ഇടുക്കി ഗവ. മെഡിക്കല്‍ കോളേജ് ആശുപത്രിയില്‍ (ജില്ലാ ആശുപത്രി) സിസിടിവി സ്ഥാപിക്കുന്നതിന് അംഗീകൃത സ്ഥാപനങ്ങളില്‍ നിന്ന് ക്വട്ടേഷന്‍ ക്ഷണിച്ചു. ഇടുക്കി ജില്ലക്കാര്‍ മാത്രം ക്വട്ടേഷന്‍ സമര്‍പ്പിച്ചാല്‍ മതിയാകും. സൂപ്രണ്ടിന് ക്വട്ടേഷന്‍ ജൂണ്‍ നാലിനകം ലഭിക്കണം. കൂടുതല്‍ വിവരങ്ങള്‍ക്ക് ഫോണ്‍ 04862 232474. 

കട്ടപ്പന ഗവ. ഐ.ടി.ഐയുടെ കീഴിലുള്ള വിവിധ സ്ഥാപനങ്ങളില്‍ അപ്രന്റീസ് പരിശീലനം നടത്തി 1988 മുതല്‍ മെയ് 2018 വരെയുള്ള അഖിലേന്ത്യാ അപ്രന്റീസ്ഷിപ്പ് പരീക്ഷകള്‍ വിജയിച്ച ട്രെയിനികളില്‍ പ്രൊവിഷണല്‍  നാഷണല്‍ അപ്രന്റീസ്ഷിപ്പ് സര്‍ട്ടിഫിക്കറ്റ്, നാഷണല്‍ അപ്രന്റീസ്ഷിപ്പ് സര്‍ട്ടിഫിക്കറ്റ് എന്നിവ കൈപ്പറ്റാത്ത ട്രെയിനികള്‍ ജൂണ്‍ 15നകം ഹാള്‍ ടിക്കറ്റ്, തിരിച്ചറിയല്‍ രേഖകള്‍ എന്നിവ ഹാജരാക്കി സര്‍ട്ടിഫിക്കറ്റുകള്‍ കൈപ്പറ്റണം. ഫോണ്‍ 04868 272216, 9495525811.
 

  ലോക ഭക്ഷ്യസുരക്ഷാ വാരാചരണത്തോടനുബന്ധിച്ചു വിദ്യാര്‍ഥികള്‍ക്കായി ക്വിസ് മത്സരം മേയ് 29 ന്  ചെറുതോണി പോലീസ് അസോസ്സിയേഷന്‍ ഹാളില്‍ രാവിലെ പത്തിനു നടത്തും. മത്സര വിജയികള്‍ക്ക് സംസ്ഥാനതലത്തില്‍ പങ്കെടുക്കാന്‍ അവസരം ലഭിക്കും. ജില്ലാതലം ഒന്നാംസമ്മാനം 5000 രൂപ, രണ്ടാംസമ്മാനം 2000 രൂപ, മൂന്നാംസമ്മാനം 1500 രൂപ എന്നിങ്ങനെയും സംസ്ഥാനതലത്തില്‍ ഇത് യഥാക്രമം 25000, 20000, 15000  എന്നിങ്ങനെയുമാണ്. 

സംസ്ഥാന മനുഷ്യാവകാശ കമ്മീഷനു ലഭിച്ച പരാതികളില്‍ തീര്‍പ്പുണ്ടാക്കുന്നതിന് മൂന്നാറില്‍ പ്രത്യേക സിറ്റിംഗ് സംഘടിപ്പിച്ചു. മൂന്നാര്‍ ഗവണ്‍മെന്റ് ഗസ്റ്റ്ഹൗസില്‍ നടത്തിയ സിറ്റിംഗില്‍ സംസ്ഥാന മനുഷ്യാവകാശ കമ്മീഷന്‍ ചെയര്‍മാന്‍ ജസ്റ്റിസ് ആന്റണി ഡൊമനിക് പരാതികള്‍ പരിഗണിച്ചു. 35 കേസുകള്‍ പരിഗണിച്ചു. ഇതില്‍ 18 പരാതികളിലാണ് ഇരുകക്ഷികളും ഹാജരായത്. 16 പരാതികളില്‍ കമ്മീഷന്‍ പരിഹാരമാര്‍ഗം നിര്‍ദ്ദേശിച്ചു.ബാക്കിയുള്ള കേസുകള്‍ അടുത്ത ഹിയറിംഗില്‍ പരിശോധിക്കും.

