സംസ്ഥാന സര്‍ക്കാരിന്റെ 1000 ദിനാഘോഷത്തോടനുബന്ധിച്ച്‌ കുട്ടനെല്ലൂര്‍ ഗവ. കോളേജില്‍ ഫെബ്രുവരി 25 മുതല്‍ 27 വരെ അതിജീവനം ഡോക്യുമെന്ററി ഫെസ്റ്റ്‌ നടത്തും. ഇന്‍ഫര്‍മേഷന്‍ പബ്ലിക്‌ റിലേഷന്‍സ്‌ വകുപ്പ്‌, ജില്ലാ ഭരണകൂടം, ലൈബ്രറി കൗണ്‍സില്‍, സി. അച്യുതമേനോന്‍ ഗവ. കോളേജ്‌, ചേതന മീഡിയ ഇന്‍സ്‌റ്റിറ്റിയൂട്ട, നവചിത്ര ഫിലിം സൊസൈറ്റി എന്നിവയുടെ ആഭിമുഖ്യത്തിലാണ്‌ ഡോക്യുമെന്ററി ഫെസ്റ്റ്‌ സംഘടിപ്പിക്കുന്നത്‌. 25 ന്‌ രാവിലെ 10 ന്‌ കോളേജ്‌ സെമിനാര്‍ ഹാളില്‍ മേയര്‍ അജിത വിജയന്‍ ഉദ്‌ഘാടനം ചെയ്യും. കൗണ്‍സിലര്‍ എം.എന്‍. ശശിധരന്‍ അധ്യക്ഷത വഹിക്കും.

പെരിങ്ങോട്ടുകര ശ്രീ. സോമശേഖര ക്ഷേത്രത്തിലെ പൂരാഘോഷത്തോടനുബന്ധിച്ച്‌ തെക്ക്‌ വിഭാഗത്തിന്റെ വെടിക്കെട്ട്‌ പൊതുപ്രദര്‍ശനത്തിന്‌ അനുമതിയില്ലെന്ന്‌ ജില്ലാ കളക്‌ടര്‍ അറിയിച്ചു. അപേക്ഷയനുസരിച്ചുളള അവശ്യവിവരങ്ങല്‍ നല്‍കാന്‍ അപേക്ഷകന്‌ കഴിയാത്തതിനെ തുടര്‍ന്നാണ്‌ അപേക്ഷ നിരസിച്ചത്‌. നിയമാനുസൃത അനുമതിയില്ലാത്ത വെടിക്കെട്ട്‌ നടത്തുന്നത്‌ നിരോധിതവും ശിക്ഷാര്‍ഹവുമാണ്‌. വെടിക്കെട്ട്‌ പൊതുപ്രദര്‍ശനം നടക്കാതെ നോക്കാന്‍ നടപടിയെടുക്കണമെന്നും റൂറല്‍ ജില്ലാ പോലീസ്‌ മേധാവിക്ക്‌ ജില്ലാ കളക്‌ടര്‍ നിര്‍ദ്ദേശം നല്‍കി.

സംസ്ഥാന സര്‍ക്കാരിന്റെ ആയിരം ദിന കര്‍മ്മ പരിപാടികളുടെ ഭാഗമായി വെള്ളാങ്കല്ലൂര്‍ ബ്ലോക്ക്‌ പഞ്ചായത്തിനു കീഴിലെ പൂമംഗലം മാരാത്ത്‌ കോളനിയില്‍ പട്ടികജാതി പട്ടികവര്‍ക്ഷ വിഭാഗത്തില്‍ പെട്ടവര്‍ക്കായി വിജ്ഞാനവാടി പ്രവര്‍ത്തനമാരംഭിക്കുന്നു. സംസ്ഥാന പട്ടികജാതി വകുപ്പാണ്‌ പോലീസ്‌ കണ്‍സ്‌ട്രക്ഷന്‍ കോര്‍പ്പറേഷന്‍ വഴി വിജ്ഞാനവാടിക്ക്‌ തുടക്കമിടുന്നത്‌. പട്ടികജാതി വിഭാഗത്തില്‍പ്പെട്ട വിദ്യാര്‍ത്ഥികളുടെയും യുവജനങ്ങളുടെയും വിദ്യാഭ്യാസ വൈജ്ഞാനിക മേഖലയിലെ മുന്നേറ്റമാണ്‌ ഇതുകൊണ്ട്‌ ലക്ഷ്യമിടുന്നത്‌.

