അറക്കുളം ഗ്രാമപഞ്ചായത്തില്‍ ഗവ. ഐ.ടി.ഐ നാടുകാണിയിലെ സ്റ്റാഫ് ക്വാര്‍ട്ടേഴ്‌സ് കെട്ടിടം പൊളിച്ചുമാറ്റി വച്ചിരിക്കുന്ന സാധനങ്ങള്‍ 26ന് രാവിലെ 11 മണിക്ക് ലേലം ചെയ്യുന്നു.  ക്വട്ടേഷനുകള്‍ 25 വരെ സ്വീകരിക്കും. വിവരങ്ങള്‍ക്ക് 04862 222399.

ആനയിറങ്കല്‍ ജലസംഭരണിയില്‍ നിന്നും 11 ക്യുമെക്‌സ് ജലം റിവര്‍സ്ലുയിസ് തുറന്ന് 25ന് രാവിലെ 11 മുതല്‍ പന്നിയാര്‍ പുഴയിലൂടെ ഒഴുക്കി പൊന്‍മുടി ജലസംഭരണിയില്‍ എത്തിക്കുമെന്നും ജലം തുറന്നുവിടുമ്പോള്‍ പന്നിയാര്‍ പുഴയുടെ ഇരുകരകളിലും താമസിക്കുന്നവര്‍ക്ക് അതീവ ജാഗ്രതാ നിര്‍ദ്ദേം നല്‍കുന്നതായും ബന്ധപ്പെട്ട ഉദ്യോഗസ്ഥര്‍ ഇതിനാവശ്യമായ മുന്‍കരുതല്‍ നടപടികള്‍ സ്വീകരിക്കണമെന്നും ജില്ലാ ദുരന്തനിവാരണ അതോറിറ്റി ചെയര്‍മാന്‍ കൂടിയായ ജില്ലാകലക്ടര്‍ അറിയിച്ചു.

ലൈഫ്മിഷന്‍ പദ്ധതിയുടെ മൂന്നാംഘട്ടത്തില്‍ ഭൂരഹിത ഭവനരഹിതര്‍ക്ക് നല്‍കുന്നതിനായി ഏറ്റെടുത്ത അടിമാലി ഗ്രാമപഞ്ചായത്തിലെ മച്ചിപ്ലാവില്‍ തൊഴില്‍ വകുപ്പിന് കീഴിലുള്ള 217 ഫ്‌ളാറ്റുകള്‍ ഉള്‍ക്കൊള്ളുന്ന ഭവന സമുച്ചയത്തിന്റെ ഉദ്ഘാടനം 25ന് വൈകിട്ട് അഞ്ചിന് അടിമാലി ഗ്രാമപഞ്ചായത്ത് ഓഫീസിന് മുന്നില്‍ തദ്ദേശസ്വയംഭരണ വകുപ്പ് മന്ത്രി എ.സി. മൊയ്തീന്‍ ഉദ്ഘാടനം നിര്‍വ്വഹിക്കും. എസ്. രാജേന്ദ്രന്‍ എംഎല്‍.എ അധ്യക്ഷനായിരിക്കും. 

ദിവസ വേതനാടിസ്ഥാനത്തില്‍ ഹോമിയോ മെഡിക്കല്‍ ഓഫീസര്‍ തസ്തികയിലേക്ക് 28ന് നടത്താന്‍ നിശ്ചയിച്ചിരുന്ന വാക്ക് ഇന്‍ ഇന്റര്‍വ്യൂ മാറ്റിവച്ചതായി ഡി.എം.ഒ അറിയിച്ചു. 

 കോടതി കേസുകളുടെ പുരോഗതി വിലയിരുത്തുന്നതിനായുള്ള സ്യൂട്ട് യോഗം ഇന്ന് (ഫെ.23) 2.30ന് കലക്ടറേറ്റ് കോണ്‍ഫറന്‍സ് ഹാളില്‍ നടക്കും. യോഗത്തില്‍ ജില്ലാ എംപവേര്‍ഡ് കമ്മിറ്റി മീറ്റിംഗ്, എല്‍.എ.ആര്‍ കേസുകളുടെ അവലോകനം എന്നിവയും നടക്കും. 

ഇടുക്കി ജില്ലയിലെ പ്രധാന അന്തര്‍ സംസ്ഥാന പാതയുടെ ഭാഗമായ മൂന്നാര്‍ -മറയൂര്‍ റബറൈസ്ഡ് റോഡ് ഉദ്ഘാടനം ആഹ്‌ളാദവും ആവേശവും നിറഞ്ഞ അന്തരീക്ഷത്തില്‍ മറയൂരില്‍ അഡ്വ. ജോയിസ് ജോര്‍ജ്ജ് എം പി നിര്‍വഹിച്ചു. എസ് രാജേന്ദ്രന്‍ എം എല്‍ എ അധ്യക്ഷനായിരുന്നു. മൂന്നാര്‍ മുതല്‍ മറയൂര്‍ വരെ നാല്‍പത് കിലോമീറ്റര്‍ നീളത്തില്‍ നിലവിലുള്ള റോഡ് റബറൈസ്ഡ് ചെയ്യുന്നതിനായി ശബരി മല ഉത്സവഫണ്ടില്‍ നിന്നും ഇരുപത് കോടി രൂപയാണ് സംസ്ഥാന സര്‍ക്കാര്‍ അനുവദിച്ചിരിക്കുന്നത്.