്ദ്രന്‍ ഉദ്ഘാടനം ചെയ്യും. സെക്രട്ടറി പൊന്ന്യം ചന്ദ്രന്‍ അധ്യക്ഷത വഹിക്കും.

ജില്ലയില്‍ എക്‌സൈസ് വകുപ്പില്‍ സിവില്‍ എക്‌സൈസ് ഓഫീസര്‍ എന്‍.സി.എ (ഒ,എക്‌സ്,ഹിന്ദുനാടാര്‍) കാറ്റഗറി നമ്പര്‍ 308/2016, 309/2016 തസ്തികകളുടെ തെരഞ്ഞെടുപ്പിനായി ചുരുക്കപ്പട്ടിക പ്രസിദ്ധീകരിച്ചു. പട്ടികയുടെ പകര്‍പ്പ് ഇന്‍ഫര്‍മേഷന്‍ സെന്ററില്‍ പരിശോധനയ്ക്ക് ലഭിക്കും. 

തോടന്നൂരിനെ സമ്പൂര്‍ണ ഹോംഷോപ്പ് ബ്ലോക്കായി പ്രഖ്യാപിക്കുന്നതിനുള്ള പ്രവര്‍ത്തനങ്ങള്‍ക്കു തുടക്കമായി.കോഴിക്കോടിനെ ആദ്യ സമ്പൂര്‍ണ ഹോംഷോപ്പ് ജില്ലയായി പ്രഖ്യാപിക്കുന്നതിന്റെ ഭാഗമായിട്ടാണ് പ്രവര്‍ത്തനങ്ങള്‍. പ്രാദേശികമായി നിര്‍മിക്കുന്ന കുടുംബശ്രി ഉത്പന്നങ്ങള്‍ക്ക് സുസ്ഥിരമായ പ്രാദേശിക വിപണി ഒരുക്കുന്നതിനുള്ള സ്ഥിരംസംവിധാനമാണ് ഹോംഷോപ്പ് പദ്ധതി. തോടന്നൂര്‍ ബ്ലോക്കില്‍ വിപണനരംഗത്തു മാത്രം എണ്‍പതോളം വനിതകള്‍ക്കു തൊഴില്‍ ലഭ്യമാക്കുകയാണ് ലക്ഷ്യം.

   
     ലോക മാനസികാരോഗ്യ ദിനത്തോടനുബന്ധിച്ച് കുതിരവട്ടം മാനസീകാരോഗ്യ കേന്ദ്രത്തില്‍ സെമിനാര്‍ സംഘടിപ്പിച്ചു. മാറുന്നലോകം യുവജനങ്ങളും മാനസീകാരോഗ്യവും എന്ന വിഷയത്തെ ആസ്പദമാക്കിയായിരുന്നു സെമിനാര്‍. ജില്ലാമെഡിക്കല്‍ ഓഫീസര്‍  വി ജയശ്രീ അധ്യക്ഷത വഹിച്ചു. സബ് ജഡ്ജ്  എംപി ജയരാജ്, ഡോ.കെ പി ബഷീര്‍, ഡോ.രവികുമാര്‍,ഡോ വി വി ആശ എന്നിവര്‍ പങ്കെടുത്തു. സെമിനാറില്‍ വിവിധ വിഷയങ്ങളെ അധികരിച്ച് ഡോ കെ.ശിവദാസന്‍, ഡോ.പിടി സതീഷ്, ഡോ.സി കെ ശ്രീപ്രിയ എന്നിവര്‍ ക്ലാസെടുത്തു.

ഭിന്നശേഷിക്കാര്‍ക്ക് നാഷണല്‍ ട്രസ്റ്റ് ലോക്കല്‍ ലെവല്‍ കമ്മിറ്റിയുടെ ഹിയറിംഗില്‍ 55 പേര്‍ക്ക്  നിയമാനുസൃത രക്ഷാകര്‍ത്താവിനെ നിയമിച്ച് ജില്ലാ കലക്ടര്‍ യു.വി ജോസ് ഉത്തരവായി. ബുദ്ധിമാന്ദ്യം, ഓട്ടിസം, സെറിബ്രല്‍ പാള്‍സി എന്നിവ ബാധിച്ചവരുടെ അപേക്ഷയിലാണ് ഹിയറിംഗ് നടത്തിയത്.   കലക്ട്രേറ്റ് കോണ്‍ഫറന്‍സ് ഹാളില്‍ നടന്ന ഹിയറിംഗില്‍  സാമൂഹ്യനീതി ഓഫീസര്‍ അനീറ്റ.എസ് ലിന്‍, ലോക്കല്‍ ലെവല്‍ കമ്മിറ്റി കണ്‍വീനര്‍ സിക്കന്തര്‍, കമ്മിറ്റി അംഗം ഡോ.പി.ഡി ബെന്നി, ജില്ലാ രജിസ്ട്രാര്‍ പി. വിലാസിനി, ഡോ.ലതിക വി.ആര്‍ തുടങ്ങിയവര്‍ അപേക്ഷകള്‍ പരിഗണിച്ചു. 

മലയോര ഹൈവേയുടെ കോഴിക്കോട് ജില്ലയിലെ പുതുക്കിയ അലൈന്‍മെന്റ് മന്ത്രിസഭായോഗം അംഗീകരിച്ചു. പുതുക്കിയ അലൈന്‍മെന്റ്: പാലുവായ് (ജില്ലാ അതിര്‍ത്തി) - വിലങ്ങാട് - കുന്നുകുളം - കായക്കൊടി - തൊട്ടില്‍പ്പാലം - മുള്ളന്‍കുന്നി - ചെമ്പനോട - പെരുവണ്ണാമൂഴി - ചക്കിട്ടപാറ - ചെംമ്പ്ര - കൂരാച്ചുണ്ട് - കല്ലാനോട് - തലയാട് - മലപ്പുറം - തൈയ്യംപാറ - തേവര്‍മല - കോഴഞ്ചേരി - മീന്‍മുട്ടി - നെല്ലിപ്പൊയില്‍ - പുല്ലൂരാംപാറ - പുന്നക്കല്‍ - കൂടരഞ്ഞി - കൂമ്പാറ - ആനക്കല്ലുംപാറ - താഴേ കക്കാട് - കക്കാടംപൊയില്‍ (ജില്ലാ അതിര്‍ത്തി).

      ജില്ലാ മെഡിക്കല്‍ ഓഫീസിന് (ആരോഗ്യം)  കീഴില്‍ മുക്തി മിഷന്‍-മെന്റെല്‍  ഹെല്‍ത്ത് പ്രോഗ്രാമിനു വേണ്ടി താല്‍ക്കാലികാടിസ്ഥാനത്തില്‍ സൈക്യാട്രിക്  സോഷ്യല്‍ വര്‍ക്കര്‍ തസ്തികയിലേക്ക് യോഗ്യരായ ഉദ്യോഗാര്‍ഥികളില്‍നിന്നും  അപേക്ഷ ക്ഷണിച്ചു. ഉദ്യോഗാര്‍ഥികള്‍ യോഗ്യതാ സര്‍ട്ടിഫിക്കറ്റിന്റെ അസ്സലും പകര്‍പ്പുകളും സഹിതം മെഡിക്കല്‍ ഓഫീസര്‍ (ആരോഗ്യം) മുമ്പാകെ ഇന്ന് രാവിലെ (ഒക്‌ടോബര്‍ 11) 10 മണിക്ക് എത്തണം.