ജില്ലയില്‍ കുടിവെള്ളക്ഷാമം പരിഹരിക്കാന്‍ സംവിധാനങ്ങള്‍ ഏര്‍പ്പെടുത്താന്‍ ജില്ലാ വികസന സമിതിയില്‍ തീരുമാനം. വേനല്‍ ശക്തമാകുന്നതോടെ വിവിധ പഞ്ചായത്തുകളില്‍ കുടിവെള്ള ക്ഷാമം ഉണ്ടായേക്കാവുന്ന സന്ദര്‍ഭങ്ങള്‍ റിപ്പോര്‍ട്ട്‌ ചെയ്യണമെന്ന്‌ ജില്ലാകളക്ടര്‍ ടി.വി. അനുപമ ഉദ്യോഗസ്ഥരോട്‌ നിര്‍ദ്ദേശിച്ചു. കുടിവെള്ള ക്ഷാമം പരിഹരിക്കുന്നതുമായി ബന്ധപ്പെട്ട്‌ അതത്‌ താലൂക്ക്‌ ഓഫീസുകളിലെ ഉദ്യോസ്ഥര്‍ സ്ഥലത്തെത്തി പരിശോധിക്കണം. കുടിവെള്ളത്തിന്റെ അളവ്‌ പരിശോധിക്കുന്ന ഗ്രൗണ്ട്‌ വാട്ടര്‍ ലെവല്‍ മോണിറ്ററിങ്‌ ആരംഭിച്ചിട്ടുണ്ട്‌. ഇതിലൂടെ ഏതൊക്കെ പ്രദേശങ്ങളില്‍ കുടിവെള്ളക്ഷാമം രൂക്ഷമാകുമെന്നു കണ്ടെത്താന്‍ കഴിയും.

സംസ്ഥാനമന്ത്രിസഭയുടെ ആയിരം ദിനാഘോഷ പരിപാടിയുടെ ഭാഗമായി 'നവകേരളം നിർമിതിയിലെ നവീന സാങ്കേതിക വിദ്യകൾ' എന്ന വിഷയത്തിൽ നടത്തുന്ന സെമിനാർ നാളെ (ഫെബ്രുവരി 25) രാവിലെ 10 മണിക്ക് ജില്ലാ ആസൂത്രണസമിതി ഹാളിൽ പി കെ ശ്രീമതി ടീച്ചർ എം പി ഉദ്ഘാടനം ചെയ്യും. ജെയിംസ് മാത്യു എം എൽ എ അധ്യക്ഷനായിരിക്കും. ഊരാളുങ്കൽ ലേബർ കോൺട്രാക്ട് സൊസൈറ്റി പ്രസിഡന്റ് പാലേരി രമേശൻ മുഖ്യാതിഥിയാവും. ചെന്നൈ ഐ.ഐ.ടിയിലെ ഷിന്റോ പോൾ സെമിനാർ വിഷയാവതരണം നടത്തും. ടൗൺ സ്‌ക്വയറിൽ വൈകിട്ട് ആറ് മണിക്ക് ടി.പി വിവേക് അവതരിപ്പിക്കുന്ന സ്‌നേഹ ഗീതങ്ങളും ഏഴ് മണിക്ക് കോഴിക്കോട് നവചേതനയുടെ നയാപൈസ നാടകവും അരങ്ങേറും.

പൊതു-സ്വകാര്യ പങ്കാളിത്തത്തിന് വിശാലമായ കാഴ്ചപ്പാടാണ് സർക്കാറിനെന്ന് വ്യവസായ വകുപ്പ് മന്ത്രി ഇ.പി ജയരാജൻ പറഞ്ഞു. ജില്ലാ വ്യവസായ കേന്ദ്രം കണ്ണൂരിൽ സംഘടിപ്പിച്ച ജില്ലാതല വ്യവസായ നിക്ഷേപക സംഗമം  ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.  