കുമളി ഗ്രാമപഞ്ചായത്ത് വിധവ സൗഹൃദ പഞ്ചായത്തായി പ്രഖ്യാപിച്ചു. കുമളി ഗവ. ഹയര്‍ സെക്കണ്ടറി സ്‌കൂള്‍ അങ്കണത്തില്‍ നടന്ന ചടങ്ങില്‍ ഹൈക്കോടതി ജഡ്ജി ജസ്റ്റിസ് ദേവന്‍ രാമചന്ദ്രന്‍ പദ്ധതിയുടെ പ്രഖ്യാപനം നടത്തി. ജില്ലാ ലീഗ് ലീഗല്‍ സര്‍വീസ് അതോറിറ്റിയും വിധവ സെല്ലും ചേര്‍ന്ന് നടപ്പാക്കുന്ന വിധവ സൗഹൃദ ജില്ല പദ്ധതിയുടെ സമര്‍പ്പണവും മെഡിക്കല്‍ ക്യാമ്പും ചടങ്ങിന്റെ ഭാഗമായി നടന്നു. 1904 വിധവകളാണ് കുമളി പഞ്ചായത്തിലുള്ളത്. വിധവാ സൗഹൃദ പഞ്ചായത്ത് ആയതോടെ കേന്ദ്ര, സംസ്ഥാന സര്‍ക്കാരിന്റെ വിവിധ ആനുകൂല്യങ്ങള്‍ നേടാനാകും.

ഭക്ഷ്യസുരക്ഷാ വാരാചരണത്തിന്റെ ഭാഗമായി ജൂണ്‍ ഒന്ന് മുതല്‍ ഏഴ് വരെ ഭക്ഷ്യ സുരക്ഷയെക്കുറിച്ചും ശുചിയായ പാചകരീതിയെക്കുറിച്ചും വൈവിദ്ധ്യമാര്‍ന്ന രീതിയില്‍ ജില്ലയിലുടനീളം ബോധവല്‍ക്കരണ പരിപാടികള്‍ സംഘടിപ്പിക്കും. ജില്ലാ കളക്ടര്‍ എച്ച്. ദിനേശന്റെ  അദ്ധ്യക്ഷതയില്‍  കളക്ട്രേറ്റില്‍ ഇത് സംബന്ധിച്ച് യോഗം  നടത്തി.  യു.എന്‍ ജനറല്‍ അസംബ്ലിയുടെ തീരുമാനപ്രകാരം ജൂണ്‍ 7 ഭക്ഷ്യസുരക്ഷാ ദിനമായി ആചരിക്കുന്നതിന്റെ ഭാഗമായാണ് വിപുലമായ പരിപാടികള്‍ ജില്ലാ ഭരണകൂടം ഒരുക്കുന്നത്.

ഭാരതീയ ചികിത്സാ വകുപ്പിന് കീഴില്‍ ഇടുക്കി ജില്ലയിലെ വിവിധ ആയുര്‍വ്വേദ സ്ഥാപനങ്ങളില്‍ ഒഴിവുള്ള മെഡിക്കല്‍ ഓഫീസര്‍, ഫാര്‍മസിസ്റ്റ് തസ്തികകളില്‍ പ്രതിദിന വേതന വ്യവസ്ഥയില്‍ താല്‍ക്കാലിക നിയമനം നടത്തുന്നതിന് മെയ് 30ന് രാവിലെ 10.30ന് കുയിലിമല സിവില്‍ സ്റ്റേഷനില്‍ പ്രവര്‍ത്തിക്കുന്ന ആയുര്‍വ്വേദ ജില്ലാ മെഡിക്കല്‍ ഓഫീസില്‍ വാക്ക് ഇന്‍ ഇന്റര്‍വ്യൂ നടത്തും.  വിദ്യാഭ്യാസ യോഗ്യത, പ്രായം, ജാതി/ മതം എന്നിവ തെളിയിക്കുന്നതിനുള്ള അസ്സല്‍ രേഖകളും പകര്‍പ്പും സഹിതം നേരിട്ട് ജില്ലാ മെഡിക്കല്‍ ഓഫീസില്‍ ഹാജരാകണം. കൂടുതല്‍ വിവരങ്ങള്‍ക്ക് ഫോണ്‍ 04862 232318.