എല്ലാം പൊതുമേഖലയിൽ വരണമെന്ന കാഴ്ചപ്പാട് സർക്കാറിനില്ല. നിക്ഷേപകർ സ്വന്തമായി വ്യവസായം തുടങ്ങുന്നുവെങ്കിൽ അതിനെ പ്രോത്സാഹിപ്പിക്കും. പൊതു സ്വകാര്യ പങ്കാളിത്തത്തേയും പ്രോൽസാഹിപ്പിക്കും. 

ടൂറിസം രംഗത്ത് ഉത്തരമലബാറിനെ സംബന്ധിച്ചിടത്തോളം വൻകുതിപ്പ് അനുഭവപ്പെട്ട നാളുകളായിരുന്നു കഴിഞ്ഞ 1000 ദിനങ്ങളെന്ന് ടൂറിസം വകുപ്പ് മന്ത്രി കടകംപള്ളി സുരേന്ദ്രൻ. സംസ്ഥാന മന്ത്രിസഭയുടെ ആയിരം ദിനാഘോഷങ്ങളുടെ ഭാഗമായി ജില്ലാ ഇൻഫർമേഷൻ ഓഫീസ് ഡി.ടി.പി.സിയും ജില്ലാ ലൈബ്രറി കൗൺസിലുമായി ചേർന്ന് വിനോദസഞ്ചാര മേഖല- കണ്ണൂരിന്റെ പുതിയ സാധ്യതകൾ എന്ന വിഷയത്തിൽ സംഘടിപ്പിച്ച സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 

വ്യവസായം തുടങ്ങുന്നതിനുള്ള അപേക്ഷകളിൽ 30 ദിവസത്തിനകം തീരുമാനം ഉണ്ടാകുമെന്ന് വ്യവസായ, കായിക വകുപ്പ് മന്ത്രി ഇ.പി. ജയരാജൻ കണ്ണൂർ ഗസ്റ്റ് ഹൗസിൽ വാർത്താസമ്മേളനത്തിൽ പറഞ്ഞു. വ്യവസായം തുടങ്ങുന്നതിനുള്ള ലൈസൻസുകളും അനുമതികളും വേഗത്തിൽ ലഭ്യമാക്കാൻ കെ-സ്വിഫ്റ്റ് എന്ന പേരിൽ ഓൺലൈൻ ക്ലിയറൻസ് സംവിധാനം സർക്കാർ കൊണ്ടുവന്നു. വ്യവസായം തുടങ്ങാൻ വിവിധ വകുപ്പുകളിൽനിന്നുള്ള അനുമതിക്ക് ഒരു ഏകീകൃത അപേക്ഷാഫോറം കെ-സ്വിഫ്റ്റിന്റെ ഭാഗമാണ്. 14 വകുപ്പുകളിലൂടെയുള്ള 29 സേവനങ്ങൾ കെ-സ്വിഫ്റ്റിലൂടെ ലഭ്യമാക്കും. മതിയായ അപേക്ഷകൾ സമർപ്പിച്ചിട്ടും അനുമതി ലഭിച്ചില്ലെങ്കിൽ കൽപിത അനുമതി ലഭിക്കുമെന്നും മന്ത്രി പറഞ്ഞു.

ജി.സി.സി രാജ്യങ്ങളിലേക്കുള്ള നഴ്‌സിംഗ് റിക്രൂട്ട്‌മെന്റ് വിപുലീകരിക്കുന്നതിന്റെ ഭാഗമായി നോർക്ക റൂട്ട്‌സ് വിദേശ റിക്രൂട്ട്‌മെന്റ് വിഭാഗം മുഖേന ദ്വൈവാര റിക്രൂട്ട്‌മെന്റ് ആരംഭിച്ചു.  നോർക്ക റൂട്ട്‌സ് ചീഫ് എക്‌സിക്യൂട്ടീവ് ഓഫീസർ കെ. ഹരികൃഷ്ണൻ നമ്പൂതിരി ആദ്യ എക്‌സ്പ്രസ്സ് റിക്രൂട്ട്്‌മെന്റ് സേവനത്തിന്റെ ഉദ്ഘാടനം  നിർവ്വഹിച്ചു.